ADESŨA 20
DWEIN 67 “Ka Asɛm No”
Ɔnate Ɔdɔ Bɔ Ele Ye Nati, Kɔso Kã Nzɛmba Ne!
“Na nzɛmba ne, odi kyɛ bedi moa bɛkã bekyire maen maen amukoraa.”—MAK. 13:10.
BƆ ADESŨA NE KƆHÃ YENWO DWIRƐ Ɔ
Yekonwu kyɛbɔ ɔdɔ bɔ yele ye ne boka yɛ maa yɛyere yɛnwo yɛyɛ asɛnga adwuma ne.
1. Nzu yeɛ bɛhane yenwo dwirɛ wɔ 2023 afoɛnoa nhyiamu nabo ɔ?
WƆ 2023 afoɛnoa nhyiamu nabo ne, a bɛmaa yenwuni ndeaseɛ foforɛ bɔ yanya ye wɔ Bible nu dwirɛ biemɔ nwo ɔ. Afei koso, bɛhãne edwirɛ bie bɔ ɔyɛ anigye bɛfale asɛnga adwuma nanwo. Bɛmaa yesa yenwuni kyɛ, ebiemɔ konya yenwo atee kɔɔboka bɛbɔ bɛso Yehowa naso, mmerɛ po bɔ basɛkye Babilɔn Pirikua ne bayie ne. Asa koso, ofi November 2023 bɔ ɔba ne, nna nikyee biala bɔ ɔfa asɛnga adwuma nanwo yeɛ adawurubɔfoɛ kobu yenwo ngondaa ɔ. Aso sɔ nzakrayɛɛ hemɔ bɔ bayɛ ne kyire kyɛ, kesaalae de asɛnga adwuma ne nwo nhia ko anaa? Ɔtte sɔ koraa!
2. Nzuati yeɛ odikyɛ yɛyere yɛnwo yɛkã nzɛmba ne ɔ? (Marko 13:10)
2 Odikyɛ yɛyere yɛnwo yɛyɛ asɛnga adwuma ne paa ɛnnɛ. Nzuati ɔ? Ofikyɛ aleɛ kye bɔ aleɛ sa ne, né yepingye ewiase he ayieleɛ ne. Asɛnga adwuma bɔ yɛkɔyɛ ye wɔ ayieleɛ mmerɛ nanu ne, ɛmɔma yɛnea bɔ Yesu hafale yenwo ɔ. (Kenga Marko 13:10.) Mateo nzɛmba nanu ne, Yesu hane kyɛ bɛkɔhã nzɛmba ne wɔ ewiase mukoraati, koraka ná “ayieleɛ ne” awa. (Mat. 24:14) Ayieleɛ ne yeɛ ole mmerɛ bɔ bɛkɔsɛkye Satan wiase ne koraa ne. Sɔ dwirɛ ne, ɔngɔhyɛ okosi, na Yehowa ahyɛ “kyẽa ne dɔnhwere” bɔ ɔkɔwa ne wato berɛ. (Mat. 24:36; 25:13; Aso. 1:7) Sɔ kyẽa ne apingye paa. (Rom. 13:11) Mmerɛ bɔ yɛnwondɛ kyɛ ayieleɛ ne kɔwa ne, odikyɛ yɛyere yɛnwo yɛkã nzɛmba ne.
3. Nzu yeɛ ɔmaa yɛyɛ asɛnga adwuma ne ɔ?
3 Mmerɛ bɔ yesusu asɛnga adwuma nanwo ne, odikyɛ yebisa yɛnwo sɔ dwirɛ bɔ yenwo hia he: Nzuati yeɛ yɛkã nzɛmba ne ɔ? Ye tikaape yeɛ ole kyɛ, ɔdɔ bɔ yele ne yeɛ ɔmaa yɛyɛ sɔ ɔ. Sɛ yɛyɛ asɛnga adwuma ne a, okyire kyɛ yɛnye gye nzɛmba nanwo, yekuro mmenia dwirɛ, na bɔ yenwo hia paa ne, yele ɔdɔ yɛma Yehowa ne ye dumaa ne. Ɛmɔma yesusu sɔ dwirɛ nanu biala nwo.
