ADESŨA 7
DWEIN 51 Yɛahyira Yɛn Ho So Ama Onyankopɔn!
Bɔ Nasiritefoɛ Nemɔ Yɛle Ne, Nzu Yeɛ Yɛkɔhora Yekosũa Yekofi Nu Ɔ?
“Mmerɛ amukoraa bɔ ɔtɛ te Nasiriteniɛ ne, ɔte krongron ma AWURADE.”—NUM. 6:8.
BƆ ADESŨA NE KƆHÃ YENWO DWIRƐ Ɔ
Nasiritefoɛ nemɔ fale nningyein bɔle afɔleɛ mane Yehowa, na né bele gyidie kyɛ Yehowa kɔboka bɛ. Adesũa he kɔmaa yekonwu bɔ yɛkɔhora yekosũa yekofi bɔ bɛyɛle nanu ɔ.
1. Ofi tete ɔbaadwu ɛnnɛ mukoraati ne, nzu yeɛ mmenia bɔ bɛsõ Yehowa ne, benu pẽe nala ayɛ ɔ?
YENWO atẽe bɔ anya bɔ ɛfa sõ Yehowa ne, wɔnye sɔ anaa? Sɛ sɔ a, yede nwu ye kyɛ ɔtte wɔ ngome. Mmeni pẽe bɔ bɛtenane ase tete ne, bɛ koso né ɔyɛ bɛ fɛ kyɛ banya yenwo atẽe bɔ bɛsõ Yehowa ɔ. (Edw. 104:33, 34) Ɛnnɛ aliemaamɔ pẽe afa nningyein abɔ afɔleɛ kyɛbɔ ɔkɔyɛ a, bɛkɔsõ Yehowa yé ɔ. Sɔ ala yeɛ Yisraelfoɛ nemɔ nu bie bɔ bɛɛyɛle Nasiritefoɛ nemɔ koso yɛle ɔ. Yede sɔ mmenia nemɔ yeɛ bele nwamɔ, na bɔ bɛyɛle ne, nzu yeɛ yɛkɔhora yekosũa yekofi nu ɔ?
2. (a) Nwamɔ yeɛ né bɛfrɛ bɛ Nasiritefoɛ ne? (Numeri 6:1, 2) (b) Nzuati yeɛ Yisraelfoɛ biemɔ sili gyinayɛɛ kyɛ bɛkɔyɛ Nasiritefoɛ ɔ?
2 Hebri dwirɛ bɔ behyirele yebo “Nasiriteniɛ” ne, bɔ okyire yeɛ ole “Ebie bɔ watu yenwo wasie berɛ kyɛ ɔkɔyɛ nikyee pɔtee bie ɔ.” Ɛhe maa yenwu kyɛ né Nasiritefoɛ nemɔ fa nningyein bɔ afɔleɛ kyɛbɔ ɔkɔyɛ a, bɛkɔsõ Yehowa yé ɔ. Mose Mmraa ne hãne kyɛ sɛ brienzua anaa brasua bie kuro a, ɔkɔhora kɔta ndaen kyɛ ɔkɔyɛ Nasiriteniɛ kodwu mmerɛ bie. a (Kenga Numeri 6:1, 2.) Sɛ né Yisraelniɛ bie ta sɔ ndaen ne a, né nningyein pɔtee biemɔ wɔ berɛ bɔ ɔkɔyɛ ɔ. Nakoso, Yisraelfoɛ bɔ baha ne de, né bɛnyɛ bie. Yede, nzu yeɛ né ɔkɔhã Yisraelniɛ bie kyɛ osi sɔ gyinayɛɛ ne ɔ? Ɔdɔ bɔ ole ma Yehowa, ɔne kyɛbɔ yenye sɔ nningyein pẽe bɔ Yehowa ayɛ ama ye ne, yeɛ né ɔkã ye maa ɔyɛ sɔ ɔ.—Deut. 6:5; 16:17.
