THANGWI YANJI MPHYAKUFUNIKA: Yahova asakulisa mbeu za undimomwene m’mitima mwa ale ‘anafuna kutawira undimomwene unapasa umaso wakukhonda mala.’ (Mabasa 13:48; 1 Akor. 3:7) Ife tisaphata basa pabodzi na Yahova tingawangisira kumwaza mphangwa kuna ale anatawira kuphatisira pinapfundza iwo. (1 Akor. 9:26) Anyakupfundza Bhibhlya asafunika kuphedzwa toera abvesese kuti ubatizo Wacikristu ndi wakufunika kakamwe toera apulumuke. (1 Ped. 3:21) Ife tisafunika kuaphedza toera acite macinjo mu umaso wawo, amwaze mphangwa, apfundzisembo anango, pontho aperekeke kuna Yahova.—Mat. 28:19, 20.

TINACITA TANI PYENEPI:

• Kumbusani anyakupfundza Bhibhlya kuti cifuniro ca pfundziro yawo ndi kuaphedza toera ‘adziwe’ Yahova na kucita pinafuna iye.—Juw. 17:3

• Aphedzeni toera athambaruke mwauzimu mukukunda mayesero, ninga misambo yakuipa na axamwali akuipa

• Aphedzeni mbadzati kubatizwa na pakumala kubatizwa toera apitirize kuwangisa cikhulupiro cawo.—Mabasa 14:22

ONANI VIDHYU YAKUTI JEOVÁ VAI AJUDÁ-LO, BULUKA PENEPO TAWIRANI MIBVUNDZO IYI:

• Thangwi yanji anango asagopa kuperekeka kuna Yahova mbabatizwa?

• Akulu a mpingo anaphedza tani anyakupfundza Bhibhlya toera athambaruke mwauzimu?

• Kodi lemba ya Izaiya 41:10 isatipfundzisanji thangwi ya Yahova?

• Tisafunika kukhala na makhaliro api toera kutumikira Yahova, maseze ndife anthu akusowa ungwiro?