YƐKÃ NZƐMBA NE, OFIKYƐ YƐNYE GYE YENWO
4. Sɛ yɛte edwirɛ fɛ bie a, nzu yeɛ yɛyɛ ɔ?
4 Ɛkae edwirɛ bie bɔ osili bɔ ɔmaa wɔnye gyele ɔ? Ebia w’abusuaniɛ bie wole, anaa wɔsa hane adwuma bie bɔ né wɔnye la so ɔ. Ɔwale sɔ ne, ɔyɛle wɔ fɛ paa, yeti né ɛpena kyɛ ɛkã yenwo dwirɛ kyire w’abusuafoɛ bɔ baha ne, ɔne wɔ damvomɔ. Yede, mmerɛ bɔ ɛtele Nyameɛ Ahennie nanwo nzɛmba, bɔ ɔyɛ fɛ tra edwirɛ biala ne, aso né ɛpena kyɛ ɛkã yenwo dwirɛ kyire ebiala anaa?
5. Mmerɛ bɔ olimoa bɔ esuane nahorɛ bɔ ɔwɔ Nyameɛ dwirɛ nanu ne, ɔhane wɔ sɛ́? (Nea foto ne koso.)
5 Nahorɛ bɔ ɔwɔ Bible nanu ne, mmerɛ bɔ olimoa bɔ esuane yenwo nikyee ne, wɔnye gyele paa. Enwuni kyɛ wɔ Baba bɔ ɔwɔ anwuro ne kuro wɔ dwirɛ, na ɔpena kyɛ ɛboka ye abusua naso. Esa nwuni kyɛ Nyameɛ ahyɛ bɔ kyɛ ɔkɔye ɛyealɛ ne amaneɛnwunɛ kofi berɛ, na okotingye w’adɔfo bɔ bawu ne kɔwa ngoa nu wɔ ewiase foforɛ nanu. Nna ɛhene ngome, na mmom pee boka so. (Mak. 10:29, 30; Yoh. 5:28, 29; Rom. 8:38, 39; Nye. 21:3, 4) Nahorɛ dwirɛ bɔ ɔte sɔ nemɔ maa w’ahone tɔle wɔ kunu paa. (Luka 24:32) Wɔnye gyele bɔ né esua nanwo alaa maa, né ɛpena kyɛ ɛkã yenwo dwirɛ kyire ebiala!—Fatoto Yeremia 20:9 nanwo.
Nahorɛ bɔ ɔwɔ Bible nanu ne, mmerɛ bɔ olimoa bɔ yesuane yenwo nikyee ne, né yɛpena kyɛ yɛkã yenwo dwirɛ yekyire ebiala! (Nea ngyekyɛmuɛ 5)
6. Nzu yeɛ asua afi Ernest ne Rose dwirɛ nanu ɔ?
6 Ɛmɔma yɛnea edwirɛ bie bɔ osili ɔ. Mmerɛ bɔ aliemaa bie bɔ bɛfrɛ ye Ernest b lili afoɛ buru ne, ye baba wuli. Ernest hane kyɛ: “Mmisale menwo kyɛ: ‘Me baba ahɔ anwuro anaa? Anaa mengonwu ye ko?’ Ɛhene ati, sɛ menwu ngwalaa bɔ bɛ baba mɔ té te ase a, né menye boro bɛ.” Né Ernest taa kɔ ye baba asieleɛ so kobu ndwerɛ bɔ mbaeɛ kyɛ: “Nyameɛ, mesrɛ wɔ, mepena kyɛ menwu nekaa bɔ me baba wɔ ɔ.” Ye baba wuli kɔyɛ afoɛ 17 si ne, Yehowa Adanzefoɛ yɛle kyɛ bɛne ye kosua Bible ne, na ole tole nu. Bɔ osuane ne, ɔmaa onwuni kyɛ, bɛbɔ bawu ne, bɛte kyɛ ebie bɔ walafe bɔ ɔnze hwee ɔ, na bekotingye bɛ bekofi ewue nu kyẽabie. Ɛhene maa yenye gyele paa. (Nwo. 9:5, 10; Aso. 24:15) Edwirɛ bɔ né wahye ye adwene afoɛ pee ne, kesaalae de né wanya yenwo mmuayɛɛ! Ɔyɛle ye fɛ paa kyɛ wasua sɔ nahorɛ dwirɛ hemɔ wɔ Bible nanu ɔ. Ɔye Rose ɔɔbokale ye so maa besuane Bible ne, na ye koso, yenye gyele paa. Ernest ne ɔye bɔle asu afoɛ 1978 nu. Nningyein pá bɔ né basua ne, bɛhane yenwo dwirɛ behyirele b’abusuafoɛ, bɛ damvomɔ, ɔne ebiala bɔ ne okuro kyɛ otie bɛ ɔ. Yeti, bahora baboka mmenia kɔbo 70 maa babɔ asu.
