Yahova asaona banja ninga cinthu cakufunika kakamwe, pontho iye asafuna kuti mamuna na nkazi akhale akuphatana. (Mat. 19:5, 6) Mu gulu ya Yahova muli na mabanja mazinji akuti asakhala akutsandzaya. Mbwenye mabanja anewa nee ndi aungwiro. Iwo asathimbanambo na pinentso. Ife tisafunika kucalira maonero a anthu anango akuti toera kumalisa nyatwa za m’banja, anyakumanga banja asafunika kumwalana peno kukhondana. Kodi Akristu anatsidzikiza tani mabanjawo?

Onani njira zixanu zakufunika.

1. Tsidzikizani ntima wanu toera mukhonde kusirira akazi peno amuna anango, pontho calirani kuona pinthu pyaulukwali pyakuti pinafewesa banjanu.—Mat. 5:28; 2 Ped. 2:14.

2. Wangisani uxamwali wanu na Mulungu, pontho pitirizani kucita pinthu pinankomeresa m’banja mwanu.—Masal. 97:10.

3. Pitirizani kubvala uunthu upswa, pontho citani pinthu pinapangiza kuti musafuna ndzanu wa m’banja.—Akol. 3:8-10, 12-14.

4. Pangizani cilemedzo, pontho cedzani ndzidzi onsene.—Akol. 4:6.

5. Pasani pinafuna ndzanu wa m’banja, pontho citani pyenepi mwaufuni.—1 Akor. 7:3, 4; 10:24.

Akristu angalemedza mabanjawo, anapangiza kuti asalemedza Yahova, ule Adatomesa banja.

ONANI VIDHYU YA NSOLO WAKUTI ‘TITHAMANGE MWAKUPIRIRA’—TIBVERE PITSOGOLERO PYA MAPIKA, BULUKA PENEPO TAWIRANI MIBVUNDZO IYI:

• Maseze anyakumanga banja anakwanisa kukhala akutsandzaya pakutoma, mbwenye ndi pinentso pipi pinafuna kuthimbana na iwo?

• Midida ya Bhibhlya inaphedza tani ale ananyerezera kuti nee asafuniwabve na ndzawo wa m’banja?

• Ndi midida ipi ya Yahova yakuti inaphedza anyakumanga banja?

• Anyakumanga banja asafunika kucitanji toera mabanjawo akhale akutsandzaya?