1. Nzu yeɛ Yehowa pena kyɛ yɛyɛ ɔ?

 NIKYEE kõ bɔ ɔmaa bɛbɔ bagya ne, bɛnye gye paa yeɛ ole mmerɛ bɔ bɛkɔwo baa ne. Nakoso, awofoɛ nemɔ nye ngɔgye yenwo kyɛ bɛwa ne kɔhɔso kɔyɛ adɔma, bɔ ongonyi ngɔyɛ panyi ɔ. Sɛ benwu ye kyɛ bɛwa ne ngora nyi a ɔkɔha bɛ, na ɔkɔmaa bɛ wora kɔbɔ paa. Sɔ ala yeɛ sɛ yɛhyɛ yebo kyɛ yesua Bible ne yɛbayɛ Yesu asuafoɛ a, ɔmaa Yehowa nye gye ɔ. Nakoso, ɔmbena kyɛ yɛfa yesi ɛberɛ ala. (1 Kor. 3:1) Mmom, ɔpena kyɛ yɛyɛ Kristofoɛ bɔ ‘banyi wɔ adwene nu ɔ’.—1 Kor. 14:20.

2. Edwirɛ benimɔ yeɛ yekonya yenwo mmuayɛɛ wɔ adesũa he anu ɔ?

² Nzu yeɛ okyire kyɛ ebie te Kristoniɛ bɔ wanyi wɔ sunzum nu ɔ? Yɛkɔyɛ sɛɛ né yaayɛ Kristoniɛ bɔ wanyi wɔ sunzum nu ɔ? Sɛ yesua Bible ne yé a, sɛɛ yeɛ ɔkɔboka yɛ maa yɛkɔɔyɛ Kristoniɛ bɔ wanyi wɔ sunzum nu ɔ? Nzuati yeɛ odikyɛ yɛnea yé, na yannya adwene kyɛ nekaa bɔ yanya ngɔsoɛ yadwu nala te pá ɔ? Yekonya sɔ dwirɛ hemɔ nwo mmuayɛɛ wɔ adesũa he anu.

NZU YEƐ OKYIRE KYƐ EBIE TE KRISTONIƐ BƆ WANYI WƆ SUNZUM NU Ɔ?

3. Sɛ bɛkã kyɛ Kristoniɛ bie anyi wɔ sunzum nu a, okyire sɛɛ?

³ Wɔ Bible nanu ne, Greek dwirɛ bɔ behyirele yebo ‘wanyi sunzum nu’ ne, ɔkora koso kyire “ebie bɔ wanyi wɔ adwene nu,” anaa “ɔtte akwalaa kõ ɔ.” a (1 Kor. 2:6) Kyɛbɔ bɛwo akwalaa bie a, onyi bayɛ panyi ne, sɔ ala yeɛ odikyɛ yɛ koso yɛbɔ mmɔden kyɛ, yɛne Yehowa afia kɔyɛ kama ɔ. Sɛ yɛyɛ sɔ a, yɛkɔɔyɛ Kristofoɛ bɔ banyi wɔ sunzum nu ɔ. Nakoso, sɛ yɛyɛ sɔ a ne yɛyielle, na mmom odikyɛ yɛbɔ mmɔden kyɛ yɛkɔyɛ pee  yɛkɔboka so. (1 Tim. 4:15) Yeti, yɛ nu biala kɔhora kɔɔyɛ Kristoniɛ bɔ wanyi wɔ sunzum nu, ɔmva yenwo ne afoɛ bɔ wali ɔ. Yede, nzu yeɛ okohyire kyɛ ebie te Kristoniɛ bɔ wanyi wɔ sunzum nu ɔ?

