ADESŨA 21
DWEIN 107 Ɔdɔ Ho Nhwɛso
Ɛkɔyɛ Sɛɛ Na Anya Ebie Bɔ Sɛ Egya Ye A, Ɔkɔboka Wɔ Ɔ?
“Braa paa, nwa yeɛ okonya ɔ? Odi mu tra agudeɛ bɔkɔɔ.” —ANY. 31:10.
BƆ ADESŨA NE KƆHÃ YENWO DWIRƐ Ɔ
Yekonwu kyɛbɔ Bible ne kɔboka ebie maa okonya ebie bɔ sɛ ogya ye a, ɔkɔboka ye ɔ. Afei koso, yekonwu kyɛbɔ yɛkɔhora yɛkɔboka aliemaamɔ bɔ bɛte sigyafoɛ bɔ bɛwɔ asafo nanu ne ɔ.
1-2. (a) Koraka Kristoniɛ bie kosi gyinayɛɛ kyɛ okogya ne, ahoboa beni yeɛ odikyɛ ɔyɛ ɔ? (b) Sɛ bɛkã “agyaa nhyehyɛɛ” a, yeɛ ole nzu? (Kenga “Edwirɛ Biemɔ Bɔ Bakyirekyire Nu” ne.)
EKURO kyɛ egya anaa? Ɔwɔ nu kyɛ nna agyaa ngome yeɛ ɔmaa ebie nye gye ɔ, nakoso aliemaamɔ bɔ bɛte sigyafoɛ ne, benu pee nala yeɛ bɛnye gye yenwo kyɛ bekonya ebie bɔ bekogya ye ɔ. Yede, koraka ɛne ebie kɔyɛ nhyehyɛɛ kyɛ ɛmɔkogya ne, nea kyɛ wɔ sikasɛm, mmɔden bɔ ɛbɔ ye wɔ asafo nanu, ɔne kyɛbɔ ɛyɛ wɔ nningyein ne kyire kyɛ aso agyaa. a (1 Kor. 7:36) Sɛ ɛyɛ sɔ ahoboa hemɔ a, ɔkɔboka wɔ maa sɛ egya a, wɔnye kɔhora kɔgye.
2 Nakoso, ɔlla ase kyɛ ekonya biaa anaa braa pá kogya ye ɔ. (Any. 31:10) Sɛ enwu ebie bɔ wɔnye gye yenwo po a, ɛyɛ a ɔlla ase kyɛ ɛmɔkɔhyɛ yebo bɛkɔyɛ agyaa nhyehyɛɛ ɔ. b Adesua he anu ne, yɛkɔnea bɔ ɔkɔboka aliemaamɔ bɔ bɛte sigyafoɛ ne maa bekonya ebie bɔ sɛ begya ye a, ɔkɔboka bɛ ɔ. Afei, yɛkɔnea kyɛbɔ bɛkɔhyɛ yebo ne sona bɔ ɔte sɔ ne kɔyɛ agyaa nhyehyɛɛ ɔ. Yekosa yɛkɔnea bɔ aliemaamɔ kɔhora kɔyɛ kɔfa kɔboka bɛ ɔ.
