Dhavidhi akwanisa kukunda Goliati thangwi akhanyindira Yahova. (1 Sam. 17:45) Yahova asafuna kuphatisira mphambvu zace toera kuphedza atumiki ace. (2 Pya dziko. 16:9) Tinacitanji toera tinyindire ciphedzo cinapereka Yahova, m’mbuto mwakunyindira maluso athu? Onani pinthu pitatu:

• Citani phembero ndzidzi onsene. Lekani kucita phembero basi ene toera kuphemba kulekererwa mungacita madawo, mbwenye musafunikambo kuphemba mphambvu toera mupirire mu ndzidzi unathimbana imwe na mayesero. (Mat. 6:12, 13) Pontho lekani kuphemba basi ene kuti Yahova apase nkhombo pisankhulo pidacita imwe, mbwenye musafunikambo kuphemba citsogolero na udziwisi wace mbamudzati kucita pisankhulo.—Tiya. 1:5

• Khalani na nsambo wakuleri na kupfundza Bhibhlya. Lerini Bhibhlya ntsiku zonsene. (Masal. 1:2) Nyerezerani mwadidi pitsandzo pya anthu analongwa m’Bhibhlya, pontho phatisirani pinthu pinapfundza imwe. (Tiya. 1:23-25) Mbamudzati kuenda mu utumiki khunganyikani mwadidi, m’mbuto mwa kunyindira pinthu pinadziwa imwe. Mbidzati kufika ntsiku ya misonkhano ya mpingo, khunganyikani mwadidi toera muphindule

• Bverani pitsogolero pinapereka gulu ya Yahova. Dziwani pitsogolero pyonsene pinapereka gulu ya Yahova, pontho khalani dzololo toera kupibvera. (Num. 9:17) Bverani akulu a mpingo mu ndzidzi unapereka iwo uphungu na pitsogolero.—Aheb. 13:17

ONANI VIDHYU YA NSOLO WAKUTI NÃO TEMAM A PERSEGUIÇÃO, BULUKA PENEPO TAWIRANI MIBVUNDZO IYI:

• Ninji pikhagopa abale na alongo adalongwa mu vidhyu?

• Ninji pidaaphedza toera kukunda kugopa?