4. Nzu yeɛ ɔmaa yenwu ye kyɛ, Kristoniɛ bie anyi wɔ sunzum nu ɔ?

⁴ Kristoniɛ bɔ wanyi wɔ sunzum nu ne, ɔbɔ mmɔden kyɛ okoli Nyameɛ akwangyerɛ mukoraati so, bɔ ɔnza nu ɔ. Ɔwɔ nu kyɛ bɔne wɔ yenwo de, nakoso ɔbɔ mmɔden kyɛ ɔkɔyɛ bɔ Yehowa kuro kyẽa biala. Afei koso, wawura sona sue foforɛ ne, na ɔbɔ mmɔden susu nningyein nwo kyɛbɔ Nyameɛ kuro ɔ. (Ɛfe. 4:​22-24) Ebieku koso, bɔ wasua wafi Bible nanu ne, ɛhene yeɛ ogyina so sisi gyinayɛɛ ahoroɛ ɔ. Yesɔ nati, yenwo nhia kyɛ bɛkɔhyehyɛ mmraa pɔtee bie bɛkɔma ye kora, né wahora wasi gyinayɛɛ bie. Afei koso, ɔyere yenwo kyɛ ɔkɔyɛ bɔ wasi yenwo gyinayɛɛ ne.—1 Kor. 9:​26, 27.

5. Kristoniɛ bɔ onyinni wɔ sunzum nu ne, nzu yeɛ ɔkɔhora kɔto ye ɔ? (Ɛfesofoɛ 4:​14, 15)

⁵ Kristoniɛ bɔ onyinni wɔ sunzum nu ne, mmenia kɔhora kɔfa “nnakannaka” so konya ye. Ebie ole kyɛ, mmenia bɔ bellé Yehowa ahyehyɛdeɛ nanwo adwene pá, ɔne bɛbɔ bafi asafo nanu bɔ bɛkekã yenwo dwirɛ tɛ́ɛ ne, okole edwirɛ bɔ bɛkã ne koli. b (Kenga Ɛfesofoɛ 4:​14, 15.) Sɔ sona ne, yenye kora boro mmenia, ye dwirɛ te twann, na ɔmva bɔne ngyɛ. Afei, ɔnyɛ se kyɛ ɔkɔto Yehowa mmraa ɔ.—1 Kor. 3:3.

6. Kyɛbɔ ebie nyi wɔ sunzum nu ne, nzu yeɛ yɛkɔhora yɛkɔfa yɛkɔtoto yenwo ɔ? (Nea foto ne koso.)

⁶ Kyɛbɔ yanwu ye ne, sɛ ebie nyi wɔ sunzum nu a, Bible ne fa toto kyɛbɔ akwalaa bie nyi bayɛ panyi nanwo. Ɔnate kyɛ ngwalaa nze nworɛ nati, ɛyɛ a behia ebie bɔ wanyi, bɔ okohyire bɛ bɔ odikyɛ bɛyɛ ɔ. Wɔde, ma yɛnea mvandoho he. Sɛ maame bie ne ɔwa brasua kaamba bɛpɛ kar atee nu a, ɔkɔsɔ akwalaa ne sa. Mmerɛ bɔ akwalaa ne gu so onyi ne, maame ne kɔma ye atee maa ye ngome ɔkɔpɛ kar atee nanu. Nakoso, ɔkɔhã kohyire ye kyɛ, koraka ɔkɔpɛ nu ne, ɔnea bɛen ne famaa. Sɛ akwalaa ne nyi a, ye bɔbɔ yeɛ ɔkɔnea kyɛbɔ ɔkɔpɛ kar atee nanu ɔ. Kyɛbɔ ngwalaa hia ebie bɔ ɔkɔbɔ bɛnwo waen, na asane biala ando bɛ ne, sɔ ala yeɛ Kristoniɛ bɔ onyinni wɔ sunzum nu ne koso te hɔ ɛne. Sana ebie bɔ  wanyi wɔ sunzum nu ne boka ye kora, né wahora wasi gyinayɛɛ pá, na wayɛ bɔ Yehowa kuro ɔ. Nakoso, Kristoniɛ bɔ wanyi wɔ sunzum nu ne de, sɛ ɔpena kyɛ osi gyinayɛɛ bie a, ɔnea Yehowa adwene wɔ edwirɛ nanwo kora ne wayɛ sɔ.

