Khala ndimwe m’mwazi mphangwa wakukhonda batizwa peno ndimwe nyakupfundza Bhibhlya, kodi musafuna kubatizwa? Thangwi yanji musafunika kubatizwa? Thangwi kuperekeka na kubatizwa kusacitisa munthu kukhala na uxamwali wakuwanga na Yahova. (Masal. 91:1) Kusiyapo pyenepi, ubatizo unakwanisambo kupulumusa munthu. (1 Ped. 3:21) Mphapo musafunika kucitanji toera kubatizwa?

Khalani na cinyindiro cakuti pinthu pinapfundza imwe ndi undimomwene. Mungakhala na mibvundzo thangwi ya pinthu pinapfundza imwe, fufudzani toera kugumana matawiro. (Aroma 12:2) Dzindikirani pinthu pisafunika imwe kucinja, pontho dziwani kuti musacita macinjo anewa toera kukomeresa Yahova. (Mis. 27:11; Aef. 4:23, 24) Pontho ndzidzi onsene citani phembero kuna Yahova. Dziwani kuti Yahova anakuphedzani mukuphatisira nzimu wace wakucena. (1 Ped. 5:10, 11) Kuwangisira kwanu toera kutumikira Yahova ndi kwakufunika kakamwe!—Masal. 16:11.

ONANI VIDHYU YA NSOLO WAKUTI PINTHU PISAFUNIKA KUCITA MUNTHU TOERA ABATIZWE, BULUKA PENEPO TAWIRANI MIBVUNDZO IYI:

• Ndi pinentso pipi pidakunda anango toera akwanise kubatizwa?

• Munakwanisa tani kukhala na cikhulupiro cakuwanga cakuti cinakuphedzani toera kuperekeka kuna Yahova?

• Ninji pidakulumiza abale na alongo anango toera kubatizwa?

• Ndi nkhombo zipi zinakhala na ale anasankhula kutumikira Yahova?

• Kodi kuperekeka kuna Yahova na kubatizwa pisabvekanji?