1. Kristofoɛ bɔ bɛkɔhɔ anwuro ne, mmerɛ beni yeɛ bemu bekofi aseɛ he aso bɛkɔhɔ ɔ?

 AFOƐ pẽe bɔ wapɛ nu ne, mmenia bɔ bɛsõ Yehowa ne abisa kyɛ, ‘Mmerɛ beni yeɛ Kristofoɛ bɔ bɛkɔhɔ anwuro ne, benu sona bɔ ɔpɛ yebo ne kofi aseɛ he aso kɔhɔ ɔ?’ Mmerɛ bie bɔ wapɛ nu ne, né y’adwene yɛ yɛ kyɛ, Amagedon kõɛ ne sĩ ne, Kristofoɛ bɔ bɛkɔhɔ anwuro ne, yɛne benu biemɔ kɔtena ewiase foforɛ nanu kãa kora né bahɔ. Nakoso Ɛwɛnelɛ Waen bɔ ɔwale July 15, 2013 ne maa yenwuni kyɛ, Kristofoɛ bɔ bɛkɔhɔ anwuro ne, bemu bekofi aseɛ he aso bɛkɔhɔ kora né Amagedon kõɛ ne awa.—Mat. 24:31.

2. Edwirɛ beni yeɛ ebia ebiemɔ kobisa ɔ, na nzu yeɛ yekosusu yenwo wɔ adesũa he anu ɔ?

² Ebia yenu biemɔ kobisa kyɛ: Kristo “mmoaen foforɛ” bɔ “amaneɛnwunɛ piri” ne kɔwa ne, né bɛsõ Yehowa nahorɛ nu ne, nzu yeɛ ɔkɔto bɛ ɔ? (Yoh. 10:16; Mat. 24:21) Ebiemɔ adwene yɛ bɛ kyɛ, Kristofoɛ bɔ bɛkɔhɔ anwuro ne, sɛ bemu bɛkɔ a, yengonya ebiala bɔ okoli yɛ nyunu maa yɛkɔsõ Yehowa ɔ. Yede, yɛbaanea Bible nu dwirɛ nyɔ bie, na ɔkɔmaa yekonwu bɔ wamaa banya sɔ adwene ne ɔ. Ɛhẽne sĩ ne, yɛkɔnea bɔ yeti yeɛ ɔnzɛkyɛ yesuro, anaa yɛmaa yɛ kunu tete yɛ ɔ.

NZU YEƐ ONGOSI Ɔ?

3-4. Nzu yeɛ wamaa ebiemɔ kunu tete bɛ ɔ, na nzuati ɔ?

³ Ebia ebiemɔ kunu tete bɛ kyɛ, aliemaamɔ bɔ bɛwɔ Akwangyerɛ Kue nanu ne, sɛ bemu bɛkɔ anwuro a, yengonya ebiala bɔ okoli yɛ nyunu ɔ. Yeti annea a, sɔ mmerɛ ne, mmoaen foforɛ ne kɔyakyi Yehowa sõen. Ebia Bible nu dwirɛ biemɔ yeɛ wamaa banya sɔ adwene ne ɔ. Yede ɛmɔma yesusu enu nyɔ nwo yɛnea. Bɔ olimoa ne fa Sɔfo Panyi Yehoada nwo. Né osuro Nyameɛ, na né odi  nahorɛ. Ɔne ɔye Yehosabeate bɔle Yehoase, bɔ né ɔte akwalaa nanwo waen, na bɛbokale ye maa ɔɔyɛle ɔhene bɔ odi nahorɛ ɔ. Mmerɛ bɔ né Yehoada te ase ne, Yehoase hɔle so yɛle nningyein pá. Nakoso mmerɛ bɔ Yehoada wuli ne, Yehoase hyɛle yebo kyɛ ɔyɛ nningyein bɔ ɔttemayé ɔ. Bɔ ɔmaa ɔwale sɔ yeɛ ole kyɛ, otiele afutue bɔ Yuda mbanyi nemɔ famane ye ne, na ɛhẽne maa ɔyakyili Yehowa sõen.—2 Abe. 24:​2, 15-19.

