Nakuti nyatwa ikulu iri cifupi kakamwe, basa yathu yakumwaza mphangwa isafunika kucitwa mwakucimbiza. (Mis. 24:11, 12, 20) Toera kuphedza anthu, tisafunika kuphatisira ncemerero unoyu toera kuatsogolera ku Mafala a Mulungu na mu site yathu. Ncemerero toera kupita mu jw.org uli na cidzindikiro cakuti cinaphedza munthu toera kupita mu site yathu na kuona vidyu yakuti Thangwi Yanji Tisafunika Kupfundza Bhibhlya? na kuphemba mphangwa zizinji peno pfundziro ya Bhibhlya. Anthu anango nee asatawira mabukhu athu, mbwenye asafuna kupita mu site yathu. Lekani kunyinyirika kuapasa ncemerero unoyu. Mbwenye lekani kupasa ncemerero ale anakhonda kupangiza cifuno.

Ntsiku zonsene sakani mwai toera kulonga na munthu thangwi ya site yathu. (Yobe 4:7) Munakwanisa kulonga: “Ndisafuna kukupasani cinthu. Ncemerero uyu unakuphedzani toera kupita mu site yakuti iri na mphangwa zakukhonda lipa na mavidyu a misolo yakusiyana-siyana.” Nakuti ncemerero unoyu ndi ung’ono, munakwanisa kukwata mingasi toera kugawira anthu mungakhala na mwai.