KYƐBƆ EKONYA BIAA ANAA BRAA PÁ KOGYA YE Ɔ
3. Sɛ ɛpena ebie bɔ ekogya ye a, edwirɛ benimɔ yeɛ odikyɛ edimoa susu yenwo ɔ?
3 Sɛ ɛpena kyɛ egya a, odikyɛ edimoa nwu subaen biemɔ bɔ ekuro ye wɔ sona nanwo kora, né ɛne ye ayɛ agyaa nhyehyɛɛ. Sɛ anyɛ sɔ a, ɛkɔhora kɔyakyi ebie bɔ ahaa ɔkɔboka wɔ ne berɛ kɔɔfa ebie bɔ ɔngɔboka wɔ ɔ. Ebie bɔ wabɔ asu ne ngome yeɛ ɛne kɔhora kɔyɛ agyaa nhyehyɛɛ ɔ. (1 Kor. 7:39) Nakoso, nna ebiala bɔ wabɔ asu ne, yeɛ sɛ egya ye a, ɔkɔboka wɔ ɔ. Yeti ɛkɔhora kobisa wɔnwo kyɛ: ‘Nningyein benimɔ yeɛ ogyi menye so ɔ? Subaen benimɔ yeɛ mekuro kyɛ menwu ye wɔ sona nanwo ɔ? Bɔ mepena mefi sona ne berɛ ne, aso ɔkɔhora kodwu yenwo anaa?’
4. Nningyein benimɔ yeɛ ebiemɔ bɔ yenwo mbaeɛ ɔ?
4 Sɛ ɛpena kyɛ egya a, yedé yedi kyɛ ahã yenwo dwirɛ ahyire Yehowa. (Flp. 4:6) Yehowa hyɛlle yenu biala bɔ kyɛ ɔkɔma yɛ ebie bɔ yekogya ye ɔ. Nakoso ɔdwene wɔnwo, na ɔse bɔ ehia ɔ. Ɛhene ati, mmerɛ bɔ eguso ɛpena ebie bɔ ekogya ye ne, ɔkɔboka wɔ. Yeti kɔso fa w’ahiasɛm to ye nyunu. (Edw. 62:8) Srɛ Yehowa kyɛ ɔma wɔ nworɛ ne aboterɛ. (Yak. 1:5) John c te aliemaa sigyaniɛ bie bɔ ofi United States. Ɔhane bɔ ɛyɛ a ɔbɔ yenwo mbaeɛ nanwo dwirɛ kyɛ: “Subaen bɔ mekuro ye wɔ sona nanwo ne, mekã yenwo dwirɛ mekyire Yehowa. Mesa mesrɛ ye kyɛ ɔma nya ebie bɔ ɔte sɔ ɔ. Afei mesrɛ ye kyɛ, ɔboka me ma nnya subaen bɔ ɔkɔmaa ngɔyɛ huɛ pá ɔ.” Tanya te aliemaa brasua bie bɔ ofi Sri Lanka. Ɔhane kyɛ: “Mebɔ Yehowa mbaeɛ kyɛ, ɔboka me ma nni nahorɛ mma ye, ná nnya subaen pá bɔ ɔkɔmaa menye kɔgye, mmerɛ bɔ nguso mepena ebie bɔ ngogya ye ne.” Sɛ enyanne ebie bɔ ekogya ye kesaalae po a, Yehowa ahyɛ bɔ kyɛ ɔkɔhɔso kɔnea wɔ, na ɔkɔmaa wɔnye kɔgye.—Edw. 55:22.
5. Kristofoɛ bɔ bɛte sigyafoɛ, bɔ bɛyere bɛnwo wɔ Yehowa soen nu ne, yenwo atee beni yeɛ ɛhene kora maa benya ɔ? (1 Korintofoɛ 15:58) (Nea foto ne koso.)
5 Bible ne tu yɛ foɛ kyɛ ‘daa biala yɛhɔ so yɛyɛ Awurade adwuma ne.’ (Kenga 1 Korintofoɛ 15:58.) Sɛ ɛyere wɔnwo fa wɔ mmerɛ pee sõ Yehowa a, ɔkɔmaa ekoyia aliemaamɔ bɔ bɛte sigyafoɛ bɔ bɛ koso bɛyɛ sɔ ɔ. Ɛhene kɔmaa ekonya yenwo atee kɔfa b’adamvoa. Mmerɛ bɔ ɛyere wɔnwo kyɛ ɛkɔyɛ bɔ Yehowa kuro ne, ɔkɔmaa wɔnye kɔgye paa.