3. Bɛbɔ bɛsõ Nyameɛ ɛnnɛ ne, nzu yeɛ bɛyɛ bɛfa besuesũa Nasiritefoɛ nemɔ ɔ?
3 Mmerɛ bɔ “Kristo mmeraa” ne oosili Mose Mmraa ne gya nu ne, nhyehyɛɛ bɔ né ɔwɔ berɛ kyɛ ebie kɔhora kɔɔyɛ Nasiriteniɛ ne, ɔwale ayieleɛ. (Gal. 6:2; Rom. 10:4) Nakoso ɛnnɛ, bɛbɔ bɛsõ Yehowa ne, bɛyere bɛnwo kyɛ bekofi b’ahõne, bɛ kra, bɛ adwene, ɔne bɛ anwoserɛ mukoraati nu bɛkɔsõ Yehowa, kyɛbɔ né Nasiritefoɛ nemɔ yɛ ne. (Mak. 12:30) Sɛ yefi yɛ ahõne nu yɛbɔ mbaeɛ yɛkã yekyire Yehowa kyɛ ye ngome yeɛ yɛkɔsõ ye a, okyire kyɛ yata ndaen kyɛ yɛkɔyɛ bɔ okuro ɔ. Bɔ ɔkɔyɛ né yahora yali sɔ bɔhyɛ naso ne, odikyɛ yɛyere yɛnwo yɛfa nningyein biemɔ yɛbɔ afɔleɛ. Yɛbaanea bɔ ɔbokale Nasiritefoɛ nemɔ maa bɛhora belili ndaen bɔ bɛtale naso ɔ. Sɛ yɛyɛ sɔ a, ɔkɔboka yɛ maa yekoli ɛbɔ bɔ yahyɛ Yehowa kyɛ yɛkɔsõ ye naso. b (Mat. 16:24) Yede ɛmɔma yɛnea bɔ Nasiritefoɛ nemɔ yɛle ne bie.
FA NNINGYEIN BƆ AFƆLEƐ
4. Kyɛbɔ Numeri 6:3, 4 maa yenwu ye ne, sɛ ebie te Nasiriteniɛ a, nningyein beni yeɛ né ɔfa bɔ afɔleɛ ɔ?
4 Kenga Numeri 6:3, 4. Sɛ ebie te Nasiriteniɛ a, né odikyɛ otua yenwo nningyein biemɔ tekyɛ nzãa, ɔne nikyee biala bɔ bafa bobe bayɛ ɔ. Nakoso Yisraelfoɛ bɔ né bɛtte Nasiritefoɛ ne de, né bɛkora bedi sɔ nningyein ne mukoraati, ofikyɛ né ɔtte bɔne kyɛ bekoli ɔ. Bible ne po kã kyɛ nzãa te akyɛdeɛ bɔ Nyameɛ afa ama yɛ ɔ, na “ɔma sona nye gye.” (Edw. 104:14, 15) Nakoso, sɔ nningyein hemɔ bɔ ɔkɔmaa Nasiritefoɛ nemɔ nye kɔgye ne, né bɛfa bɛbɔ afɔleɛ. c
Kyɛbɔ Nasiritefoɛ nemɔ yɛle ne, wɔ koso wɔnye gye yenwo kyɛ ɛkɔfa nningyein kɔbɔ afɔleɛ anaa? (Nea ngyekyɛmuɛ 4-6)