7. Nahorɛ bɔ yasua yafi Bible nanu ne, sɛ ɔkã y’ahone a, nzu yeɛ yɛkɔyɛ ɔ? (Luka 6:45)
7 Nahorɛ bɔ yasua yafi Bible nanu ne, sɛ ɔka y’ahone a, ɔngɔyɛ se ngɔma yɛ kyɛ yɛkɔhã yenwo dwirɛ yekohyire mmenia ɔ. (Kenga Luka 6:45.) Yesuesua Yesu asuafoɛ nemɔ bɔ bɛhane kyɛ: “Bɔ yɛ yanwu ye ná yate ne de, yɛngɔhora yɛngɔyakyi ye hanɛ.” (Aso. 4:20) Yɛnye gye nahorɛ bɔ yasua nanwo, yeti yekuro kyɛ yɛkã yenwo dwirɛ yekyire mmeni pee.
YƐKÃ NZƐMBA NE, OFIKYƐ YEKURO MMENIA DWIRƐ
8. Nzu yeɛ ɔmaa yɛkã nzɛmba ne yekyire mmenia ɔ? (Kenga edwirɛ bɔ ɔwɔ alaka nanu bɔ yenwa, “ Dɔ Mmenia—Na Boka Bɛ Má Bɛɛyɛ Asũafoɛ” ne.) (Nea foto ne koso.)
8 Kyɛbɔ Yehowa ne Ɔwa ne kuro mmenia dwirɛ ne, sɔ ala yeɛ yɛ koso yekuro mmenia dwirɛ ɔ. (Any. 8:31; Yoh. 3:16) Bɛbɔ ‘bɛnze Nyameɛ’ ná bellé “anyelasoɛ biala” ne, ɛyɛ a né bɛnwo yɛ y’anwumvo paa. (Ɛfe. 2:12) Ɔhaw bɔ sɔ mmenia nemɔ fa nu wɔ ewiase he anu ne, wayɛ kyɛbɔ bɛla kumaa bie nu ne. Nyameɛ Ahennie nanwo nzɛmba bɔ yɛkã ne, ɔte kyɛ nyamaa bɔ yɛfa yɛtwetwe bɛ yefi sɔ kumaa nanu ɔ. Ɔnate kyɛ yekuro bɛ dwirɛ, na bɛnwo yɛ y’anwumvo nati, yɛpena kyɛ yɛyɛ bɔ yɛkɔhora biala yɛkã nzɛmba ne bie yekyire bɛ. Nzɛmba ne bɔ yɛkã yekyire bɛ ne, ɔmaa benya anyelasoɛ, na bɛnye gye. Osa bukye “daa ngoa” nwo atee ma bɛ wɔ ewiase foforɛ bɔ Nyameɛ fa ba nanu.—1 Tim. 6:19.
