1. Nzu yeɛ ole honhom nu paradise ne, na nzu yeɛ bɛbɔ bɛwɔ nu ne yere bɛnwo kyɛ bɛkɔyɛ ɔ?

 YELE paradise bie wɔ aseɛ so ɛnnɛ. Mmeni pee yeɛ bɛwɔ nu ɔ, na bɛ mukoraati bɛyɛ nyumaa pá. Sɔ mmenia hemɔ so anu dwo bɛ, na bɛnye gye. Bɛbɔ bɛnwo mmɔden kyɛ bengofi sɔ paradise nanu lé, na bɛnye gye yenwo kyɛ bekonya mmeni pee maa bɛkɔɔboka bɛ so ɔ. Yede, nzu yeɛ ole sɔ paradise ne? Ɛhene yeɛ ole honhom nu paradise ne. a

2. Nzu yeɛ ɔyɛ nwanwa wɔ honhom nu paradise nanwo ɔ?

² Ewiase he anu ayɛ suro paa, ofikyɛ Satan amaa mmenia tianu ayɛ se, na bellé ɔdɔ bɛmma bɛnwo. Nakoso bɔ ɔyɛ nwanwa yeɛ ole kyɛ, Yehowa amaa yanya nekaa bie bɔ asomdwee wɔ ɔ. (1 Yoh. 5:19; Nye. 12:12) Yɛ Nyameɛ bɔ okuro yɛ dwirɛ ne, wanwu bɔ ɔkɔso wɔ ewiase he anu ne. Ɛhene ati, wama yɛ honhom nu paradise bɔ ɔnate so bɔ yɛnwo waen kyɛbɔ ɔkɔyɛ a, yɛkɔhora yɛkɔsõ ye ɔ. Bible ne kã yenwo dwirɛ kyɛ, ɔte “afealeɛ,” ɔne “turo bɔ mmerɛ biala nzue doadoa nu ɔ.” (Yes. 4:6; 58:11) Bɛbɔ bɛwɔ sɔ paradise he anu ne, Yehowa ayira bɛ paa. Yeti, ɔmva yenwo kyɛ nningyein nu ayɛ se ne, bɛso anu dwo bɛ.—Yes. 54:14; 2 Tim. 3:1.

3. Ngɔmhyɛ bɔ ɔwɔ Yesaya yeti 65 ne, sɛɛ yeɛ ɔwale nu tete ne ɔ?

³ Kyɛbɔ nningyein kɔhɔso wɔ honhom nu paradise nanu ne, Yehowa nate diyifoɛ Yesaya so hãne yenwo dwirɛ. Ekonwu  ye wɔ Yesaya yeti 65. Sɔ dwirɛ ne limoa wale nu wɔ afoɛ 537 K.Y.B. (Kora Yeɛ Yesu Ba Ɔ) Sɔ mmerɛ ne, Yudafoɛ bɔ né bɛte ngoaa wɔ Babilɔn ne, né bayakyi bɛ maa basa bawa bɛ kuro. Yehowa yirale bɛ paa, na ɔbokale bɛ maa besa besiesiele Yerusalem kuro ne maa ɔyɛle nyemene, na besa besili asɔre awuro ne. Ɛhene maa besa benyane nekaa bɔ bɛkɔso Yehowa nahorɛ nu wɔ Yisrael.—Yes. 51:11; Sak. 8:3.

4. Sɛɛ yeɛ ngɔmhyɛ bɔ ɔwɔ Yesaya yeti 65 ne ba nu ɛnnɛ ɔ?

⁴ Yesaya ngɔmhyɛ ne sa wale nu wɔ afoɛ 1919 Y.B (Yɛ Aberɛ So) nu. Sɔ mmerɛ ne, bɛbɔ bɛso Yehowa ne lɛle bɛnwo fili Babilɔn Pirikua ne sanu. Afei, honhom nu paradise ne hyɛle yebo kyɛ ɔtrɛ kɔ aseɛ so nekaa biala. Bɛbɔ né bɛkã nzɛmba ne, né bele subaen pá, na bɛyerele bɛnwo bɛtele asafo ahoroɛ. Mmenia bɔ né bɛ subaen tekyɛ ngaka ne, bɛfale “sona sue foforɛ bɔ Nyameɛ bɔle ye kyɛ ye sɛso” ne bewurale. (Ɛfe. 4:24) Nhyiraa bɔ Yesaya hãne yenwo dwirɛ ne, ɔkɔwa nu wɔ ewiase foforɛ nanu. Nakoso ɛnnɛ po, yenya nhyiraa pee. Yede ɛmɔma yɛnea sɔ nhyiraa ne bie, ɔne bɔ yeti yeɛ ɔnzɛkyɛ yefi honhom nu paradise nanu lé ɔ.

