Kɔyɛ afoɛ 30 bɔ wapɛ nu ne, né mmeni pee nala nwu ye kyɛ asomdwee wɔ wiase nanu paa. Nakoso kesaalae, nningyein bɔ ɔkɔ so ne, wamaa sɔ adwene ne asesa.

•   “Mmeni pee adwene yɛ bɛ kyɛ annea a, né Gaza koɛ ne atrɛ ahɔ maen ahoroɛ bɔ bapɛ yenwo bayia naso, ofikyɛ ɛlɛsaen, Israel ne kue bie bɔ bɛfrɛ ye Hezbollah ahyɛ yebo bɛko wɔ Lebanon wɛen naso.”—Reuters, January 6, 2024.

•   “Kue biemɔ wɔ Iran, na bahyɛ yebo bɔ bedi bɔne wɔ maen ahoroɛ nu, na Iran koso ahyɛ yebo ɔyɛ bomb bɔ yenoa yɛ hye paa, ɛhe amaa esuronyi aha maen biemɔ, ofikyɛ Russia ne China koso aata Iran si.”—The New York Times, January 7, 2024.

•   “Russia maen ne asa akanyaen yenwo, ná ɔsɛkye nningyein paa wɔ Ukraine maen nanu.”—UN News, January 11, 2024.

•   “Ɛlɛsaen China maen ne ahɔ ye nyunu wɔ sikanzɛm ne akodeɛ nu paa. Na Taiwanfoɛ koso, bɛfa bɛ maen ne bɛhoahoa bɛnwo. Afei kyɛbɔ China ne U.S.A afia ndwo ne, annea yé a, koɛ kɔhora kosi.”—The Japan Times, January 9, 2024.

 Bɔ ɔkɔ so ɛnnɛ wɔ maen nemɔ afia ne, nzu yeɛ Bible ne ka fa yenwo ɔ? Wiase koɛ foforɛ kɔhora kosi anaa?

 Bible ne ammobɔ maen bɔ ngondii kosisi so nemɔ dumaa, nakoso ɔmaa yenwu kyɛ ne ngondii ahoroɛ kɔhɔ so ɛnnɛ, na ‘ɔkɔye asomdwee kofi berɛ.’—Nyekyire 6:4.

 Daniel nwomaa ne ha tole berɛ kyɛ, maen ahoroɛ bɔ bele tumi ne, bɛkɔfa koɛ “kɔteta” bɛnwo wɔ “ayieleɛ mmerɛ” nanu. Sɔ koɛ nemɔ kɔmaa bɛkɔfa akodeɛ pee bekoli dwumaa, na bɛkɔsɛkye “mbembenanneɛ” anaa sikaa pee.—Daniel 11:40, 42, 43.

 Bible ne maa yenwu kyɛ, wiase ne tebea kɔsɛkye kora ne wayɛ yé. Yesu hane kyɛ ‘amaneɛnwunɛ piri bɔ ɔkɔwa ne, ofi mmerɛ bɔ Ɛdangama bɔle wiase bɔ ɔbaadwu ɛnnɛ, ye sɛso ɔwalle le, na sɔ bieku koso ngɔwa le.’ (Mateo 24:21) Sɔ “amaneɛnwunɛ piri” ne kɔfa Amagedon koɛ ne kɔwa, na ɛhene yeɛ Bible ne ka yenwo dwirɛ kyɛ ɔte ‘Otumvoɛ Nyameɛ kyẽa piri ne koɛ ne.’—Nyekyire 16:14, 16. NWT

 Nakoso Amagedon koɛ ne ngɔtɔle sona bo, na mmom okole yɛ ngoa. Nyameɛ nate sɔ koɛ naso kɔye awaen ahoroɛ bɔ odi mmenia so namukoraati kofi berɛ, ofikyɛ sɔ awaen nemɔ nate koɛ so asɛkye nningyein pee. Sɛ ɛpena Amagedon koɛ nanwo dwirɛ pee, ɔne kyɛbɔ ɔkɔfa asomdwee kɔwa wiase a, kenga sɔ dwirɛ hemɔ:

•   “Dɛn Ne Armagedon Ko No?”

•   “Harmagedon Yɛ Asɛmpa!”