Munthu angacita madawo mbakhonda kutcunyuka asabuluswa mu mpingo, pontho pyenepi pisatsidzikiza mpingo. (1 Akor. 5:6, 11) Natenepa tingakhonda kucedza na munthu unoyu, tinapangiza kuti tisafuna Yahova. Mbwenye pinakhala pyakutsukwalisa kakamwe kuna abale, kuphatanizambo acibale na akulu a mpingo adatsalakana nkhani ineyi, angaona kuti tikucedza na munthu wakubuluswa mu mpingo.

Kusiyapo pyenepi, tingakhonda kucedza na munthu wakubuluswa mu mpingo tisacenesa dzina ya Yahova na kuphedzera midida yace yakulungama. (1 Ped. 1:14-16) Pontho tisapangiza ufuni kuna munthu unoyu. Mwakukhonda penula, munthu wakubuluswa mu mpingo asabva kupha, mbwenye pyenepi pisabala “nsapo wantendere mwakubverana na ulungami.” (Aheb. 12:5, 6, 11) Mbwenye tingacedza na munthu wakubuluswa mu mpingo peno wakubuluka ekhene, tinapangiza kuti nee tisabvera midida ya Yahova. Pontho tisafunika kukumbuka kuti Yahova asasandika munthu mwakubverana na pire pidacita iye. (Yer. 30:11) Natenepa tisafunika kupitiriza kutumikira Yahova na kuphedzera midida yace, mbatidikhira kuti ntsogolo iye anadzabwezereswa mu mpingo.—Iza. 1:16-18; 55:7.

ONANI VIDHYU YA NSOLO WAKUTI KHALANI WAKUKHULUPIRIKA NA NTIMA ONSENE, BULUKA PENEPO TAWIRANI MIBVUNDZO IYI:

• Ndi mabvero api adakhala na Gabriella na Ben mu ndzidzi udasiya mwanawo kutumikira Yahova?

• Abale na alongo mu mpingo aphedza tani banja ineyi?

• Ndi citsandzo cipi ca m’Bhibhlya cinapangiza kuti kukhala wakukhulupirika kuna Yahova ndi kwakufunika kakamwe kupiringana acibale athu?

• Tinapangiza tani kuti ndife akukhulupirika kakamwe kuna Yahova kupiringana acibale athu?