United Nations bɔ amaneɛ kyɛ:

•   Ofi October 7 bɔ ɔbaadwu October 23, 2023 ne, mmenia 6,400 yeɛ bawuwu wɔ Gaza ne Israel koɛ nanu ɔ, na mmenia 15,200 yeɛ bapirapira ɔ. Sɔ mmenia ne, enu kaa bie yeɛ bɛte sogyafoɛ ɔ. Na bɛbɔ koɛ natu bafi b’awuro nu ne de, bɛnga.

•   Ɔbaadwu September 24, 2023 ne, né temamufoɛ 9,701 yeɛ bawuwu wɔ Russia ne Ukraine koɛ nanu ɔ, na mmenia 17,748 yeɛ bapirapira wɔ Ukraine ɔ.

 Bɛbɔ koɛ ti benwu amaneɛ ne, anyelasoɛ beni yeɛ Bible ne fa ma bɛ ɔ?

 Bible ne ha tole berɛ kyɛ Nyameɛ kɔmaa ‘koɛ bo kɔpɛ kɔɔdwu aseɛ ne noa dɔ.’ (Edwein 46:9) Awaen ahoroɛ bɔ ɔwɔ berɛ ne, ɔkɔfa ye Ahennie bɔ ɔwɔ anwuro ne koosi yemukoraati gya nu. (Daniel 2:44) Nyameɛ Ahennie ne kɔmaa mmenia konya ahotɔ.

 Wɔde, nea bɔ Yesu, bɔ ɔte Nyameɛ Ahennie naso hene ne kɔyɛ ɔ:

•   “Bɛ bɔ bɛyɛ anwumvo, ahiafoɛ ne bɛ bɔ belle bokafoɛ ne, besu bɛfrɛ ye a, ɔkɔpepɛ kole bɛ. Okonwu ahiafoɛ ne bɛ bɔ bɛyɛ anwumvo ne anwumvoin, na okole ahiafoɛ kra ngoa. Okole bɛ ngoa kofi nhyɛsoɛ ne nzɛmmɔne nu, na bɛ mogya koli mu wɔ ye nye so.”—Edwein 72:12-14.

 Nyameɛ nate ye Ahennie naso kɔye ɔhaw bɔ koɛ afa awa ne amukoraa kofi berɛ.

•   “Okokyikyi bɛ nye abo moen amukoraa. Na ewue nne berɛ ko, aworabɔlɛ ne esuɛ ne yealɛ biala nne berɛ ko, ofikyɛ nningyein daa nemɔ apɛ nu ahɔ.”—Nyekyire 21:4.

 Ɔngɔhyɛ, Nyameɛ ahennie ne kɔmaa nningyein kɔsesa wɔ aseɛ he aso. Bible ne hãne kyɛ yɛkɔte ‘koɛ mɔ, ɔne koɛ nwo amaneɛbɔ,’ na sɔ ala yeɛ ɔkɔ so ɛnnɛ ɔ. (Mateo 24:6) Sɔ nningyein he mukoraati kyire kyɛ yɛte “ayieleɛ mmerɛ” nanu.—2 Timoteo 3:1.