BƐBƆ BƐWƆ HONHOM NU PARADISE NANU NE, NHYIRAA BƆ BENYA YE Ɔ

5. Kyɛbɔ Yesaya 65:13 ne maa yenwu ye ne, nzu yeɛ yenya ye wɔ honhom nu paradise nanu ɔ?

⁵ Bele anwoserɛ, na bɛnwo tɔ bɛ. Bɛbɔ bɛwɔ honhom nu paradise nanu, ɔne bɛbɔ bɛnne nu bie ne, Yesaya ngɔmhyɛ ne maa yenwu nzonzonleɛ bɔ ɔla b’afia ɔ. (Kenga Yesaya 65:13.) Nningyein bɔ ɔboka bɛbɔ bɛso Yehowa ne maa bɛkora bɛso ye yé ne, ɔfa ma bɛ maa ɔbo so. Ebie yeɛ ole kyɛ, wama yɛ ye honhom krongron, Bible ne, nwomaa, ɔne vidio ahoroɛ. Sɔ nningyein ne boka yɛ maa ‘yedidi, yɛno, na yedi ahurusi.’ (Fatoto Nyekyire 22:17 nanwo.) Nakoso bɛbɔ bɛnne honhom nu paradise nanu ne de, ‘ɛhɔen kũ bɛ, nzuhɔen kũ bɛ, na bɛ nyunu gua ase,’ ofikyɛ bɛnze Nyameɛ.—Amos 8:11.

6. Nningyein bɔ Yehowa fa ma yɛ bɔ ɔboka yɛ wɔ y’asetena nu ne, sɛɛ yeɛ Yoel 2:​21-24 hãne yenwo dwirɛ ɔ, na sɛɛ yeɛ yenya so mvasoɛ ɔ?

⁶ Yoel ngɔmhyɛ ne hãne nningyein biemɔ bɔ ɔnate kyɛ Yehowa kuro yɛ dwirɛ nati, ɔfa ma yɛ maa yɛkora yɛtena ngoa nu nanwo dwirɛ. Ebie yeɛ ole, aburoo, nzaa, ngoo, ɔne Bible nu dwirɛ bɔ ɔboka yɛ wɔ y’asetena nu ɔ. (Yoel 2:​21-24) Bible nu dwirɛ bɔ ɔte sɔ ne, ɔnate yɛ nwomaa ahoroɛ bɔ ogyi Bible naso, yɛ wɛbsait, asafo nhyiamu, manzin, ɔne mandam nhyiamu so yeɛ ɔfa ma yɛ ɔ. Yɛkora yenya sɔ nningyein hemɔ aso mvasoɛ kyẽa biala, na ɛhene maa yenya anwoserɛ.

7. Nningyein benimɔ yeɛ ɔmaa ‘y’ahone’ tɔ yɛ kunu ɔ? (Yesaya 65:14)

⁷ Bɛnye gye, na bɛnye sɔ bɔ bele ye ɔ. Ɔnate kyɛ mmenia bɔ bɛso Nyameɛ ne, bɛnye sɔ bɔ wayɛ wama bɛ nati, ‘bɛto anigye dwein.’ (Kenga Yesaya 65:14.) Nahorɛ dwirɛ bɔ ɔwɔ Bible nanu ne hyɛ yɛ ngunaen, na bɔhyɛ bɔ ɔwɔ nu ne koso kyekye yɛ wora. Kristo wue ne koso amaa yanya anyelasoɛ. Ɛhe mukoraati maa ‘y’ahone’ tɔ yɛ kunu. Sɛ yɛne yeliemamɔ Kristofoɛ bɔ sɔ nningyein he anwo ngɔmmɔ a, ɔmaa yɛnye gye paa.—Edw. 34:8; 133:​1-3.

