Bible ne maa yenwu kyɛ, Yehowa kora kã bɔ okosi kyẽabie ɔ. (Yes. 45:21) Nakoso, nningyein bɔ Yehowa nwu ye fa kyẽabie nwo, ɔne mmerɛ bɔ ɔfa nwu ye ne de, Bible ne ngã yenwo dwirɛ pẽe. Yeti yɛ koso, yɛngɔhora yengonwu ye mukoraati. Nakoso kãa bɔ yɛse ne, ɛmɔma yɛnea yenwo dwirɛ.

Yehowa kɔhora kɔyɛ nikyee biala, sana ye bɔbɔ ɔkã kyɛ ɔngɔyɛ. Ɔnate kyɛ Nyameɛ nworɛ nu pi nati, edwirɛ biala bɔ ɔpena kyɛ ɔkã fa kyẽabie nwo ne, ɔkɔhora kɔhã. (Rom. 11:33) Nakoso ɔnate kyɛ ɔhyɛ yenwo so tra ebiala nati, ɔkɔhora kosi gyinayɛɛ kyɛ, edwirɛ biemɔ bɔ okosi kyẽabie ne, ɔkɔye ye adwene kofi so.—Fatoto Yesaya 42:14 nanwo.

Yehowa yɛ nikyee biala kyɛbɔ ye pɛ si te ɔ. Nzu yeɛ ɛhe maa yenwu yɛfa bɔ okosi kyẽabie bɔ Yehowa kora kã nanwo ɔ? Yesaya 46:10 kã kyɛ: “Me yeɛ ofi ahyɛaseɛ ne, ngane ayieleɛ dwirɛ ɔ, ɔne kyɛ ofi tetetete yeɛ ngane bɔ onnya osisilli nwo dwirɛ ɔ. Ngane kyɛ, ‘Me botaeɛ kogyina, na ngɔyɔ me nhyehyɛleɛ amukoraa.’”

Nikyee kõ bɔ ɔmaa Yehowa kora kã bɔ okosi kyẽabie ne yeɛ ole kyɛ, ole tumi. Sɛ ebie nea vidio bie, na sɛ okonwu kyɛbɔ vidio kosi kɔhɔ a, sana wanea vidio namu wayie. Nakoso Yehowa de, ɔtte sɔ. Nningyein bɔ okosisi kyẽabie ne, ɔyɛlle yenwo vidio tolle berɛ. Na mmom, ɔnate tumi bɔ ole ye nati, ɔkɔhora kosi gyinayɛɛ kyɛ ɔkɔmaa edwirɛ bie kosi wɔ mmerɛ pɔtee bie nu.— Ɛks. 9:​5, 6; Mat. 24:36; Aso. 17:31.

Ɛhẽne ati yeɛ sɛ Yehowa pena kyɛ onwu bɔ okosi kyẽabie a, Bible ne kã kyɛ ‘ɔdwene ye nwo,’ anaa ‘ɔyɛ nhyehyɛleɛ’ ne. (2 Ahe. 19:25; Yes. 46:11) Sɔ dwirɛ bɔ Bible ne fa yɛle adwuma wɔ wa ne, behyirele yebo befili Hebri dwirɛ bɔ yeɛ ole “ngukuenwonɛniɛ” nanu. (Yer. 18:4) Kyɛbɔ ngukuenwonɛniɛ kora fa nnɛterɛ nwo kukue bɔ ɔyɛ nyemene ne, sɔ ala yeɛ Yehowa koso yɛ nikyee biala kyɛbɔ ye pɛ si te ɔ, na ɛhẽne maa bɔ wabɔ ye tianu kyɛ ɔkɔyɛ ne ba nu.—Ɛfe. 1:11.

Yehowa nhyɛ ebiala. Kyɛbɔ ebiala asetena kɔyɛ ne, Yehowa hyehyɛ tolle berɛ. Yeɛ mmenia bɔ bɛpena kyɛ bɛsõ ye ne koso, ɔnhyɛ bɛ kyɛ bɛsõ ye. Yehowa ayakyi yenwo atēe ne ama ebiala kyɛ ɔyɛ bɔ okuro ɔ, nakoso ɔhyɛ yɛ ngunaen kyɛ yɛyɛ bɔ ɔte pá ɔ.

Wɔde ma yɛnea sɔ dwirɛ nyɔ hemɔ. Bɔ olimoa, Yehowa hãhyirele Ninewefoɛ nemɔ kyɛ ɔnate bɔne bɔ bɛyɛ nati, ɔkɔsɛkye bɛ. Nakoso mmerɛ bɔ bɛsesãne b’adwene ne, Yehowa koso “sesane ye adwene wɔ musue bɔ ɔhane kyɛ ɔkɔprapra kogua bɛ so ne anwo, na wamma wando bɛ.” (Yona 3:​1-10) Yehowa anyɛ bɔ né wabɔ ye tianu kyɛ ɔkɔfa kɔyɛ Ninewefoɛ nemɔ ne, ofikyɛ bɛ bɔbɔ befili b’ahõne nu bɛsesãne bɛ adwene.

Edwirɛ bɔ ɔtɔ so nyɔ ne, yeɛ ole ngɔmhyɛ bɔ ɔfa Karose nwo ne. Ye yeɛ né okole Yuda maen ne kofi Babilɔnfoɛ sanu, na wamaa basa basi Yehowa asɔre awuro ne biekũ ɔ. (Yes. 44:26–45:4) Pɛsia hene Karose maa sɔ ngɔmhyɛ ne wale nu. (Ɛsra 1:​1-4) Bɔ ɔte yeɛ ole kyɛ, né Karose nzõ Nyameɛ. Nakoso Yehowa fale ye yɛle adwuma maa bɔ okuro ne wale nu, bɔ wanhyɛ ye kyɛ ɔɔsõ ye ɔ.—Any. 21:1.

Nningyein bɔ Yehowa kora nwu ye fa kyẽabie nwo ne, nna yemu yeɛ yasusu yenwo ne, na mmom pẽe wɔ berɛ bɔ yɛnze ɔ. Yɛ bɔ yɛte sona ne de, yɛngɔhora yɛngɔte Yehowa atẽe bo yengoyie llé. (Yes. 55:​8, 9) Nakoso kãa bɔ yɛse ne, ɔmaa yenya gyidie kyɛ, Yehowa yɛ bɔ ɔtengyɛ daabiala, mmerɛ po bɔ ɔkã bɔ okosi kyẽabie nwo dwirɛ ne.