Ife tiri na mavidhyu manai analonga pya pfundziro ya Bhibhlya toera kuaphatisira mu utumiki. Mphapo ndi cipi cifuniro ca vidhyu ibodzi na ibodzi?

• Thangwi Yanji Tisafunika Kupfundza Bhibhlya?​—Vidhyu Yonsene yacitwa toera kuphedza anthu kuti afune kupfundza Bhibhlya mwakukhonda tsalakana uphemberi wawo. Isakulumiza anthu toera kusaka m’Bhibhlya mitawiro ya mibvundzo yakufunika kakamwe thangwi ya umaso, pontho isatawira ubodzi mwa mibvundzo ineyi. Iyo isapangizambo kuti munthu anaphemba tani pfundziro ya Bhibhlya.

• Thangwi Yanji Tisafunika Kupfundza Bhibhlya? (vidhyu yakubvira) ndi ibodzi ene na vidhyu yakutoma, mbwenye iyi iri na mphindi ibodzi na masegundu 17. Iyo inaphedza kakamwe mupisa pyakuti anthu nee ali na ndzidzi uzinji toera kucedza.

• Pfundziro ya Bhibhlya Isacitwa Tani? yacitwa toera kuphedza anthu kuti afune kupfundza Bhibhlya mwakukhonda lipa. Kusiyapo pyenepi, isatawira mibvundzo yakuti kazinji anthu asaicita thangwi ya pfundziro ya Bhibhlya, pontho isalonga kuti munthu anaphemba tani pfundziro ya Bhibhlya.

• Bem-Vindo ao Seu Estudo da Bíblia yacitwa toera kupangiza anyakupfundza Bhibhlya. Maseze vidhyu ineyi isagumanika pa tsamba yaciwiri ya bukhu Seja Feliz Para Sempre!, imwe munakwanisambo kuipangiza mu ndzidzi unatomesa imwe pfundziro na bhruxura Tsandzayani na Umaso Kwenda na Kwenda! Pontho isaphedza nyakupfundza toera kudziwa pinthu pinagumanika m’bukhu na pinthu pinafuna kucitwa mu ndzidzi wa pfundziro.

Maseze vidhyu ibodzi na ibodzi iri na cifuniro cace, imwe munakwanisa kupangiza peno kutumizira anthu ibodzi mwa mavidhyu anewa khala ndi pyakufunika. Amwazi mphangwa asafunika kudziwa mwadidi mavidhyu anewa na kuaphatisira mwadidi mu utumiki.