Sɛ ɛkɔ ewiase nekaa biala a, nzue bɔ ɔtɔ ɛlɛsaen ne, oyi sɛkye nningyein paa. Nea bɔ yeti yeɛ yɛkã sɔ ɔ:

•   ‘Nzue kandinga bie tɔle China Ahenguro nu fili Fue oodwuli Mmenaa, na kɔyɛ kyɛ afoɛ 140 ɛhe ne, ebie tɔlle sɔ lle. Nzue ne tɔle alaa maa sɛ ne ebie gyina nu a, ɔkɔdeda ye sisia’—AP News, August 2, 2023.

•   ‘Mvrama kandinga bie bɔ bɛfrɛ ye Typhoon Khanun tuli Japan maen ne ngwaen. Otuli ɛlɛnyɔ, na kyẽa bɔ ɔtɔ so nyɔ ne, nzue kandinga bie tɔle. Na ɔkɔyɛ kyɛ mmenia nyɔ yeɛ bewuli ɔ. Ɔnate sɔ mvrama nati, bekyire kyɛ, nzue kandinga bie kɔtɔ wɔ Central Taiwan mmokaa nanu dɔ.’—Deutsche Welle, August 3, 2023.

•   “Nzue kandinga bie yi fale [Nova Scotia] dapɛen he ayieleɛ. Kɔyɛ kyɛ afoɛ 50 ɛhe ne, ɛhe yeɛ ɔte nzue kandinga paa bɔ watɔ Canada maen ne nekaa bɔ ɔwɔ Atlantic po ne noa ne.”—BBC News, July 24, 2023.

 Nzu yeɛ Bible ne kã fa ɛhemɔ nwo ɔ?

 Bible ne ma yenwu kyɛ, mmerɛ bɔ yɛte nu ne te “ayieleɛ mmerɛ.” (2 Timoteo 3:1) Yesu hyɛle ngɔm kyɛ, yɛ mmerɛ he anu ne, “nningyein suronyisuronyi” anaa nningyein bɔ otu ahõne kosisi. (Luka 21:11) Ewienu tebea bɔ wasesã nati yeɛ wamaa sɔ nningyein hemɔ taa sisi ne. Sɛ osisi koso a, ɔyɛ suro, na ɔsɛkye nningyein.

 Bible ne maa yenwu kyɛ sɔ nningyein nemɔ bɔ osisi ne kyire kyɛ anyelasoɛ wɔ berɛ. Nzuati ɔ? Yesu hãne kyɛ: “Sɛ ɛmɔnwu kyɛ sɔ nningyein hemɔ besisi a, odi kyɛ ɛmɔnwu kyɛ Nyameɛ ahennie ne apingye.”—Luka 21:31; Mateo 24:3.

 Sɔ nningyein bɔ osisi ne, ɔmaa yenwu kyɛ, ɔngɔhyɛ Nyameɛ ahennie ne kɔye nningyein bie tekyɛ mvrama bɔ ye noa yɛ se, ɔne nzue bɔ oyi sɛkye nningyein ne kofi berɛ.—Yob 36:27, 28; Edwein 107:29.

 Kyɛbɔ Nyameɛ Ahennie ne kosiesie aseɛ ne, sɛ ɛpena kyɛ enwu yenwo dwirɛ pẽe a, yede kengã sɔ dwirɛ he: “Who Will Save the Earth?”