Ndakula mu cisa cakutcerenga ca nzinda wa Montreal. Mukhali ine na nthanda zitanthatu zakubalwa, babanga alowa, mama mbasala na mabasa onsene a panyumba. Mwa ana asere a pa banja pathu, ine ndikhali wang’ono kakamwe.

Mukhakula ine, ndzidzi onsene ndikhaphatisira mitombwe yakuledzeresa, kugwa juga, uphanga na kucita uxamwali na mapanga. Mukhakhala ine na pyaka khumi, ndikhacita malonda akusaka amuna toera kudzacita ulukwali na akazi, pontho ndikhakwata kobiri ya juri. Kazinji kene ndikhalonga uthambi mbandikomerwa na malonda authambi akhacita ine. Pyenepi pikhali ninga nsambo wanga.

Mukhali ine na pyaka 14, ndathimizira njira zanga zakucita malonda akubera anthu. Mwacitsandzo, ndikhagula marorojo a ndalama, mapurusera na mphete, mbindipiikha cidzindikiro toera pioneke ninga pya ndalama ya ntengo wapadzulu, buluka penepo mbindipigulisa mu nseu na m’maloja makulu. Ndikhakomerwa kakamwe na kuwina kobiri mwakukhonda nentsa. Ndzidzi unango ndawina kobiri $10.000 pa ntsiku ibodzi!

Mukhali ine na pyaka 15 dathamangiswa kuxikola ya anyakaidi mbandisowa pakukhala. Ndikhagona m’miseu, m’maparki peno m’manyumba mwa axamwali anga.

Thangwi ya malonda anga authambi, kazinji kene ndikhabvundzwa na apolixa. Nakuti nee ndikhagulisa pinthu pyakuba, cipo ndapitiswa nkaidi. Mbwenye, ndikhalipa anthu azinji thangwi ya malonda anga authambi na kugulisa pinthu mwakukhonda tawiriswa. Mwakukhonda gopa, ndikhakwata kobiri izinji ya juri na pyenepi pikhali pyakugopswa, midzidzi inango ndikhafamba na mpfuti. Ntsiku zinango ndikhaphata basa pabodzi na nsoka wa mapanga.

Ndatoma kubva pya Bhibhlya mukhali ine basi ene na pyaka 17. Ndikhakhala na nkazi akhabanyirana na ine wakuti adzatoma kupfundza Bhibhlya na Mboni za Yahova. Nakuti ndikhaida kakamwe pikhalonga Bhibhlya, ndansiya mbandienda kabanyirana na nkazi unango.

 Ndzidzi wakucinja wadzafika mudatoma nkazi waciwiri akhabanyirana na ine kupfundza Bhibhlya na Mboni za Yahova! Iye acita macinjo mu umaso wace na ndikhadzumatirwa thangwi yakupfulika na kupirira kwace. Ndatawira ncemerero toera kagumanika pa misonkhano ku Nyumba ya Umambo ya Mboni za Yahova. Ndatambirwa mwadidi na anthu a mabvaliro akuthema na a ntima wadidi. Pikhali pyakusiyana tani na anthu akhadziwa ine pakutoma! Cipo ndapibva kukhala wakufuniwa na anthu a m’banja mwathu; nee ndapibva wakutsalakanwa kutomera uwana wanga. Citsalakano cidagumana ine pakati pa Mboni za Yahova cipo ndacigumana kale. Mudaperekeka Mboni za Yahova toera kundipfundzisa Bhibhlya, ndatawira mwakutsandzaya.

Mwandimomwene pikhapfundza ine m’Bhibhlya pyapulumusa umaso wanga. Ndikhacita masasanyiro a kuenda kaba na andzanga awiri toera kumalisa mangawa anga akugwa juga a kobiri yakupiringana $50.000. Mbwenye ndiri wakutsandzaya kakamwe thangwi yakukhonda cita pyenepi! Andzanga aenda kaba. M’bodzi mwa iwo amangwa na unango aphiwa.

Mukhapitiriza ine kupfundza Bhibhlya, ndaona kuti ndikhafunika kucita macinjo mazinji. Mwacitsandzo, ndapfundza pinalonga Bhibhlya pa 1 Akorinto 6:10: ‘Mambava, anyakumana, anyakuledzera, anapokosera andzawo pinthu, awa onsene nee anadzapita mu Umambo wa Mulungu.’ Mudaleri ine vesi ineyi, mbindinyerezera pikhacita ine ndatoma kugwisa misozi. Ndadzindikira kuti ndikhafunika kucinja umaso wanga mwakukwana. (Aroma 12:2) Ndikhali phanga, nsumankha na ndikhali munthu wauthambi.

Kusiyapo pyenepi, ndapfundzambo m’Bhibhlya kuti Yahova ndi wantsisi na wakulekerera. (Izaiya 1:18) Ndikhacita phembero mwakuwanga, mbandidembetera Yahova toera andiphedze kukhala wakusudzuka m’makhaliro a umaso wanga wakale. Na ciphedzo cace, pang’ono na pang’ono ndakwanisa kucinja umaso wanga. Wadzafika ndzidzi wakufunika wakuti ine na nkazi akhabanyirana na ine talembesa banja yathu.

Ndamanga banja mukhali ine na pyaka 24, pontho ndikhali na ana atatu. Natenepa ndikhafunika kugumana basa yakuthema. Mbwenye nee ndapfundza kakamwe xikola. Ndacita pontho phembero kuna Yahova. Buluka penepo ndaenda kasaka basa. Ndapanga mapatrau kuti ndikhafuna kucinja umaso wanga toera kucita basa yakuona ntima. Midzidzi inango, ndikhaapanga kuti ndikhapfundza Bhibhlya na cifuno cakukhala munthu wadidi. Mapatrau azinji akhakhonda kundipitisa basa. Mbwenye pakumala kulonga pakweca pinentso pya umaso wanga wa nduli, patrau m’bodzi alonga: “Ine nkhabe kudziwa thangwi yanji, mbwenye pana cinthu cinandipanga kuti ndisafunika kukupitisa basa.” Penepo ndadziwa kuti unoyu ukhali ntawiro wa maphembero anga. Mukupita kwa ndzidzi, ine na nkazi wanga tabatizwa ninga Mboni za Yahova.

Lero ndiciri maso thangwi yakuphatisira midida ya Bhibhlya na kukhala na umaso Wacikristu. Ndiri na banja yadidi, pontho ndisanyindira kuti Yahova andilekerera na ndisatsandzaya na cikumbuntima cakucena.

Ndiri m’basa ya utumiki wa ndzidzi onsene mu pyaka 14, mbandikaphedza anango kupfundza pinalonga Bhibhlya, pontho cincino nkazanga apitambo m’basa ineyi. Mu pyaka pyakupiringana 30, ndatsandzaya mukuphedza anyabasa andzanga akukwana 22 toera kulambira Yahova. Ndisapitiriza kuenda ku maloja makulu, mbwenye tayu toera kacita malonda authambi ninga pikhacita ine kale. Cincino ndingaenda m’maloja anewa kazinji kene ndisalonga pya cikhulupiro canga. Ndisafuna kuaphedza toera kukhala na cidikhiro ca umaso n’dziko ipswa ya ntsogolo yakuti cipo munadzagumanika anthu akucita malonda authambi.​—Masalmo 37:10.