7. Kristofoɛ bɔ banyi wɔ sunzum nu ne, yenwo hia kyɛ ebiemɔ boka bɛ anaa?

⁷ Bɔ yɛkã ye, okyire kyɛ Kristoniɛ bɔ wanyi wɔ sunzum nu ne, yenwo nhia kyɛ ebie kɔboka ye anaa? Daabi, ɔtte sɔ. Sɛ odwu mmerɛ bie a, odikyɛ sɔ Kristofoɛ nemɔ maa ebiemɔ boka bɛ. Kristoniɛ bɔ onnyini wɔ sunzum nu ne, daa ɔpena kyɛ ebiemɔ kyire ye bɔ odikyɛ ɔyɛ ɔ. Nakoso Kristoniɛ bɔ wanyi wɔ sunzum nu ne de, ɔse kyɛ Yehowa pena kyɛ ‘ɔsoa ye bɔbɔ ye adesoa.’ Yeti sɛ osi gyinayɛɛ a, odimoa nea bɔ ebiemɔ yɛle wɔ sɔ dwirɛ nanwo kora ne wayɛ sɔ.—Gal. 6:5.

8. Kristofoɛ bɔ banyi wɔ sunzum nu ne, nzuati yeɛ yɛkɔhora yɛkɔhã kyɛ, ɔsono kyɛbɔ benu biala si te ɔ?

⁸ Bɛtaa bɛkã kyɛ, asaa mmɛseka mukoraa ɔnzɛ. Sɔ ala yeɛ Kristofoɛ bɔ banyi wɔ sunzum nu ne koso, ɔsono ebiala ne ye subaen ɔ. Ebiemɔ adwene nu abukye paa, na ebiemɔ koso le akokoduro. Afei ebiemɔ kuro páyɛlɛ, yeɛ ebiemɔ koso se anwumvoin. Asa koso, ɔsono kyɛbɔ benu biala kogyina Bible naso kosi edwirɛ komapɛ bie nwo gyinayɛɛ ɔ. Ye titire ne, mmerɛ bɔ odikyɛ ebiala fa ye tiboa yɛ adwuma wɔ sɔ dwirɛ nanwo ne. Sɛ ɔba sɔ a, benu biala ndwudwo ndia ye mango wɔ gyinayɛɛ bɔ okosi nanwo, na mmom bɛyere bɛnwo kyɛ bɛkɔyɛ kõ.—Rom. 14:10; 1 Kor. 1:10.

YƐKƆYƐ SƐƐ NÉ YAYƐ KRISTONIƐ BƆ WANYI WƆ SUNZUM NU Ɔ?

9. Sɛ yɛbayɛ Kristoniɛ a, okyire kyɛ kyɛbɔ ɔte biala yɛkɔyɛ ebie bɔ wanyi wɔ sunzum nu anaa? Kyirekyire nu.

⁹ Sɛ bɛwo akwalaa bie a, kyɛbɔ ɔte biala okonyi kɔɔyɛ panyi. Nakoso, sɛ ebie kɔhora kɔɔyɛ Kristoniɛ bɔ wanyi wɔ sunzum nu a, ɛhene de ɔtte sɔ. Sɛ yɛnea Korintofoɛ nemɔ sɔaa, benu biemɔ tiele nzɛmba ne, bɛbɔle asu, na benyane honhom krongron akyɛdeɛ ne bie. Afei koso, nningyein bɔ somafoɛ Pɔɔlo hyirehyirele bɛ ne, benyane mvasoɛ pee befili so. (Aso. 18:​8-11) Nakoso bɛbɔle asu afoɛ pee sĩ ne, né benu biemɔ té te mmenia bɔ bennyini wɔ sunzum nu ɔ. (1 Kor. 3:2) Yede, yɛkɔyɛ sɛɛ né sɔ edwirɛ ne bie ando yɛ?

