ADESŨA 18
DWEIN 1 Yehowa Su Ahorow
“Aseɛ Ye Aso Amukoraa Ndɛenbualɛniɛ” Bɔ Ɔse Anwumvoin Ne, Nya Ye Nu Gyidie!
“Yiti aseɛ ye aso amukoraa Ndɛenbualɛniɛ ne, ongobua ndɛen bɔ ɔtengyɛ hɔ ɔ?”—GYE. 18:25.
BƆ ADESŨA NE KƆHÃ YENWO DWIRƐ Ɔ
Ndeaseɛ bɔ yele ye kyɛ Yehowa kɔla anwumvoinnwunɛ ali, na wabua ndɛen turoloo mmerɛ bɔ otingye bɛbɔ bɛndengyɛ ne, adesua he kɔboka yɛ maa yɛkɔte yebo yé.
1. Edwirɛ beni yeɛ Yehowa hane bɔ né ɔkɔkyekye Abraham wora ɔ?
NYAMEƐ nate abɔfo bie aso hahyirele Abraham kyɛ, ɔbaasɛkye Sodom ne Gomora kuro ne. Sɔ ngɔmmɔ bɔ ɔhɔle so ne, né Abraham wora ngofi ye llé. Né Abraham pena kyɛ ɔte bɔ né Yehowa baayɛ nabo yé. Yeti obisale kyɛ: “Aso ɛkɔfa bɛ bɔ bɛtengyɛ ne ɛkɔfra amumuyɛɛfoɛ so ɛkɔsɛkye bɛ anaa? . . . Yiti aseɛ ye aso amukoraa Ndɛenbualɛniɛ ne, ongobua ndɛen bɔ ɔtengyɛ hɔ ɔ?” Yehowa tole ye boase bokale ye damvo Abraham maa ɔtele bɔ né ɔbaayɛ nabo. Yeɛ ole kyɛ, Nyameɛ ngɔsɛkye bɛbɔ bɛtengyɛ ne llé. Sɔ dwirɛ he kyekye yɛ wora paa.—Gye. 18:23-33.
2. Nzu yeɛ ɔmaa yenwu kyɛ Yehowa bua ndɛen turoloo, na ɔda anwumvoinnwunɛ ali ɔ?
2 Nzuati yeɛ yɛkɔhora yekole yekoli kyɛ, Yehowa bua ndɛen turoloo, na ɔda anwumvoinnwunɛ ali ɔ? Ofikyɛ yɛse kyɛ “AWURADE de, ɔnea b’ahone nu.” (1 Sam. 16:7) Afei koso, Yehowa se “sona biala ye ti anu dwirɛ.” (1 Ahe. 8:39; 1 Abe. 28:9) Ebia sɔ dwirɛ he kɔyɛ yɛ nwanwa, nakoso bɔ odikyɛ yenwu ye yeɛ ole kyɛ, Yehowa se nworɛ tra kuro sona biala, yeti nna nikyee biala bɔ ɔkɔyɛ ne yeɛ yɛkɔte yebo ɔ. Ɛhene ati, somafoɛ Pɔɔlo hane Yehowa nwo dwirɛ kyɛ: “Nwa yeɛ ɔkɔhora kohyirehyire ye porɛ bɔ wabɔ nu ɔ?”—Rom. 11:33.
3-4. Sɛ odwu mmerɛ bie a, edwirɛ benimɔ yeɛ ebia yekobisa yɛnwo ɔ, na nzu yeɛ yekosusu yenwo wɔ adesua he anu ɔ? (Yohane 5:28, 29)
3 Ɔwɔ nu kyɛ yɛse kyɛ Yehowa yɛ bɔ ɔte pá mmerɛ biala de, nakoso odwu mmerɛ bie a, edwirɛ bɔ Abraham bisale ne, ebie nwo dwirɛ kora ba yɛ tianu. Ebie yeɛ ole kyɛ: ‘Mmenia bɔ Yehowa bɔbɔ sɛkyele bɛ tekyɛ Sodom ne Gomorafoɛ ne, aso bekotingye bɛ anaa? Benu biemɔ kɔboka ‘bɔnefoɛ bɔ bekodwɔso kofi awufoɛ nu’ naso anaa?—Aso. 24:15.
