Mu utumiki wace, Yezu akhaphatisira pinthu pikhacitika ntsiku na ntsiku toera kupfundzisa anthu. (Luka 13:1-5) Imwe munakwanisambo kuphatisira pinthu pinacitika ntsiku zino toera kucitisa anthu kuti akhale na cifuno cakubvesera mphangwa za Umambo. Mwacitsandzo, imwe munakwanisa kulonga thangwi ya kudhula kwa pinthu, pidengwa pyacibaliro, uviyaviya, kunjipa kwa anthu anaphatisira mitombwe yakuledzeresa na pinthu pinango. Buluka penepo citani mibvundzo ninga iyi: “Musanyerezera kuti nyatwa ineyi inadzamala?” peno “Maonero anu, ninji cinafuna kumalisa nyatwa ineyi?” Mungamala, pangizani munthu anacedza na imwe vesi ya Bhibhlya yakuti isabverana na pinacedza imwe. Iye angapangiza cifuno, mpangizeni vidhyu peno ibodzi mwa mabukhu anagumanika m’Bokosi Yathu Yakupfundzisa. Tingawangisira toera kukhuya mitima ya anthu a mucisa cathu, tikucita “pinthu pyonsene thangwi ya mphangwa zadidi.”—1 Akor. 9:22, 23.

Ndi pinthu pipi pinacitika ntsiku zino pyakuti pinacitisa anthu a mucisa canu kukhala na cifuno cakubvesera mphangwa zathu?