10. Sɛ yɛpena kyɛ yenyi wɔ sunzum nu a, nzu yeɛ odikyɛ yɛyɛ ɔ? (Yuda 20)

¹⁰ Sɛ yɛkɔhora yɛkɔyɛ Kristoniɛ bɔ wanyi wɔ sunzum nu a, sana yetu yenwo agyirɛ. Bɛbɔ bɛ “adwene te nganga,” bɔ bɛmbena kyɛ benyi wɔ sunzum nu ne, ɔkɔhora kɔyɛ se kɔma bɛ kyɛ bekonya ngɔsoɛ wɔ asafo nanu ɔ. (Any. 1:22) Yɛmbena kyɛ yɛyɛ kyɛ mmenia bɔ banyi, nakoso daa bɛpena kyɛ bɛ maame anaa bɛ baba kyire bɛ bɔ odikyɛ bɛyɛ ɔ. Mmom odikyɛ yɛbɔbɔ yɛyere yɛnwo kyɛ, yɛkɔhɔ so yekonya gyidie bɔ enu yɛ se wɔ Yehowa nu. (Kenga Yuda 20.) Sɛ ɛpena kyɛ ɛbayɛ Kristoniɛ bɔ wanyi wɔ sunzum nu a, srɛ Yehowa ma ɔboka wɔ, ofikyɛ ye yeɛ ɔmaa ‘yekuro kyɛ yɛyɔ, ná yɛyɔ nnwumaa kyɛbɔ ɔsɔ ye nye ɔ.’—Flp. 2:13.

11. Nzu yeɛ Yehowa yɛ fa boka yɛ maa yɛbayɛ Kristofoɛ bɔ banyi wɔ sunzum nu ɔ? (Ɛfesofoɛ 4:​11-13)

¹¹ Yehowa ayɛ nningyein biemɔ bɔ ɔkɔboka yɛ maa yekonyi wɔ sunzum nu ɔ. Ebie ole kyɛ, yele asafo nu mbanyi bɔ bɛnea yɛ so, ná bekyirekyire yɛ ɔ. Bɛnye gye yenwo paa kyɛ, bɛkɔboka yɛ maa yɛkɔɔyɛ “mmenia bɔ yanyi yayie, bɔ yanya Kristo ye sue tebea ne tɛkyɛ ɔ.” (Kenga Ɛfesofoɛ 4:​11-13.) Afei koso, Yehowa fa ye honhom krongron ne boka yɛ maa yenya “Kristo adwene.” (1 Kor. 2:​14-16) Yehowa amaa bahworɔ Nzɛmba nna ne, kyɛbɔ ɔkɔboka yɛ maa yekonwu subaen ahoroɛ bɔ Yesu lale ye ali mmerɛ bɔ ne ɔkã nzɛmba ne wɔ aseɛ  he aso ne. Sɛ esuesua bɔ Yesu yɛle ne a, ɔkɔboka wɔ maa ɛkɔyɛ Kristoniɛ bɔ wanyi wɔ sunzum nu ɔ.

KYƐBƆ BIBLE NE BƆ EKOSUA NE KƆBOKA WƆ Ɔ

12. “Kristo nwo ngwadaa ngwadaa ngyerɛkyerɛ ne,” ebie yeɛ ole beni?