4 Bɔ yɛse yɛfa ewuetingyelɛ nanwo ne, ɛmɔma yesusu yenwo kaa. Ɛlɛsaen, yenyane ndeaseɛ foforɛ yɛfale “ngoa ewutingyelɛ,” ɔne “ndɛenbualɛ ewutingyelɛ” nanwo. a (Kenga Yohane 5:28, 29.) Ɛhene ati, kyɛbɔ né yɛte Bible nu dwirɛ biemɔ bo ne, yayɛ nu nzakrayɛɛ. Yekosusu ɛhe anwo wɔ adesua he, ɔne bɔ oliberɛ nanu. Atee bɔ Yehowa faso bua ndɛen turoloo ne, yekolimoa yɛkɔnea bɔ yɛnze wɔ yenwo ɔ. Ɛhene si ne, yɛkɔnea bɔ yɛse yɛfa yenwo ɔ.
BƆ YƐNZE Ɔ
5. Mmenia bɔ Yehowa sɛkyele bɛ wɔ Sodom ne Gomora ne, nzu yeɛ yɛ nwomaa ahoroɛ ne hafale bɛnwo mmerɛ bie bɔ wapɛ nu ɔ?
5 Mmenia biemɔ bɔ Yehowa buli bɛ atɛn kyɛ bɛte abɔnefoɛ ne, yɛ nwomaa ahoroɛ ne aha bɛnwo dwirɛ pee mmerɛ bie bɔ wapɛ nu ɔ. Ebie yeɛ ole kyɛ, yɛhane kyɛ mmenia biemɔ tekyɛ bɛbɔ né bɛwɔ Sodom ne Gomora bɔ Yehowa sɛkyele bɛ ne, bengotingye bɛ. Nakoso mmerɛ bɔ yɛbɔle mbaeɛ, na yesusuli edwirɛ nanwo bieku ne, yenwuni kyɛ yɛngɔhora yɛngɔha ye pein kyɛ ɔte sɔ. Nzuati ɔ?
6. Mmeni foforɛ benimɔ yeɛ Bible ne kã bɛnwo dwirɛ kyɛ Yehowa buale bɛ ndɛen kyɛ bɛte abɔnefoɛ, bɔ yeti ɔsɛkyele bɛ ɔ, na sɔ atemmuo ne, yenwo dwirɛ beni yeɛ yɛnze ɔ?
6 Edwirɛ biemɔ koso bɔ yɛkɔhora yekosusu yenwo ɛhe. Bible nanu dwirɛ biemɔ maa yenwu mmenia biemɔ bɔ Yehowa buale bɛ ndɛen kyɛ bɛte abɔnefoɛ, bɔ yeti ɔsɛkyele bɛ ɔ. Ebie yeɛ ole mmeni pee bɔ bewuli wɔ Nzueyilɛ nanu, maen nzoo bɔ né bɛwɔ Bɔhyɛ Aseɛ naso bɔ Yehowa maa Yisraelfoɛ nemɔ sɛkyele bɛ ne, ɔne Asiria sogyafoɛ 185,000 bɔ Yehowa abɔfo huhuni bɛ kɔngɔen komapɛ ne. (Gye. 7:23; Deut. 7:1-3; Yes. 37:36, 37) Sɔ dwirɛ hemɔ anu ne, yele adanzeɛ bie wɔ Bible nanu bɔ okyire kyɛ, Yehowa asɛkye sɔ mmenia nemɔ koraa bɔ ongotingye bɛ anaa? Daabi, yelle bie sɔ. Nzuati yeɛ yɛkã sɔ ɔ?
7. Bɛbɔ bewuli wɔ Nzueyilɛ nanu, ɔne bɛbɔ Yisrael maen ne sɛkyele bɛ wɔ Kanaan aseɛ so ne, bɛnwo dwirɛ beni yeɛ yɛnze ɔ? (Nea foto bɔ ɔwɔ ne.)
7 Atee bɔ Yehowa fale so buale sɔ mmenia nemɔ nu biala ndɛen ne, yɛnze. Afei bɛbɔ behuni bɛ ne, yɛnze kyɛ benyane yenwo atee besuane Yehowa nwo nikyee bɛsakrale b’adwene kora yeɛ bewu ɔ. Koraka Nzueyilɛ ne ba ne, Bible ne kã kyɛ né Nowa te “tenenee nzɛmbahanɛniɛ.” (2 Pet. 2:5) Nakoso Bible ne nga kyɛ, mmerɛ bɔ né Nowa yɛ sɔ alaka kandinga ne, osa hane Yehowa nwo dwirɛ hyirele ebiala bɔ né ɔte aseɛ so sɔ mmerɛ ne. Sɔ ala yeɛ abɔnefoɛ bɔ né bɛwɔ Kanaan aseɛ so ne, yɛnze kyɛ ebia benyane yenwo atee besuane Yehowa nwo nikyee bɛsakrale b’adwene kora yeɛ bɛsɛkye bɛ ɔ.