Ɔnate kyɛ yekuro mmenia dwirɛ, na bɛnwo yɛ y’anwumvo nati, yɛpena kyɛ yɛyɛ bɔ yɛkɔhora biala yɛkã nzɛmba ne bie yekyire bɛ (Nea ngyekyɛmuɛ 8)
9. Edwirɛ beni yeɛ yɛbɔ mmenia kɔkɔ kyɛ ɔbaasi ɔ, na nzuati yeɛ yɛyɛ sɔ ɔ? (Hesekiel 33:7, 8)
9 Ɔnate kyɛ yekuro mmenia dwirɛ nati, yɛbɔ bɛ kɔkɔ kyɛ ɔngɔhyɛ ewiase he kɔhɔ ayieleɛ. (Kenga Hesekiel 33:7, 8.) Sɔ mmenia ne, benu biemɔ te y’abusuafoɛ ne yɛ damvomɔ, na bɛnwo yɛ y’anwumvo paa. Mmeni pee bɔ bɛ bra kyɛbɔ bekuro ɔ, ofikyɛ kyɛ bɛnze kyɛ “amaneɛnwunɛ piri bɔ ɔkɔwa ne, ofi mmerɛ bɔ Ɛdangama bɔle wiase bɔ ɔbaadwu ɛnɛ ɔ, ye sɛso ɔwwale le, na sɔ bieku koso ngɔwa le.” (Mat. 24:21) Yɛpena kyɛ yɛmaa benwu bɔ ɔkɔhɔso wɔ sɔ ndɛenbualɛ mmerɛ nanu ɔ. Yeɛ ole kyɛ, bɛkɔsɛkye ngondombo soen, na ɛhene si ne, Amagedon kɔsɛkye ewiase tɛɛ he koraa. (Nye. 16:14, 16; 17:16, 17; 19:11, 19, 20) Yɛbɔ mbaeɛ kyɛ mmenia pee kotie sɔ kɔkɔbɔ ne, na baaboka yɛso maa yaso Yehowa. Yede, y’abusuafoɛ ne mmenia bɔ kesaalae bɛmva sɔ kɔkɔbɔ ne bɛnyɛ hwee ne, nzu yeɛ ɔkɔto bɛ ɔ?
10. Nzuati yeɛ yenwo hia kyɛ yɛkɔso yɛbɔ mmenia kɔkɔ ɔ?
10 Kyɛbɔ yenwuni ye wɔ adesua ko nanu ne, mmenia bɔ bɛkɔhyɛ yebo bekonya Yehowa nu gyidie, mmerɛ bɔ bɛsɛkye Babilɔn Pirikua ne, ebia okole bɛ ngoa. Yesɔ nati, sɔ mmerɛ he yeɛ yenwo hia paa kyɛ yɛbɔ bɛ kɔkɔ wɔ bɔ ɔbaasi nanwo ɔ. Bɔ odikyɛ yɛhyɛ ye nzorɛ yeɛ ole kyɛ: Ebia bɔ yɛkã yekyire bɛ ɛnnɛ ne, ɛhene yeɛ bɛkɔkae sɔ mmerɛ ne ɔ. (Fatoto Hesekiel 33:33 nanwo.) Ebia b’adwene kɔhɔ kɔkɔbɔ bɔ yɛfa yɛmane bɛ naso, na wahã bɛ maa baaboka yɛso maa yaso Yehowa, kora ne waha siɛ. Sɛ yɛnea biaa bie bɔ né ɔnea prisafoɛ so wɔ Filipi ne a, ‘aseɛ wosolɛ serɛserɛ’ bie sili kora yeɛ ɔsakyera ye adwene ɔ. Sɔ ala yeɛ mmenia bɔ bendie nzɛmba ne ɛnnɛ ne, sɛ bɛsɛkye Babilɔn Pirikua ne a, ebia bɛnwo kodwiri bɛ maa bɛkɔyɛ nzakrayɛɛ.—Aso. 16:25-34.
