1. Bɔ yeti yeɛ odikyɛ yɛmaa Yehowa kyire yɛ atẽe ne, fa mvandoho kyirekyire nu.

 WƆDE fa ye kyɛ amini ɛhɔayeɛ bie nu. Ɔnate kyɛ ewobire, ɛkyerebene, anyanyangyeleɛ, atũi, ɔne ndotõma bɛnyɛ nna wɔ berɛ nati, ɔmaa ɛberɛ yɛ suro paa. Nakoso enu berɛ ala, yeɛ bɔfoɛ bie bɔ ɔse ɛhɔayeɛ nanu oofitéle wɔ so ɔ. Sɛ ɔba sɔ a, wɔnye kɔgye paa, ɔnate kyɛ ɛse kyɛ ɔkɔhora kohyire wɔ atẽe maa ekoodwu kuro nu asomdwee nu. Ewiase bɔ yɛte nu ne, ɔte kyɛ sɔ ɛhɔayeɛ bɔ yɛkã yenwo dwirɛ ne. Ofikyɛ nningyein bɔ ɔkɔmaa yɛkɔhwẽ yɛnwo yekofi Yehowa nwo ngome yeɛ wayi nu ɔ. Nakoso bɔ ɔmaa yɛnye gye yeɛ ole kyɛ, yele ebie bɔ okyire yɛ atẽe ɔ. Yeɛ ole Yehowa, ofikyɛ ɔse atẽe bɔ yɛfa so a, asane biala ngɔto yɛ, na wamaa yahora yadwu ewiase foforɛ nanu.

2. Sɛɛ yeɛ Yehowa kyire yɛ atẽe ɔ?

² Yede sɛɛ yeɛ Yehowa kyire yɛ atẽe ɔ? Ɔnate Bible naso yeɛ ɔyɛ sɔ ɔ. Sɛ ɛhẽne la ahãmeɛ a, Yehowa kora fa sona so ma yɛ akwangyerɛ. Ebie yeɛ ole kyɛ, Yehowa nate “akoaa nahorɛniɛ ne nworɛniɛ” naso maa yenya Bible nu dwirɛ bɔ ɔboka yɛ maa yesi gyinayɛɛ pá ɔ. (Mat. 24:45) Afei koso, Yehowa kora fa mmenia biemɔ tekyɛ manzin soneafoɛ ne asafo nu mbanyi nemɔ so hyɛ yɛ ngunaen, na besa bɛma yɛ akwangyerɛ bɔ ɔboka yɛ maa yɛkora yegyina yɛ haw ahoroɛ noa ɔ. Ɔyɛ yɛ fɛ paa kyɛ Yehowa nate sɔ atẽe hemɔ aso ma yɛ akwangyerɛ bɔ ɔkɔbɔ yɛnwo waen kora né ewiase he ahɔ ye ayieleɛ ɔ. Ofikyɛ akwangyerɛ bɔ ɔte sɔ ne boka maa yɛne Yehowa afĩa yɛ kama, kyɛbɔ ɔkɔyɛ a, yɛnye kɔgye ɛnnɛ na wamaa yanya daa ngõa kyẽabie ɔ.

3. Nzu yeɛ yekosusu yenwo wɔ adesũa he anu ɔ?

³ Bɛbɔ Yehowa nate bɛ so fa akwangyerɛ ma yɛ ne, ɔnate kyɛ bɛte mmenia bɔ mvomsoɛ wɔ bɛnwo nati, sɛ odwu mmerɛ bie a, ɔkora yɛ se ma yɛ kyɛ yɛkɔfa akwangyerɛ bɔ ɔte sɔ yɛkɔyɛ adwuma ɔ. Nzuati ɔ? Ofikyɛ, ebia né yɛnye ngye akwangyerɛ bɔ bafa bama yɛ nanwo, anaa ebia yekonya adwene kyɛ akwangyerɛ ne, ndeaseɛ biala nne nu, yeti offi Yehowa berɛ. Sɛ adwene bɔ ɔte sɔ ba yɛ tianu a, odikyɛ yenya gyidie kyɛ Yehowa bɔbɔ yeɛ okyire ye mmenia  atẽe ɔ, yeti sɛ yɛfa yɛyɛ adwuma a, ɔkɔboka yɛ bɔbɔ. Edwirɛ nzã bɔ yɛbaasusu yenwo wɔ adesũa he anu ne, ɔkɔboka yɛ maa gyidie bɔ ɔte sɔ bɔ yele ye ne, enu kɔyɛ se paa. (1) Tete ne, sɛɛ yeɛ Yehowa hyirele ye mmenia atẽe ɔ? (2) Sɛɛ yeɛ Yehowa kyire yɛ atẽe ɛnnɛ ɔ? ɔne (3) Sɛ yɛkɔso yɛfa akwangyerɛ bɔ Yehowa fama yɛ ne yɛyɛ adwuma a, sɛɛ yeɛ ɔkɔboka yɛ ɔ?