¹² Sɛ yɛkɔhora yɛkɔyɛ Kristofoɛ bɔ banyi wɔ sunzum nu a, “Kristo nwo ngwadaa ngwadaa ngyerɛkyerɛ,” anaa Bible nu dwirɛ bɔ yesuane kora yeɛ yɛbɔ asu ne, odikyɛ yesua pee yɛboka so. Sɔ dwirɛ ne bie fa adwene sakyera, gyidie, asubɔ, ɔne mmenia bɔ bekotingye bɛ nanwo. (Heb. 6:​1, 2) Gyidie bɔ Kristofoɛ le ye ne, ogyi sɔ Bible ngyerɛkyerɛ hemɔ aso. Ɛhene ati, mmerɛ bɔ né somafoɛ Petro dwudwo kyire mmenikue bie wɔ Pɛntekɔso kyẽa ne, ɔhãne Bible ngyerɛkyerɛ hemɔ nwo dwirɛ. (Aso. 2:​32-35, 38) Odikyɛ yedé Bible nu dwirɛ hemɔ yɛtonu kora, ne yahora yaayɛ Yesu asuafoɛ. Ebie yeɛ ole kyɛ, Pɔɔlo hãne kyɛ sɛ ebie nné nni kyɛ bekotingye mmenia bekofi ewue nu a, ɔngɔhora ngɔhã kyɛ ɔte nahorɛ Kristoniɛ. (1 Kor. 15:​12-14) Yeti sɛ yɛkɔhora yɛkɔɔyɛ Kristofoɛ bɔ banyi wɔ sunzum nu a, odikyɛ yesua Bible nu dwirɛ pee yɛboka bɔ yɛse naso.

13. Edwirɛ bɔ ɔwɔ Hebrifoɛ 5:14 ne, sɛ yɛkɔhora yɛkɔfa yɛkɔyɛ adwuma a, nzu yeɛ odikyɛ yɛyɛ ɔ? (Nea foto ne koso.)

¹³ Bible nu dwirɛ bɔ yelimoa yesuane ne la ahameɛ a, odikyɛ yɛbɔ mmɔden kyɛ yɛkɔyɛ Bible nanu nhwehwɛmuɛ yɛkɔhɔ siɛ. Sɛ yɛyɛ sɔ a, yekonwu adwene bɔ Yehowa le ye wɔ nningyein biemɔ nwo, na ye mmraa ahoroɛ ne koso, yɛkɔte yebo. Yeti odikyɛ yɛbɔbɔ yesua nikye, yɛdwenedwene yenwo, na yɛnea kyɛbɔ yɛkɔfa yɛkɔbɔ yɛ bra ɔ. Sɛ yɛkɔso yɛyɛ sɔ a, ɔkɔboka yɛ maa yekosi gyinayɛɛ bɔ ɔsɔ Yehowa nye ɔ. c—Kenga Hebrifoɛ 5:14.

14. Sɛɛ yeɛ Pɔɔlo bokale Korintofoɛ nemɔ maa benyini wɔ sunzum nu ɔ?

¹⁴ Kristofoɛ bɔ bennyini wɔ sunzum nu ne, sɛ odikyɛ besi nikyeebie bɔ Bible ne hyɛlle yenwo mmraa nwo gyinayɛɛ a, ɛyɛ a bennwu bɔ bɛyɛ ɔ. Ebiemɔ adwene yɛ bɛ kyɛ, sɛ Bible ne hyɛlle mmraa pɔtee wɔ nikyeebie nwo a, yede bɛkɔhora bɛkɔyɛ bɔ bekuro ɔ. Benu biemɔ koso, sɛ bési gyinayɛɛ bie a, ɛyɛ a bekuro kyɛ ebie  kohyire bɛ bɔ odikyɛ bɛyɛ ɔ. Wɔ Korinto asafo nanu ne, né ebiemɔ pena kyɛ Pɔɔlo kã kyire bɛ pein kyɛ, beli aleɛ bɔ bafa babɔ afɔleɛ bama bosoen, anaa nnɛmaa bedi. Kyɛ ahaa Pɔɔlo kohyire bɛ bɔ odikyɛ bɛyɛ ne, ɔmaa benwuni ye kyɛ, benu biala gyina ‘fawɔnwodi bɔ ole ye’ naso osi gyinayɛɛ bɔ ɔkɔmaa yetianu kɔtengyɛ ye ɔ. Ɔne bɛ susuli Bible nu dwirɛ ahoroɛ bɔ né ɔkɔboka bɛ maa bekosi gyinayɛɛ pá, bɔ ɔngɔto ebiala sindidua nanwo. (1 Kor. 8:​4, 7-9) Bɔ Pɔɔlo yɛle ne bokale Korintofoɛ nemɔ maa bɛhora benyini wɔ sunzum nu. Afei koso, ɔmaa benu biala hora fale ye adwene yɛle adwuma, bɔ ebie angyire bɛ bɔ odikyɛ bɛyɛ ɔ.