YƐKÃ NZƐMBA NE, OFIKYƐ YELE ƆDƆ YƐMA YEHOWA NE YE DUMAA NE
11. Sɛɛ yeɛ yɛfa animnyam, anidie, ne tumi yɛma Yehowa ɔ? (Nyekyire 4:11) (Nea foto ne koso.)
11 Bɔ yeti yeɛ yɛkã nzɛmba ne titire paa yeɛ ole kyɛ, yele ɔdɔ yɛma Yehowa, ne ye dumaa krongron ne. Asɛnga adwuma ne te atee ko bɔ yɛnate so yɛye Yehowa ayɛ, yɛfa yekyire kyɛ yele ɔdɔ yɛma ye ɔ. (Kenga Nyekyire 4:11.) Yedé yɛto nu paa kyɛ, odikyɛ bɛbɔ bɛso Yehowa ne fa animnyam, anidie, ne tumi bɛma ye. Sɛ yɛboka mmenia maa benwu ye kyɛ Yehowa yeɛ ‘ɔbɔle nningyein mukoraati,’ na ɔnate ye so yeɛ yɛte ngoa nu a, okyire kyɛ yɛfa anidie ne animnyam yɛma ye. Yesa yɛfa yɛ tumi yɛma Yehowa mmerɛ bɔ yɛfa y’anwoserɛ, yɛ mmerɛ, ɔne y’anwonyadeɛ yɛbɔ afɔleɛ yɛfa yɛkã nzɛmba ne kyɛbɔ yɛkɔhora ɔ. (Mat. 6:33; Luka 13:24; Kol. 3:23) Ɔdɔ bɔ yele yɛma Nyameɛ ne, yeɛ ɔkã yɛ maa yɛkã yenwo dwirɛ yekyire mmenia ɔ. Afei koso, yɛnye gye yenwo kyɛ yɛkɔmaa mmenia konwu ye dumaa ne, ɔne bɔ okyire ɔ. Nzuati ɔ?
Yɛfa yɛ tumi yɛma Yehowa mmerɛ bɔ yɛfa y’anwoserɛ, yɛ mmerɛ, ɔne y’anwonyadeɛ yɛbɔ afɔleɛ yɛfa yɛkã nzɛmba ne kyɛbɔ yɛkɔhora ɔ (Nea ngyekyɛmuɛ 11)
12. Sɛɛ yeɛ yɛnate asɛnga adwuma naso yɛte Yehowa dumaa nanwo ɔ?
12 Ɔdɔ bɔ yele yɛma Yehowa ne, yeɛ ɔkã yɛ maa yɛte ye dumaa nanwo ɔ. (Mat. 6:9) Yɛpena kyɛ mmenia nwu ye kyɛ, ngondombo bɔ Satan apɛ ato Yehowa so afa asɛkye ye dumaa ne, ɔtte nahorɛ. (Gye. 3:1-5; Yob 2:4; Yoh. 8:44) Yeti, yɛpena kyɛ yɛkã nahorɛ bɔ ɔfa Yehowa nwo ne yekyire ebiala bɔ okotie, yɛfa yekyire kyɛ yɛta ye si. Yɛpena kyɛ mmenia nwu ye kyɛ, ɔdɔ yeɛ ɔte Yehowa subaen titire ɔ, na ye yeɛ ɔkɔhora koli yɛ so maa yɛnwo kɔtɔ yɛ ɔ. Afei koso, ɔngɔhyɛ ɔnate ye Ahennie naso kɔye yɛ haw mukoraati kofi berɛ, na ɔkɔmaa yekonya anigye ne asomdwee. (Edw. 37:10, 11, 29; 1 Yoh. 4:8) Sɛ yɛmaa mmenia nwu sɔ dwirɛ hemɔ bɔ ɔfa Yehowa nwo ne a, okyire kyɛ yɛte ye dumaa nanwo. Ɛhene koso maa yɛnye gye ofikyɛ dumaa bɔ ɔla yɛ so ne, yenwo adwuma alaa yeɛ yɛyɛ ne. Atee beni aso?
13. Nzuati yeɛ ɔyɛ yɛ fɛ kyɛ yɛte Yehowa Adanzefoɛ ɔ? (Yesaya 43:10-12)
13 Yehowa aye yɛ kyɛ yɛte ye “adanzefoɛ.” (Kenga Yesaya 43:10-12.) Akwangyerɛ Kue ne hworɔle krataa bie, na bɛhãne kyɛ: “Yenwo atee bɔ animnyam wɔ nu tra nikyee biala yeɛ ole kyɛ, bɛkɔfrɛ yɛ nu biala Yehowa Danzeniɛ ɔ.” Nzuati ɔ? Ɛmɔma yɛnea mvandoho bie. Fa ye kyɛ anya edwirɛ wɔ kɔɔt bɔ ɛpena ebie maa ɔbadi adanzeɛ ma wɔ ɔ. Aso ahaa ebiala mbaen yeɛ ɛkɔmaa ɔkɔyɛ sɔ anaa? Aporowaa biala nne yenwo kyɛ, ebie bɔ ɛse ye, ele yenu gyidie, na ye abrabɔ te kama yeɛ ɛkɔmaa okooli adanzeɛ kɔma wɔ ɔ. Yɛ koso, ɔnate kyɛ Yehowa se yɛ nati yeɛ waye yɛ kyɛ ye Adanzefoɛ ɔ, na ole yenu gyidie kyɛ yɛkɔmaa mmenia konwu kyɛ, ye ngome yeɛ ɔte nahorɛ Nyameɛ ne ɔ. Ɔyɛ yɛ fɛ paa kyɛ yɛte ye Adanzefoɛ, bɔ yɛfa yenwo atee biala yɛboka mmenia maa benwu ye dumaa ne, ɔne yenwo nahorɛ dwirɛ ɔ. Yɛyɛ sɔ a, yɛmaa ebiala nwu ye kyɛ, yɛfata paa kyɛ bɛfrɛ yɛ Yehowa Adanzefoɛ!—Edw. 83:18; Rom. 10:13-15.