Sɛ ɛyere wɔnwo kyɛ ɛkɔfa wɔ mmerɛ pee kɔso Yehowa a, ɔkɔmaa ekonya yenwo atee koyia aliemaamɔ bɔ bɛ koso, bɛnye gye yenwo kyɛ bekogya ɔ (Nea ngyekyɛmuɛ 5)
6. Sɛ Kristoniɛ pena ebie bɔ okogya ye a, nzu yeɛ odikyɛ ɔhyɛ ye nzorɛ ɔ?
6 Odikyɛ ɛhyɛ ɛhe nzorɛ: Sɛ ɛpena ebie bɔ ekogya ye a, nnɛmaa ɛhene bayɛ nikyee bɔ yenwo hia wɔ paa wɔ wɔ́ asetena nu ɔ. (Flp. 1:10) Sɛ wɔnye kɔgye a, oggyi agyaa bɔ ɛkɔhɔ anaa sigya bɔ ekoli naso, na mmom ogyi kyɛbɔ ɛne Yehowa afia si te naso. (Mat. 5:3) Sɛ ɛte sigyaniɛ a, ɔkora maa ɛfa wɔ mmere pee so Yehowa. (1 Kor. 7:32, 33) Yeti, fa sɔ mmerɛ ne yɛ adwuma yé. Aliemaa brasua bie bɔ bɛfrɛ ye Jessica fi United States. Ogyale ne, ne waha kaa maa onya afoɛ 40. Ɔhane kyɛ: “Mmerɛ bɔ né menwondɛ kyɛ ngonya ebie bɔ okogya me ne, mvale me mmerɛ pee nyɛle asɛnga adwuma ne, na ɛhene maa menye gyele.”
TO WƆ BOASE NWU SONA NE SUBAEN YÉ
7. Nzuati yeɛ odikyɛ ɛto wɔ boase nwu ebie subaen yé kora, né ahahyire ye kyɛ ekuro ye ɔ? (Anyandera 13:16)
7 Sɛ enwu ebie bɔ wɔnye gye yenwo a, odikyɛ ndɛ nala ɛfa kɔbɔ so kyɛ ekuro ye anaa? Bible ne kã kyɛ, ebie bɔ ɔte badwemma de, bɔ ɔyɛ biala, ɔfa adwene to yenwo. (Kenga Anyandera 13:16.) Yeti ɔte pá kyɛ ɛkɔto wɔ boase konwu ebie subaen yé kora, né ahahyire ye kyɛ ekuro ye. Aschwin bɔ ofi Netherlands ne hane kyɛ: “Kyɛbɔ sɛ wɔnye bɔ ebie so a ɛkora nya ɔdɔ ma ye ne, sɔ ala yeɛ ɔdɔ ne kɔhora kɔtete wɔnye so ɔ. Yeti sɛ ɛto wɔ boase nwu ebie subaen yé a, ɔkɔmaa ɛngɔpere wɔnwo ngɔha ngohyire sona ne kyɛ ekuro ye.” Sɛ ɛto wɔ boase nwu ebie subaen yé a, ɔkɔmaa ekonwu ye kyɛ ebia egya sɔ sona ne a, ɔkɔboka wɔ anaa ɔngɔboka wɔ.
