Ndabalwa mu Nzinda wa Quebec, provinsya inalongwa Cifransa. Anyakubalanga Louis na Zélia, andikuza mwaufuni kakamwe. Pai wanga akhali wakupfulika, pontho akhakomerwa na kuleri. Ndikhakomerwa kakamwe na kulemba, pontho ndikhafuna kukhala jornalista.

Pikhali ine cifupi na pyaka 12, Rodolphe Soucy wakuti akhaphata basa pabodzi na baba, abwera kunyumba kwathu pabodzi na xamwali wace. Iwo akhali Mboni za Yahova. Ine nee ndikhadziwa pinthu pizinji thangwi ya Mboni za Yahova, pontho nee ndikhafuna kudziwa pya uphemberi wawo. Mbwenye ndadzumatirwa kakamwe na njira ikhatawira iwo mibvundzo mukuphatisira Bhibhlya. Anyakubalanga adzumatirwambo, natenepa tatawira kupfundza Bhibhlya.

Mu ndzidzi unoyu, ine ndikhapfundza kuxikola ya gereja ya Katolika. Ntsiku inango ndacedza na andzanga akuxikola pinthu pikhapfundza ine m’Bhibhlya. Mwakukhonda dembuka, apfundzisi akuti akhali mapadre abva mafala akhacedza ife. M’mbuto mwakuphatisira Bhibhlya toera kupokanya pikhalonga ine, m’bodzi wa mapadre anewa andipambizira pamaso pa andzanga onsene kuti ndine nyakukhonda bvera. Maseze pikhali pyakutsukwalisa, pyenepi pyadzakhala nkhombo thangwi pyandiphedza toera kudzindikira kuti pinapfundziswa m’maxikola a gereja nee pisabverana na pinalonga Bhibhlya. Natenepa ndaona kuti ndikhafunika kubuluka pa xikola ineyi. Anyakubalanga anditawirisa toera ndikapfundze kuxikola inango.

Ndapitiriza kupfundza Bhibhlya, mbwenye nee ndathambaruka mwakucimbiza thangwi ndikhagopa kumwaza mphangwa nyumba na nyumba. Gereja ya Katolika ikhatcinga kakamwe basa yathu yakumwaza  mphangwa. Maurice Duplessis, ntsogoleri wa ndale wa ku Quebec, akhaphedzera pikhacita gereja. Na thangwi ineyi, iwo athusa Mboni za Yahova na kuzitsalakana mwakuipa. Mu ndzidzi unoyu, Mboni za Yahova zikhafunika kukhala na cipapo kakamwe toera kumwaza mphangwa.

M’bale adandiphedza toera kukunda kugopa kwanga akhali John Rae, adamalisa turma yacipfemba ya Xikola ya Jileadhi. John akhali wa maluso kakamwe, wakucepeseka na wacitsalakano. Kazinji kene nee akhandipasa uphungu pakweca, mbwenye ndapfundza pizinji na citsandzo cace cadidi. John nee akhalonga mwadidi Cifransa, natenepa kazinji kene tikhaenda pabodzi kamwaza mphangwa, pontho ndikham’phedza kulonga cilongero ceneci. Kukhala pabodzi ndzidzi uzinji na John kwandiphedza toera kukhala m’bodzi wa Mboni za Yahova. Pakumala pyaka khumi kubulukira mu ndzidzi udatoma ine kupfundza Bhibhlya, ndabatizwa pa ntsiku 26 ya mwezi wa Maio, mu caka 1951.

Mpingo wathu ung’ono mu Nzinda wa Quebec ukhali na apainiya azinji. Citsandzo cawo candiphedza toera kutumikirambo ninga mpainiya. Buluka penepo, tatoma kumwaza mphangwa nyumba na nyumba mukuphatisira basi ene Bhibhlya. Maseze nee tikhali na mabukhu, ife tikhaphatisira Malemba munjira yadidi kakamwe. Natenepa ndikhawangisira kudzolowera mavesi a Bhibhlya toera kutsidzikiza undimomwene. Mbwenye azinji akhakhonda kuleri Mabhibhlya ale akhakhondeswa na Gereja ya Katolika.