Nowa ne ye abusua ne yɛ alaka kandinga nanwo adwuma. Koraka Nzueyilɛ ne ba ne, yɛnze kyɛ osa hane Yehowa nwo dwirɛ hyirele ebiala bɔ né ɔte aseɛ so sɔ mmerɛ ne (Nea ngyekyɛmuɛ 7)
8. Sodom ne Gomorafoɛ ne, bɛnwo dwirɛ beni yeɛ yɛnze ɔ?
8 Sodom ne Gomorafoɛ nemɔ koso ɛ? Né biaa bie bɔ ɔte teneneeniɛ bɔ bɛfrɛ ye Lɔto ne bɛ yeɛ ɛte ɔ. Nakoso yebisa kyɛ, aso ɔhora hane Nyameɛ nwo dwirɛ hyirele bɛ mukoraati anaa? Daabi. Ɔwɔ nu kyɛ né bɛte abɔnefoɛ, nakoso bɛ mukoraati yeɛ né bɛse kyɛ bɔ bɛyɛ ne te bɔne anaa? Kae kyɛ ɛwɔfoɛ bɔ né baasikye Lɔto ne, kuro nanu mmrienzua mukoraati wale kyɛ bɛne bɛ baala. Bible ne kã kyɛ “fite mmɛɛmaa so kodwu mbanyi so” yeɛ bɛwale berɛ ɔ. (Gye. 19:4; 2 Pet. 2:7) Aso yɛkɔhora yɛkɔha kyɛ, Yehowa bɔ ɔte Nyameɛ bɔ ɔse anwumvoin ne, ongotingye sɔ mmenia hemɔ nu komapɛ po anaa? Yehowa maa Abraham nwuni kyɛ, ateneneefoɛ buru po, bɛnne sɔ kuro nanu. (Gye. 18:32) Yeti bɔne bɔ né bɛyɛ nati yeɛ ɔmaa Yehowa sɛkyele bɛ ɔ. Yede yɛkɔhora yɛkɔha ye pein kyɛ, sɔ mmenia nemɔ, benu biala nne berɛ bɔ ɔkɔboka ‘bɔnefoɛ bɔ bekodwɔso bekofi awufoɛ nu’ naso anaa? Daabi, yɛngɔhora yɛngɔha ye sɔ.
9. Solomon nwo dwirɛ beni yeɛ yɛnze ɔ?
9 Bible ne maa yesa yenwu mmenia biemɔ bɔ né bɛte ateneneefoɛ nakoso nzieɛn, bɛɛyɛle abɔnefoɛ nwo dwirɛ. Benu bie yeɛ ole Ɔhene Solomon. Né bahyirehyire ye Yehowa nwo nikye, ɔne atee bɔ odikyɛ ɔfaso so ye ɔ, na Yehowa koso yirale ye paa. Nakoso nzieɛn, ɔɔsone bosoen. Bɔ ɔyɛle ne maa Yehowa fɛle yeso yaa, na ɛhene ati Yisraelfoɛ nemɔ nwuni amaneɛ afoɛ pee. Bible ne kã kyɛ Solomon “toale ye mbanyi mɔ.” Benu ko yeɛ ole Ɔhene Dawide bɔ né odi nahorɛ ne. (1 Ahe. 11:5-9, 43; 2 Ahe. 23:13) Nakoso, sɔ dwirɛ bɔ Bible ne hafale Solomon nwo ne, okyire kyɛ bekotingye ye anaa? Ɛhene de, Bible ne nga. Ebia ebiemɔ konya adwene kyɛ, “sona biala bɔ wawu ne, wanya fawɔnwodi wafi bɔne tumi bo.” (Rom. 6:7) Ɔte nahorɛ, nakoso ɛhene ngyire kyɛ sɛ ebie wu a, bɔ ɔte biala bekotingye ye. Ewuetingyelɛ te akyɛdeɛ bɔ ofi Nyameɛ bɔ okuro yɛ dwirɛ ne berɛ ɔ. Ɛhene ati, bɛbɔ okuro kyɛ bɛso ye daa ne, yeɛ ɔfa yenwo atee bɔ ɔte sɔ ne do bɛ ɔ. (Yob 14:13, 14; Yoh. 6:44) Aso Solomon konya sɔ akyɛdeɛ ne bie anaa? Ɛhene de yɛnze; Yehowa ngome yeɛ ɔse ɔ. Bɔ yɛse alaa yeɛ ole kyɛ, Yehowa kɔyɛ bɔ ɔtengyɛ ɔ.
