1. Nzuati yeɛ ɔyɛ se ma ebiemɔ kyɛ bɛne mmenia kɔbɔ ngɔmmɔ wɔ asɛnga nu ɔ? (Nea foto ne koso.)

 YƐKÃ nzɛmba ne yekyire mmenia ofikyɛ yele ɔdɔ yɛma Yehowa yɛ Baba bɔ ɔwɔ anwuro ne, na yɛpena kyɛ yɛboka bɛ maa besua yenwo nikye. Aliemaa biemɔ wɔ berɛ a, sɛ bɛkɔ asɛnga a bɛnye gye paa. Nakoso ebiemɔ de, bɛnye ngye wɔ asɛnga nu. Nzuati ɔ? Ebiemɔ fɛre nikye paa. Afei koso, benwu ye kyɛ bɛngora bengyirekyire yé wɔ asɛnga nu. Ebiemɔ koso, ɔyɛ se ma bɛ kyɛ bɛkɔhɔ mmenia awuro mmerɛ bɔ bɛfrɛlle bɛ ɔ. Ebiemɔ suro kyɛ ebia ne mmenia andie bɛ. Ebiemɔ wora, benguro kyɛ bɛkɔhã edwirɛ bie bɔ ɔkɔmaa ebie kɔfɛ bɛso yaa ɔ. Aliemaa hemɔ le ɔdɔ ma Yehowa, nakoso ɔkora yɛ se ma bɛ kyɛ bɛkɔhã nzɛmba ne bekohyire mmenia bɔ bɛnze bɛ ɔ. Ye mukoraati si ne, bɛse kyɛ asɛnga adwuma nanwo hia yeti bɛyere bɛnwo bɛyɛ. Ɛhe maa Yehowa nye gye paa!

2. Sɛ ɔyɛ se kyɛ ekonya anigye wɔ asɛnga nu a, nzuati yeɛ ɔnzɛkyɛ ɛmaa w’aba nu bu ɔ?

² Wɔ koso sɛ odwu mmerɛ bie a, ɛkora nya sɔ adwene ne bie maa yeti, ɔyɛ se ma wɔ kyɛ wɔnye kɔgye wɔ asɛnga nu hɔ ɔ? Sɛ sɔ a, nnɛmaa w’aba nu, ofikyɛ ɛhene kyire kyɛ ɛberɛ wɔnwo ase, na ɛmbena kyɛ ɛne ebiala kosu aporowaa. Afei koso, ebiala nne berɛ bɔ sɛ ɔyɛ nikye pá, na mmenia kekã  yenwo dwirɛ tɛɛ a, ɔkɔyɛ ye fɛ ɔ. Wɔ Baba bɔ ɔwɔ anwuro ne se ɔhaw bɔ ɛfa nu ne mukoraati, na ɔpena kyɛ ɔboka wɔ. (Yes. 41:13) Adesua he kɔmaa yekonwu nningyein nnu biemɔ bɔ ɔkɔboka wɔ maa ekoli sɔ haw nemɔ so, kyɛbɔ ɔkɔyɛ a ekonya anigye wɔ asɛnga nu ɔ.

MÁ NYAMEƐ DWIRƐ NE BOKA WƆ

3. Nzu yeɛ ɔbokale diyifoɛ Yeremia maa ɔhora hãne edwirɛ ne hyirele mmenia ɔ?

³ Ofi tete yeɛ Nyameɛ afa adwuma awura bɛbɔ bɛsõ ye ne sa ɔ. Ne benu biemɔ nwu adwuma ne kyɛ ɔyɛ se, nakoso ɔbokale bɛ maa bɛhora bɛyɛle. Diyifoɛ Yeremia sɔaa, mmerɛ bɔ Yehowa fawurale yesa kyɛ ɔɔhã ye dwirɛ ne, ne ɔtwetwe yenwo. Yeremia hãne kyɛ: “Menze dwudwo, ofikyɛ nde akwadaa.” (Yer. 1:6) Yede, nzu yeɛ ɔbokale ye maa onya akokoduro ɔ? Nyameɛ dwirɛ ne yeɛ ɔbokale ye ɔ. Ɔhãne kyɛ: “Ye dwirɛ ne ayɛ m’ahone nu kyɛ see bɔ ogye wɔ me mmowue nu ɔ, mahyɛ me nwo so mafɛ.” (Yer. 20:​8, 9) Mmenia bɔ ne Yeremia kã edwirɛ ne kyire bɛ ne, né bɛso yɛse, yeti ne wamaa adwuma ne ayɛ se ama ye. Nakoso, edwirɛ bɔ né Nyameɛ afa awura ye sa kyɛ ɔhã ne, ɛhene yeɛ ɔmaa onyane anwoserɛ ɔ.

