THANGWI YANJI MPHYAKUFUNIKA: 1 Akorinto ndi ibodzi mwa matsamba 14 adalembwa na Paulu toera kuphedza Akristu. Munthu angalemba tsamba, asasankhula mwadidi mafala anafuna kulemba iye, kusiyapo pyenepi munthu anaitambira asaileri kazinji kene. Kulemba matsamba ndi njira yadidi kakamwe toera kumwaza mphangwa kuna acibale na anthu anango anadziwana na ife. Matsamba asatiphedzambo toera kumwaza mphangwa kuna anthu anakhonda ife kugumana panyumba. Mwacitsandzo, panango mwanaciro nyumba apangiza cifuno, mbwenye mphyakunentsa kwa iye kugumanika panyumba. Anthu anango ncisa cathu asakhala kutali kakamwe. Mphapo tisafunika kukumbukanji mu ndzidzi unalemba ife tsamba makamaka kuna munthu wakuti nee tisandziwa?

TINACITA TANI PYENEPI:

• Lembani pikhafuna kulonga imwe mbamudaonana naye nkhope na nkhope. Pakutoma lembani dzina yanu, pontho cidakucitisani kulemba tsamba ineyi. Pontho mungafuna munakwanisa kulemba mbvundzo wakuti unancitisa kukhala na cifuno cakupfundza Bhibhlya peno kupita mu webhisaiti yathu. Longani thangwi ya Pfundziro ya Bhibhlya inacitwa mu Interneti, peno pya pfundziro inacitwa panyumba ya munthu, buluka penepo lembani misolo mingasi ya bukhu inaphatisira ife pakupfundzisa. Mungafuna pakutumiza tsamba yanu munakwanisa kuphataniza bukhu, ncemerero toera kupita mu jw.org, ncemerero wa misonkhano peno tratadho.

• Mbwenye, lekani kulemba pinthu pizinji pa tsamba yanu toera munthu analembera imwe akhonde neta na kuileri—Onani citsandzo pa tsamba 8 cinapangiza kuti munalemba tani tsamba yanu

• Mungamala kulemba tsamba yanu, ilerini toera kuona khala iri na madodo peno khala ikubveka mwadidi. Phatisirani mafala adidi na acilemedzo, pontho mungaphatisira maselo aikheni akukwana.