15. Kristofoɛ bɔ né bɛte Hebrifoɛ ne, nzu yeɛ Pɔɔlo yɛ fa bokale bɛ maa benyini wɔ sunzum nu ɔ?

¹⁵ Edwirɛ bɔ Pɔɔlo hworɔ mane Kristofoɛ bɔ né bɛte Hebrifoɛ ne, yɛkɔhora yekosua nikyeebie bie bɔ yenwo hia paa yekofi nu. Benu biemɔ wɔ berɛ a, ɔnate kyɛ né bɛngora bennyi wɔ sunzum nu nati, né ‘benhia aleɛ bɔ nu yɛ se ɔ, na mmom né betehia nyɔfonesue.’ (Heb. 5:12) Bɛbɔ né bɛte sɔ ne, nzakrayɛɛ ahoroɛ bɔ né Yehowa nate asafo naso ayɛ, bɔ né odikyɛ bede bɛto nu ne, banyɛ sɔ. (Any. 4:18) Ebie ole kyɛ, né sɔ Kristofoɛ nanu pee té le adwene kyɛ, odikyɛ bedi Mose Mmraa naso. Nakoso, né Yehowa nate Yesu wue naso aye afi berɛ kɔyɛ afoɛ 30 bɔ wapɛ nu ɔ. (Rom. 10:4; Tito 1:10) Ɛhene ati, né odikyɛ ahaa bede bɛtonu kyɛ, sɔ mmraa ne nyɛ adwuma kõ. Sɛ ɛkenga Hebrifoɛ nwomaa ne a, enwu ye paa kyɛ né Pɔɔlo pena kyɛ ɔboka sɔ Kristofoɛ nemɔ maa bɛte nningyein bo yé. Ye krataa ne bokale bɛ maa benwuni ye kyɛ, nhyehyɛɛ foforɛ bɔ né Yehowa pena kyɛ bɛfa so bɛsõ ye ne, ɔte pá koraa tra bɔ né ɔwɔ Mmraa nanu ne. Afei koso, ɔmaa benwuni ye kyɛ, odikyɛ benya akokoduro bɛkã nzɛmba ne, ɔmva yenwo kyɛ Yudafoɛ nemɔ tane bɛ nye ne.—Heb. 10:​19-23.

NNENYA ADWENE KYƐ NEKAA BƆ ANYA NGƆSOƐ ADWU NALA TE PÁ

16. Sɛ yɛyere yɛnwo yɛbayɛ Kristoniɛ bɔ wanyi wɔ sunzum nu a, nzu bieku yeɛ odikyɛ yɛyɛ ɔ?

¹⁶ Odikyɛ yɛyere yɛnwo yɛbayɛ Kristoniɛ bɔ wanyi wɔ sunzum nu ɔ. Nakoso yɛyɛ sɔ a, ne yɛyielle, na mmom odikyɛ yɛnea yé na yande yanza. Yeti, ɔnzɛkyɛ yenya adwene kyɛ nekaa bɔ yanya ngɔsoɛ yadwu nala te pá. (1 Kor. 10:12) Odikyɛ yɛkɔso ‘yɛneanea y’ahone nu  yɛnea’ kyɛ yenya ngɔsoɛ wɔ asafo nanu, anaakyɛ yɛte yesa.—2 Kor. 13:5.

17. Krataa bɔ Pɔɔlo hworɔ ɔɔmane Kolosefoɛ nemɔ ne, sɛɛ yeɛ ɔmaa yenwu bɔ yeti yeɛ yenwo hia kyɛ yɛkɔso yenyi wɔ sunzum nu ɔ?

