Bible ne maa yenwu kyɛ Amagedon kõɛ ne, ɔtte kõɛ bɔ ɔkɔhɔso wɔ ewiase nekaa kãa bie ɔ. Na mmom, ɔte kõɛ bɔ ɔkɔhɔso wɔ Nyameɛ ne awaen ahoroɛ bɔ bɛwɔ wiase mukoraati ne afĩa ɔ.

•   “Bɛte sunzummɔne . . . bɔ bɛkɔ wiase amukoraa ahemvo mɔ so aporɔ bɛboaboa bɛ noa bɛma koɛ wɔ Tuminiɛ Nyameɛ ye kyẽa piri ne ɔ. . . . Na bɛboaboale bɛ noa wɔ nekaa bie bɔ Hebri dwudwolɛ nu bɛfrɛ berɛ Amagedon.”—Nyekyire 16:14, 16.

 Edwirɛ “Amagedon” ne, bɛye befili Hebri dwirɛ Har Meghid·dohnʹ nu, na bɔ okyire yeɛ ole “Megido Bokaa.” Né Megido te kuro bɔ ɔwɔ tete Israel ɔ. Ɛhẽne ati, ebiemɔ susu kyɛ Amagedon kõɛ ne kɔhɔso wɔ Israel maen nanu. Nakoso, sɛ bɛboa “wiase amukoraa ahemvo,” ne b’asogyafoɛ nemɔ noa a, aso bɛkɔhɔ Megido, anaa maen bɔ bepingye Israel berɛ nanu anaa?

 Edwirɛ bɔ ɔwɔ Nyekyire nwomaa nanu ne, ɛyɛ a né ogyi berɛ ma nikyee bie. (Nyekyire 1:1) Amagedon tte kuro, anaa maen pɔtẽe bie. Na mmom ɔte mmerɛ bɔ maen bɔ bɛwɔ aseɛ he aso mukoraati ne kɔhã bɛnwo kɔbɔ nu, na badwɔso batia Nyameɛ ahennie ne.—Nyekyire 19:11-16, 19-21.