KYƐBƆ YEHOWA HYIRELE YISRAELFOƐ NEMƆ ATẼE Ɔ

4-5. Sɛɛ yeɛ Yehowa hyirele kyɛ ɔnate Mose so yeɛ odi Yisraelfoɛ nemɔ nyunu ɔ? (Nea foto bɔ ɔwɔ Ɛwɛnelɛ Waen ne nyunu ne.)

⁴ Yehowa yele Mose kyɛ oli Yisraelfoɛ nemɔ nyunu ɔfa bɛ fi Egypt aseɛ so. Na ɔmane bɛ adanzeɛ bɔ okyire kyɛ ye yeɛ waye Mose kyɛ oli bɛ nyunu ɔ. Ebie yeɛ ole kyɛ, Yehowa nate munungum pila so hyirele Yisraelfoɛ ne atẽe eyia, na ɔnate sẽe pila so hyirele b’atẽe kɔngɔen. (Ɛks. 13:21) Mose ne Yisraelfoɛ nemɔ lili pila ne sĩ maa ɔfale bɛ hɔle Ɛpo Kɔkorɛ ne noa. Nakoso mmerɛ bɔ Egyptfoɛ nemɔ pole Yisraelfoɛ nemɔ so ne, bɛ kunu tetele bɛ paa, ofikyɛ né bɛse kyɛ bawu bayie. Yeti ɛhẽne maa benyane adwene kyɛ, né ɔnzɛkyɛ Mose di bɛ nyunu fa bɛ kɔ Ɛpo Kɔkorɛ ne noa. Nakoso né mvomsoɛ biala nne bɔ Mose yɛle nanwo, ofikyɛ Yehowa bɔbɔ yeɛ ɔnate Mose so lili bɛ nyunu fale bɛ hɔle berɛ ɔ. (Ɛks. 14:2) Atẽe bɔ Yehowa fale so lɛle bɛ sɔ mmerɛ ne, né ɔyɛ nwanwa paa.—Ɛks. 14:​26-28.

⁵ Afoɛ 40 bɔ Yisraelfoɛ nemɔ fa tenane ɛserɛ so mukoraati ne, Mose hɔle so fale yenwo tole munungum pila naso, ofikyɛ né ɔse kyɛ ɛhẽne yeɛ Yehowa nate so bɔ okyire ye mmenia atẽe ɔ. a Odwuli mmerɛ bie ne, Yehowa fale munungum pila ne oosiele ɛtena sua bɔ Mose yɛle ne anwuro, kyɛbɔ ɔkɔyɛ a, Yisraelfoɛ ne mukoraati konwu ye ɔ. (Ɛks. 33:​7, 9, 10) Né Yehowa fi munungum pila nanu ɔne Mose dwudwo, na bɔ Yehowa kɔhã kohyire Mose ne, ye koso né ɔkã kyire Yisraelfoɛ nemɔ. (Edw. 99:7) Yeti né Yisraelfoɛ nemɔ le adanzeɛ paa bɔ okyire kyɛ Yehowa yeɛ ɔnate Mose so ɔma bɛ akwangyerɛ ɔ.

6. Nzu yeɛ Yisraelfoɛ nemɔ yɛle wɔ akwangyerɛ bɔ Yehowa famane bɛ nanwo ɔ? (Numeri 14:​2, 10, 11)

⁶ Aworabolɛ dwirɛ yeɛ ole kyɛ, bɔ Yehowa nate Mose so yɛle ne mukoraati sĩ ne, Yisraelfoɛ nemɔ nu bie anné Mose ando nu kyɛ ye yeɛ Yehowa nate ye so ɔma bɛ akwangyerɛ ɔ. (Kenga Numeri 14:​2, 10, 11.) Nna ɛlɛhõmapɛ yeɛ bɛfa bɛyɛle sɔ ɔ, na mmom bɛyɛle sɔ mmerɛ pẽe. Ɔnate bɔ bɛyɛle nati, Yehowa hãne kyɛ Yisraelfoɛ bɔ bɛte sɔ ne, benu kõ po ngɔhɔ Bɔhyɛ Aseɛ naso bie.—Num. 14:30.