8. Sigyaniɛ bie kɔyɛ sɛɛ né wahora wanwu sona bɔ ɔpena kyɛ ogya ye ne subaen yé? (Nea foto ne koso.)
8 Sona bɔ ɛpena kyɛ ɛne ye yɛ agyaa nhyehyɛɛ ne, ɛkɔyɛ sɛɛ né ahora anwu ye subaen yé? Ɛkɔhora kɔfa wɔnye kɔto ase kɔnea mmɔden bɔ sona ne bɔ ye wɔ asafo nanu, ɔne subaen bɔ ɔda y’ali mmerɛ bɔ aliemaamɔ ayia nu kyɛ bɛgye bɛnye ne. Bisa wɔnwo kyɛ: ‘Nwamɔ yeɛ bɛte ye damvo ɔ, na nzu yeɛ ɔtaa kã yenwo dwirɛ ɔ?’ (Luka 6:45) Bɔ ogyi yenye so ne, ɛhene bie ala yeɛ ogyi wɔnye so anaa? Ɛkɔhora kobisa yenwo dwirɛ kofi ye asafo nu mbanyi, anaa aliemaamɔ bɔ bɛse sona ne yé ne berɛ. (Any. 20:18) Bɔ ɛkɔhora kobisa yenwo dwirɛ ne bie yeɛ ole mmɔden bɔ sona ne bɔ ye wɔ asafo nanu, ɔne ye subaen. (Rut 2:11) Mmerɛ bɔ ɛyɛ sɔ ne, odikyɛ ɛnea yé na anyɛ nikyee biala bɔ ɔkɔha sona ne ɔ. Ɛhene kohyire kyɛ ebu ye.
Ɔte pá kyɛ ɛkɔto wɔ boase konwu ebie subaen yé kora, né ahahyire ye kyɛ ekuro ye (Nea ngyekyɛmuɛ 7-8)
9. Koraka ɛkɔhã kohyire ebie kyɛ ekuro ne, nzu yeɛ odikyɛ esusu yenwo ɔ?
9 Odikyɛ ɛnea sona ne subaen kodwu mmerɛ beni kora, né ahahyire ye kyɛ ekuro ye? Sɛ ɛkã kyire sona ne ndɛ kyɛ ekuro ye a, ebia né wanya adwene kyɛ ɛpere wɔnwo soma. (Any. 29:20) Nakoso, sɛ sona ne nwu ye kyɛ ekuro ye na ɛngora ye kã a, okonya adwene kyɛ ɛte lapafoɛ. (Nwo. 11:4) Hyɛ ye nzorɛ kyɛ, sɛ ɛkã kyire ebie kyɛ ekuro ye a, ongyire kyɛ kyɛbɔ ɔte biala sona ne kɔpene so kɔma wɔ. Kae kyɛ, koraka ɛkɔhã kohyire ebie kyɛ ekuro ye ne, odikyɛ enwu ye kyɛ aso agyaa, na sona ne koso te ebie bɔ egya ye a, ɔkɔboka wɔ ɔ.
10. Sɛ enwu ye kyɛ ebie kuro wɔ, nakoso enguro ye a, nzu yeɛ odikyɛ ɛyɛ ɔ?
10 Yede sɛ ebie kã kyire wɔ kyɛ okuro wɔ koso ɛ? Sɛ enwu ye kyɛ enguro sona ne a, ma onwu ye. Ɔba sɔ a, nnɛyɛ nningyein biemɔ bɔ ɔkɔmaa sona ne tianu kɔyɛ ye fɛ kyɛ ebia ekuro ye, mmerɛ bɔ wɔ bɔbɔ ɛse kyɛ enguro ye ɔ.—1 Kor. 10:24; Ɛfe. 4:25.
