Mmerɛ bie bɔ wapɛ nu ne, behũhũni mmeni pẽe wɔ kõɛ nu. Yeti sɛ odwu January 27, 2023 a, mmeni pẽe kɔkae bɛ wɔ ewiase mukoraati. Sɔ dwirɛ ne sili ne, afoɛ 75 apɛ nu. Yeti ebia ekobisa kyɛ, nzuati yeɛ Nyameɛ mane yenwo atẽe maa behũhũni mmeni pẽe sɔ ɔ?

•   Sɛ ɛpena kyɛ enwu bɔ Bible ne kã fa yenwo a, yede yɛsrɛ wɔ, kenga sɔ dwirɛ he wɔ Twi nu, “Adɛn Nti Na Onyankopɔn Maa Kwan Maa Nasi Aban No Kunkum Nnipa Pii? Adɛn Nti Na Wansiw Ano?”

 Kyɛbɔ Yudafoɛ nemɔ nwuni amaneɛ wɔ sɔ kõɛ nanu ne, né ɔyɛ aworabɔ paa. Behũhũni mmeni pẽe. Na bɔ ɔyɛ yea ne, mmenia bɔ bɛyɛlle bɔne biala pó ne, bɛyɛle bɛ ayayadeɛ na behũhũni bɛ. Na Yehowa Adanzefoɛ koso, ɔnate bɛ gyidie bɔ ogyĩ Bible so nati, bɛyɛle bɛ ayayadeɛ paa.

•   Sɛ ɛpena kyɛ enwu pẽe bokaso a, yede yɛsrɛ wɔ, kenga sɔ dwirɛ he wɔ Twi nu, “Dɛn Na Ɛtoo Yehowa Adansefo Bere a Nasi Aban Kunkum Yudafo Pii Wɔ Wiase Ko II Mu No?”

 Mmeni pẽe nala suro kyɛ kõɛ bɔ behũhũni mmeni pẽe wɔ nu ne, okosá kosi biekũ. Nakoso, ɔyɛ yɛ fɛ paa kyɛ, Bible ne kã kyɛ, ɔngɔhyɛ sɔ nningyein namukoraati kofi berɛ.

•   “Ofikyɛ mese adwene horɛ bɔ medwene mefa ɛmɔ nwo ɔ, AWURADE noa dwirɛ ɛne; yieyɛlɛ nwo adwene, nna bɔne adwene ɔ; kyɛ ngɔma ɛmɔkonya ayieleɛ pá ne anyelasoɛ.”—Yeremia 29:11. a

 Sɛ sɔ dwirɛ ne kɔwa nu a, sana Nyameɛ ye abɔnefoɛ ne nningyein tɛ́ɛ bɔ ɔkɔso namukoraati fi berɛ. Yeti ɔngɔhyɛ biala:

•   Abɔnefoɛ bɔ bɛmma mmenia nwo ndɔ bɛ ne, ɔkɔye bɛ kofi berɛ.—Anyandera 2:22.

•   Ɔkɔye amaneɛnwunɛ mukoraati kofi berɛ.—Nyekyire 21:4.

•   Okotingyé bɛbɔ bawuwu ne maa bɛkɔtena aseɛ he aso.—Yohane 5:28, 29.

 Nya gyidie kyɛ, edwirɛ bɔ Bible ne kã fa kyẽabie nwo ne, ɔkɔwa nu. Sɛ ɛpena kyɛ enwu ɛhe anwo dwirɛ pẽe a, yede maa yɛne wɔ sũa Bible ne bɔ engotua hwee ɔ.