7. Mmenia benimɔ yeɛ betiele Yehowa akwangyerɛ, na bɛfa bɛyɛle adwuma ɔ? (Numeri 14:24) (Nea foto ne koso.)

⁷ Yisraelfoɛ nemɔ bie wɔ berɛ a, bɛhɔle so betiele akwangyerɛ bɔ Yehowa fa mane bɛ ne. Benu kõ yeɛ ole Kalebo. Yehowa hãne yenwo dwirɛ kyɛ: ‘Kalebo de, wali nahorɛ wama me.’ (Kenga Numeri 14:24.) Yeti, Yehowa koso yirale ye, na ɔmane ye atẽe kyɛ ye bɔbɔ ɔye nekaa bɔ ɔkɔtena wɔ Bɔhyɛ Aseɛ naso ɔ. (Yos. 14:​12-14) Mmerɛ bɔ Mose wuli ne, Yosua yeɛ oosili ye gya nu ɔ, na ye yeɛ né odi Yisraelfoɛ nemɔ nyunu ɔ. Yeti Yisraelfoɛ nemɔ “buli Yosua wɔ mmerɛ mukoraa bɔ né ɔte ngõa nu” ne. (Yos. 4:14) Yisraelfoɛ bɔ bɛhɔle Bɔhyɛ Aseɛ naso ne, ɔnate kyɛ betiele Yehowa akwangyerɛ, na bɛfa bɛyɛle adwuma nati, Ye koso oyirale bɛ, na ɔmaa bɛsa hãne aseɛ bɔ né wafa wahyɛ bɛ bɔ ne.—Yos. 21:​43, 44.

8. Mmerɛ bɔ né ahemvo di maen naso ne, atẽe beni yeɛ Yehowa fale so mane Yisraelfoɛ nemɔ akwangyerɛ ɔ? (Nea foto ne koso.)

⁸ Afoɛ pẽe sĩ ne, Yehowa yele maenbulɛfoɛ bɔ né bɛfa akwangyerɛ bɛma ye mmenia ɔ. Nziɛen bɔ né ahemvo di Yisrael maen naso ne, Yehowa nate ye adiyifoɛ so fale akwangyerɛ mane ye mmenia. Ahemvo bɔ né bedi nahorɛ ne, betiele akwangyerɛ bɔ Yehowa adiyifoɛ nemɔ famane bɛ  ne. Ebie yeɛ ole kyɛ, mmerɛ bɔ diyifoɛ Natan fale afutue mane Ɔhene Dawide ne, otiele. (2 Sam. 12:​7, 13; 1 Abe. 17:​3, 4) Ɔhene Yehosafate koso, ɔfale akwangyerɛ bɔ diyifoɛ Yahasiɛl famane ye ne yɛle adwuma, na ɔhyɛle Yudafoɛ nemɔ ngunaen kyɛ, ‘bele [Nyameɛ] ngɔmhyɛlɛfoɛ ne beli.’ (2 Abe. 20:​14, 15, 20) Ɔhene Hesekia koso, mmerɛ bɔ ɔhɔle ɔhaw bie nu ne, ɔhɔle diyifoɛ Yesaya berɛ maa ɔhyɛle ye ngunaen. (Yes. 37:​1-6) Mmerɛ biala bɔ Yisrael ahemvo nemɔ kɔfa Yehowa akwangyerɛ kɔyɛ adwuma ne, né ɔboka bɛ, na né ɔbɔ maen nanwo waen. (2 Abe. 20:​29, 30; 32:22) Né nikyee biala di adanzeɛ kyɛ Yehowa yeɛ ɔnate ye adiyifoɛ nemɔ so fa akwangyerɛ ma Yisraelfoɛ nemɔ ɔ. Nakoso ɛhe mukoraati sĩ ne, ahemvo nemɔ nu pẽe ne Yisraelfoɛ nemɔ bandie Yehowa adiyifoɛ nemɔ dwirɛ.—Yer. 35:​12-15.