11. Sɛ ɛpena kyɛ ɛkamvo ebie kyire w’abusuaniɛ anaa wɔ damvo bie kyɛ ogya ye a, nzu yeɛ odikyɛ ɛmaa ɔtena w’adwene nu ɔ?
11 Sɛ ɛkɔ maen bie so a, awofoɛ anaa ebie bɔ yenye afi yeɛ ɔpena biaa anaa braa ma ye abusuaniɛ bɔ ɔte sigyaniɛ ɔ. Yeɛ ɛkɔ maen foforɛ so a, ebie abusuafoɛ anaa ye damvomɔ yeɛ bɛpena biaa anaa braa bɛma ye ɔ. Yesi ne, bɛyɛ nhyehyɛɛ maa sɔ mmenia nyɔ nemɔ yianu bɛnea kyɛ bɛkɔhora bɛkɔyɛ agyaa nhyehyɛɛ anaa. Sɛ ɔkɔba kyɛ wɔ yeɛ ɛyɛ agyaa nhyehyɛɛ ma mmenia nyɔ bie a, yede nea bɔ benu biala nye gye yenwo, ɔne bɔ ohia ɔ. Sɛ ɛpena kyɛ ɛkamvo ebie ma w’abusuaniɛ bie anaa wɔ damvo bie kyɛ ogya ye a, to wɔ boase nea sona ne subaen, ɔne kyɛbɔ ɔne Yehowa afia si te ɔ. Nna esikaa, nwomaa bɔ ebie asua, anaa dumaa bɔ wale ne yeɛ yenwo hia ɔ, na mmom kyɛbɔ ɔne Yehowa afia si te ɔ. Nakoso kae kyɛ, mmenia nyɔ ne bɔbɔ, yeɛ odikyɛ besi gyinayɛɛ kyɛ bekogya anaa bengogya ɔ.—Gal. 6:5.
KYƐBƆ ƐNE EBIE KƆHYƐ YEBO KƆYƐ AGYAA NHYEHYƐƐ Ɔ
12. Sɛ ɛpena kyɛ ɛne ebie yɛ agyaa nhyehyɛɛ a, ɛkɔyɛ sɛɛ na ahahyire ye?
12 Sɛ ɛpena kyɛ ɛne ebie hyɛ yebo yɛ agyaa nhyehyɛɛ a, ɛkɔyɛ sɛɛ na ahahyire ye? d Ɛkɔhora ne ye koyia nu wɔ nekaa bɔ mmenia konwu ɛmɔ, anaa ɛkɔhora kɔfrɛ ye wɔ fon so na ahahyire ye. Sɛ ɔba sɔ a, nnɛfa edwirɛ ne nwonwa, kã ye pein kyire kyɛ ekuro ye. (1 Kor. 14:9) Afei sɛ ɔkɔyɛ yé a, ma sona ne mmerɛ má ɔɔdwene bɔ ahahyire ye nanwo. (Any. 15:28) Nakoso, sɛ ɔkã kyire wɔ kyɛ onguro wɔ a, nnɛmaa ɔha wɔ.
13. Sɛ ebie kã kyire wɔ kyɛ okuro wɔ a, nzu yeɛ odikyɛ ɛyɛ ɔ? (Kolosefoɛ 4:6)
13 Sɛ ebie kã kyire wɔ kyɛ okuro wɔ koso ɛ? Kae kyɛ sona ne dwenene edwirɛ nanwo hyɛle kora yeɛ ɔbaahã kyire wɔ, yeti nya yenwo aboterɛ, na ma onwu ye kyɛ ebu ye. (Kenga Kolosefoɛ 4:6.) Sɛ enwu ye kyɛ odikyɛ ɔma wɔ mmerɛ maa ɛkɔdwene yenwo a, kã kyire ye. Nakoso ɛyɛ a, nnɛmaa ɔkyɛ pee. (Any. 13:12) Sɛ enguro sona ne a, nnɛfa fea ye, na mmom ma onwu ye. Hans te aliemaa brienzua bɔ ofi Austria. Mmerɛ bie aliemaa brasua bie hahyirele ye kyɛ okuro ye. Hans hane kyɛ: “Ndole me boase ne ye dwudwole, na mmaa onwuni kyɛ mmoale menwo kyɛ ngɔyɛ agyaa nhyehyɛɛ. Né menguro kyɛ okonya adwene kyɛ ebia mekuro ye, yeti mmane ye mmuayɛɛ ndɛ. Ofi sɔ mmerɛ ne bɔ ɔkɔ ne, nneane yé kyɛ mengɔfa menwo ngowurowura ye.” Nakoso, sɛ enwu ye kyɛ ekuro sona ne a, yede ɛne ye besusu kyɛbɔ odikyɛ ɛmɔyɛ ɛmɔ nikye, mmerɛ bɔ ɛmɔyɛ agyaa nhyehyɛɛ nanwo. Kae kyɛ, ɛmɔnye ngɔhora ngɔgye nikyee kõ anwo, ofikyɛ ebia ɔsono ɛmɔ nu biala amammerɛ, ɔne bɔ yɛnye gye yenwo ɔ.