BƆ YƐSE Ɔ
10. Adwene beni yeɛ Yehowa le ye wɔ mmenia bɔ ɔkɔsɛkye bɛ nanwo ɔ? (Hesekiel 33:11) (Nea foto ne koso.)
10 Kenga Hesekiel 33:11. Yehowa maa yenwu adwene bɔ ole ye wɔ ndɛen bɔ obua mmenia nanwo ɔ. Honhom ne hane somafoɛ Petro maa ye koso, ɔhane bɔ Hesekiel hane ne bie. Ɔhane kyɛ: ‘Awurade mbena kyɛ sona biala mini,’ anaa ɔsɛkye. (2 Pet. 3:9) Sɔ dwirɛ ne maa y’ahone tɔ yɛ kunu, ofikyɛ ɔmaa yenwu ye kyɛ, koraka Yehowa kosi gyinayɛɛ kyɛ ɔsɛkye ebie a, ongotingye ye ne, sana onya nikyee pɔtee bie gyina so. Ɔnate kyɛ Yehowa te anwumvoinnwunɛ Nyameɛ nati, sɛ onwu nikyee bie bɔ odikyɛ ogyina so nwu sona ne anwumvo a, ɔyɛ sɔ.
Abɔnefoɛ bɔ bekotingye bɛ ne, ɔkɔmaa mmenia ahoroɛ pee konya yenwo atee kosua Yehowa nwo nikye (Nea ngyekyɛmuɛ 10)
11. Mmenia benimɔ yeɛ bengotingye bɛ ɔ, na nzu yeɛ ɔmaa yenwu ye sɔ ɔ?
11 Mmenia bɔ bengotingye bɛ ne, bɛnwo dwirɛ beni yeɛ yɛse ɔ? Benu kaa bie yeɛ Bible ne kã bɛnwo dwirɛ ɔ. b Ebie yeɛ ole kyɛ, Yesu hane kyɛ bengotingye Yudase Yiskariote. (Mak. 14:21) Né Yudase se ye paa kyɛ, ɔyɛ bɔne tia Yehowa ne Ɔwa ne, nakoso obuli yenye guale so yɛle. c (Mak. 3:29) Afei koso, Yesu hane kyɛ, nyamesom mbanyi bɔ né bɛtane yenye ne, sɛ bewu a, bengotingye bɛ. (Mat. 23:33) Somafoɛ Pɔɔlo koso hane kyɛ, mmenia biemɔ bɔ né bafi asafo nanu, bɔ né bɛkeka yenwo dwirɛ tɛɛ bɛfa bɛsɛkye mmenia adwene ne, sɛ banzakyera na bewu a, bengotingye bɛ.—Heb. 6:4-8; 10:29.