KYƐBƆ YEHOWA HYIRELE TETE KRISTOFOƐ NEMƆ ATẼE Ɔ

9. Kristofoɛ bɔ né bɛwɔ berɛ wɔ asomafoɛ nemɔ aberɛ so ne, nwamɔ yeɛ Yehowa nate bɛ so fale akwangyerɛ mane bɛ ɔ? (Nea foto ne koso.)

⁹ Betingyɛle Yesu befili ewue nu ne sĩ ne, Yehowa hyehyɛle Kristofoɛ asafo ne. Yede, Kristofoɛ bɔ né bɛwɔ berɛ ne, sɛɛ yeɛ Yehowa hyirele bɛ atẽe ɔ? Yehowa yele Yesu kyɛ ɔyɛ asafo ne ti. (Ɛfe. 5:23) Nakoso Yesu bɔbɔ deinn wangɔ asafo biala nu ngokõngokõ wangɔ amma bɛ akwangyerɛ, na mmom, ɔnate asomafoɛ ne, ɔne mbanyi bɔ bɛwɔ Yerusalem naso yeɛ ɔyɛle sɔ ɔ. (Aso. 15:​1, 2) Sɛ ɛhẽne la ahãmeɛ a, bɛyele mbanyi bɔ né bɛkɔnea bɛkɔtoto nningyein wɔ asafo biala nu ɔ.—1 Tɛs. 5:12; Tito 1:5.

10. (a) Kristofoɛ bɔ né bɛwɔ berɛ tete ne, nzu yeɛ bɛyɛle wɔ akwangyerɛ bɔ Yehowa fa mane bɛ nanwo ɔ? (Asomafoɛ 15:​30, 31) (b) Bɛbɔ né Yehowa nate bɛso ɔfa akwangyerɛ ma ye mmenia ne, nzuati yeɛ ebiemɔ anné bɛ anni ɔ? (Kenga edwirɛ bɔ yenwa, “Adanzeɛ Bɔ Okyire Kyɛ Yehowa Kyire Ye Mmenia Atẽe Ne, Nzuati Yeɛ Né Ebiemɔ Nné Nni Ɔ” bɔ ɔwɔ alaka nanu ne.)

¹⁰ Kristofoɛ bɔ né bɛwɔ berɛ sɔ mmerɛ ne, nzu yeɛ bɛyɛle wɔ akwangyerɛ bɔ Yehowa fa mane bɛ nanwo ɔ? Benu pẽe nye gyele akwangyerɛ nanwo, yeti bɛfa bɛyɛle adwuma. Bible ne kã kyɛ: “Bɛnye gyele, ɔnate kyɛ benyane aworakyekyerɛ befili nu.” (Kenga Asomafoɛ 15:​30, 31.) Yede, yɛ mmerɛ he aso koso, sɛɛ yeɛ Yehowa kyire yɛ atẽe ɔ?

KYƐBƆ YEHOWA KYIRE YƐ ATẼE ƐNNƐ Ɔ

11. Adanzeɛ beni yeɛ okyire kyɛ Yehowa nate ebiemɔ so ɔboka ye mmenia maa bɛte Bible nabo ɛnnɛ ɔ?

¹¹ Ɛnnɛ koso, Yehowa nate ye Dwirɛ Bible ne, ɔne Ɔwa Yesu bɔ ɔte asafo ne ti naso yeɛ okyire  ye mmenia atẽe ɔ. Sɛ ɛhẽne la ahãmeɛ a, yele adanzeɛ bɔ okyire kyɛ Yehowa nate mmeni foforɛ so okyire ye mmenia atẽe anaa? Yóo. Ebie yeɛ ole bɔ ɔhɔleso wɔ afoɛ 1870 nanu berɛ ne. Sɔ mmerɛ ne, Charles Taze Russell ne bɛbɔ bɛboka ye so ne, benwuni kyɛ Nyameɛ Ahennie ne kɔhyɛ yebo koli tumi wɔ afoɛ 1914 nu. (Dan. 4:​25, 26) Nhwehwɛmuɛ bɔ bɛyɛle wɔ Bible nanu ne, yeɛ ɔmaa benwuni sɔ ngɔmhyɛ ne ɔ. Yedé yedi paa kyɛ Yehowa yeɛ ɔbokale bɛ maa benwuni sɔ dwirɛ ne ɔ. Ofikyɛ nningyein bɔ ɔhɔleso wɔ afoɛ 1914 nu ne, né okyire kyɛ Nyameɛ Ahennie ne ahyɛ yebo odi tumi amba. Ebie yeɛ ole kyɛ, sɔ mmerɛ ne yeɛ Ewiase Kõɛ I ne hyɛle yebo ɔ. Ɛhẽne sĩ ne, anwonyerɛ, aseɛwosolɛ, ɔne ɛhɔen koso wale. (Luka 21:​10, 11) Ɛhe maa yenwu kyɛ, né Yehowa nate sɔ mmrienzua nemɔ aso ɔboka ye mmenia maa bɛte Bible nabo.