ALIEMAAMƆ BƆ BƐTE SIGYAFOƐ NE, SƐƐ YEƐ YƐKƆHORA YƐKƆBOKA BƐ Ɔ?
14. Aliemaamɔ bɔ bɛte sigyafoɛ ne, sɛɛ yeɛ yɛkɔhora yɛkɔfa yɛnoa dwudwolɛ yɛkɔhyɛ bɛ ngunaen ɔ?
14 Sɛɛ yeɛ yɛkɔhora yɛkɔboka aliemaamɔ bɔ bɛte sigyafoɛ ne ɔ? Bɔ yɛkɔhora yɛkɔyɛ ne bie yeɛ ole kyɛ, yɛkɔnea yɛnoa dwudwolɛ yé. (Ɛfe. 4:29) Yɛkɔhora yekobisa yɛnwo kyɛ: ‘Aso mekekã edwirɛ biemɔ bɔ ɔyɛ yea mefa megoro bɛbɔ begyalle nanwo anaa? Sɛ menwu kyɛ aliemaa brienzua ne aliemaa brasua bie bɔ bɛte sigyafoɛ bɛbɔ ngɔmmɔ a, ɛyɛ a menya adwene kyɛ bekuro bɛnwo anaa?’ (1 Tim. 5:13) Afei koso ɔnzɛkyɛ yɛmaa aliemaamɔ bɔ bɛte sigyafoɛ ne nya adwene kyɛ ɔnate kyɛ begyalle nati, bɛso llé mvasoɛ. Hans, bɔ yalimoa yaha yenwo dwirɛ ne hane kyɛ: “Ɛyɛ a, aliemaa biemɔ taa kã kyire me kyɛ, ‘Yɛ na gya braa, na anyi.’ Edwirɛ bɔ ɔte sɔ ne maa aliemaamɔ bɔ bɛte sigyafoɛ ne nya adwene kyɛ, bɛso llé mvasoɛ biala wɔ asafo nanu. Afei koso, ɔkɔhora kɔmaa bɛkɔpere bɛnwo bekogya.” Yeti, ɔte pá kyɛ yɛkɔpena yenwo atee bɔ yɛkɔfaso yɛkɔkamvo bɛ ɔ.—1 Tɛs. 5:11.
15. (a) Kyɛbɔ Romanfoɛ 15:2 ne kã ne, sɛ yɛpena kyɛ yɛkamvo aliemaa bie yekyire ebie kyɛ ogya ye a, nzu yeɛ odikyɛ yesusu yenwo ɔ? (Nea foto ne koso.) (b) Nzu yeɛ esua fili vidio nanu ɔ?
15 Yede, sɛ y’adwene yɛ yɛ kyɛ aliemaa nyɔ biemɔ bɔ bɛte sigyafoɛ fata bɛnwo koso ɛ? Bible ne tu yɛ foɛ kyɛ, yɛyɛ bɔ ɔkɔmaa yɛ mango nwo kɔtɔ ye ɔ. (Kenga Romanfoɛ 15:2.) Aliemaa biemɔ wɔ berɛ a, benguro kyɛ ebie kɔkamvo ebie kɔma bɛ kyɛ begya ye, na odikyɛ yɛte yebo. (2 Tɛs. 3:11) Ebiemɔ de, ebia bekuro ye sɔ, nakoso ɛhene po ne, odikyɛ yedimoa yebisa bɛ. e (Any. 3:27) Ebiemɔ koso, ɛyɛ a bɛfɛre kyɛ ebie kɔyɛ sɔ nhyehyɛɛ ne kɔma bɛ ɔ. Lydia te aliemaa brasua bie bɔ ofi Germany, na ɔte sigyaniɛ. Ɔhane kyɛ: “Ɛkɔhora kɔto asaa kɔfrɛ mmrandeɛ ne ndaluwa maa ɛmɔ kɔbɔ nu bɛkɔgye bɛnye. Afei yɛ nhyehyɛɛ bɔ ɔkɔmaa sɔ mmenia nyɔ nemɔ konwu bɛnwo, na bahora babɔ ngɔmmɔ ɔ. Ɛhene si ne, na ayakyi ama bɛ.”