8. Nningyein titire nyɔ beni yeɛ yenwu ye wɔ honhom nu paradise nanu ɔ?

⁸ Ɔdɔ ne ngabonu bɔ ɔwɔ Yehowa Adanzefoɛ afia ne, yeɛ ole nningyein titire nyɔ bɔ ɔmaa yenwu ye kyɛ, bɛwɔ honhom nu paradise nanu ɔ. Sɔ ɔdɔ bɔ “ɔkã nningyein mukoraa bɔ nu” ne, ɔmaa yenwu kyɛbɔ  nningyein kɔhɔ so wɔ ewiase foforɛ nanu ɔ. Sɔ mmerɛ ne, ɔdɔ ne ngabonu bɔ ɔkɔwa b’afia ne, ɔkɔtra ɛnnɛ deɛ ne koraa. (Kol. 3:14) Aliemaa brasua bie hãne bɔ onwuni ye wɔ Yehowa Adanzefoɛ nwo, mmerɛ bɔ ɔfale yenwo bɔle bɛ nanwo dwirɛ kyɛ: “Sɛ bɛkã anigye paa a, né nne bie, ofikyɛ né ɔdɔ nne m’abusua nu. Nakoso, mmerɛ bɔ olimoa bɔ ngɔle Yehowa Adanzefoɛ nhyiamu bo ne, nwuni kyɛ bɛdodɔ bɛnwo paa.” Sɛ ebie pena kyɛ yenye gye paa a, sana ɔba honhom nu paradise nanu bie. Ewiase he anu de, mmenia mva yɛ nyɛ hwee, nakoso Yehowa ne bɛbɔ bɛso ye ne nyunu de, yele dumaa pá.—Yes. 65:15.

9. Nzu dwirɛ yeɛ Yesaya 65:​16, 17 ne kã fa amaneɛ bɔ yenwu ye ɛnnɛ nanwo ɔ?

⁹ Bɛnwo dwo bɛ. Yesaya 65:14 maa yenwu ye kyɛ, bɛbɔ bɛnne honhom nu paradise nanu ne, ‘besu bɛdi yealɛ wɔ b’ahone nu, na bɛbɔ awue bɛdi aworabolɛ.’ Yede, nningyein bɔ kesaalae ɔmaa bɛbɔ bɛso Nyameɛ ne nwu amaneɛ, na bedi yealɛ ne koso ɛ? Ɔngɔhyɛ ‘bɛ wora kofi, na Nyameɛ kobu yenye kogua so.’ (Kenga Yesaya 65:​16, 17.) Yehowa kɔye amaneɛ bɔ yɛfa nu ne mukoraati kofi berɛ, na ɛyealɛ bɔ sɔ amaneɛ ne amaa yafa nu ne koso, yɛngɔkae ye kõ.

10. Nzuati yeɛ ɔyɛ wɔ fɛ kyɛ ɛne aliemaamɔ bɔ nu so Yehowa ɔ? (Nea foto ne koso.)

¹⁰ Kesaalae po, ɔhaw bɔ yɛfa nu wɔ ewiase he anu ne, sɛ yɛkɔ asafo nhyiamu a, ɔmaa yɛye y’adwene yefi so, na ɛhene maa yɛnwo dwo yɛ paa. Subaen bɔ Nyameɛ honhom ne maa yenya ye tekyɛ ɔdɔ, anigye, asomdwee, adɔeɛyɛlɛ, ɔne anwobrɛaseɛ ne, sɛ yɛda ye ali a, ɔmaa aliemaamɔ bɔ bɛwɔ honhom nu paradise nanu ne, bɛnwo dwo bɛ. (Gal. 5:​22, 23) Ɔyɛ yɛ fɛ paa kyɛ yɛwɔ Nyameɛ ahyehyɛdeɛ nanu ɔ! Bɛbɔ bɛkɔso bɛtena honhom nu paradise nanu ne, bekonwu kyɛ Nyameɛ bɔhyɛ bɔ ɔfa “nyameɛso foforɛ ne aseɛ foforɛ” nanwo ne, wawa nu.