Mu caka 1952, ine ndamanga banja na Simone Patry, mulongo wakukhulupirika wa mu Nzinda wa Quebec. Ife tafuluka mbitienda ku Montreal, pontho mu caka ceneci tabala mwanathu wankazi anacemerwa Lise. Maseze talimira kutumikira ninga apainiya ndzidzi pang’ono mbatidzati kumanga banja, ine na Simone tayesera kukhala na umaso wakukhonda funa pizinji toera tikwanise kucita mabasa mazinji mu mpingo.

Papita pyaka khumi mbandidzati kunyerezera kutumikira pontho ninga mpainiya. Mu caka 1962, pikhali ine pa Xikola ya Utumiki wa Umambo ya akulu a mpingo ku Bheteli ya ku Kanada, ndaphembwa toera kuphata basa pabodzi na m’bale Camille Ouellette. Phinga yakumwaza mphangwa ikhali na m’bale Camille yandidzumatirisa kakamwe, thangwi iye akhali wakumanga banja, pontho akhali na ana. Pikhali pinthu pyacilendo ku Quebec, anyakumanga banja akuti ali na ana mbatumikira ninga apainiya, mbwenye Camille akhali na cifuno ceneci. Mu ndzidzi ukhacedza ife pabodzi, iye andiwangisa toera ndinyerezere mwadidi makhaliro anga. Pidapita mwezi mingasi, ndaona kuti ndikhafunika  kutumikira pontho ninga mpainiya. Anango akhalonga kuti ceneci nee ndi cisankhulo cadidi, mbwenye ine nee ndabwerera nduli thangwi ndikhanyindira kuti Yahova anapasa nkhombo kuwangisira kwanga m’basa yakumwaza mphangwa.

Mu caka 1964, ine na Simone taphembwa toera katumikira ninga apainiya akupambulika mu Nzinda udabalwa ife ku Quebec, pontho tatumikira kweneko mu pyaka pizinji. Mbwenye mu ndzidzi unoyu nee tikhatcingwa kakamwe kupiringana kale.

Sabudu inango namaulo, ine ndamangwa mu nzinda ung’ono wa Sainte-Marie, wakuti nee ukhali kutali na Nzinda wa Quebec. Anthu adandimanga andiendesa kuna apolixa, mbandifungira nkaidi thangwi yakumwaza mphangwa nyumba na nyumba mwakukhonda tawiriswa. Mukupita kwa ndzidzi, iwo andiendesa kuna nyakutonga miseru anacemerwa Baillargeon, mamuna wakugopesa kakamwe. Iye andibvundza kuti mbani advogado wako. Pidalonga ine dzina ya Glen How, * anadziwika mwadidi ninga advogado wa Mboni za Yahova, iye aipirwa kakamwe mbalonga: “Nkhabe! Nee ndisatawira!” Thangwi Glen How akhadziwika na makhaliro adidi, pontho akhaphata basa ninga advogado toera kutsidzikiza Mboni za Yahova. Mwakukhonda dembuka, advogado andipanga kuti ndapambizirwa pinthu pyakuti nee ndikhapicita.

Kutcingwa kwa basa yathu ku Quebec kukhacitisambo kukhala pyakunentsa kugumana mbuto toera kusonkhana. Mpingo wathu ung’ono ukhasonkhana mu garaje yakale. Toera kupisirwa mu ndzidzi wakuthondola, abale akhaphatisira aquecedor querosene. Kazinji kene ife tikakhala pabodzi n’khundu mwa aquecedor unoyu midzidzi mingasi misonkhano mbidzati kutoma toera kuwangisana.

Ndi pyakutsandzayisa kakamwe kuona nkhombo zidagumanika mukupita kwa pyaka thangwi ya basa yakumwaza mphangwa. Mu caka 1960, mu Nzinda wa Quebec, cisa ca Côte-Nord na Gaspé Peninsula mukhali na mipingo mingasi ming’ono. Lero, mbuto zenezi ziri na abale na alongo azinji kakamwe, pontho iwo asasonkhana mu Nyumba za Umambo zakubalika kakamwe.