4. Sɛ yɛkenga Bible ne, na yɛdwenedwene yenwo a, sɛɛ yeɛ ɔkɔboka yɛ ɔ? (Kolosefoɛ 1:​9, 10)

⁴ Edwirɛ bɔ ɔwɔ Bible nanu ne, yeɛ ɔmaa Kristofoɛ nya anwoserɛ ɔ. Mmerɛ bɔ né Pɔɔlo tworɔ krataa kɔma aliemaamɔ bɔ bɛwɔ Kolose asafo nanu ne, ɔmaa benwuni ye kyɛ, sɛ benya Nyameɛ nwo nimdeɛ a, ɔkɔboka bɛ maa ‘bɛkɔhora bɛkɔbɔ bra bɔ ɔfata Awurade,’ na bahɔso ‘basu mmaa wɔ nnwumaa paa mukoraati nu’ (Kenga Kolosefoɛ 1:​9, 10.) Asɛnga adwuma ne koso boka sɔ nnwumaa pá naso. Sɛ yɛkenga Bible ne, na yɛdwenedwene yenwo a, ɔkɔmaa gyidie bɔ yele ye wɔ Yehowa nu ne kɔyɛ se. Sɛ ɔba sɔ a, yekonwu ye kyɛ asɛnga adwuma nanwo hia, yeti odikyɛ yɛyere yɛnwo yɛyɛ.

5. Sɛ yɛ́kenga Bible ne a, yɛkɔyɛ sɛ ne yanya sɔ mvasoɛ?

⁵ Sɛ yɛkɔhora yekonya Bible naso mvasoɛ paa a, odikyɛ yɛto yɛboase yɛkenga, na yɛdwenedwene yenwo. Sɛ ɛ́kenga edwirɛ bie wɔ Bible nanu na ɛnde yebo a, nnɛyakyi ye brɛ kɔ. Ɛkɔhora kɔfa Nhoma a Yehowa Adansefo De Yɛ Nhwehwɛmu bɔ ɔwɔ Twi nu ne, anaa Watch Tower Publications Index ne kɔyɛ nhwehwɛmuɛ kɔhɔ sĩɛ na wamaa ate yebo yé. Sɛ ɛto wɔ boase sua Bible ne a, ɔkɔboka wɔ maa gyidie bɔ ele ye kyɛ nu dwirɛ ne te nahorɛ ne, ɔkɔyɛ  se. (1 Tɛs. 5:21) Sɛ ɔba sɔ a, bɔ ekonwu ye ne kɔmaa ɛkɔfa anigye kɔhã yenwo dwirɛ kohyire mmenia.

BOA WƆNWO KORA NE AHƆ ASƐNGA

6. Nzuati yeɛ odikyɛ yɛboa yɛnwo kora ne yahɔ asɛnga ɔ?

⁶ Sɛ ɛbaahɔ asɛnga, na edimoa boa wɔnwo a, ɔboka wɔ maa ɛkora ne mmenia dwudwo bɔ enzuro ɔ. Sɔ ala yeɛ Yesu yɛle ɔ. Ɔbokale ye asuafoɛ nemɔ maa bɛboale bɛnwo kora, yeɛ ɔsoma bɛ maa bɛkɔkã nzɛmba ne ɔ. (Luka 10:​1-11) Asuafoɛ nemɔ koso, bɔ Yesu hãhyirele bɛ ne, bɛfa bɛyɛle adwuma. Yesɔ nati, bɛhora bɛɛhãne nzɛmba ne, na bɛnye gyele paa.—Luka 10:17.

7. Yɛkɔyɛ sɛɛ ne yaboa yɛnwo koraka yahɔ asɛnga? (Nea foto ne koso.)

⁷ Sɛɛ yeɛ yɛkɔboa yɛnwo kora ne yahɔ asɛnga ɔ? Atee bɔ yɛkɔfa so yekohyirehyire Bible nu dwirɛ bie nu maa nu kɔla berɛ ne, odikyɛ yedimoa yɛdwene yenwo. Asa koso, mmenia bɔ yɛkwaahã edwirɛ ne yekyire bɛ ne, odikyɛ yesusu atee bɔ bɛkɔfa so bɛkɔyɛ bɛ nikye, ɔne bɔ yɛkɔyɛ mmerɛ bɔ bayɛ sɔ nanwo. Sɛ yɛkora yɛyɛ ɛhemɔ a, ɔkɔboka yɛ maa yɛkɔte yɛ nyunu yɛne mmenia kɔbɔ ngɔmmɔ bɔ yekunu ngɔtete yɛ ɔ.

