Yáa, February 24, 2023 ne, né kõɛ bɔ ɔkɔso wɔ Ukraine ne ali afoɛ kõ. Amaneɛbɔ kyire kyɛ, Ukraine ne Russia asogyafoɛ kɔyɛ apee-yaa-nzã (300,000) yeɛ bawuwu anaa bapirepira ɔ, na bɛbɔ bɛtte sogyafoɛ ne koso, kɔyɛ apee-aburasa (30,000) yeɛ bawuwu wɔ kõɛ nanu ɔ. Nakoso, ebia ɔkɔbo sɔ.

 Nikyefee ngyire kyɛ kõɛ ne bo kɔpɛ ɛnnɛ, anaa ɛhẽma.

•   “Ofi mmerɛ bɔ Russia asogyafoɛ ne hɔle Ukraine maen nanu ne, afoɛ kõ ɛhe, nakoso hwee ngyire kyɛ kõɛ ne bo kɔpɛ ɛlɛsaen ye ala. Nikyefee ngyire kyɛ benu biala di ngunim wɔ kõɛ nanu. Sɛ beyia kyɛ besiesie edwirɛ ne a, benu biala yɛlle ye adwene kyɛ ɔkɔyakyi.”—NPR (National Public Radio), February 19, 2023.

 Ɔyɛ ebiemɔ yea kyɛ sɔ kõɛ he, ɔne kõɛ ahoroɛ bɔ ɔkɔso wɔ ewiase nati, mmeni pẽe nwu amaneɛ ɔ. Yede, anyelasoɛ beni yeɛ Bible ne fa ma ɔ? Aso kyẽabie kõɛ bo kɔpɛ?

 Bible ne kã kõɛ bie nwo dwirɛ, sɔ kõɛ ne de, ɔngɔmaa mmenia ngonwu amaneɛ, mmom, okole bɛ ngõa. Sɔ kõɛ ne yeɛ ole Amagedon, na Bible ne kã yenwo dwirɛ kyɛ yeɛ ole, ‘Tuminiɛ Nyameɛ ne kõɛ ne’. (Nyekyire 16:14, 16) Nyameɛ nate sɔ kõɛ naso kɔsɛkye sona awaen, na ɔkɔmaa kõɛ mukoraati kɔwa ayieleɛ. Nahorɛ nu, Amagedon kõɛ ne kɔfa asomdwee bɔ olle ayieleɛ kɔwa ewiase mukoraati. Sɛ ɛpena yenwo dwirɛ pẽe a, kenga edwirɛ ahoroɛ bɔ oli so ne:

•   “Dɛn Ne Armagedon Ko No?”

•   “Harmagedon Yɛ Asɛmpa!”