ƐMƆHƆSO BƐWƐNE!
Bayɛ Wɔɔkye Bie Bɔ Bɛfrɛ Ye Doomsday Clock, Na Okyire Kyɛ Waha Kãa Bie Na Aseɛ Ne Asɛkye—Nzu Yeɛ Bible Ne Kã Fa Yenwo Ɔ?
Sɛ ɛnea Doomsday Clock a naso a, ekonwu kyɛ bɛbɔ bɛyɛ abɔdeɛ nu nhwehwɛmuɛ ne, babri wɔɔkye ne bato nekaa bie bɔ okyire kyɛ waha kãa bie na aseɛ ne asɛkye. January 24, 2023 yeɛ bɛyɛle sɔ ɔ.
“Ebiemɔ susu kyɛ, ‘Doomsday Clock’ ne gyĩ berɛ ma nningyein bɔ osisi bɔ ɔkɔhora kɔmaa aseɛ he kɔsɛkye ɔ. Ɔnate kõɛ bɔ ɔkɔso, ɔne bɔmb bɔ bɛfa bɛsɛkye nningyein wɔ Ukraine nati, wɔ January 24 ne, bɛ brili wɔɔkye ne bɛtole nekaa bie bɔ okyire kyɛ, waha kãa bie na aseɛ ne asɛkye.”—AFP International Text Wire.
“Dwirɛ, January 24 ne, bɛbɔ bɛyɛ abɔdeɛ nu nhwehwɛmuɛ ne brili ‘Doomsday Clock’ ne tole 90 sekɛns—ɛhe kyire kyɛ, waha kãa bie na ewiase ne asɛkye.”—ABC News.
“Bɛbɔ bɛyɛ abɔdeɛ nu nhwehwɛmuɛ wɔ ewiase mukoraati ne, bafa kɔkɔbɔ bie bato dwaa kyɛ, nningyein bɔ mmenia yɛ ye ɛlɛsaen ne, ɔkɔhora kɔmaa aseɛ ne kɔsɛkye.”—The Guardian.
Aso aseɛ he kɔsɛkye anaa? Aso bɔ okosi kyẽabie nati, odikyɛ yesuro anaa? Nzu yeɛ Bible ne kã fa yenwo ɔ?
Nzu yeɛ okosi kyẽabie ɔ?
Bible ne kã kyɛ, “aseɛ de, otimu berɛ afebɔɔ” afei koso mmenia “kɔtena so afebɔɔ.” (Nworɛ Dwirɛhanɛniɛ 1:4; Edwein 37:29) Ɛhẽne kyire kyɛ, ɔmva yenwo ne bɔ sona kɔyɛ biala ne, bɛngɔhora bɛngɔsɛkye aseɛ he llé, na mmom mmenia kɔtena so daa.
Nakoso, Bible ne maa yenwu kyɛ ewiase he kɔhɔ ye ayieleɛ. Sɛ yɛkɔyɛ ɛhe anwo nneasoɛ a, Bible ne kã kyɛ: ‘Ewiase ne, ɔne nu akɔnnɔ gu so ɔpɛ nu kɔ.’—1 Yohane 2:17.
Sɛ ɛpena kyɛ enwu bɔ Bible ne kã fa ewiase ayieleɛ nanwo a, yede yɛsrɛ wɔ kenga sɔ dwirɛ he wɔ Twi nu: “Wiase Yi Reba Awiei Anaa? Bible Aka Sɛ Biribiara Bɛsɛe Anaa?”
Sɛ ɛpena kyɛ enwu bɔ Bible ne kã fa nningyein bɔ okosisi kora na ewiase he ahɔ ayieleɛ a, yede yɛsrɛ wɔ kenga sɔ dwirɛ he wɔ Brɔfo nu: “When Will the World End?”
Kae Kyɛ Nningyein Kɔyɛ Yé
Ɔmva yenwo ne ɔhaw bɔ ɔkɔso ɛnnɛ ne, kae kyɛ Bible ne maa yenwu kyɛ nningyein kɔyɛ yé. Atẽe beni so?
Bible ne ma yɛ afutue bɔ ɔboka yɛ wɔ yɛ asetena nu ɔ. (2 Timoteo 3:16, 17) Yɛsrɛ wɔ kenga sɔ dwirɛ he wɔ Brɔfo nu: “How to Control Worry” na ɔkɔmaa ekonwu kyɛ sɛ eyia ɔhaw pó a, nningyein kɔyɛ yé kyẽabie.
Bible ne ma yɛ kyẽabie nwo anyelasoɛ bɔ odimũ ɔ. (Romanfoɛ 15:4) Bible ne maa yɛte nningyein bɔ osisi wɔ ewiase ɛnnɛ nabo, na osá maa yenwu kyɛ ɔmva yenwo kyɛ nningyein ngoyé ne, anyelasoɛ wɔ berɛ.
Sɛ ɛpena kyɛ enwu pẽe fa bɔ Bible ne kã nanwo a, yede yɛsrɛ wɔ, maa yɛne wɔ sũa Bible ne bɔ engotua hwee ɔ.
a “Doomsday Clock ne te wɔɔkye bie bɔ bayɛ ɔ, na besusu kyɛ okyire nningyein bɔ sona ayɛ, bɔ ɔkɔhora kɔsɛkye aseɛ ne ɔ. Bɛfa sɔ wɔɔkye ne bɛkae yɛ kyɛ, nningyein bɔ ɔkɔso wɔ ewiase he anu ne, sɛ sona anyɛ yenwo hwee a, ɔkɔmaa aseɛ ne kɔsɛkye.”—Bulletin of the Atomic Scientists.
Wɔnye Kɔgye Ɛhe Koso Nwo
ESSENTIAL BIBLE TEACHINGS
Nzuati Yeɛ Nyameɛpiri Ma Atẽe Maa Amaneɛnwunɛ Kɔ So Ɔ?
Mmeni pẽe bisa bɔ yeti yeɛ ɛpɔen ne amaneɛnwunɛ abu so wɔ ewiase sɔ ɔ. Bible ne fa mmuaeɛ bɔ enu la berɛ, na osa te awerɛkyekyerɛ koso ma.
ESSENTIAL BIBLE TEACHINGS
Nzuati Yeɛ Nyameɛpiri Bɔle Aseɛ Ne Ɔ?
Y’aseɛ ne yɛ nyemene paa. Bafa aseɛ ne basĩnze nekaa páa bɔ eyia ngɔhora ngɔzɛkye ye ɔ, ɛhe ti ɔkora pɛ yenwo kyɛbɔ okuro biala bɔ hwee nzi y’atẽe ɔ. Nzuati yeɛ Nyameɛpiri lɛle mmerɛ bɔle aseɛ ne kama sɔ ɔ?
YƐNWO DWIRƐ
Má Ebie Ne Wɔ Beesũa Bible
Ɛmɔsusu Bible nu nzɛmmisa bie, anaa sũa pẽe fa Yehowa Adanzefoɛ nwo.
