Ɔnate kõɛ bɔ ɔkɔso wɔ Ukraine, ɔne kyɛbɔ ɛlɛsaen nzue ndɔ wɔ mmerɛ bɔ odikyɛ ɔtɔ nati, wamaa aleɛ nwo ayɛ se wɔ ewiase mukoraati. Ɛhe amaa maen ahoroɛ biemɔ bɔ wahia bɛ ne, wayɛ se wama bɛ paa kyɛ bekonya aleɛ bekoli ɔ.

•   “Ɛlɛsaen nzue ndɔ wɔ mmerɛ bɔ odikyɛ ɔtɔ ɔ, na daabiala bɛtoto nningyein nu, na ɛhẽne yeɛ wamaa aleɛ nwo ayɛ sɔ ne. Kõɛ bɔ ɔkɔso ne koso boka so bie.”—António Guterres, UN secretary-general, July 17, 2023.

•   “Ɛyɛ a bɛfa aleɛ biemɔ tekyɛ aburoo, ɔne atokoɔ befi Ukraine maen nanu bɛkɔ maen ahoroɛ biemɔ so. Nakoso ɛlɛsaen Russia maen ne nwa, bɛngɔma atẽe maa bɛngɔfa sɔ aleɛ nemɔ bɛngɔpɛ nu wɔ bɛ maen naso kõ. Ebiemɔ kã kyɛ annea a, ɛhe kɔmaa maen ahoroɛ biemɔ bɔ wahia bɛ ne, aleɛ nwo kɔyɛ se paa wɔ berɛ. Na bɛbɔ bekoli amia paa yeɛ ole, maen ahoroɛ bɔ ɔwɔ North Africa, ɔne Middle East ne.”—Atalayar.com, July 23, 2023.

 Yede kyɛbɔ aleɛ nwo ayɛ se ne, nzu yeɛ Bible ne kã fa yenwo ɔ? Ɛnea a, nningyein kɔyɛ yé kyẽabie?

•   Yesu hyɛle ngɔm kyɛ: ‘maen kodwɔso kotia maen, ahennie kodwɔso kotia ahennie, yeɛ ɛhɔen kɔwa.’—Mateo 24:7.

•   Bible nu nwomaa bɔ bɛfrɛ ye Nyekyire ne, ɔkã mmenia nna biemɔ bɔ bɛtete pɔngɔ so nwo dwirɛ, na benu biala gyi berɛ ma nikyeebie. Benu kõ gyi berɛ ma kõɛ, yeɛ kõ koso gyi berɛ má ɛhɔen. Ɛhe maa yenwu kyɛ, né mmerɛ bie kɔwa bɔ aleɛ nwo kɔyɛ se alaa maa mmenia ngɔhora ye tɔ ɔ. Nyekyire nwomaa ne bue bie kã kyɛ, ‘Nneane, yieee, pɔngɔ bire bie, na né bɔ ɔte ye so ne otira tonyi. Na ndele komviɛ bie kyɛ, “Aburoo kongo ko te denare ko, yeɛ atokoɔ kongo nza te denare ko.’—Nyekyire 6:5, 6.

 Aleɛ bɔ Bible ne hãne kyɛ yenwo kɔyɛ se ne, ɛnnɛ paa yeɛ sɔ dwirɛ ne awa nu ɔ. Bible ne kã kyɛ yɛwɔ “ayieleɛ mmerɛ” nanu. (2 Timoteo 3:1) Sɛ ɛpena kyɛ enwu “ayieleɛ mmerɛ” ne, ɔne mmenia nna bɔ bɛtete pɔngɔ so nanwo dwirɛ pẽe a, nea vidio bɔ yeɛ ye ole, Ewiase Ne Asesã Fi Afoɛ 1914, na kenga sɔ dwirɛ he wɔ Twi nu: “Nnipa Nnan a Wɔtete Apɔnkɔ So—Wɔyɛ Nnipa Bɛn?”

•   Ɔhaw bɔ yeyia ye ɛnnɛ ne, Bible ne maa yenya afutue pẽe bɔ ɔkɔhora kɔboka yɛ maa yekogyina yenoa ɔ. Sɔ ɔhaw ahoroɛ bɔ yɛkã yenwo dwirɛ ne, ebie yeɛ ole kyɛ ɛlɛsaen aleɛ nyɔboɛ ayɛ se, na nekaa bie wɔ berɛ a, sɛ etira esikaa po a, ennya bie ndɔ. Sɛ ɛpena kyɛ enwu ɛhe anwo dwirɛ pẽe a, kenga sɔ dwirɛ he wɔ Borɔfo nu: “How to Live on Less.”

•   Bible ne maa yenya anyelasoɛ kyɛ nningyein kɔyɛ yé kyẽabie. Ɔmaa yenwu kyɛ ‘aleɛ kobu so wɔ aseɛ ne aso,’ na ebiala konya aleɛ koli maa ye ko koyi. (Edwein 72:16) Ɛkɔyɛ sɛɛ ná anya gyidie kyɛ sɔ dwirɛ he kɔwa nu? Yɛsrɛ wɔ, kenga sɔ dwirɛ he wɔ Borɔfo nu, na sũa pẽe boka so: “A Real Hope for a Better Tomorrow.”