11. Kyɛbɔ Yesaya 65:​18, 19 kã ne, nzu yeɛ yenya yefi honhom nu paradise bɔ Yehowa abɔ ama yɛ nanu ɔ?

¹¹ Bɛle anigye, na bedi ahurusi. Yesaya sa maa yenwu bɔ yeti yeɛ odikyɛ ‘yɛmaa yɛnye gye na yedi ahurusi’ wɔ honhom nu paradise nanu ɔ. Yeɛ ole kyɛ, Yehowa bɔbɔ yeɛ ɔbɔle ɔ. (Kenga Yesaya 65:​18, 19.) Yeti ɔnyɛ nwanwa kyɛ, mmenia bɔ bɛwɔ ngondombo soen nu ne, ɔnate yɛ so ɔtwe bɛ ba honhom nu paradise bɔ ɔyɛ nyemene nanu ɔ. Ɔnate kyɛ yɛwɔ nahorɛ nanu nati, yenya nhyiraa pee, na ɛhene maa yɛnye gye paa. Yeti yɛkã yenwo dwirɛ yekyire mmenia.—Yer. 31:12.

12. Bɔhyɛ bɔ ɔwɔ Yesaya 65:​20-24 ne, ɔkã wɔ sɛ́, na nzuati ɔ?

 ¹² Ɔnate kyɛ yɛwɔ honhom nu paradise nanu nati, yele anyelasoɛ, na ɛhene maa yɛnye gye paa. Wɔde, ma yɛnea nningyein bɔ yekonwu ye, ɔne bɔ yɛkɔyɛ ye wɔ ewiase foforɛ nanu ne bie. Bible ne hyɛ yɛ bɔ kyɛ: “Adɔma bɔ bɛwo ye a, ɔngyɛ né wawu ne, ebie ngosi ko . . . yeɛ aworowaa bɔ wanyie ye afoɛ mukoraa di ne koso, sɔ ala.” ‘Yekosisi sua yɛkɔtena nu, na yɛkɔyɛ bobe boo mɔ yekoli nu aleɛ.’ ‘Yɛngɔyɔ adwuma yɛngɔfɛ mbaen,’ ofikyɛ ‘yɛkɔyɛ bɛ bɔ AWURADE ayira bɛ ɔ.’ Yehowa ahyɛ bɔ kyɛ, ɔkɔmaa yɛnye kɔgye kyẽabie, na asane biala ngɔto yɛ. Sɔ mmerɛ ne, ‘anzana bɛbaasu bɛfrɛ ne po,’ né ɔse bɔ ebiala hia ɔ, ‘na ɔkɔmaa ateasefoɛ amukoraa bekonya bɔ bɛpena ɔ.’—Yes. 65:​20-24; Edw. 145:16.

13. Nzakrayɛɛ bɔ mmenia yɛ, mmerɛ bɔ bahyɛ yebo kyɛ bɛso Yehowa ne, sɛɛ yeɛ Yesaya 65:25 kã yenwo dwirɛ ɔ?

¹³ B’abrabɔ ayɛ kama, na bele asomdwee. Mmenia bɔ né bɛ subaen tekyɛ ngaka ne, Nyameɛ nate ye honhom naso aboka bɛ maa basesa. (Kenga Yesaya 65:25.) Yeti, kesaalae bayakyi bɛ subaen daa ne koraa. (Rom. 12:2; Ɛfe. 4:​22-24) Mmenia bɔ bɛso Nyameɛ ne, bɔne té wɔ bɛnwo, yeti bɛkɔhɔ so bekoli mvomsoɛ. Nakoso, sɔ mmenia hemɔ bɔ befi “adasa mmaa mukoraa” nu ne, Yehowa ahã bɛ abɔ nu maa bayɛ kõ. Ɛhene ati, bele asomdwee, na bɛdodɔ bɛnwo. (Tito 2:11) Nyameɛ bɔ ole tumi wɔ nikyee biala so ne ngome yeɛ ɔkɔhora kɔyɛ sɔ anwanwadeɛ he ɔ!

