Misonkhano ya basa ya m’munda ndi ninga misonkhano yonsene ya mpingo, thangwi yonsene ndi masasanyiro a Yahova akuti asatiphedza toera kuwangisana unango na ndzace, kupangiza ufuni na kuphata mabasa adidi. (Aheb. 10:24, 25) Nsonkhano wa basa ya m’munda usafunika kucitwa nkati mwa mphindi zixanu peno zinomwe, pyenepi pisaphataniza kugawa abale na alongo, kuapanga cisa cinafuna kuenda iwo kamwaza mphangwa na kucita phembero. (Mbwenye, ungacitwa pakumala kwa misonkhano ya mpingo, usafunika kumala mphindi zakucepa kakamwe.) M’bale anafuna kutsogolera asafunika kukhunganyika mphangwa zakuti zinaphedza abale na alongo anafuna kubuluka mu utumiki pa ntsiku ineyi. Mwacitsandzo, khala abale na alongo azinji adagumanika pa nsonkhano wa basa ya m’munda n’Sabudu nee abuluka mu utumiki pakati pa sumana, m’bale anatsogolera asafunika kulonga pinthu pyakuti pinaphedza amwazi mphangwa kudziwa pinafuna iwo kulonga kuna mwanaciro nyumba. Ndi mphangwa zipi zinango zakuti m’bale anatsogolera nsonkhano wa basa ya mʼmunda anakwanisa kuziphatisira?

• Khundu yakuti mafala toera kutomesa makani inagumanika mu Umaso Wathu Wacikristu na Utumiki—Programu ya Misonkhano

• Pinthu pinacitika ntsiku na ntsiku peno mphangwa zinalonga pinthu pinacitika n’dziko toera kutomesa makani

• Tinatawira tani munthu angatigwanda mafala

• Tinatawira tani munthu anakhonda kukhulupira kuti Mulungu alipo, anakhonda kutawira kuti ndi Mulungu adacita pinthu pyonsene, munthu analonga cilongero cinango, peno munthu wakuti uphemberi wace nee usadziwika kakamwe mucisa canu

• Tinaphatisira tani websaiti yathu ya jw.org, JW Library^® peno Bhibhlya

• Tinaphatisira tani maferamentu anagumanika m’Bokosi Yathu Yakupfundzisa

• Tinamwaza tani mphangwa mukuphatisira telefoni, kulemba matsamba, kumwaza mphangwa m’mbuto zinagumanika anthu azinji, kucita maulendo akubwereza peno kucitisa mapfundziro a Bhibhlya

• Kukumbusa abale na alongo toera afambe mwakutsidzikizika, kucinja njira yakumwaza mphangwa mwakubverana na pinacitika, kupangiza makhaliro adidi na pinthu pinango

• Phatisirani pfundziro ya bhruxura yakuti Wangisirani Toera Kuleri Mwadidi na Kupfundzisa, peno vidhyu inalonga pya pfundziro ineyi

• Longani kuti abale peno alongo anawangisana tani, pontho anaphedzana tani mu ndzidzi unamwaza iwo mphangwa

• Longani lemba yakuti isabverana na basa yakumwaza mphangwa, peno citsandzo cakuwangisa thangwi ya pinthu pidacitikirwa na anango mu utumiki