KUKHALA MASO NINGA AKRISTU
Tinacitanji Tingagumana Mwanang’ono Panyumba
Tingagumana mwanang’ono panyumba, tisafunika kuphemba toera kulonga na anyakubalace. Pyenepi pinapangiza kuti tisalemedza utongi wa anyakubala. (Mis. 6:20) Mwana angatiphemba toera kupita n’nyumba nee tisafunika kutawira. Khala anyakubala nkhabepo, tinakwanisa kubwerera ndzidzi unango.
Khala mwana ndi wathunga, panango wakuti ali nkati mwa pyaka 15 mpaka 19, mphyadidi kuphemba toera kulonga na anyakubalace. Tingakhonda kugumana anyakubalace panyumba, tinakwanisa kumbvundza: ‘Anyakubalako asakutawirisa kusankhula mphangwa zinafuna iwe kuleri?’ Angatawira kuti inde, tinakwanisa kumpasa bukhu mbatimpanga toera kupita mu site jw.org.
Tingacita ulendo wakubwereza kuna mwana wathunga adapangiza cifuno, tisafunika kumphemba toera tionane na anyakubalace. Pyenepi pinatipasa mwai toera kuafokotozera cifuno cathu cakubwera panyumba pawo na kupangiza kuti uphungu wa Bhibhlya ndi wakunyindirika, pontho usaphedza mabanja. (Masal. 119:86, 138) Kupangiza cilemedzo na citsalakano kuna anyakubala kunakwanisa kupereka umboni wadidi, pontho kunatipasa miyai inango toera kumwaza mphangwa zadidi kuna banja ineyi.