YƐKƆHÃ NZƐMBA NE KODWU KYƐ AYIELEƐ NE KƆWA Ɔ
14. Nningyein bɔ ɔyɛ yɛ fɛ kyɛ ɔngɔhyɛ okosisi ne, ebie yeɛ ole beni?
14 Ɔyɛ yɛ fɛ kyɛ yanwu nningyein bɔ ɔngɔhyɛ okosisi ne bie ɔ! Yedé yedi kyɛ Yehowa koyira asɛnga adwuma naso, ná waboka mmeni pee maa baanwu nahorɛ ne, kora ne amaneɛnwunɛ piri ne awa. Afei koso yele anyelasoɛ kyɛ, sɔ mmerɛ ne po bɔ nningyein nu kɔyɛ se paa wɔ Satan wiase he anu ne, mmeni pee kɔɔboka yɛso maa yɛkɔye Yehowa ayɛ!—Aso. 13:48.
15-16. Nzu yeɛ yɛkɔhɔso yɛkɔyɛ ɔ, na yɛkɔyɛ yekoodwu mmerɛ beni?
15 Mmerɛ bɔ yɛnwondɛ kyɛ sɔ nningyein nemɔ kosisi ne, odikyɛ yɛkɔso yɛkã Nyameɛ Ahennie nanwo nzɛmba ne wɔ ewiase mukoraati. Ofikyɛ ɔte adwuma bɔ yengosa yɛngɔyɛ ye ko kyẽabie ɔ. Afei koso, odikyɛ yɛbɔ mmenia kɔkɔ wɔ nningyein bɔ ɔbasisi nanwo, na yɛmaa benwu ye kyɛ ewiase he ayieleɛ ne apingye paa. Sɛ yɛyɛ sɔ na odwu ndɛenbualɛ mmerɛ ne a, bekonwu ye kyɛ edwirɛ bɔ yɛhã yehyirele bɛ ne, né ofi Yehowa berɛ.—Hes. 38:23.
16 Yede, nzu yeɛ yafa yasie yɛnye so kyɛ yɛkɔyɛ ɔ? Odikyɛ yɛfa anwokeka, akokoduro, ɔne anigye yɛyɛ asɛnga adwuma ne. Ofikyɛ yɛnye gye nzɛmba nanwo, yekuro mmenia dwirɛ, na bɔ ɔtra yemu ne, yele ɔdɔ yɛma Yehowa ne ye dumaa ne. Yeti yɛkɔhɔso yɛkɔhã nzɛmba ne, kodwu kyɛ Yehowa kɔhã kyɛ, “Kesaalae de, wayɛ yé!”
DWEIN 54 “Ɔkwan no Ni”
a Bɛyɛle afoɛnoa nhyiamu ne October 7, 2023, wɔ Yehowa Adanzefoɛ Nhyiamu Asa bɔ ɔwɔ Newburgh, New York, U.S.A ne. Bɛfale dwumadie ne Bue 1 ne bɛtole JW Broadcasting so wɔ November 2023 nu, na bɛfale Bue 2 ne koso bɛtole berɛ January 2024 nu.
b Kenga edwirɛ bɔ yeɛ ole “Bible Tumi Sesa Nnipa—Bible Mu Mmuaeɛ a Emu Da Hɔ Maa Me Koma Tɔɔ Me Yam,” bɔ ɔwɔ February 1, 2015 Twi Ɛwɛnelɛ Waen nanu ne.