12. Nzu yeɛ yɛse yɛfa Yehowa anwumvoinnwunɛ nwo ɔ? Kã bie nwo dwirɛ.
12 Sɛ bɔ yahã ne la ahameɛ a, nzu yeɛ yɛse yɛfa Yehowa anwumvoinnwunɛ nwo ɔ? Nzu yeɛ wayɛ wafa wahyire kyɛ, “ɔmbena kyɛ sona biala mini,” anaa ɔsɛkye ɔ? Ɛmɔma yɛnea kyɛbɔ Yehowa nwuni ebiemɔ anwumvo, mmerɛ bɔ bɛyɛle bɔne pirikua ne. Ɔhene Dawide yɛle nningyein biemɔ bɔ né ɔte bɔne pirikua paa ɔ. Ebie yeɛ ole kyɛ ɔsɛkyele agyaa, na ohuni sona. Nakoso Dawide nuni yenwo, yeti Yehowa nwuni ye anwumvoin, na ɔfa hyɛle ye. (2 Sam. 12:1-13) Ɔhene Manase koso yɛle nningyein pee bɔ ɔttemaye wɔ ye asetena nu. Ɔwɔ nu kyɛ ɔyɛle bɔne hɔle siɛ paa de, nakoso mmerɛ bɔ onuni yenwo ne, Yehowa nwuni ye anwumvoin, na ɔfa hyɛle ye. (2 Abe. 33:9-16) Sɔ dwirɛ hemɔ maa yenwu ye kyɛ, sɛ Yehowa nwu ye kyɛ odikyɛ onwu ebie anwumvoin a, ɔyɛ ye sɔ. Mmenia biemɔ bɔ bɛyɛle bɔne pirikua, nakoso benuni bɛnwo ne, Yehowa kotingye bɛ.
13. (a) Nzuati yeɛ Yehowa nwuni Niniwefoɛ nemɔ anwumvo ɔ? (b) Nzu yeɛ nzieɛn Yesu hafale Niniwefoɛ nemɔ nwo ɔ?
13 Niniwefoɛ nemɔ koso, yɛse kyɛ Yehowa nwuni bɛ anwumvoin. Nyameɛ hahyirele Yona kyɛ: “B’amumuyɛɛ wafo waadwu me nyunu.” Nakoso mmerɛ bɔ benuni bɛnwo ne, Yehowa fale bɛ bɔne hyɛle bɛ. Né Niniwefoɛ dwirɛ yɛ Yehowa anwumvo koraa tra Yona. Né Yona afɛ bɛ so yaa paa, yeti né odikyɛ Nyameɛ maa ɔkae kyɛ, “bɛnze bɛ sa bɛen ne bɛ sa famaa nu nzonzoleɛ.” (Yona 1:1, 2; 3:10; 4:9-11) Ye si ne, Yesu fale sɔ dwirɛ ne bokale mmenia maa benwuni kyɛbɔ Yehowa bua ndɛen turoloo, na onwu anwumvoin ɔ. Yesu hane Ninwefoɛ bɔ bɛsakrale nanwo dwirɛ kyɛ, “bekodwɔso wɔ ndɛenbualɛ ne anu.”—Mat. 12:41.
14. “Ndɛenbualɛ ewutingyelɛ” ne, sɛɛ yeɛ ɔfa Niniwefoɛ nemɔ nwo ɔ?
14 “Ndɛenbualɛ” beni yeɛ Niniwefoɛ nemɔ ‘kɔhɔ nu’ ne? Yesu hane kyɛ, kyẽabie “ndɛenbualɛ ewutingyelɛ” bie kɔwa. (Yoh. 5:29) Afoɛ Apee Ahennie ne yeɛ né ɔkã yenwo dwirɛ ɔ. Sɔ mmerɛ ne, “teneneefoɛ ne bɔnefoɛ, kodwɔso kofi awufoɛ nu.” (Aso. 24:15) Bɔnefoɛ nemɔ de, “bɛkɔhɔ ngoa ewutingyelɛ nu.” Sɔ dwirɛ ne kyire kyɛ, sɛ betingye sɔ mmenia nemɔ a, bekohyirehyire bɛ Yehowa ne Yesu nwo nikye. Yehowa ne Yesu kɔfa bɛnye koli bɛsi kɔnea kyɛ bɛfa bɔ besua ne bɛbɔ bɛ bra anaa. Yeti sɛ betingye Niniweniɛ bie, na ɔyɛ ye adwene kyɛ ɔngɔso Yehowa a, Yehowa ngɔma ɔngɔhɔso ngɔtena ngoa nu. (Yes. 65:20) Nakoso bɛbɔ bekosi gyinayɛɛ kyɛ bɛkɔso Yehowa nahorɛ nu ne de, bekonya yenwo atee bɛkɔtena ase daa!—Dan. 12:2.
15. (a) Bɛbɔ bɛsɛkyele bɛ wɔ Sodom ne Gomora ne, nzuati yeɛ ɔnzɛkyɛ yɛkã kyɛ bengotingye bɛ ɔ? (b) Edwirɛ bɔ ɔwɔ Yuda 7 ne, sɛɛ yeɛ yɛkɔhora yɛkɔte yebo ɔ? (Kenga edwirɛ bɔ ɔwɔ alaka nanu bɔ yenwa, “ Nzu Yeɛ Né Yuda Pena Kyire Ɔ?”)