12-13. Mmerɛ bɔ né Ewiase Kõɛ II ne kɔso ne, nzu yeɛ aliemaamɔ bɔ beli asafo ne nyunu ne yɛle bɔ ɔmaa asɛnga adwuma ne hɔle so ɔ?

¹² Ɛmɔma yesa yɛnea edwirɛ bie bɔ osili, mmerɛ bɔ né Ewiase Kõɛ II ne kɔso ne. Aliemaamɔ bɔ né beli asafo ne nyunu bɔ né bɛwɔ Yehowa Adanzefoɛ ewiase mukoraati adwumayɛbea ti ne, bɛyɛle edwirɛ bɔ ɔwɔ Nyekyire 17:8 nanwo nhwehwɛmuɛ. Nhwehwɛmuɛ bɔ bɛyɛle ne, ɔmaa benwuni kyɛ, kõɛ bɔ né ɔkɔso sɔ mmerɛ ne, nna ɛhẽne yeɛ ɔkɔfa Amagedon kõɛ ne kɔwa ɔ. Na mmom kõɛ ne kɔhɔ ayieleɛ maa asomdwee kɔwa kyɛbɔ ɔkɔyɛ a, okobukye yenwo atẽe kɔma Yehowa Adanzefoɛ maa bɛkɔhã nzɛmba ne bekohyire mmeni pẽe ɔ. Ɔwɔ nu kyɛ né kõɛ ne gyi nu serɛserɛ paa de, nakoso aliemaamɔ bɔ né beli asafo ne nyunu ne, bɛhyɛle yebo bɛyɛle Gilead Sukuu ne. Bɛnate sɔ sukuu naso tetele aliemaa biemɔ maa bɛɛyɛle nzɛmbatrɛlɛfoɛ, bɔ bɛkɔhã nzɛmba ne wɔ ewiase mukoraati ɔ. Mmerɛ bɔ né kõɛ ne gyi nu po ne, bɛfale sɔ aliemaa hemɔ hɔle nekaa ahoroɛ maa bɛɛhãne nzɛmba ne. Ebiekũ koso, akoaa nahorɛniɛ ne yɛle nhyehyɛɛ maa bɛhyɛle yebo bɛyɛle Teokrasi Sukuu b wɔ asafo biala nu wɔ ewiase mukoraati. Né sɔ sukuu ne kɔboka aliemaamɔ maa bekonwu kyɛbɔ bekohyirehyire Bible nanu yé wɔ asɛnga nu ɔ. Ofikyɛ né mmeni pẽe wɔ berɛ bɔ odikyɛ bɛkã Nyameɛ Ahennie nanwo dwirɛ bekyire bɛ ɔ.

¹³ Yenwu ye paa kyɛ, Yehowa yeɛ né okyire ye mmenia atẽe sɔ mmerɛ ne ɔ. Ofi mmerɛ bɔ Ewiase Kõɛ II ne wale ayieleɛ ne, Yehowa Adanzefoɛ bɔ bɛwɔ maen pẽe so ne anya asomdwee bafa bahã nzɛmba ne bahyire mmenia bɔ nikyefee nzi  b’atẽe ɔ. Kesaalae, mmeni pẽe yeɛ bɛba asafo nanu ɔ, na aliemaamɔ wora, bɛyɛ asɛnga ne wɔ ewiase nekaa biala.

14. Akwangyerɛ biala bɔ Yehowa nate ye ahyehyɛdeɛ naso kɔfa kɔma yɛn ɛnnɛ ne, nzuati yeɛ odikyɛ yetie ɔ? (Nyekyire 2:1) (Nea foto ne koso.)