8. Atee beni aso yeɛ Pɔɔlo fale Kristofoɛ totole ngukue nwo ɔ?

⁸ Mmerɛ bɔ né somafoɛ Pɔɔlo kã asɛnga adwuma bɔ yɛyɛ nanwo dwirɛ ne, ɔhãne kyɛ: “Sɔ agyapadeɛ bɔ yanya ye ne wɔ ngukue nu.” (2 Kor. 4:7) Nzu yeɛ ole sɔ agyapadeɛ ne? Ɛhene yeɛ ole Ahennie nanwo nzɛmba bɔ yɛkã yekyire mmenia, kyɛbɔ ɔkɔyɛ a bekonya ngoa ne. (2 Kor. 4:1) Ngukue ne koso, yeɛ ole nzu? Yeɛ ole bɛbɔ bɛsõ Nyameɛ, bɔ bɛkã nzɛmba ne bekyire mmenia ne. Wɔ Pɔɔlo aberɛ so ne, ne adwadifoɛ fa nningyein biemɔ bɔ yenwo hia tekyɛ aleɛ, esikaa, ɔne nzaa gua ngukue nu bɛfa betu atee. Yɛkoso, Yehowa afa asɛnga adwuma bɔ yenwo hia paa ne wawura yɛsa, yeti ɔkɔma yɛ anwoserɛ bɔ yɛkɔfa yɛkɔyɛ ɔ.

SRƐ YEHOWA KYƐ ƆMA WƆ AKOKODURO

9. Sɛ yɛbaahɔ asɛnga na yekunu tete yɛ a, nzu yeɛ odikyɛ yɛyɛ ɔ? (Nea foto ne koso.)

⁹ Sɛ odwu mmerɛ bie na yɛbaahɔ asɛnga a ne yekunu tete yɛ. Ɔnate kyɛ ɛyɛ a, yɛnze kyɛbɔ mmenia kɔyɛ bɛ nikye ɔ. Yɛkɔyɛ sɛɛ né  yahora yali ɔhaw bɔ ɔte sɔ naso? Mmerɛ bɔ bɛhã behyirele asomafoɛ nemɔ kyɛ nnɛmaa bɛkã nzɛmba ne, baamma esuronyi anga bɛ. Mmom bɛsrɛle Yehowa kyɛ ɔma bɛ ‘ahoneserɛ bɔ bɛkɔfa bɛkɔhã ye dwirɛ ne ɔ.’ Yehowa mane bɛ mbaeɛ nanwo mmuayɛɛ, ɛberɛ ala. (Aso. 4:​18, 29, 31) Yɛkɔso, sɛ yɛbaahɔ asɛnga na yekunu tete yɛ a, odikyɛ yɛsrɛ Yehowa kyɛ ɔboka yɛ. Srɛ ye kyɛ ɔma ɛhɔso nya ɔdɔ ma mmenia, kyɛbɔ ɔkɔyɛ a, ekoli esuronyi bɔ wahã wɔ naso ɔ.

10. Sɛɛ yeɛ Yehowa boka yɛ maa yedi yenwo adanzeɛ ɔ? (Yesaya 43:​10-12)

¹⁰ Yehowa aye yɛ kyɛ ye Adanzefoɛ, na wahyɛ bɔ kyɛ ɔkɔboka yɛ maa yekonya akokoduro yɛkɔfa yekoli yenwo adanzeɛ. (Kenga Yesaya 43:​10-12.) Ma yɛnea atee nna bɔ ɔfa so yɛ sɔ ɔ. Bɔ olimoa, mmerɛ biala bɔ yɛkã nzɛmba ne, Yesu boka yɛso. (Mat. 28:​18-20) Bɔ ɔtɔ so nyɔ, Yehowa aye abɔfo nemɔ kyɛ bɛboka yɛ. (Nye. 14:6) Bɔ ɔtɔ so nza, Yehowa fa ye honhom krongron ne boka yɛ maa yɛkae nningyein bɔ yasua ne. (Yoh. 14:​25, 26) Bɔ ɔtɔ so nna, Yehowa ama yɛ aliemaamɔ bɔ yɛne bɛ bɔnu yɛ asɛnga adwuma ne ɔ. Yehowa boka yɛ so, na aliemaamɔ koso ta yesĩ, ɛhene maa yenya akokoduro yɛfa yɛyɛ asɛnga adwuma ne.

SESÃ ATEE BƆ ƐFA SO YƐ ASƐNGA ADWUMA NANU, NA NYA ADWENE PÁ

11. Ɛkɔyɛ sɛɛ né anya mmeni pee ali bɛ adanzeɛ wɔ asɛnga nu? (Nea foto ne koso.)