⁴ Bɔ ɔtɔ so nyɔ ne yeɛ ole, edwirɛ bɔ ɔtole tete Kristofoɛ nemɔ, mmerɛ bɔ asomafoɛ nemɔ mukoraati wuli ne. Yohane yeɛ ole somafoɛ bɔ ɔpɛ yebo bɔ owuli ɔ. Mmerɛ bɔ né ɔte ase ne, ɔbokale Kristofoɛ pẽe maa bɛhɔle so belili nahorɛ bɛmane Yehowa. (3 Yoh. 4) Né ebiemɔ pena kyɛ bɛfa ngondombo ngyerɛkyerɛ bɛsɛkye aliemaamɔ adwene. Nakoso, kyɛbɔ Yesu asomafoɛ bɔ baha ne yɛle ne, Yohane koso amma sɔ mmenia nemɔ atẽe. (1 Yoh. 2:18) Nakoso mmerɛ bɔ Yohane wuli ne, sɔ mmenia nemɔ nyane atẽe bɛfale ngondombo ngyerɛkyerɛ beewurale asafo nanu. Yeti, afoɛ bie sĩ ne, ngondombo ngyerɛkyerɛ lɛle ndii wɔ asafo nanu.

5. Bible nu dwirɛ nyɔ bɔ yasusu yenwo ne, nzu yeɛ ongyire ɔ?

⁵ Yede Bible nu dwirɛ nyɔ bɔ yasusu yenwo ne, okyire kyɛ Kristofoɛ bɔ bɛkɔhɔ anwuro ne, sɛ bemu bɛkɔ a, ɔkɔmaa Kristofoɛ bɔ bɛkɔtena aseɛ he aso ne kɔyakyi Yehowa sõen, kyɛbɔ Yehoase yɛle ne anaa? Anaa bɛkɔmaa ngondombo ngyerɛkyerɛ kɔsɛkye b’adwene, kyɛbɔ ɔtole Kristofoɛ bɔ bɛtenane ase wɔ asomafoɛ nemɔ wue sĩ ne? Yɛkɔhora yɛkɔhã kyɛ, ɔngɔwa sɔ llé! Yedé yedi paa kyɛ, sɛ bɛbɔ bɛkɔhɔ anwuro ne mukoraati fi aseɛ he aso po a, Kristofoɛ bɔ bɛkɔha aseɛ he aso ne, bɛkɔhɔso bɛkɔsõ Yehowa nahorɛ nu. Nzuati yeɛ yɛkã sɔ ɔ?

NAHORƐ SÕEN NGƆSƐKYE LLÉ

6. Mmerɛ nzã beni yeɛ yɛbaasusu yenwo ɔ?

⁶ Sɛ kyẽabie nningyein nu yɛ se po a, nzuati yeɛ yedé yedi paa kyɛ, nahorɛ sõen ngɔsɛkye llé ɔ? Ofikyɛ Bible ne maa yenwu kyɛ, mmerɛ bɔ yɛwɔ nu kesaalae ne, ɔtte kyɛ tete Yisraelfoɛ nemɔ aberɛ so. Afei koso, ɔtte kyɛ Kristofoɛ bɔ bɛtenane ase wɔ asomafoɛ nemɔ wue sĩ ne aberɛ so. Yede ɛmɔma yesusu mmerɛ nzã bie anwo kãa. Yeɛ ole: (1) tete Yisraelfoɛ nemɔ aberɛ so, (2) Kristofoɛ bɔ bɛtenane ase wɔ asomafoɛ nemɔ wue sĩ ne aberɛ so, ɔne (3) yɛ mmerɛ he aso, ‘mmerɛ bɔ bɛkɔhyehyɛ nningyein amukoraa foforɛ’ ne.—Aso. 3:21.