¹⁴ Ɛnnɛ koso, Akwangyerɛ Kue bɔ bɛwɔ berɛ ne, Kristo yeɛ okyire b’atẽe ɔ. Yesɔ ne ati, bɛnea kyɛ akwangyerɛ biala bɔ bɛfa bɛma aliemaamɔ ne, ɔte bɔ Yehowa dé to nu bɔ ogyi Bible naso ɔ. Bɛnate manzin soneafoɛ, ne asafo nu mbanyi nemɔ aso yeɛ bɛfa akwangyerɛ bɛma aliemaamɔ bɔ bɛwɔ asafo ahoroɛ c nu wɔ ewiase mukoraati ɔ. Bɔ ɔte yeɛ ole kyɛ, asafo nu mbanyi bɔ bele anyelasoɛ kyɛ bɛkɔhɔ anwuro, ɔne mbanyi bɔ baha ne mukoraati ne, bɛwɔ Kristo “sa famaa nu.” (Kenga Nyekyire 2:1.) Asafo nu mbanyi te mmenia bɔ bɔne wɔ bɛnwo ɔ. Yeti tekyɛ Mose, Yosua, ɔne asomafoɛ nemɔ ne, bɛ koso bɛkora bedi mvomsoɛ. (Num. 20:12; Yos. 9:​14, 15; Rom. 3:23) Nakoso, Kristo nate akoaa nahorɛniɛ ne, ɔne asafo nu mbanyi nemɔ aso, yeɛ ɔfa akwangyerɛ ma bɛbɔ bɛsõ Yehowa ne ɔ, na ɔkɔhɔso kɔyɛ sɔ alaa “kodwu ewiase ayieleɛ.” (Mat. 28:20) Yeti, akwangyerɛ biala bɔ Yesu nate sɔ aliemaa hemɔ aso kɔfa kɔma yɛ ne, odikyɛ yetie na yɛfa yɛyɛ adwuma.

SƐ YƐFA AKWANGYERƐ BƆ YEHOWA FA MA YƐ NE YƐYƐ ADWUMA A, ƆBOKA YƐ BƆBƆ

15-16. Bɛbɔ betiele Yehowa akwangyerɛ ne, nzu yeɛ asũa afi bɔ bɛyɛle nanu ɔ?

¹⁵ Sɛ yɛfa akwangyerɛ bɔ Yehowa fa ma yɛ ne yɛyɛ adwuma a, ɔboka yɛ bɔbɔ, na yenya nhyiraa koso. Andy ne ɔye Robyn dwirɛ ne maa yenwu kyɛ ɛhe te nahorɛ. Afutue bɔ asafo ne fa ma yɛ kyɛ yɛyɛ yɛnwo awiɛmvoɛ ne, bɛfa bɛyɛle adwuma. (Heb. 13:5) Yeti, bɛhora betuli bɛnwo bɛmane bɛɛbokale maa besisili asafo sua ahoroɛ. Robyn hãne kyɛ: “Sɛ odwu mmerɛ bie a, sua kyekyereboo bie yeɛ yenya yɛtena nu ɔ, na ɛyɛ a egyaale po, ebie nne nu. Menye gye foto pɛlɛ nwo paa. Nakoso, ɔnate bɔ né yafa yasie yɛnye so ne ati, né odikyɛ metɔne me kamera nemɔ, na né ɔlla ase kyɛ ngɔyɛ sɔ ɔ. Nakoso, tekyɛ Abraham aye Sara ne, né ɔyɛ me fɛ kyɛ mefa sɔ nningyein nemɔ mebɔ afɔleɛ kyɛbɔ ɔkɔyɛ a, ngonya mmerɛ pẽe ngɔfa ngɔsõ Yehowa ɔ.” (Heb. 11:15) Yede, sɔ nikyee bɔ bɛyɛle ne, nhyiraa beni yeɛ banya ye ɔ? Robyn toale so kyɛ: “Ɔnate kyɛ yɛfa yɛ anwoserɛ mukoraati yɛyɛ Yehowa adwuma ne ati, yɛnye gye paa. Mmerɛ biala bɔ yɛne aliemaamɔ kɔbɔ nu kosi asafo sua bie ne, ɔmaa yenwu kyɛbɔ yɛnye kɔgye, mmerɛ bɔ yahɔ ewiase foforɛ nanu ne.” Ohũ Andy koso hãne kyɛ: “Sɛ enwu ye kyɛ ɛfa  w’anwoserɛ mukoraati boka Yehowa adwuma a, ɔmaa wɔnye gye paa.”

