KUKHALA MASO NINGA AKRISTU
Kuthimizira Maluso Athu mu Utumiki—Citani Mibvundzo Yakuti Inaphedza Munthu Kunyerezera
THANGWI YANJI MPHYAKUFUNIKA: Khala manyerezero a ‘munthu akhala ninga madzi a mu ncera wakuzika,’ mibvundzo yakhala ninga nthepu wakutunga nawo madzi anewa. (Mis. 20:5) Mibvundzo isacitisa anyakubvesera athu kucitambo khundu m’makani, pontho isatiphedza kudziwa pinanyerezera iwo. Kazinji kene mibvundzo ingacitwa mwadidi isaphedza kakamwe. Tinakwanisa tani kucita mibvundzo yadidi ninga ikhacita Yezu?
TINACITA TANI PYENEPI:
-
Citani mibvundzo toera kudziwa maonero a munthu. Yezu acita mibvundzo mizinji toera kudziwa maonero a anyakupfundzace. (Mat. 16:13-16; be-T 238 ¶3-5) Ndi mibvundzo ipi yakuti inakwanisa kukuphedzani kudziwa pinanyerezera munthu?
-
Citani mibvundzo yakucitisa munthu kulongambo. Toera kusandika maonero akuphonyeka akhali na Pedhru, Yezu acita mibvundzo mbapereka matawiro akuti acitisa Pedhru kugumana ntawiro wadidi. (Mat. 17:24-26) Ndi mibvundzo ipi yakuti munakwanisa kuicita toera kucitisa munthu kugumana ntawiro wadidi?
-
Perekani takhuta kwa anakubveserani. Yezu apereka takhuta kwa ‘nyakupfundzisa mwambo’ pidatawira iye mbvundzo wace. (Mark. 12:34) Munapereka tani takhuta kwa munthu adatawira mbvundzo wanu?
ONANI KHUNDU YAKUTOMA YA VIDHYU YAKUTI CITANI BASA IDACITA YEZU—KUPFUNDZISA, BULUKA PENEPO TAWIRANI MIBVUNDZO IYI:
-
Mphangwa zikhalonga m’bale kwa nyakupfundza zikhali zandimomwene, mphapo thangwi yanji tinalonga kuti njira yace yakupfundzisa si yadidi tayu?
-
Thangwi yanji ife tisafunika kucita pizinji kupiringana kufokotoza kwene basi mphangwa?
ONANI KHUNDU YACIWIRI YA VIDHYU, BULUKA PENEPO TAWIRANI MIBVUNDZO IYI:
-
Kodi m’bale aphatisira tani mibvundzo munjira yadidi?
-
Ndi makhundu api anango akupfundzisa kwace adaona imwe kuti tisafunikambo kuatowezera?