Toera kukomeresa Mulungu, anyakupfundza Bhibhlya asafunika kukhala na cikhulupiro cakuwanga. (Aheb. 11:6) Ife tinakwanisa kuaphedza kucita pyenepi mukuphatisira bukhu yakuti Seja Feliz Para Sempre! Bukhu ineyi iri na malemba akufunika kakamwe, ndi yakukhonda nentsa kubvesesa, iri na mibvundzo yadidi, iri na mavidhyu akuwangisa na mafoto akubalika kakamwe. Tingaphedza anyakupfundza Bhibhlya toera kukulisa makhaliro Acikristu na uxamwali wawo na Mulungu, ife tiri kumanga na pinthu pyakukhonda kupya na moto.—1 Akor. 3:12-15.

Kuna anthu anango pisanentsa kutawira kuti anakwanisa kukhala axamwali a Mulungu thangwi nee asamuona. Natenepa ife tisafunika kuaphedza toera adziwe Yahova na kunkhulupira.

ONANI VIDHYU YA NSOLO WAKUTI PHATISIRANI BUKHU YAKUTI “SEJA FELIZ PARA SEMPRE!” TOERA KUPHEDZA ANYAKUPFUNDZA BHIBHLYA KUTI AKHULUPIRE YAHOVA, BULUKA PENEPO TAWIRANI MIBVUNDZO IYI:

• Tisadziwa tani kuti mulongo akhunganyika mwadidi mbadzati kucitisa pfundziro?

• Iye aphatisira tani mwadidi mibvundzo toera kuphedza nyakupfundza kuti alonge mabvero ace na manyerezero ace thangwi ya lemba ya Izaiya 41:10, 13?

• Kodi vidhyu na mavesi a Bhibhlya aphedza tani nyakupfundza unoyu?

Anthu azinji nee asadziwa pinthu thangwi ya ciomboli, pontho nee asaciona ninga muoni udatipasa Mulungu. (Agal. 2:20) Natenepa, ife tisafunika kuaphedza toera akhulupire ntsembe ya ciomboli ya Yezu.

ONANI VIDHYU YA NSOLO WAKUTI PHATISIRANI BUKHU YAKUTI “SEJA FELIZ PARA SEMPRE!” TOERA KUPHEDZA ANYAKUPFUNDZA BHIBHLYA KUTI AKHULUPIRE YEZU, BULUKA PENEPO TAWIRANI MIBVUNDZO IYI:

• Tisadziwa tani kuti m’bale akhunganyika mwadidi mbadzati kucitisa pfundziro?

• Kodi iye aphatisira tani khundu yakuti “Quer Pesquisar Mais?” toera kuphedza nyakupfundza?

• Thangwi yanji kucita phembero na nyakupfundza ndi pyakufunika?