Mungayang’ana maluwa akubalika, thambo yakudzala na nyenyezi peno madzi anabuluka paphiri, kodi musakwanisa kuona mphambvu za Mulungu ule adacita pyenepi? Pinthu pidacita Yahova pisapangiza pakweca makhaliro ace akukhonda kuoneka. (Aroma 1:20) Tinganyerezera mwacidikhodikho pyonsene pidacita Mulungu pyakuti tisakwanisa kupiona tisadzindikira kuti iye ndi wamphambvu, waufuni, waudziwisi, waulungami na wakupasa mwakudzala manja.—Masal. 104:24.

Ndi pinthu pipi pidacita Yahova pyakuti musapiona ntsiku zonsene? Khala musakhala mu nzinda, panango musakwanisa kuona mbalame na miti. Kuona pinthu pidacita Yahova kunatiphedza toera tikhonde kudzudzumika kakamwe, tikhale na maonero adidi tingathimbana na nyatwa, kunathimizira kun’nyindira kwathu, pontho kunatiphedza toera kuona kuti Yahova ali na mphambvu ya kutitsalakana kwenda na kwenda. (Mat. 6:25-32) Khala muli na anapiana aphedzeni toera adziwe makhaliro akudzumisa a Yahova. Tingapangiza kuti tisapereka takhuta thangwi ya pyonsene pidaticitira Yahova, uxamwali wathu na iye unathimizirika.—Masal. 8:3, 4.

ONANI VIDHYU YAKUTI AS MARAVILHAS DA CRIAÇÃO REVELAM A GLÓRIA DE DEUS—LUZ E COR, BULUKA PENEPO TAWIRANI MIBVUNDZO IYI:

• Kodi ntoto (pigmentos) usatiphedza tani toera kuona makore?

• Kodi kuyetimira kusatoma tani?

• Thangwi yanji m‘midzidzi inango thambo isakhala na kore yakusiyana?

• Ndi makore api akubalika adaona imwe cifupi na panyumba panu?

• Thangwi yanji tisafunika kuyang’ana mwacidikhodikho pyakucitwa?