Mu caka 1970, ine na Simone taphembwa toera kutumikira ninga muyang’niri wa cisa. Mu caka 1973, ine ndakhazikiswa ninga muyang’aniri wa gawo. Mu pyaka pyenepi, ine ndapfundza pizinji na abale a maluso ninga Laurier Saumur * na David Splane, * akuti akhatumikira ninga ayang’aniri a cisa. Pakumala misonkhano yonsene ya cisa, ine na David tikhapasana maonero toera kuthimizira maluso athu akupfundzisa. Ndisakumbuka ntsiku inango idandipanga David kuti: “Ndakomerwa kakamwe na nkhani yako yakumalisa Léonce. Ikhali nkhani yadidi, mbwenye ine mbidacita nkhani zitatu kubulukira mu nkhani idacita iwe!” Ndadzindikira kuti ndikhalonga pizinji kakamwe mu nkhani zikhacita ine. Natenepa ndikhafunika kupfundza njira yadidi yakucita nkhani.

 Ayang’aniri a gawo akhali na basa yakuwangisa ayang’aniri a cisa. Na thangwi ineyi, amwazi mphangwa azinji ku Quebec akhandidziwa kakamwe. Kazinji kene iwo akhafuna kakamwe kumwaza mphangwa pabodzi na ine mu ndzidzi ukhacedzera ine anyang’aniri a cisa. Nakuti ndikhakomerwa kakamwe kumwaza mphangwa pabodzi na iwo, ndikhali na ndzidzi wakucepa toera kucedza na muyang’aniri wa cisa. Ntsiku inango muyang’aniri wa cisa unango andipanga: “Ndi pyakufunika kakamwe kucedza na abale, mbwenye leka duwala kuti wabwera kuno toera kucedzera ine sumana ino. Ine ndisafunambo kuwangiswa!” Uphungu unoyu wandiphedza toera kukhala na maonero akulinganira.

Mwakutsukwalisa, mu caka 1976, nkazanga wakufunika Simone aphatwa na utenda mbalowa. Iye akhali nkazi wadidi kakamwe thangwi nee akhafuna pinthu pizinji, pontho akhafuna kakamwe Yahova. Nakuti ndikhali wakuphatika kakamwe mu utumiki, pyenepi pyandiphedza toera kupirira nyatwa yakuferwa na nkazanga, pontho ndisapereka takhuta kuna Yahova thangwi ya kundiphedza mu ndzidzi unoyu wa nyatwa. Mukupita kwa ndzidzi, ine ndamanga banja na Carolyn Elliott, mpainiya waphinga wakuti asalonga Cingerezi, pontho wakuti akhadabwera ku Quebec toera kuphedzera basa yakumwaza mphangwa. Carolyn akhali wacitsalakano, pontho akhabalangaza kakamwe anango, makamaka ale akutsoperwa. Iye akhandiphedza kakamwe pikhatumikira ine ninga muyang’aniri wa cisa.

Mwezi wa Janeiro wa caka 1978, ndaphembwa toera kupfundzisa turma yakutoma ya Xikola ya Basa ya Upainiya ku Quebec. Ndadzudzumika kakamwe thangwi cipo ndikhadacita kale basa ineyi, natenepa pinthu pyonsene pikhali pipswa kwa ine. Mbwenye ndatsandzaya kakamwe thangwi turma ineyi yakutoma idapfundzisa ine ikhali na apainiya azinji a maluso. Maseze ndikhali mpfundzisi, ine ndapfundza pizinji na apainiya anewa.