Sɛ aliemaamɔ bɔ nu kyɛ bɛgye bɛnye a, ɔkora bukye yenwo atee ma aliemaamɔ bɔ bɛte sigyafoɛ ne maa bɛne bɛnwo yia (Nea ngyekyɛmuɛ 15)
16. Kristofoɛ bɔ bɛte sigyafoɛ ne, nzu yeɛ odikyɛ bɛmaa ɔtena b’adwene nu ɔ?
16 Sɛ yagya oo, sɛ yɛte sigyafoɛ oo, yɛ mukoraati yɛnye kɔhora kɔgye! (Edw. 128:1) Yeti sɛ ɛpena kyɛ egya biaa anaa braa nakoso enyanne bie a, kɔso yere wɔnwo sõ Yehowa. Aliemaa brasua bie bɔ bɛfrɛ ye Sin Yi bɔ ofi Macao ne hane kyɛ: “Mmerɛ bɔ ɛfa di sigya kesaalae ne, sɛ ɛfa toto anigye bɔ ɛne ehu anaa ɛye konya ye wɔ Paradise nanwo a, ɔte kaa bie. Yeti sɛ ɛte sigyaniɛ a, ma wɔnye gye, na fa sɔ mmerɛ ne yɛ adwuma yé.” Yede sɛ anya ebie bɔ ɛkɔhora ne ye kɔyɛ agyaa nhyehyɛɛ a, nzu yeɛ ɔkɔmaa ɛmɔ nhyehyɛɛ ne kɔhɔ yé ɔ? Adesua bɔ oliberɛ ne kɔmaa yekonwu ye.
DWEIN 137 Tete Mmea Anokwafo ne Kristofo Mmea
a Sɛ ɛpena kyɛ enwu ye kyɛ aso agyaa a, kenga edwirɛ bɔ ɔwɔ jw.org so bɔ yenwa, “Dating—Part 1: Am I Ready to Date?”
b EDWIRƐ BIE BƆ BAHYIREHYIRE NU Ɔ: Adesua he ne bɔ oli berɛ nanu ne, yekosusu “agyaa nhyehyɛɛ” bɔ mmenia nyɔ yɛ nanwo. Sɔ nhyehyɛɛ ne hyɛ yebo mmerɛ bɔ brienzua ne brasua ne ale atonu kyɛ bekuro bɛnwo ne, na ɔtoa so kodwu kyɛ bekogya anaa bɛkɔpɛ sɔ nhyehyɛɛ nanu ɔ. Sɔ mmerɛ ne koso boka benu biala maa onwu ye mango yé.
c Dumaa ne bie wɔ berɛ a, basesã ye.
d Wɔ maen biemɔ so ne, aliemaa brienzua yeɛ ɔkã kyire aliemaa brasua kyɛ okuro ye ɔ. Nakoso sɛ ɛte aliemaa brasua, na ɛpena kyɛ ɛyɛ sɔ a, mvomsoɛ biala nne yenwo. (Rut 3:1-13) Sɛ ɛpena ɛhe anwo dwirɛ pee a, kenga edwirɛ bɔ yenwa, “Young People Ask . . . How Can I Tell Him How I Feel?” bɔ ɔwɔ October 22, 2004 Awake! nanu ne.
e Nea vidio bɔ ye dwirɛti yeɛ ole, Belili Ngunim Wɔ Gyidie Kõɛ Nanu—Kristofoɛ Asigyafoɛ bɔ ɔwɔ jw.org so ne.