7. Yisraelfoɛ bɔ bedi nahorɛ ne, mmerɛ bɔ benwuni kyɛ edwirɛ bɔ Yehowa hãne ne awa nu ne, sɛɛ yeɛ ɔbokale bɛ ɔ?

⁷ Tete Yisraelfoɛ nemɔ aberɛ so. Waha kãa maa Mose wu ne, ɔhãhyirele Yisraelfoɛ nemɔ kyɛ: “Mese kyɛ me wue asi ne, edwirɛ tɛɛ ala yeɛ ɛmɔkoli ɔ, na mmeraa bɔ mahyɛ mama ɛmɔ ne, ɛmɔkobu so.” (Deut. 31:29) Mose sa bɔle Yisraelfoɛ nemɔ kɔkɔ kyɛ, sɛ bɛkɔ so bɛyɛ Yehowa so asoserɛ a, bɛkɔɔyɛ ngoaa wɔ maen foforɛ so. (Deut. 28:​35, 36) Sɔ dwirɛ ne wale nu anaa? Yóo, ofikyɛ ahemvo bɔ né bedi Yisrael maen ne aso ne, benu pẽe hɔle so yɛle Yehowa so asoserɛ afoɛ pẽe. Ɛhẽne maa Yisraelfoɛ nemɔ koso lili bɛsĩ, na bɛɛsõne bosoen. Yeti, Yehowa yele yesa fili bɛ bo, na wamma ɔhene bɔ ɔte Yisraelniɛ anni bɛ so kõ. (Hes. 21:​25-27) Nakoso Yisraelfoɛ bɔ bedi nahorɛ ne de, mmerɛ bɔ benwuni kyɛ edwirɛ bɔ Yehowa hãne ne awa nu ne, ɔmaa bɛ gyidie yɛle se paa.—Yes. 55:​10, 11.

8. Odikyɛ ɔyɛ yɛ nwanwa kyɛ, asomafoɛ nemɔ wue sĩ ne, ngondombo ngyerɛkyerɛ lɛle asafo ne bɔle so anaa? Kyirekyire nu.

⁸ Kristofoɛ bɔ bɛtenane ase wɔ asomafoɛ nemɔ wue sĩ ne. Kyɛbɔ asafo ne sɛkyele wɔ asomafoɛ nemɔ wue sĩ ne, odikyɛ ɔyɛ yɛ nwanwa anaa? Daabi, ofikyɛ né Yesu bɔbɔ ahã ato berɛ kyɛ, asomafoɛ nemɔ wue sĩ ne, ngondombo ngyerɛkyerɛ kole ndii wɔ asafo nanu. (Mat. 7:​21-23; 13:​24-30, 36-43) Afei, mmerɛ bɔ né somafoɛ  Pɔɔlo, Petro, ɔne Yohane mukoraati te ase ne, bɛmaa ɔlale ali kyɛ edwirɛ bɔ Yesu hãne ne, wahyɛ yebo ɔba nu. (2 Tɛs. 2:​3, 7; 2 Pet. 2:1; 1 Yoh. 2:18) Yeti mmerɛ bɔ asomafoɛ nemɔ mukoraati wuli ne, afei de né ngondombo ngyerɛkyerɛ ale asafo ne abɔ so paa. Ngondombo ngyerɛkyerɛ bɔ ɔhyɛle yebo sɔ mmerɛ ne, enu yeɛ Babilɔn Pirikua bɔ ogyi berɛ ma ewiase mukoraati ngondombo sõen ahyehyɛdeɛ ne, ofi wale ɔ. Ɛhẽne koso maa edwirɛ bɔ Yesu hãne ne wale nu.

9. Mmerɛ bɔ yɛwɔ nu ne, sɛɛ yeɛ ɔte sorongo wɔ Yisraelfoɛ, ɔne Kristofoɛ bɔ bɛtenane ase wɔ asomafoɛ nemɔ wue sĩ ne deɛ nanwo ɔ?

⁹ ‘Mmerɛ bɔ bɛkɔhyehyɛ nningyein amukoraa foforɛ.’ Nningyein bɔ ɔkɔ so wɔ yɛ aberɛ so ne, ɔte sorongo wɔ bɔ ɔhɔle so wɔ tete Yisrael nanwo. Osa te sorongo wɔ bɔ ɔhɔle so wɔ Kristofoɛ bɔ bɛtenane ase wɔ asomafoɛ nemɔ wue sĩ nanwo. Yede sɛɛ yeɛ bɛfrɛ mmerɛ bɔ yɛwɔ nu ne ɔ? Yɛtaa yɛkã kyɛ, yɛwɔ “ayieleɛ mmerɛ” nanu. (2 Tim. 3:1) Nakoso Bible ne maa yenwu kyɛ ayieleɛ mmerɛ ne, ɔne mmerɛ bɔ bɛkɔhyehyɛ nningyein amukoraa foforɛ ne, yemu kɔhyɛ yebo mmerɛ kõ anu. Afei koso, ɔkɔhɔso alaa koodwu kyɛ Mɛsaya Ahennie ne kɔye bɔne kofi sona nwo, na wamaa aseɛ ne akakyi paradise. Sɔ mmerɛ ne yeɛ Bible ne kã yenwo dwirɛ kyɛ, ɔte ‘mmerɛ bɔ bɛkɔhyehyɛ nningyein amukoraa foforɛ’ ne. (Aso. 3:21) Sɔ mmerɛ ne hyɛle yebo wɔ afoɛ 1914 nu. Yede nzu yeɛ bɛhyehyɛle ye foforɛ ne? Yeɛ ole kyɛ, Yehowa fale Yesu siele bia so wɔ anwuro kyɛ Ɔhene. Yeti sɔ mmerɛ ne de, né Yehowa asa anya ebie bɔ ɔte Ɔhene Dawide bosoniɛ bɔ okoli hene ɔ. Nakoso, nná ɛhẽne angome yeɛ Yehowa yɛle ɔ, na mmom osa maa nahorɛ sõen gyinane ye gya so biekũ. (Yes. 2:​2-4; Hes. 11:​17-20) Yede, ɛhe mukoraati sĩ ne, ngondombo ngyerɛkyerɛ kosa kole nahorɛ sõen kɔbɔ so biekũ anaa?