5. Nningyein beni yeɛ Madián ne Marcela fabɔle afɔleɛ ɔ, na nzuati yeɛ bɛyɛle sɔ ɔ?
5 Kyɛbɔ Nasiritefoɛ nemɔ yɛle ne, yɛ koso yɛfa nningyein yɛbɔ afɔleɛ, kyɛbɔ ɔkɔyɛ a yekonya mmerɛ pẽe yɛkɔsõ Yehowa ɔ. Sɔ yeɛ aliemaa bie bɔ bɛfrɛ ye Madián, ɔne ɔye Marcela yɛle ɔ. d Né bɛnwo tɔ bɛ paa, ofikyɛ né Madián yɛ adwuma bɔ esikaa wɔ nu ɔ. Yeti sua bɔ né bɛte nu ne, né ye nyɔboɛ yɛ se paa. Nakoso né bɛpena kyɛ benya mmerɛ pẽe bɛfa bɛsõ Yehowa. Ye sɔ nati, bɛyɛle nzakrayɛɛ biemɔ. Bɛhãne kyɛ: “Yɛyakyili nningyein pẽe bɔ né yɛtotɔ ne. Afei koso, yetu yɛhɔle sua kãamba bie nu, na yɛtɔnene yɛ kar koso.” Nná ebie yeɛ ɔhyɛle bɛ kyɛ bɛfa nningyein bɛbɔ afɔleɛ ɔ. Na mmom bɛ bɔbɔ deinn yeɛ befili bɛ ahõne nu besili sɔ gyinayɛɛ ne ɔ, ofikyɛ né bɛpena kyɛ benya mmerɛ pẽe bɛfa bɛsõ Yehowa. Sɔ gyinayɛɛ ne bɔ besili ne amaa bɛnye agye paa, na benunni bɛnwo llé.
6. Nzu yeɛ ɔmaa aliemaa biemɔ fa nningyein bɔ afɔleɛ ɔ? (Nea foto ne koso.)
6 Ɛnnɛ koso, aliemaamɔ pẽe wɔ berɛ a, bayakyi nningyein biemɔ yɛlɛ. Nna kyɛ ebia sɔ nningyein nemɔ te bɔne, yeɛ Yehowa koso nhyɛ bɛ kyɛ bɛyɛ sɔ. Na mmom, bɔ wamaa bayɛ sɔ alaa yeɛ ole kyɛ, bɛpena kyɛ benya mmerɛ pẽe bɛsõ Yehowa. (1 Kor. 9:3-6) Ebie yeɛ ole kyɛ, ebiemɔ wɔ berɛ a, adwuma bɔ bɛnye gye yenwo paa ne, bayakyi. Yeɛ ebiemɔ atu afi b’awuro nu baatena nekaa foforɛ. Ebiemɔ koso asi gyinayɛɛ kyɛ bekoli sigya bekoodwu mmerɛ bie kora né bagya. Bɛbɔ bagya ne koso, benu biemɔ asi gyinayɛɛ kyɛ bɛkɔnwondɛ kãa kora né bawo. Nna ɛhẽne angome, ebiemɔ koso asi gyinayɛɛ kyɛ bɛkɔyakyi bɛ abusũafoɛ berɛ, na batu bahɔ nekaa bɔ behia adawurubɔfoɛ pẽe maa bayɛ asɛnga adwuma ne. Kae kyɛ, nikyee biala bɔ afa abɔ afɔleɛ ama Yehowa ne, sɛ ɔte piri oo, sɛ ɔte kãa oo, ye wora ngofi ye llé.—Heb. 6:10.
BƆ MMƆDEN KYƐ ƐKƆYƐ SORONGO
7. Nzu yeɛ né ɔkɔmaa ɔkɔyɛ se kɔma Nasiriteniɛ bie kyɛ okoli ndaen bɔ wata Yehowa naso ɔ? (Numeri 6:5) (Nea foto ne koso.)
