Sɛ ɛkɔ ewiase nekaa biala a, mmeni pẽe yeɛ batua bɛnwo naen ɔ.

•   “Sɛ bɛkã kyɛ ebie atua yenwo naen a, bɔ okyire yeɛ ole kyɛ, okyi kaka nwo nikyee biala. Yeti sɛ bɛfa kaka bɛyɛ aleɛ oo, ataadeɛ oo, onguro. Sɔ mmenia nemɔ le adwene bie kyɛ sɛ ebie kũ kaka po a, okyire kyɛ ye tianu yɛ se.”—The Vegan Society.

 Bɔ ɔmaa ebiemɔ tua bɛnwo naen yeɛ ole kyɛ, besusu kyɛ ɔnzɛkyɛ ebiala ha ngaka nemɔ. Ebiemɔ koso wɔ berɛ a, besusu kyɛ kaka nwo hia alaa maa yeti ɔnzɛkyɛ bekũ bɛ. Afei ebiemɔ koso le adwene kyɛ sɛ baani naen a, ɔkɔmaa bekonyi bɛkɔhyɛ. Yeɛ ebiemɔ koso, ɔnate asɔre bɔ bɛkɔ nati, besusu kyɛ ebie di naen a wayɛ bɔne.

•   “Bɛbɔ batua bɛnwo naen ne, nna kyɛ naen deinn yeɛ benguro ɔ, na mmom besusu kyɛ sɛ ebie di a, wayɛ bɔne. Yeti benyane a, ahaa ebiala ahora ayɛ sɔ. Afei besusu kyɛ sɛ mmenia mukoraati kora yɛ bɔ bɛyɛ ne bie a, ahaa nningyein kɔhɔ yé wɔ ewiase nanu.”—Britannica Academic.

 Aso ɔte amba kyɛ, sɛ ebiala tua yenwo naen a, ɛhẽne yeɛ ɔkɔmaa nningyein kɔhɔ yé wɔ ewiase he anu ɔ? Nea bɔ Bible ne kã fa ɛhe anwo ɔ.

 Bible ne maa yenwu kyɛ, mmerɛ bɔ Yehowa a bɔle sona ne, ɔfale ngaka wurale yesa kyɛ ɔnea bɛso. Ɛhẽne ati, sɛ ɛfa ngaka toto sona nwo a, ɔnyɛ yé. (Gyenesise 1:27, 28) Odwuli mmerɛ bie ne, Nyameɛ hãhyirele sona kyɛ ɔkɔhora kohũ ngaka ne bie koli. (Gyenesise 9:3) Nakoso, Nyameɛ nguro kyɛ yɛkɔyɛ ngaka nemɔ ayayadeɛ.—Anyandera 12:10.

 Kyɛ ebie koli naen, anaa ongoli ne, ɔte ye bɔbɔ ye dwirɛ, Bible ne nhyehyɛ mmraa biala wɔ ɛhe anwo. b Bɛbɔ bedi naen, ɔne bɛbɔ benni ne, Nyameɛ bu bɛmukoraati pɛ. (1 Korintofoɛ 8:8) Sɛ ebie kã kyɛ, yede naen biala bɔ okonya ne okoli, na ebie koso nwa ongoli a, ɔnzɛkyɛ yedwudwo yetia benu biala, anaa yebu bɛ atɛn.—Romanfoɛ 14:3.

 Mmenia bɔ bedi tumi ne, bɛboka so bie yeɛ wamaa nningyein ayɛ basaa wɔ ewiase nanu ne. Yeti, sɛ ebie di naen oo, onni oo, ɔnga huu, ofikyɛ nna ɛhẽne yeɛ ɔbaasesã ewiase ne ɔ. Bible ne kã kyɛ:

•   “Nikyee bɔ wakondo ne, bɛngɔhora ye tengyɛ.”—Nworɛ Dwirɛhanɛniɛ 1:15.

 Nyameɛ bɔ ɔbɔle yɛ ne, ye ngome twé yeɛ ɔkɔhora kɔye ɔhaw bɔ yɛ fanu namukoraati kofi berɛ ɔ. Atẽe bɔ Nyameɛ kɔfaso kɔye sona haw kofi berɛ ne, sɔa yeɛ Bible ne kã yenwo dwirɛ ɔ:

•   “Na nwuni nyameɛso foforɛ ne aseɛ foforɛ; ofikyɛ né nyameɛso bɔ oli moa ne ne aseɛ bɔ oli moa ne bapɛ nu bahɔ, yeɛ né ɛpo nne berɛ ko.”—Nyekyire 21:1.

 Nyameɛ kɔye sona awaen bɔ ogyi berɛ ma “nyameɛso bɔ oli moa” ne kofi berɛ. Na “nyameɛso foforɛ” bɔ ogyi berɛ ma Nyameɛ Ahennie ne, yeɛ okoli aseɛ he aso ɔ. Afei koso, ɔkɔye “aseɛ bɔ oli moa,” kyire kyɛ, mmenia bɔ bɛyɛ nningyein bɔ ɔttemayé ne kofi berɛ. Sɔ mmerɛ ne, “aseɛ foforɛ,” anaa bɛbɔ bekuro kyɛ Nyameɛ di bɛ so ne, yeɛ bɛkɔtena aseɛ naso ɔ.

 Sɛ Nyameɛ Ahennie ne hyɛ yebo kyɛ odi aseɛ he aso a, sɔ mmerɛ ne yeɛ sona ne ngaka kɔtena asomdwee nu ɔ. Afei koso, sɔ mmerɛ ne, nikyee biala kɔhɔ yé wɔ aseɛ he aso.—Yesaya 11:6-9.