Mwezi wa Setembro, ife tinadzaphata basa yakutomesa mapfundziro a Bhibhlya mukuphatisira bhruxura yakuti Tsandzayani na Umaso Kwenda na Kwenda! Amwazi mphangwa anakwanisa kusankhula kutumikira ninga apainiya akuphedza mbapereka maora 30. Kodi tinadzacita tani kampanya ineyi?

• Paulendo Wakutoma: Phatisirani tsamba yakumalisa ya bhruxura ineyi toera kuphedza munthu kuti akhale na cifuno, pontho pangizani kuti tisacitisa tani pfundziro ya Bhibhlya. Mu ndzidzi unacita imwe kampanya ineyi, kumbukani ale akuti kale akhadapangiza cifuno, kuphatanizambo ale adacitira imwe maulendo akubwereza. Maseze pakutoma akhadakhonda kupfundza Bhibhlya, panango cincino anatawira kupfundza Bhibhlya mukuphatisira bhruxura ineyi. Imwe nee musafunika kusiya bhruxura ineyi panyumba pakuti nee pali na anthu peno kuitumiza pabodzi na matsamba kuna anthu akuti nee apangiza cifuno. Komiti Yakuyang’anira Basa ya Mpingo, panango inadzacita masasanyiro toera kucita misonkhano inango nkati mwa mwezi unoyu.

• Njira Zinango: Khala mpingo wanu usaphatisira makarinya a mabukhu, ikhani m’makarinya anewa bhruxura yakuti Tsandzayani na Umaso Kwenda na Kwenda! Pontho pangani ale anafuna bhruxura ineyi kuti angakwata bhruxura ineyi, iwo anakwanisambo kupfundza Bhibhlya mwakukhonda lipa. Pangizani mwacigwagwa kuti tisacitisa tani Pfundziro ya Bhibhlya peno bveranani toera kucita pyenepi pa ndzidzi unango. Muyang’aniri wa basa ya m’munda anakwanisa kusankhula amwazi mphangwa akuthema kuti aende m’mbuto zinacitirwa malonda toera kutomesa mapfundziro a Bhibhlya. Imwe munakwanisambo kutomesa mapfundziro a Bhibhlya kuna andzanu akubasa peno anthu anamwazira imwe mphangwa m’mbuto zinango.

Yezu atituma toera ‘kucita anyakupfundza na kuapfundzisa.’ (Mat. 28:19, 20) Tisadikhira kuti kampanya ineyi yakupambulika inatiphedza toera kukwanirisa cifuniro ceneci mukuphatisira bhruxura yakuti Tsandzayani na Umaso Kwenda na Kwenda!