7 Kenga Numeri 6:5. Sɛ né ebie te Nasiriteniɛ a, né ɔta ndaen kyɛ ɔngɔtete yeti, na né ɛhẽne kyire kyɛ ɔkɔbrɛ yenwo ase kɔma Yehowa. Bɔ ɔte yeɛ ole kyɛ, sɛ né Yisraelniɛ bie yɛ Nasiriteniɛ afoɛ pẽe a, né ɔmaa yeti nwĩaa ne fu gua yenwo. Yeti sɛ ebiala nye bɔ yeso pɛ, né ɔkora nwu ye kyɛ sɔ sona ne te Nasiriteniɛ. Sɛ né ebie te Nasiriteniɛ, na sɛ oliema Yisraelfoɛ nemɔ hyɛ ye ngunaen a, né ɔboka ye maa ɔkora di ndaen bɔ wata Yehowa naso. Nakoso bɔ ɔyɛ aworabɔ yeɛ ole kyɛ, odwuli nekaa bie ne, né mmenia mva Nasiritefoɛ nemɔ nyɛ huu. Wɔ diyifoɛ Amos aberɛ so ne, Yisraelfoɛ bɔ né bɛmva Yehowa mmraa bɛnyɛ hwee ne, bɛmane “Nasiritefoɛ nemɔ nzaa maa bɛnone.” Bɔ yeti yeɛ bɛyɛle sɔ yeɛ ole kyɛ, ndaen bɔ né bata Yehowa kyɛ bɛngɔno nzãa ne, né bɛpena kyɛ bebu so. (Amo. 2:12) Ɛhẽne ati sɛ né ebie te Nasiriteniɛ a, né odikyɛ onya akokoduro paa kora né wahora wali ndaen bɔ wata naso, na wamaa wayɛ sorongo.
Sɛ né Nasiriteniɛ bie kɔhora koli ndaen bɔ wata naso a, né odikyɛ ɔyɛ sorongo (Nea ngyekyɛmuɛ 7)
8. Sɛɛ yeɛ Benjamin dwirɛ ne ahyɛ wɔ ngunaen ɔ?
8 Sɛ yɛfɛre nikyee po a, Yehowa kɔhora kɔma yɛ akokoduro maa yɛkɔyɛ sorongo yekofi mmenia bɔ baha nanwo. Benjamin te Yehowa Danzeniɛ abɛmaa bɔ ɔwɔ Norway, na wali afoɛ buru. Ɛmɔma yɛnea bɔ ɔtole ye ɔ. Sukuu bɔ né ɔwɔ nu ne, bɛyɛle dwumadié bie bɛfa behyirele kyɛ, mmenia bɔ bɛkõ bɛma Ukraine maen ne, bɛta bɛsĩ. Yeti bɛmaa akwalaa biala wurale Ukraine maen ne ataadeɛ, na bɛhãne kyɛ bɛto dwein. Né Benjamin mbena kyɛ ɔyɛ bie, yeti ɔtele yenwo oogyinane nekaa bie. Nakoso, tikyaniɛ bie nwuni ye, na ɔtẽane nu frɛle ye kyɛ: “Baaboka yɛso kesaalae, yɛnwondɛ wɔ!” Benjamin nyane akokoduro, na ɔhãhyirele tikyaniɛ ne kyɛ: “Nde Yehowa Danzeniɛ, na nikyee biala bɔ ɔfa kõɛ nwo ne, menyɛ bie. Yehowa Adanzefoɛ pẽe yeɛ ɔnate kyɛ bɛmva bɛnwo benwura kõɛ nu nati, bafa bɛ bagua prisã ɔ.” Tikyaniɛ ne tele yebo, yeti wanha ye kõ. Nakoso bɛbɔ bɛwɔ klass berɛ ne, betuli bɛnoa beguale ye so kyɛ, bɛnde yebo kyɛ ye ngome de wanyɛ bɔ bɛyɛ ne bie ɔ. Ɛhẽne maa Benjamin kunu tetele ye, na ahãa ɔpena sũ. Nakoso onyane akokoduro hyirehyirele bɛ nu. Ɛhẽne sĩ ne, Benjamin hãhyirele ye awofoɛ kyɛ, onwu ye paa kyɛ, Yehowa yeɛ ɔmane ye akokoduro maa ɔhora yɛle sɔ ɔ.