15 Mmerɛ bɔ né Yesu kã Sodom ne Gomorafoɛ nemɔ nwo dwirɛ ne, ɔhane kyɛ “ndɛenbualɛ kyẽa ne,” okosi bɛ yé kɔtra mmenia bɔ bɛpole ye, na bandie ye ngyerɛkyerɛ ne. (Mat. 10:14, 15; 11:23, 24; Luka 10:12) Bɔ Yesu hane ne, né ɔpena kyire sɛɛ? Ebia y’adwene kɔyɛ yɛ kyɛ, né ɔkã edwirɛ ne maa ɔyɛ suro soma. Nakoso, bɔ odikyɛ yɛhyɛ ye nzorɛ yeɛ ole kyɛ, edwirɛ bɔ Yesu hafale Niniwefoɛ nemɔ nwo ne, sɔ dwirɛ ne ala yeɛ ɔhafale Sodom ne Gomorafoɛ nemɔ koso nwo ɔ. Ɛhe maa yenwu ye kyɛ, nahorɛ dwirɛ paa yeɛ né Yesu kã ne. Yeti, “ndɛenbualɛ kyẽa” bɔ né ɔkã fa Niniwefoɛ nemɔ nwo ne, ɛhene ala yeɛ ɔhafale Sodom ne Gomorafoɛ nemɔ koso nwo ɔ. Sodom ne Gomorafoɛ nemɔ yɛle nningyein tɛɛ tekyɛ Niniwefoɛ nemɔ ala. Nakoso Niniwefoɛ nemɔ de, benyane yenwo atee bɛsakrale b’adwene. Afei kae kyɛ, bɛbɔ “bayɔ bɔne ne” koso boka bɛbɔ bɛkɔhɔ “ndɛenbualɛ ewuetingyelɛ” nu naso. (Yoh. 5:29) Ɛhe maa yenwu ye kyɛ, ebia bekotingye Sodom ne Gomorafoɛ nanu biemɔ, na yekonya yenwo atee yekohyirehyire bɛ Yehowa ne Yesu nwo nikye.
16. Kyɛbɔ Yehowa kosi gyinayɛɛ kɔfa bɛbɔ okotingye bɛ nanwo ne, nzu yeɛ yɛse yɛfa yenwo ɔ? (Yeremia 17:10)
16 Kenga Yeremia 17:10. Bɔ yɛse yɛfa atee bɔ Yehowa faso bua ndɛen nwo ne, sɔ tworɔnzɛm he bɔ ye mua. Yehowa de, ofi tete ɔbaadwu ɛnnɛ ne, ‘ɔpɛnzɛpɛnzɛ adwene nu, na oso ahone nea.’ Kyɛbɔ daa ɔyɛ ne, ‘okotua ebiala kerɛ kyɛbɔ ye atee si te ɔ.’ Yeti sɛ ósi gyinayɛɛ fa bɛbɔ okotingye bɛ kyẽabie nanwo a, sɔ ala yeɛ ɔkɔyɛ ɔ. Bɛbɔ ɔnzɛkyɛ Yehowa tingye bɛ ne, ɔse. Na ɔse bɛbɔ odikyɛ onwu bɛ anwumvoin, na otingye bɛ ne koso. Ɛhene ati, ɔnzɛkyɛ yɛkã ye lle kyɛ bengotingye ebie, sana yele adanzeɛ bie wɔ Bible nanu bɔ okyire sɔ ɔ.
‘ASEƐ YE ASO MUKORAA NDƐENBUALƐNIƐ NE, OKOBUA NDƐEN BƆ ƆTENGYƐ Ɔ’
