Thangwi yanji musafunika kukhunganyika? Utenda na pidengwa pinakwanisa kucitika mwakukhonda dikhira. Natenepa, tonsene tisafunika kuphatisira cincino pitsogolero pinatipasa gulu ya Yahova toera pitiphedze tingagwerwa na utenda mwandzidzidzi. Tingacita pyenepi, tinapangiza kuti tisalemedza umaso, pontho tisalemedza mitemo ya Yahova inalonga pya ciropa.—Mabasa 15:28, 29.

Munakhunganyika tani?

• Citani phembero, pontho lembani mwadidi kartau ya Diretiva Antecipada de Vontade e Procuração Relativas a Cuidados de Saúde (DPA). a Amwazi mphangwa akubatizwa anakwanisa kuphemba m’bale anatsalakana mabukhu pa Nyumba ya Umambo toera aapase kartau ya DPA peno Cartão de Identificação (ic) toera kulembera anawo ang’ono

• Khala imwe mulongo muli na mimba, phembani akulu a mpingo toera akupaseni tsamba yakuti Informação para Grávidas (S-401). Tsamba ineyi inakuphedzani toera kucita pisankhulo pyadidi mu ndzidzi unakhala imwe na mimba na mu ndzidzi wakubala

• Mungafuna kukondzwa peno mungafuna kubhaxari kunyumba ya ungumi, dziwisani akulu a mpingo, pontho pangani madotoro kuti munadzaoniwa na m’bodzi wa Mboni za Yahova anapita ncibverano na madotoro

Akulu a mpingo anakuphedzani tani? Iwo anakuphedzani kulemba kartau ya DPA. Mbwenye nee anakucitirani pisankhulo pya ukondzi peno kukupangani maonero awo thangwi ya pisankhulo pinafunika imwe kucita. (Aroma 14:12; Agal. 6:5) Imwe mungadziwisa akulu a mpingo kuti muli na utenda wakuti usaphemba kuikhwa peno kubuluswa ciropa, mwakukhonda dembuka, iwo anapita ncibverano na abale a Komiti Inapita Ncibverano na Nyumba za Ungumi (COLIH) toera akuphedzeni.

Komiti Inapita Ncibverano na Nyumba za Ungumi inakuphedzani tani? Abale anatumikira mu komiti ineyi asapfundziswa kuti anaphedza tani madotoro na atongi toera kubvesesa thangwi ya cisankhulo cathu cakukhonda kuikhwa peno kubuluswa ciropa. Iwo anakwanisa kucedza na dotoro wanu thangwi ya njira zinango za ukondzi zakukhonda kuphatisira ciropa. Pingafunika, iwo anakuphedzani toera kugumana dotoro wakuti anatawira kukukondzani mwakukhonda kuphatisira ciropa.

ONANI VIDHYU YA NSOLO WAKUTI COMO TOMAR DECISÕES SOBRE TRATAMENTOS DE SAÚDE QUE ENVOLVAM O USO DO SANGUE, BULUKA PENEPO, TAWIRANI MBVUNDZO UYU:

• Ninji pidapfundza imwe mu vidhyu ineyi, pyakuti pinakuphedzani toera kukhala wakukhunganyika pangaoneka utenda wakuti usaphemba kuikhwa peno kubuluswa ciropa?

  Your answer