9. Yɛkɔyɛ sɛɛ né yamaa Yehowa nye agye?
9 Ɔnate kyɛ yɛpena kyɛ yɛyɛ bɔ Yehowa kuro nati, yɛbɔ mmɔden kyɛ yɛkɔyɛ sorongo yekofi mmenia bɔ bɛnzõ ye nanwo. Nakoso sɛ yɛkɔhora yɛkɔmaa mmenia bɔ yɛne bɛ wɔ adwuma nu, ɔne bɛbɔ yɛne bɛ kɔ sukuu ne konwu kyɛ yɛte Yehowa Adanzefoɛ a, sana yenya akokoduro. Mmenia bɔ bɛwɔ ewiase nanu ne, bɛ abrabɔ sɛkyelɛ alaa yeɛ ɔsɛkye ɔ. Ɛhẽne ati, ɔkɔyɛ se kɔma yɛ paa kyɛ yɛkɔfa Bible nu dwirɛ yɛkɔbɔ yɛ bra, na yahora yaha nzɛmba ne yahyire mmenia ɔ. (2 Tim. 1:8; 3:13) Kae kyɛ mmerɛ biala bɔ ekonya akokoduro kɔyɛ bɔ Yehowa kuro ne, ɔmaa ɛyɛ sorongo fi mmenia bɔ baha nanwo, na ɛhẽne maa ‘yenye gye’ paa.—Any. 27:11; Mal. 3:18.
YERE WƆNWO KYƐ ƐKƆFA BƆ YEHOWA KURO NE KOLIMOA
10. Bɛbɔ né bɛte Nasiritefoɛ ne, nzuati yeɛ né ɔkɔhora kɔyɛ se kyɛ bekoli edwirɛ bɔ ɔwɔ Numeri 6:6, 7 naso ɔ?
10 Kenga Numeri 6:6, 7. Bɛbɔ né bɛte Nasiritefoɛ ne, sɛ ebie wu a, né bɛngora bɛngɔ efuin nanwo. Ebia ɛkɔhã kyɛ ɛhe de, nna ɔnyɛ se. Nakoso né ɔte tete Yisraelfoɛ nemɔ amamerɛ kyɛ, sɛ ebie wu a odikyɛ mmenia bɔ bɛkɔwa berɛ ne, bɛkɔ efuin nanwo. Yeti sɛ ebie te Nasiriteniɛ na yenwoniɛ bie wu a, né ɔkɔhora kɔyɛ se kɔma ye paa kyɛ ɔngɔhɔ efuin nanwo ɔ. (Yoh. 19:39, 40; Aso. 9:36-40) Nakoso ɔnate ndaen bɔ wata nati, né ɔngɔhora ngɔyɛ sɔ. Sɛ né sona bɔ wawu ne te Nasiriteniɛ ne busũaniɛ po a, ɔwɔ nu kyɛ ɔkɔhora koli aworabɔlɛ de, nakoso né odikyɛ ɔyere yenwo kyɛ ɔngɔhɔ efuin nanwo. Né ɔlla ase mma Nasiritefoɛ nemɔ koraa kyɛ bɛkɔyɛ sɔ, nakoso Yehowa bokale bɛ maa bɛhora bɛyɛle.
11. Sɛ Kristoniɛ bie si gyinayɛɛ bie, na sɛ ye abusũafoɛ ne ye nyɛ adwene po a, nzu yeɛ odikyɛ ɔyere yenwo kyɛ ɔkɔyɛ ɔ? (Nea foto ne koso.)
