ƐMƆHƆSO BƐWƐNE!
Nzuati yeɛ Ɛpɔen Abu So Sɔ Ne?—Nea Bɔ Bible ne Ka Ɔ
Ɛnnɛ, ɛpɔen, basabasayɛlɛ, abusua nu ngondii, ɔne koɛ yeɛ yɛtaa yɛte yenwo dwirɛ paa ɔ.
“Israel ne Gaza koɛ ne, ɔne bɛbɔ bɛhyɛ afoforɛ ngunaen kyɛ bɛyɛ basabasa nati, ɛnnɛ sɛ ɛkɔ sohyia media so a, alapaa ngome yeɛ mmenia bɔ bɛnwo ɔ.”—The New York Times, November 15, 2023
“Ofi October 7 bɔ ɔba ne, ɛpɔen ne basabasayɛlɛ ahɔ ye nyunu wɔ wiase nanu paa watra mmerɛ biala.”—Dennis Francis, United Nations General Assembly ne president, November 3, 2023.
Mmenia bɔ bɛbɔ bɛnwo alapaa, basabasayɛlɛ, ɔne koɛ bɔ ɔkɔso ne, ɔtte nikyee foforɛ. Tete ne, Bible ne po hane ebiemɔ nwo dwirɛ kyɛ, né ‘bɛ noa yɛ yea kyɛ agyaen.’ Na né ebiemɔ koso nye gye koɛ ne basabasayɛlɛ nwo. (Edwein 64:3; 120:7; 140:1) Nakoso, Bible ne maa yenwu kyɛ, ɛpɔen bɔ ɔkɔso ɛnnɛ ne, okyire nikyee bie.
Ɛpɔen—Ɔte ayieleɛ mmerɛ nanwo nzɛngyerɛneɛ
Bible ne maa yenwu nningyein nyɔ tibɔ ɛpɔen abu so sɔ ne.
1. Ɔmaa yenwu kyɛ, ayieleɛ mmerɛ nanu ne, ‘mmeni pee dɔ noa kodwo.’ (Mateo 24:12) Kyɛ ahaa bɛkɔ dodɔ bɛnwo ne, subaen bɔ bɛkɔla yali ne kɔmaa bɛkɔpɔ bɛnwo mmom.—2 Timoteo 3:1-5.
2. Satan Abɔnzam yeɛ ɔta ɛpɔen ne basabasayɛlɛ bɔ ɔkɔso ɛnnɛ ne si ɔ, ofikyɛ Bible ne ka kyɛ “ewiase amukoraa wura bɔnefoɛ ne bo.”—1 Yohane 5:19; Nyekyire 12:9, 12.
Nakoso, Bible ne sa maa yenwu kyɛ, ɔngɔhyɛ Nyameɛ kɔye nningyein bɔ ɔfa ɛpɔen ba namukoraati kofi berɛ. Afei koso, ɔkɔye ɔhaw bɔ ɛpɔen ti, wawa yɛ so ne kofi berɛ. Bible ne ahyɛ bɔ kyɛ:
Nyameɛ ‘kokyikyi bɛ nye abo moen amukoraa. Na ewue nne berɛ ko, aworabɔlɛ ne esuɛ ne yealɛ biala nne berɛ ko, ofikyɛ nningyein daa nemɔ, bapɛ nu bahɔ.’—Nyekyire 21:4.