14. Edwirɛ bɔ ɔwɔ Yesaya 65:25 ne, sɛɛ yeɛ aliemaa bie nwuni kyɛ ɔte nahorɛ ɔ?

¹⁴ Aso mmenia kora sesa bɛ subaen amba? Ɛmɔma yɛnea sɔ dwirɛ he. Né abrandeɛ bie yɛ ye nningyein basabasa, na né ye abrabɔ asɛkye koraa. Koraka onya afoɛ 20 ne, né wahɔ prisa wawa mmerɛ pee, ofikyɛ, né owua kar, obu mmenia anoa nye, na né ɔyɛ nningyein foforɛ pee bɔ ɔttemaye ɔ. Afei koso, ne okuro ngondii paa. Mmerɛ bɔ bɛhãne Bible nanu dwirɛ behyirele ye, na ɔhyɛle yebo hɔle asafo nhyiamu ne, yenye gyele paa, ofikyɛ onwuni kyɛ wawa honhom nu paradise bie anu. Ɔbɔle asu ne si ne, onwuni kyɛ edwirɛ bɔ ɔwɔ Yesaya 65:25 ne fa yenwo paa. Mmerɛ bie bɔ wapɛ nu ne, né ye subaen tekyɛ gyata. Nakoso kesaalae de, waayɛ ebie bɔ okuro asomdwee tekyɛ boaen.

15. Nzuati yeɛ yɛpena kyɛ yɛboka mmeni pee maa, bɛbaboka yɛ so wɔ honhom nu paradise nanu ɔ?

¹⁵ Edwirɛ bɔ ɔwɔ Yesaya 65:13 ne hyɛ yebo kyɛ: “AWURADE nwa nyoo.” Ngyekyɛmuɛ 25 ne koso, edwirɛ he yeɛ ɔfa pɛ yebo ɔ: “AWURADE noa dwirɛ ɛne.” Edwirɛ biala bɔ Yehowa kã ne, ɔba nu. (Yes. 55:​10, 11) Honhom nu paradise ne, yɛwɔ nu kesaalae. Kyɛbɔ Yehowa amaa yɛ mukoraati yahã yabonu kyɛ aliemaamɔ ne, ɔyɛ nwanwa paa. Ewiase nanu ndwo, nakoso yɛde yele asomdwee, na yɛnwo tɔ yɛ. (Edw. 72:7) Ye sɔ nati, yɛpena kyɛ yɛboka mmeni pee maa bɛbaboka yɛ so. Sɛ yɛkɔhora yɛkɔyɛ sɔ a, sana yɛboka bɛ maa bɛbayɛ asuafoɛ.—Mat. 28:​19, 20.

MA MMENIA NYE GYE YENWO KYƐ BƐKƆWA HONHOM NU PARADISE NANU BIE

16. Nzu yeɛ ɔmaa mmenia kora ba honhom nu paradise nanu ɔ?

¹⁶ Yenu biala kɔhora kɔyɛ nikyeebie bɔ ɔkɔmaa mmenia nye kɔgye yenwo kyɛ, bɛkɔwa honhom nu paradise nanu bie ɔ. Sɛ yɛkɔhora yɛkɔyɛ sɔ a, sana yesuesua Yehowa. Ɔnhyɛ mmenia kyɛ bɛbra ye ahyehyɛdeɛ nanu, na mmom, onya aboterɛ “twetwe” bɛ maa bepingye ye. (Yoh. 6:44; Yer. 31:3) Sɛ  sɔ mmenia nemɔ sua Yehowa subaen ahoroɛ bɔ ɔyɛ nyemene nanwo nikye a, ɔkã bɛ maa befi b’ahone nu bɛbaso ye. Yede, yɛkɔyɛ sɛɛ né yafa yɛ subaen, ɔne yɛ nneyɛɛ so yamaa mmenia nye agye yenwo kyɛ, bɛkɔwa honhom nu paradise nanu bie?