17. Bɛbɔ bawu ne, anyelasoɛ beni yeɛ ɔwɔ berɛ ma bɛ ɔ?
17 Ofi mmerɛ bɔ Adam ne Hawa bɛɛbokale Satan so maa bedwɔso betiale Yehowa ne, mmenia bɔ bawu ne, ɔtte angorɛ. ‘Pɔfoɛ bɔ yeɛ ole ewue ne,’ wali yɛnye wahyɛ paa! (1 Kor. 15:26) Yede, anyelasoɛ beni yeɛ ɔwɔ berɛ ma sɔ mmenia bɔ bawu ne ɔ? Bɛbɔ bedi Kristo si bɔ bedi nahorɛ ne, benu kaa bie bɔ bɛte 144,000 ne, sɛ bewu a, bekotingye bɛ maa bɛkɔhɔ anwuro, na bengowu ko. (Nye. 14:1) Mmeni pee bɔ bedi nahorɛ bɛma Yehowa, na bele ɔdɔ bɛma ye ne, bɛkɔboka ‘teneneefoɛ bɔ bekodwɔso bekofi awufoɛ nu’ naso. Sɛ bɛkɔso bedi nahorɛ wɔ Kristo Afoɛ Apee Ahennie ne, ɔne nzɔhwɛ bɔ ɔpɛ yebo nanu a, bɛkɔtena ase daa wɔ aseɛ he aso. (Dan. 12:13; Heb. 12:1) Afei koso, Afoɛ Apee Ahennie nanu ne, bɛbɔ bɛte “bɔnefoɛ,” bɔ begyi berɛ bɛma bɛbɔ banzo Yehowa lle, anaa ‘bɛyɛle bɔne’ ne po, bekonya yenwo atee bɛkɔsakyera b’adwene, na bali nahorɛ bama Yehowa. (Luka 23:42, 43) Nakoso, mmenia biemɔ bɔ bedwɔso betiale Yehowa, ɔne bɔ wabɔ ye tianu kyɛ ɔkɔyɛ ne de, wasi gyinayɛɛ kyɛ ongotingye bɛ.—Luka 12:4, 5.
18-19. (a) Nzuati yeɛ yɛkɔhora yekonya gyidie kyɛ Yehowa kobua ndɛen turoloo wɔ bɛbɔ okotingye bɛ nanwo ɔ? (Yesaya 55:8, 9) (b) Nzu yeɛ yekosusu yenwo wɔ adesua bɔ oliberɛ nanu ɔ?
18 Yele adanzeɛ bɔ yɛkora yegyina so yedé yedi kyɛ Yehowa bua ndɛen turoloo mmerɛ biala anaa? Yoo, ebie yeɛ ole Abraham deɛ ne. Né ɔse kyɛ, Yehowa bɔ ɔte “aseɛ ye aso amukoraa Ndɛenbualɛniɛ ne,” obua ndɛen turoloo, ɔse nworɛ tra ebiala, na onwu anwumvoin. Yehowa afa ndɛenbualɛ mukoraa wawura Ɔwa ne sa, na watete ye wama sɔ adwuma ne. (Yoh. 5:22) Yehowa ne Ɔwa ne mukoraati kora nwu bɔ ɔwɔ sona tianu ɔ. (Mat. 9:4) Yeti bekobua “ndɛen bɔ ɔtengyɛ” mmerɛ biala.
19 Ɛmɔma yɛhɔso yenya gyidie kyɛ, Yehowa yeɛ ɔse bɔ ɔte pá ɔ. Ɔnate kyɛ yɛte sona nati, yɛngora yemmua ndɛen turoloo, nakoso Yehowa de, ɔtte sɔ. (Kenga Yesaya 55:8, 9.) Ɛhene ati, odikyɛ yɛyakyi ndɛenbualɛ nwo dwirɛ mukoraa yɛma Yesu ne ye Baba. Ofikyɛ yele gyidie kyɛ, yɛ Hene Yesu kobua ndɛen turoloo, na ɔkɔla anwumvoinnwunɛ ali. (Yes. 11:3, 4) Yede, kyɛbɔ Yehowa ne Yesu kobua ndɛen wɔ amaneɛnwunɛ piri nanu ne, nzu yeɛ yɛkɔhora yɛkɔha yɛkɔfa yenwo ɔ? Yenwo dwirɛ beni yeɛ yɛnze ɔ, na beni yeɛ yɛse ɔ? Yekonya sɔ dwirɛ nemɔ nwo mmuayɛɛ wɔ adesua bɔ oli berɛ nanu.
DWEIN 57 Yɛka Asɛmpa no Kyerɛ Nnipa Nyinaa
b Ɔfa Adam, Hawa, ne Kain nwo ne, kenga Ɛwɛnelɛ Waen bɔ ɔwale January 1, 2013, kr. 12, yebo berɛ dwirɛ ne.
c Kenga Ɛwɛnelɛ Waen bɔ ɔwale July 15, 2007, kr. 18, bɔ ɔwɔ Twi nu ne.