10. (a) Edwirɛ beni yeɛ Bible ne hã fale nahorɛ sõen nwo ɛnnɛ ɔ? (Yesaya 54:17) (b) Nzuati yeɛ sɔ dwirɛ ne hyɛ ngunaen ɔ?

¹⁰ Kenga Yesaya 54:17. Edwirɛ bɔ ɔwɔ sɔ ngɔmhyɛ nanu ne, wɔde susu yenwo nea. Ɔkã kyɛ: “Akodeɛ biala bɔ babɔ bafa batia wɔ ne, ɔngɔyɛ adwuma”! Yenwu ye paa kyɛ sɔ dwirɛ he awa nu ɛnnɛ. Afei, edwirɛ bɔ ɔma awerɛkyekyerɛ he koso, wawa nu ɛnnɛ. Yeɛ ole kyɛ: “AWURADE kohyirehyire wɔ mma mukoraa nikye, na wɔ mma konya asomdwee pee. Wɔ bo kotindim wɔ tenenee nu. . . . Engosuro, yeɛ ɛne ahunundetelɛ b’afia atee kɔwale, ofikyɛ ongopingye wɔ.” (Yes. 54:​13, 14) Bɔ ɔte yeɛ ole kyɛ, Satan bɔ ɔte “ewiase wa nyameɛ” ne po, ɔngɔhora ngosi asɛnga adwuma bɔ Yehowa Adanzefoɛ yɛ ye wɔ ewiase mukoraati ne atẽe llé. (2 Kor. 4:4)  Nahorɛ sõen asa asi ye daa nu biekũ, na ngondombo ngyerɛkyerɛ ngɔhora ngɔsɛkye ye llé. Yɛkɔhɔ so yɛkɔsõ Yehowa nahorɛ nu daa. Amba, akodeɛ biala bɔ babɔ bafa batia yɛ ne, ɔngɔyɛ adwuma!

NZU YEƐ OKOSI Ɔ?

11. Bɛbɔ bɛkɔha aseɛ so wa ne, nzu yeɛ ɔmaa yedé yedi kyɛ Yesu kɔhɔso kɔnea bɛso ɔ?

¹¹ Bɛbɔ bɛkɔhɔ anwuro ne, sɛ bemu befi aseɛ he aso bɛkɔ a, nzu yeɛ okosi ɔ? Kae kyɛ Yesu yeɛ ɔte yɛ Mene ɔ, na ye koso yeɛ ɔte asafo ne ti ɔ. Yesu bɔbɔ deinn po hãne kyɛ: “Ɛmɔ Mene te komapɛ, bɔ ye ole Kristo ne.” (Mat. 23:10) Bɛbɔ bɛsõ Yehowa bɔ bɛkɔha aseɛ he aso wa ne, yɛse kyɛ Yesu Kristo bɔ ɔte yɛ Hene ne, ɔkɔhɔso kɔnea bɛso kama, yeti bengosuro hwee. Bɔ ɔte yeɛ ole kyɛ, atẽe pɔtee bɔ Yesu kɔfaso kɔnea bɛ so ne de, yɛnze. Nakoso edwirɛ biemɔ wɔ Bible nanu bɔ ɔkɔboka yɛ maa yekonya gyidie kyɛ Yesu kɔnea bɛ so ɔ. Yede ɛmɔma yesusu enu biemɔ nwo.

12. Sɛɛ yeɛ Yehowa hɔleso neane ye mmenia (a) mmerɛ bɔ Mose wuli ne? (b) mmerɛ bɔ ɔfale adwuma foforɛ wurale Elia sa ne? (Nea foto ne koso.)