¹⁷ Krataa bɔ Pɔɔlo hworɔ ɔɔmane Kolosefoɛ nemɔ anu ne, osa hãne bɔ yeti yeɛ yenwo hia kyɛ, ebie kɔso nyi wɔ sunzum nu ɔ. Ɔwɔ nu kyɛ né sɔ Kristofoɛ nemɔ anyi wɔ sunzum nu de, nakoso Pɔɔlo bɔle bɛ kɔkɔ kyɛ bɛnea yé, na bannya adwene bɔ ewiase ne le ye ne bie. (Kol. 2:​6-10) Bɛbɔ né bɛwɔ sɔ asafo nanu ne, ne Epafra se bɛ paa, yeti ɔhɔle so bɔle mbaeɛ mane bɛ, kyɛbɔ ɔkɔyɛ a, ‘bekogyina pindinn ɔ.’ (Kol. 4:12) Nzu yeɛ yesua yefi nu ɔ? Né Pɔɔlo ne Epafra mukoraati se kyɛ, sɛ ebie kɔhɔso konyi wɔ sunzum nu a, sana sona ne bɔbɔ yere yenwo, na Nyameɛ koso boka ye. Né bɛpena kyɛ Kolosefoɛ nemɔ kɔso nyi wɔ sunzum nu, ɔmva yenwo ne ɔhaw biala bɔ né bɛfa nu ɔ.

18. Kristoniɛ bɔ wanyi wɔ sunzum nu ne, sɛ wannea yé a, nzu yeɛ ɔkɔhora kɔto ye ɔ? (Nea foto ne koso.)

¹⁸ Pɔɔlo bɔle Hebrifoɛ nemɔ kɔkɔ kyɛ, sɛ ebie anyi wɔ sunzum nu po, na wannea yenwo yé a, ɔne Nyameɛ afia kɔhora kɔsɛkye koraa. Kristoniɛ bie kɔhora kɔso kɔyɛ bɔne, na ngɔyɛ ye adwene kyɛ ɔkɔyɛ nzakrayɛɛ bɔ ɔkɔmaa Nyameɛ kɔfa kɔhyɛ ye ɔ. Nakoso bɔ ɔyɛ anigye yeɛ ole kyɛ, Hebrifoɛ nemɔ de, ne bɛtte sɔ. (Heb. 6:​4-9) Ɛnnɛ koso, bɛbɔ bayakyi adesua ne asɛnga hɔlɛ, ɔne bɛbɔ batu bɛ, nakoso nzieɛn benu bɛnwo ne koso ɛ? Ɔnate kyɛ bayɛ nzakrayɛɛ nati, bɛtte kyɛ mmenia bɔ Pɔɔlo hãne bɛnwo dwirɛ wɔ Hebrifoɛ nwomaa nanu ne. Nakoso sɛ besa bɛba asafo nanu a, odikyɛ bɛboka bɛ maa bɛne Yehowa afia sa yɛ kama. (Hes. 34:​15, 16) Mbanyi nemɔ kɔhora kɔyɛ nhyehyɛɛ maa aliemaa bie bɔ ɔbɔ yenwo mmɔden ne bɛ kosua nikye, na wamaa bɛ gyidie asa ayɛ se.

19. Nzu yeɛ odikyɛ yenu biala fasie yenye so ɔ?

¹⁹ Sɛ afa asie wɔnye so kyɛ ɛpena kyɛ ɛbayɛ Kristoniɛ bɔ wanyi wɔ sunzum nu a, ɛkɔhora kodwu yenwo. Kɔso sua Bible ne, na yɛ nu nhwehwɛmuɛ kɔ siɛ. Sɛ ɛyɛ sɔ a, ɔkɔboka wɔ maa ɛkɔyɛ bɔ Yehowa kuro ɔ. Sɛ ɛte Kristoniɛ bɔ wanyi wɔ sunzum nu koso a, yede yere wɔnwo, na ande anza.