¹¹ Sɛ ɛkɔ asɛnga na ando mmeni pee wɔ awuro a, ɛyɛ a w’aba nu bu anaa? Sɛ sɔ a, ɛkɔhora kobisa wɔnwo kyɛ: ‘Ɔkɔyɛ kyɛ nisua yeɛ mmenia nemɔ ahɔ ɔ?’ (Aso. 16:13) ‘Bahɔ adwuma, anaa bɛkwaali dwaa?’ Sɛ enwu ye sɔ a, ɛkɔhora kooli bɛbɔ bɛwɔ dwaaso ne adanzeɛ anaa? Aliemaa bie bɔ bɛfrɛ ye Joshua hãne kyɛ, “Mefa atee ahoroɛ so medi bɛbɔ bɛwɔ dwaa so, ɔne stɔɔ ahoroɛ nu ne adanzeɛ.” Afei koso, ɔne ɔye Bridget anwu ye kyɛ, sɛ bɛkɔ asɛnga nnɔsoa, ɔne Kwasiada eyia a, ɛyɛ a bɛto mmeni pee wɔ awuro.—Ɛfe. 5:​15, 16.

12. Sɛ ɛkɔto ebie wɔ asɛnga nu a, ɛkɔyɛ sɛɛ ne ahora anwu bɔ ɔha ye ɔ?

¹² Sɛ ɛkɔto ebie wɔ asɛnga nu, na enwu ye kyɛ yenye ngye edwirɛ bɔ ɛkã nanwo a, fa atee bie so nwu bɔ ɔha ye ɔ. Joshua ne Bridget  anwu ye kyɛ sɛ bɛfa edwirɛ bɔ ɔwɔ trat ahoroɛ ne nyunu bɛhyɛ ngɔmmɔ bo a, ɔboka paa. Bɛfa trat bɔ yenwa, Ɛnea A Bible Ne Te Nwomaa Beni? bedi mmenia adanzeɛ. Ɛyɛ a, bebisa sona ne kyɛ: “Ebiemɔ nwa Nyameɛ yeɛ ɔmaa bɛhworɔle Bible ne ɔ, ebiemɔ koso nwa, ɔtte nahorɛ. Ɛdwene yenwo sɛ?” Ɛhene kora bukye atee maa bɛne mmenia bɔ ngɔmmɔ.

13. Sɛ mmenia andie yɛ wɔ asɛnga nu po a, nzuati yeɛ yɛnye kɔhora kɔgye ɔ? (Anyandera 27:11)

¹³ Sɛ yɛkɔ asɛnga na mmenia andie yɛ a, ɔnzɛ kyɛ yɛmaa ɔha yɛ. Nzuati ɔ? Ofikyɛ yɛse kyɛ yahora yali mmenia adanzeɛ, kyɛbɔ Yehowa ne Ɔwa ne pena kyɛ yɛyɛ ne. (Aso. 10:42) Yeti sɛ yaando mmenia wɔ awuro, anaa baandie yɛ po a, yɛnye kɔhora kɔgye. Ofikyɛ yɛse kyɛ yayɛ bɔ ɔsɔ yɛ Baba bɔ ɔwɔ anwuro ne nye.—Kenga Anyandera 27:11.

14. Sɛ aliemaa bie nya ebie bɔ ɔne ye kosua Bible ne a, nzuati yeɛ yɛnye kɔhora kɔgye ɔ?

¹⁴ Sɛ aliemaa bie nya ebie bɔ ɔne ye kosua Bible ne a, yemukoraati yɛnye gye paa. Asɛnga adwuma bɔ yɛyɛ ne, Ɛwɛnelɛ Waen bie fa totole akwalaa bie bɔ wamini bɔ bɛpena ye nanwo. Sɛ akwalaa bie mini a, mmeni pee yeɛ bekyini bɛkɔpena ye ɔ. Sɛ benwu ye a, nna bɔ onwuni ye ne ngome yeɛ yenye gye ɔ, na mmom ebiala bɔ ɔbokaso ne koso, yenye gye. Sɔ ala yeɛ asɛnga adwuma ne koso, yɛne yeliemamɔ yeɛ yɛbɔ nu yɛyɛ ɔ. Ɛhene ati, sɛ ebie hyɛ yebo kyɛ ɔba asafo nhyiamu a, yemukoraati yɛnye gye.