11 Yɛte Kristofoɛ bɔ yahyɛ Yehowa bɔ kyɛ yɛkɔhɔso yɛkɔsõ ye ɔ. Sɔ bɔhyɛ ne te nikyee bɔ yenwo hia yɛ paa ɔ. Ye sɔ ne ati, nna nikyee biala bɔ y’abusũafoɛ kɔyɛ ne, yeɛ yɛkɔhora yɛkɔyɛ bie ɔ. Ɔwɔ nu, yɛbɔ mmɔden kyɛ yɛkɔyɛ bɔ yɛkɔhora biala yɛkɔfa yɛkɔboka yɛ abusuafoɛ, nakoso yɛmva bɔ Yehowa kuro ne yɛndo ahameɛ, na yɛnyɛ bɔ ɔkɔsɔ y’abusũafoɛ nye ɔ. (Mat. 10:35-37; 1 Tim. 5:8) Sɛ yɛyɛ sɔ na ɔkɔmaa bɛkɔfɛ yɛso yaa po a, ɔnate kyɛ yɛpena kyɛ yɛyɛ bɔ Yehowa kuro nati, yekotie ye.
Sɛ ɔyɛ se ma wɔ kyɛ ɛkɔfa bɔ Yehowa kuro kolimoa po a, ɛkɔyɛ sɔ anaa? (Nea ngyekyɛmuɛ 11) e
12. Bɔ Alexandru aye fa yɛle ye namukoraati sĩ ne, nzu yeɛ ɔyɛle ɔ?
12 Ɛmɔma yɛnea bĩaa bie bɔ bɛfrɛ ye Alexandru ne ɔye Dorina dwirɛ ne. Bemu bɛhyɛle yebo kyɛ besũa Bible ne, nakoso afoɛ kõ sĩ ne, Dorina yakyili adesũa ne, na ɔhãhyirele ohũ ne kyɛ ye koso ɔyakyi. Nakoso, Alexandru fili anwobrɛaseɛ nu hãhyirele ye kyɛ ɔngɔyakyi. Dorina nye angye mmuayɛɛ bɔ ohũ famane ye nanwo, yeti ɔbɔle mmɔden kyɛ ɔkɔhyɛ ye maa ɔkɔyakyi adesũa ne. Alexandru bɔle mmɔden kyɛ okonya ɔye nwo aboterɛ, nakoso né ɔlla ase mma ye koraa. Sɛ odwu mmerɛ bie a, né ɔye kora kã edwirɛ bie bɔ ɔyɛ yea paa kyire ye, na né ɛhẽne kora bu ye abanu. Nakoso, wanyakyi adesũa ne, ofikyɛ né ɔpena kyɛ ɔyɛ bɔ Yehowa kuro ɔ. Alexandru hɔle so yɛle nningyein biemɔ bɔ okyire kyɛ okuro ɔye ne, na obu ye paa. Ɛhẽne bokale ɔye ne maa osa hyɛle yebo kyɛ osũa Bible ne, na nziɛen ɔbɔle asu.—Nea bɛnwo vidio bɔ ɔwɔ jw.org so ne. Ye dwirɛti ne nwa, “Ɔdɔ Le Aboterɛ, Na Yetianu Yɛ Mmerɛ.” Ɔwɔ edwirɛ bɔ ɔba ndoɔtoasoɛ bɔ yenwa, “Nahorɛ Ne Sesã Asetena” nanu.
13. Nzu yeɛ yɛyɛ a, ɔkɔmaa Yehowa ne yɛ abusũafoɛ mukoraati nye kɔgye ɔ?
13 Yehowa yeɛ ɔhyehyɛle abusũa ɔ, na ɔpena kyɛ yɛne yɛ abusũafoɛ mukoraati nye gye. (Ɛfe. 3:14, 15) Nakoso sɛ yɛkɔhora yekonya sɔ anigye ne a, sana yɛfa bɔ Yehowa kuro ne mmom yedimoa. Nningyein bɔ ɛyɛ fa boka w’abusũafoɛ maa benwu ye kyɛ ɛdwene bɛnwo, ɔne mmɔden bɔ ɛbɔ kyɛ ɛkɔsõ Yehowa ne, yenye gye yenwo paa.—Rom. 12:10.
