Ɛlɛsaen, basabasa bɔ ɔkɔ so wɔ amanyɔnzɛm nu ne, wasone paa, na wamaa esuronyi ahã mmeni pee.

•   Sɛ ɛkɔ Mexico a, amanyɔfoɛ 39 bɔ bahũ bɛ, ɔne basabasa bɔ ɔkɔ so wɔ amanyɔnzɛm nu nati, mmeni pee nala ayɛ b’adwene kyɛ bɛngɔfa bɛnwo bengowura 2023-2024 abatoɔ bɔ ɔkɔhɔso nanu.

•   Ɛlɛsaen basabasa bɔ bɛyɛ ye wɔ amanyɔnzɛm nu wɔ Europe ne, wahɔ anyunu paa, na nu ko yeɛ ole Slovakia prime minister bɔ ahaa bekũ ye May 15, 2024 ne.

•   Nikyee ko bɔ wamaa esuronyi atɔ Americafoɛ so, yeɛ ole bɛ prɛsedɛnt dáa bɔ bɛfrɛ ye Donald Trump bɔ ahaa bekũ ye July 13, 2024 ne.

 Nzuati yeɛ basabasayɛlɛ kɔso wɔ amanyɔnzɛm nu sɔ ne? Aso yebo kɔpɛ? Nzu yeɛ Bible ne kã fa yenwo ɔ?

 Bible ne frɛ mmerɛ bɔ yɛwɔ nu ne “ayieleɛ mmerɛ,” na ɔhã tole berɛ kyɛ subaen bɔ mmeni pee konya ye sɔ mmerɛ ne, ɔkɔmaa basabasayɛlɛ kɔhɔ ye nyunu paa.

•   “Ayieleɛ mmerɛ ne, mmerɛ bɔ nu yɛ se kɔwa. Ofikyɛ mmenia kɔyɛ . . . boniayɛfoɛ, . . . amvamvirifoɛ, . . . bɛ bɔ bɛ ti anu te awosii, bɛ bɔ bɛpo nikye paa biala, bɛ bɔ bɛye bɛ mmango mɔ bɛma, asobrakyeɛfoɛ, bekoli bɛ ti piri.”—2 Timoteo 3:1-4.

 Bible ne sa hane kyɛ, sɔ mmerɛ ne, basabasayɛlɛ kɔhɔ so. Sɔ basabasayɛlɛ ne bie yeɛ ole atua bɔ mmenia te tia awaen, ɔne amanyɔnzɛm nu ngondii. (Luka 21:9) Nakoso sɔ nningyein hemɔ ngɔtena berɛ afebɔɔ.

 Bible ne amaa yanwu kyɛ, Nyameɛ kɔye sona ahennie mukoraati kofi berɛ, na ɔkɔfa ye bɔbɔ ye ahennie deɛ ne koosi ye gya nu.

•   ‘Nyameɛso Nyameɛ kɔma ahennie bie kɔye ye ti. . . . Sɔ ahennie ne kɔsɛkye ahennie nemɔ amukoraa maa bɛkɔbɔ bɔkɔɔ, nakoso ye de, okogyina afebɔɔ.’—Daniel 2:44.

 Nyameɛ Ahennie ne kɔmaa mmenia mukoraati kɔyɛ kõ, na ɔkɔmaa asomdwee kɔwa wiase nekaa biala.

•   Yesu Kristo bɔ ɔte ahennie naso hene ne, bɛfrɛ ye “Asomdwee Hene,” na ɔkɔnea maa “asomdwee kɔhɔ so kɔtrɛ bɔ olle ayieleɛ ɔ.”—Yesaya 9:6, 7.

•   Ɛnnɛ po, bɛbɔ sɔ Ahennie ne di bɛ so ne, bɛbɔ mmɔden kyɛ bɛne mmenia kɔtena asomdwee nu. Bible ne kã kyɛ: “Bɛkɔboro bɛ ngrandɛ bɛkɔfa bɛkɔbɔ kona, ná baboro bɛ pealɛɛ bafa babɔ asɔsɔaa. Maen bie ngɔhwe obiɛngo maen so ngrandɛ, na bengosua koɛhonɛ ko.”—Yesaya 2:3, 4.

 Sɛ ɛpena ɛhe anwo dwirɛ pee a, kenga “Dɛn na Onyankopɔn Ahenni Bɛyɛ?” Na nea video bɔ yeɛ ole Nzu Yeɛ Ole Nyameɛpiri Ahennie?