FA W’ADWENE SIE ƆDƆ BƆ ELE MA YEHOWA NE WƆ MANGO NASO

15. Edwirɛ bɔ ɔwɔ Mateo 22:​37-39 ne, sɛ yɛfa yɛyɛ adwuma a, sɛɛ yeɛ ɔkɔboka yɛ maa yɛkɔhɔso yekonya anigye wɔ asɛnga nu ɔ? (Nea foto bɔ ɔwɔ koso.)

¹⁵ Sɛ yɛfa y’adwene yesie ɔdɔ bɔ yele yɛma Yehowa ne yɛ mango naso a, ɔkɔmaa yɛkɔhɔso yekonya anigye wɔ asɛnga nu. (Kenga Mateo 22:​37-39.) Sɛ Yehowa nwu ye kyɛ yɛyere yɛnwo yɛyɛ asɛnga adwuma ne a, wɔde nea kyɛbɔ ɔmaa yenye gye ɔ. Sɔ ala yeɛ sɛ yɛhyɛ yebo kyɛ yɛne mmenia sua Bible ne a, bɛkoso bɛnye gye ɔ! Afei koso, fa w’adwene sie kyɛbɔ edwirɛ bɔ yɛkã yekyire mmenia ne, ɔkɔhora kole bɛ ngoa naso.—Yoh. 6:40; 1 Tim. 4:16.

16. Sɛ aha sua nu bɔ ɛngora fité po a, sɛɛ yeɛ ɛkɔhora konya anigye wɔ asɛnga adwuma nanu ɔ? Kã bie nwo dwirɛ.

¹⁶ Ɔnate ɔhaw bie ti, aha sua nu bɔ ɛngora  fité anaa? Sɛ sɔ a, yede nningyein bɔ ɛyɛ a, okyire kyɛ ele ɔdɔ ma Yehowa ne wɔ mango ne, fa w’adwene sie so. COVID-19 anwonyerɛ ne wale ne, Samuel ne Dania hale sua nu. Sɔ mmerɛ bɔ ne nningyein nu ayɛ se ne, bɛnate fon ne ngrataa hworɔlɛ so belili mmenia adanzeɛ, na bɛne ebiemɔ koso suane nikyee wɔ Zoom so. Ne Samuel le kansa, yeti ɛyɛ a ɔfa kɔ hɔspitel. Sɛ ɔkɔ a, né odi bɛbɔ bɛwɔ berɛ ne adanzeɛ. Ɔhãne kyɛ: “Sɛ yɛfa ɔhaw bie nu a, ɔkora maa adwenedwene tɔ yɛ so, y’anwoserɛ so te, na ye gyidie koso kɔ ase. Sɛ ɔba sɔ a, odikyɛ yɛyɛ nningyein biemɔ wɔ Yehowa soen nu bɔ ɔkɔmaa yɛnye kɔgye ɔ.” Dania koso fini ase, na ɔmaa ɔhale nekaa horɛ bosome nza. Yeti, ne odikyɛ ɔtena wheelchair nu bosome nzia. Ɔhãne kyɛ: “Nyerele menwo nyɛle bɔ ngɔhora ɔ. Yeti, mmenia bɔ ne bɛba awuro berɛ, ɔne nɛseniɛ bɔ ne ɔnea me ne, nnili bɛ adanzeɛ. Afei koso, nnili maame bie bɔ ne ɔne adwumakue bie bɔ bɛtɔne ayire, bɛyɛ adwuma ne adanzeɛ wɔ fon so.” Ɔnate bɔ ne wato Samuel ne Dania nati, ne bɛngora bɛnyɛ asɛnga adwuma ne pee. Nakoso, kãa bɔ bɛhora bɛyɛle ne, ɔmaa bɛnye gyele.

17. Nningyein bɔ yahã yenwo dwirɛ wɔ adesua he anu ne, ɛkɔyɛ sɛɛ ne anya so mvasoɛ?

¹⁷ Nningyein nnu bɔ yahã yenwo dwirɛ wɔ adesua he anu ne, sɛ ɛfa ye mukoraati yɛ adwuma a, yeɛ ɔkɔmaa wɔnye kɔgye wɔ asɛnga nu ɔ. Bɔ yahã yenwo dwirɛ ne, ɔtekyɛ nningyein biemɔ bɔ bɛkekã bɛbɔ nu bɛfa bɛyɛ aleɛ pɔtee bie ɔ. Sɛ komapɛ po fi nu a, aleɛ ne ngɔyɛ fɛ. Yeti, sɛ yɛkɔso yɛfa sɔ nningyein hemɔ yɛyɛ adwuma a, ɔkɔmaa yekonya anigye wɔ asɛnga adwuma nanu, na nikyefee ngɔma y’aba nu ngobu.