HYƐ MMENIA NGUNAEN MA BESUESŨA NASIRITEFOƐ NEMƆ
14. Nwamɔ yeɛ odikyɛ yɛbɔ mmɔden paa kyɛ yɛkɔhyɛ bɛ ngunaen ɔ?
14 Ɔnate ɔdɔ bɔ yele yɛma Yehowa nati, odikyɛ yɛfa nningyein yɛbɔ afɔleɛ. Nakoso odwu mmerɛ bie a, ɛyɛ a ɔlla ase kyɛ yɛkɔyɛ sɔ. Yede, yenu biala kɔyɛ sɛɛ né wahora waboka ye mangõ maa wafa nningyein wabɔ afɔleɛ? Yeɛ ole kyɛ yɛkɔhyehyɛ yɛnwo ngunaen. (Yob 16:5) Sɛ ɛnea asafo bɔ ɛwɔ nu ne a, aliemaa biemɔ afa nningyein babɔ afɔleɛ, kyɛbɔ ɔkɔyɛ a bekonya mmerɛ pẽe bɛkɔsõ Yehowa anaa? Ɛse mmrandeɛ ne ndaluwa biemɔ bɔ bɛfa ɔhaw nu wɔ sukuu nu, nakoso bemia bɛnye begyina nu kyɛbɔ ɔkɔyɛ a, bɛkɔyɛ sorongo anaa? Ebiemɔ wɔ berɛ koso a, ɔnate Bible bɔ besũa, anaa Yehowa bɔ bɛsõ ye nati b’abusũafoɛ tane bɛnye. Mmenia bɔ bɛte sɔ ne, sɛɛ yeɛ ɛkɔhora kɔboka bɛ ɔ? Yenwo atẽe biala bɔ yekonya ye ne, ɛmɔma yɛfa yɛhyɛ sɔ mmenia nemɔ ngunaen, na yɛma benwu kyɛ, nningyein bɔ bafa babɔ afɔleɛ, ɔne akokoduro bɔ bɛfa begyina ɔhaw ahoroɛ noa ne, yɛnye gye yenwo paa.—Flm. 4, 5, 7.
15. Aliemaamɔ bɔ bɛfa bɛ mmerɛ pẽe bɛsõ Yehowa ne, nzu yeɛ ebiemɔ ayɛ afa aboka bɛ ɔ?
15 Aliemaamɔ bɔ bɛfa bɛ mmerɛ pẽe bɛso Yehowa ne, yɛkɔhora yɛkɔyɛ nningyein biemɔ yɛkɔfa yɛkɔboka bɛ. (Any. 19:17; Heb. 13:16) Sɔ yeɛ aliemaa brasua aworowaa bie bɔ ɔwɔ Sri Lanka ne yɛle ɔ. Ye pɛnhyɛn sikaa ne, bɛfale bie bɛbokale so. Yeti osili gyinayɛɛ kyɛ, ndaluwa nyɔ biemɔ bɔ bɛte atẽepakyelɛfoɛ, bɔ ɔne bɛ wɔ asafo kõ anu ne, ɔkɔfa esikaa ne bie kɔboka bɛ. Né esikaa nwo ayɛ se ama bɛ, nakoso né begu so bɛyɛ atẽepakyelɛ adwuma ne. Yeti aliemaa brasua ne yɛle kyɛ bosome biala ɔkɔma bɛ esikaa kãa maa bɛkɔfa bɛkɔtɔ krɛdit bekogua bɛ fon so. Aliemaa brasua ne yɛle nikyee paa kyɛ ɔyɛle sɔ ɔ!