¹² Mose wuli kora yeɛ Yisraelfoɛ nemɔ kɔ bɔhyɛ aseɛ naso ɔ. Yede mmerɛ bɔ owuli ne, nzu yeɛ ɔtole bɛ ɔ? Aso Yehowa yakyili benu maa ɔhale bɛ ngome anaa? Daabi, wanyɛ sɔ. Na mmom mmerɛ bɔ bɛhɔle so belili nahorɛ bɛmane Yehowa ne, ye koso ɔneane bɛ. Yehowa hãhyirele Mose kyɛ sɛ owu a, Yosua yeɛ okoli Yisraelfoɛ nemɔ nyunu ɔ. Ye sɔ nati, Mose fale afoɛ pẽe tetele Yosua kora yeɛ owu ɔ. (Ɛks. 33:11; Deut. 34:9) Yehowa sa maa bɛyele mmrienzua bɔ bedi nahorɛ, bɔ né bɛkɔla mmenia apee, ɛyaa, aburuannu, ɔne ye po mmenia buru noa ɔ. (Deut. 1:15) Ɛhe maa yenwu kyɛ Yehowa hɔle so neane Yisraelfoɛ nemɔ. Bɔ yɛkã ye, ebie hɔle so wɔ diyifoɛ Elia aberɛ so. Ɔfale afoɛ pẽe bokale Yisraelfoɛ nemɔ maa bɛsõne Yehowa. Nakoso oodwuli nekaa bie ne, Yehowa fale ye hɔle Yisrael maen ne ngwaen dɔ maa ɔɔtoale ye adwuma naso. (2 Ahe. 2:1; 2 Abe. 21:12) Ɔwale sɔ ne, Yisraelfoɛ bɔ né bɛwɔ maen ne sorɔ dɔ, bɔ bedi nahorɛ ne, Yehowa yakyili benu anaa? Daabi, ofikyɛ né Elia afa afoɛ pẽe atete Elisa bɔ né okosi ye gya nu kɔtoa adwuma naso ne. Sɛ ɛhẽne la ahãmeɛ a, né bele mmenikue bie bɔ Bible ne frɛ bɛ “ngɔmhyɛlɛfoɛ fekue.” Bɛ koso, né batete bɛ, na né bɛboka adiyifoɛ nemɔ maa bɛyɛ bɛ adwuma ne. (2 Ahe. 2:7) Ɛhe maa yenwu ye kyɛ, né mmrienzua bɔ bedi nahorɛ pẽe wɔ berɛ, bɔ né bɛkɔhora bɛkɔboka Nyameɛ mmenia maa bɛkɔsõ ye ɔ. Yehowa hɔleso bokale ye mmenia, na wanyakyi benu.

13. Edwirɛ bɔ ɔwɔ Hebrifoɛ 13:5b ne, awerɛhyɛmuɛ beni yeɛ ɔmaa yenya ye ɔ?( Nea foto ne koso.)

 ¹³ Mmerɛ bɔ sɔ dwirɛ nemɔ wɔ yɛ tianu ne, ɛmɔma yebisa kyɛ, bɛbɔ bɛkɔhɔ anwuro ne, sɛ bemu befi aseɛ so bɛkɔ a, nzu yeɛ okosi ɔ? Onnikyɛ yɛfa ɛhe yɛha yɛnwo, ofikyɛ Bible ne ma yɛ awerɛhyɛmuɛ kyɛ, mmenia bɔ bɛkɔha aseɛ so ne, Yehowa ngɔye yesa ngofi bɛ bo le. (Kenga Hebrifoɛ 13:5b.) Ɛnnɛ koso, Akwangyerɛ Kue ne se kyɛ, yenwo hia paa kyɛ bɛkɔtete afoforɛ, kyɛbɔ Mose ne Elia yɛle ne. Ye sɔ nati, mmrienzua biemɔ bɔ bele anyelasoɛ kyɛ bɛkɔtena aseɛ he aso ne, Akwangyerɛ Kue ne afa afoɛ pẽe atete bɛ, kyɛbɔ ɔkɔyɛ a bɛkɔboka aliemaamɔ maa bɛkɔsõ Yehowa yé ɔ. Ɛhẽne ati, bahyehyɛ sukuu ahoroɛ bɔ bɛfa bɛtete asafo nu mbanyi, manzin soneafoɛ, Bɛtɛl Kