Mwezi wa Setembro, ife tinakhala na basa yakudziwisa anthu kuti basi ene ndi Umambo wa Mulungu unafuna kumalisa nyatwa za anthu. (Mat. 24:14) Munacita tani basa ineyi? Lerini lemba ibodzi inalonga pya Umambo wa Mulungu kuna anthu azinji kakamwe mwezi unoyu. Munthu angapangiza cifuno, mpaseni revista ya Ncenjezi N.° 2 2020. Buluka penepo, citani ulendo wakubwereza mwakucimbiza, pontho yeserani kutomesa pfundziro ya Bhibhlya mukuphatisira bhruxura Tsandzayani na Umaso Kwenda na Kwenda! Ale anatumikira ninga apainiya akuphedza mwezi wa Setembro anakwanisa kupereka maora 15 peno 30.

Mwakukhonda dembuka, Umambo wa Mulungu unadzafudza mautongi onsene a anthu. (Dhan. 2:44; 1 Akor. 15:24, 25) Natenepa tendeni tiphatisire mwai unoyu wakupambulika toera kupangiza kuti tisaphedzera Yahova na Umambo wace!