16. Nasiritefoɛ bɔ né bɛwɔ berɛ tete ne, nzu yeɛ yasũa yafi bɛ dwirɛ nanu ɔ?
16 Yisraelfoɛ bɔ besili gyinayɛɛ kyɛ bɛkɔyɛ Nasiritefoɛ ne, yasũa nningyein pẽe yafi bɔ bɛyɛle nanu. Osa maa yenwu nikyeebie yɛfa Yehowa, bɔ ɔte yɛ Baba bɔ ɔwɔ anwuro nanwo. Ɔse kyɛ yɛpena kyɛ yɛfa nningyein pẽe yɛbɔ afɔleɛ, kyɛbɔ ɔkɔyɛ a ɛbɔ bɔ yahyɛ ye ne, yɛkɔhora yekoli so ɔ. Yehowa ama yɛ atẽe kyɛ yefi y’ahõne nu yɛfa nningyein yɛbɔ afɔleɛ yɛma ye, na ɛhẽne kyire kyɛ okuro yɛ dwirɛ paa. (Any. 23:15, 16; Mak. 10:28-30; 1 Yoh. 4:19) Nasiritefoɛ nwo dwirɛ ne boka yɛ maa yenwu kyɛ, nikyee biala bɔ yafa yabɔ afɔleɛ yama Yehowa ne, onwu ye, na yenye gye yenwo paa. Yeti ɛmɔma yɛyere yɛnwo kyɛ, yekofi y’ahõne mukoraati nu yɛkɔsõ Yehowa.
SƐƐ YEƐ ƐKƆYE EDWIRƐ HEMƆ NOA Ɔ?
-
Sɛɛ yeɛ Nasiritefoɛ nemɔ hyirele kyɛ bele akokoduro, na bɛfa nningyein bɛbɔ afɔleɛ ɔ?
-
Sɛɛ yeɛ yɛkɔhora yɛkɔhyɛ mmenia ngunaen maa bekosuesũa Nasiritefoɛ nemɔ ɔ?
-
Nasiritefoɛ nwo dwirɛ ne, sɛɛ yeɛ ɔmaa yenwu adwene bɔ Yehowa le ye wɔ yɛnwo ɔ?
DWEIN 124 Yebedi Nokware Daa
a Nasiritefoɛ nemɔ bie wɔ berɛ a, Yehowa bɔbɔ yeɛ ɔyele bɛ ɔ. Nakoso, Yisraelfoɛ nanu pẽe wɔ berɛ a, bɛ bɔbɔ yeɛ besili gyinayɛɛ kyɛ bɛkɔyɛ Nasiritefoɛ ɔ.—Kenga edwirɛ bɔ yeɛ ole, “ Nasiritefoɛ Bɔ Yehowa Bɔbɔ Yele Bɛ Ɔ” bɔ ɔwɔ alaka nanu ne.
b Ɔtɔ mmerɛ bie a, yɛ nwomaa ahoroɛ ne fa aliemaamɔ bɔ bɛyɛ mmerɛ mukoraati sõen adwuma ne toto Nasiritefoɛ nemɔ nwo. Nakoso wɔ adesũa he anu de, yɛkɔnea kyɛbɔ yɛbɔ yɛsõ Yehowa ne mukoraati, yɛkɔhora yekosuesũa bɔ Nasiritefoɛ nemɔ yɛle ne.
c Nningyein bɔ né Nasiriteniɛ kotua yenwo ne la ahãmeɛ a, né adwuma pɔtee biala nne berɛ bɔ odikyɛ ɔyɛ ɔ.
d Kenga edwirɛ bɔ ɔwɔ jw.org bɔ yenwa, “Yesii Gyinae Sɛ Yɛbɛyɛ Yɛn Ho Awiɛmfoɔ.” Ekonwu ye wɔ edwirɛ bɔ ɔba ndoatoasoɛ bɔ yeɛ ole, “Yehowa Adansefo Binom Asetenam Nsɛm” bɔ ɔwɔ Twi nu ne.
e BƆ FOTO NE KÃ YENWO DWIRƐ Ɔ: Nasiriteniɛ bie busũaniɛ awu bɔ bɛfa efuin ne bɛpɛ nu ɔ, na waatena ye sua ne anwuro berɛ bɔ osũ ɔ. Nakoso ɔnate ndaen bɔ wata nati, ɔngɔhora ngɔhɔ efuin nanwo.