Mukupita kwa ndzidzi, mu caka 1978, kwacitika nsonkhano wa dziko yonsene wa nsolo wakuti: “Fé Vitoriosa” mu Estádio Olímpico de Montreal. Ukhali nsonkhano ukulu kakamwe kupiringana misonkhano inango idacitwa ku Quebec, pontho  agumanika anthu akupiringana 80.000. Ine ndaphembwa toera kuphata basa mu Departamento de Serviço de Notícias. Ine ndalonga na majornalista azinji, pontho ndatsandzaya kakamwe kuona kuti iwo akhalemba pinthu pizinji pyadidi thangwi ya ife. Iwo amala midzidzi yakupiringana 20 mbaticita mibvundzo mu televizau na mu radyo, pontho iwo abulusa madzana a misolo ya mphangwa. Pyenepi pyapereka umboni kakamwe!

Mu caka 1996, ine ndatambira macinjo makulu. Kutomera ndzidzi udabatizwa ine ndikhatumikira ku Quebec mu cilongero ca Cifransa, mbwenye mu caka 1996, ndacinjwa toera katumikira ku dhistritu ya Toronto mu cilongero ca Cingerezi. Ndikhapibva kuti nee ndathema, pontho ndikhagopa kakamwe kucita nkhani thangwi nee ndikhadziwa kulonga mwadidi Cingerezi. Ndacita phembero kazinji kene mbandinyindira kakamwe Yahova.

Ndikhadzudzumika kakamwe mbandidzati kutoma kutumikira mu dhistritu ineyi, mbwenye cincino ndinakwanisa kulonga kuti ndatsandzaya kakamwe kutumikira ku mbuto ineyi. Mwakupirira, Carolyn andiphedza toera kupfundza Cingerezi, pontho abale akhandiphedza kakamwe na kundiwangisa. Mwakukhonda dembuka ife takhala na axamwali azinji apswa.

Kusiyapo kucita mabasa anango na kukhunganyika nsonkhano wa cisa, kazinji kene n’Cixanu namaulo ndikhaphatisira ndzidzi ubodzi toera kumwaza mphangwa nyumba na nyumba. Panango anango akhabvundzika: ‘Thangwi yanji asaenda kamwaza mphangwa mu ndzidzi wakuti tikukhunganyika nsonkhano?’ Mbwenye ndikhaona kuti kumwaza mphangwa ndzidzi unoyu kukhali kwakuwangisa kakamwe. Ngakhale cincino, kumwaza mphangwa kusanditsandzayisa kakamwe.

Mu caka 1998, ine na Carolyn takhazikiswa toera katumikira ninga apainiya akupambulika ku Montreal. Mu pyaka pizinji, basa yanga ikhaphataniza kukhunganya maperekero a umboni wapakweca na kutawira mibvundzo inacita anthu thangwi ya Mboni za Yahova. Ine na Carolyn tisakomerwa kakamwe kumwazira mphangwa anthu anafulukira kuno ku Kanada akuti asafuna kakamwe kupfundza Bhibhlya.

Ndinganyerezera pyaka 68 pidapita mbandikatumikira ninga m’bodzi wa Mboni za Yahova, ndisaona kuti ndi nkhombo kakamwe kwa ine. Ndiri wakutsandzaya kakamwe thangwi ya kuwangisira kumwaza mphangwa na kuphedza anthu azinji toera kudziwa undimomwene. Pidamala mwananga Lise pabodzi na mamunace kukuza anawo, iwo atoma kutumikira ninga apainiya a ndzidzi onsene. Pisanditsandzayisa kakamwe ndingaona phinga iri na iye m’basa yakumwaza mphangwa. Ndisapereka takhuta kakamwe kuna Akristu andzanga thangwi ya citsandzo cawo cadidi, pontho andiphedza toera kukhala na uxamwali wakuwanga na Yahova na kuntumikira munjira zakusiyana-siyana. Ndadzindikira kuti toera kukhala wakukhulupirika m’mabasa a Yahova pisanyindira basi ene ciphedzo ca nzimu wakucena wa Yahova. (Masal. 51:11) Ndisapitiriza kupereka takhuta kuna Yahova thangwi andipasa miyai yakupambulika toera kubvekesa dzina yace!​—Masal. 54:6.