17. Sɛ mmenia nye kɔgye yenwo kyɛ bɛkɔwa honhom nu paradise nanu bie a, nzu yeɛ odikyɛ yɛyɛ ɔ?

¹⁷ Sɛ yɛmaa aliemaamɔ nwu ye kyɛ yekuro bɛ dwirɛ, na yɛdwene bɛnwo a, ɔmaa mmenia nye gye yenwo kyɛ bɛkɔwa honhom nu paradise nanu bie. Sɛ mmenia ba yɛ asafo nhyiamu ahoroɛ ne bie a, yɛpena kyɛ benwu ye kyɛ: ‘Nyameɛ wɔ yɛ nu amba.’ Asafo nhyiamu ahoroɛ bɔ né bɛyɛ ye wɔ tete Korinto kuro nanu ne, sɔ yeɛ ebiemɔ hã fale yenwo ɔ. (1 Kor. 14:​24, 25; Sak. 8:23) Yeti, afutue bɔ Bible ne fa ma yɛ kyɛ, “Ɛ́mɔtena asomdwee nu” nu ne, odikyɛ yɛkɔso yɛfa yɛyɛ adwuma.—1 Tɛs. 5:13.

18. Nzu yeɛ ɔkɔmaa mmenia nye kɔgye yenwo kyɛ bɛkɔwa Yehowa ahyehyɛdeɛ nanu ɔ?

¹⁸ Subaen pá bɔ ɔwɔ aliemaamɔ nwo ne, ɛhene yeɛ Yehowa fa ye adwene sie so ɔ, na sɔ yeɛ odikyɛ yɛyɛ ɔ. Bɔ yeti yeɛ odikyɛ yɛyɛ sɔ yeɛ ole kyɛ, bɔne bɔ ɔwɔ bɛnwo ne, kyẽabie okofi berɛ. Bible ne kã kyɛ, “Ɛmɔhurohuro ɛmɔ nwo dwirɛ, ɛ́mɔnwu ɛmɔ nwo anwumvoin, ná ɛ́mɔfa bɛhyehyɛ ɛmɔ nwo.” Sɛ yɛfa sɔ dwirɛ he yɛyɛ adwuma a, ɔkɔmaa sɛ yɛne aliemaa bie nya edwirɛ a, yekofi ɔdɔ nu yekosiesie y’afia. (Ɛfe. 4:32) Bɛbɔ bɛpena kyɛ mmenia da sɔ subaen ne bie ali bekyire bɛ ne, sɛ benwu ye sɔ a, ɔmaa benye gye yenwo kyɛ bɛkɔwa honhom nu paradise nanu bie. b

 KƆSO TENA HONHOM NU PARADISE NANU

19. (a) Kyɛbɔ yenwu ye wɔ alaka bɔ yenwa, “ Bɛhɔle, Na Besa Bɛwale” nanu ne, nzu yeɛ ebiemɔ hãne ɔ? (b) Nzu yeɛ odikyɛ yɛyere yɛnwo kyɛ yɛkɔyɛ ɔ? (Nea foto ne koso.)

¹⁹ Nea kyɛbɔ yɛnye gye yenwo kyɛ yɛwɔ honhom nu paradise nanu ɔ! Mmeni pee bɔ bɛwɔ nu ɛnnɛ ne, bɛye Yehowa ayɛ bɛtra mmerɛ biala, na b’abrabɔ koso te kama. Ɛmɔma yɛhɔso yɛla Yehowa ase kyɛ wamaa yanya honhom nu paradise bɔ ɔte sɔ ɔ. Ebiala bɔ ɔpena kyɛ yenwo tɔ ye, ye ahone tɔ ye kunu, onya asomdwee, na ye abrabɔ yɛ kama ne, odikyɛ ɔba honhom nu paradise nanu, na ɔnzɛ kyɛ ofi nu lé! Satan bɔ mmɔden kyɛ ɔkɔlakalaka yɛ maa yekofi nu, yeti odikyɛ yɛmaa yɛnye da berɛ. (1 Pet. 5:8; Nye. 12:9) Sɛ yɛyɛ sɔ a, ɔngɔhora ongoli yɛso ngunim. Ɛmɔma yɛyere yɛnwo yɛbɔ honhom nu paradise nanwo waen, ofikyɛ nu yɛ nyemene, na asomdwee koso wɔ nu.