¹⁶ Sɛ yɛfa Yehowa akwangyerɛ yɛyɛ adwuma a, sɛɛ yeɛ osa boka yɛ ɔ? Mmerɛ bɔ Marcia yiele sɛkɛndri sukuu ne, osili gyinayɛɛ kyɛ ɔkɔyɛ atẽepakyelɛniɛ. (Mat. 6:33; Rom. 12:11) Ɔhãne kyɛ: “Mmerɛ bɔ nyiele sukuu ne, nyane yenwo atẽe kyɛ ngɔhɔ univasity afoɛ 4 bɔ mengotua esikaa biala ɔ. Nakoso, né mepena kyɛ mefa me mmerɛ pẽe mesõ Yehowa. Ɛhẽne ati, nyɛle m’adwene kyɛ ngɔhɔ sukuu bɔ bekyire nzaanodwuma, kyɛbɔ ɔkɔyɛ a, sɛ meyie a, ɔkɔboka me maa ngɔhora ngɔyɛ atẽepakyelɛ adwuma ne ɔ. Ɔte pá kyɛ nzili sɔ gyinayɛɛ ne ɔ, ofikyɛ kesaalae, menye gye kyɛ meyɛ atẽepakyelɛ adwuma ne. Afei koso, ɔnate kyɛ me bɔbɔ yeɛ meyɛ m’adwuma nati, ɔmaa menya mmerɛ mefa meboka adwuma bɔ bɛyɛ ye wɔ Bɛtɛl ne. Mesa menya yenwo atẽe meyɛ nningyein foforɛ wɔ asafo nanu koso. Ɛhe mukoraati maa menye gye paa.”

17. Sɛ yɛfa akwangyerɛ bɔ Yehowa fama yɛ ne yɛyɛ adwuma a, nhyiraa foforɛ beni yeɛ yenya ye ɔ? (Yesaya 48:​17, 18)

¹⁷ Sɛ odwu mmerɛ bie a, asafo ne tu yɛ foɛ kyɛ yɛnea yenwo yé wɔ anwonyadeɛ pẽe bɔ yɛkɔpena, ɔne nningyein biemɔ bɔ sɛ yɛyɛ a, ɔkɔmaa ɔkɔyɛ se kɔma yɛ kyɛ yɛkɔyɛ bɔ Nyameɛ kuro nanwo. Sɛ yɛfa sɔ akwangyerɛ bɔ Yehowa fa ma yɛ ne yɛyɛ adwuma a, ɔboka yɛ paa, ofikyɛ, ɔmaa yenya tiboa pá ne asomdwee. (1 Tim. 6:​9, 10) Ɔba sɔ a, ɔmaa yɛkora yefi y’ahõne mukoraati nu yɛsõ Yehowa, na ɛhẽne maa yɛnye gye paa.—Kenga Yesaya 48:​17, 18.

18. Nzuati yeɛ ɛpena kyɛ ɛkɔso tie Yehowa akwangyerɛ, ná ɛfa yɛ adwuma ɔ?

¹⁸ Yehowa kɔhɔso kɔfa ebiemɔ so kɔfa akwangyerɛ kɔma ye mmenia wɔ amaneɛnwunɛ piri nanu, kodwu kyɛ Afoɛ Apee bɔ Yesu kɔfa koli bia ne kɔwa ayieleɛ ɔ. (Edw. 45:16) Sɛ odwu sɔ mmerɛ ne a, akwangyerɛ bɔ bɛkɔfa bɛkɔma yɛ ne, yɛkɔhɔso yɛkɔfa yɛkɔyɛ adwuma, mmerɛ po bɔ yɛnye ngye yenwo ne anaa? Sɛ yɛfa Yehowa akwangyerɛ yɛyɛ adwuma ɛnnɛ a, yede sɔ mmerɛ ne, ɔngɔyɛ se ngɔma yɛ kyɛ yɛkɔyɛ sɔ ɔ. Yeti, ɛmɔma yenu biala ɔyere yenwo kyɛ akwangyerɛ biala bɔ Yehowa nate Akwangyerɛ Kue, ɔne asafo nu mbanyi nemɔ aso kɔfa kɔma yɛ ne, yɛkɔfa yɛkɔyɛ adwuma. (Yes. 32:​1, 2; Heb. 13:17) Sɛ yɛyɛ sɔ a, ɔkɔmaa yɛkɔfa yɛnwo yɛkɔto Yehowa so, ofikyɛ yele gyidie kyɛ ye yeɛ ɔbɔ yɛnwo waen, na okyire yɛ atẽe fa yɛ kɔ ewiase foforɛ nanu ɔ.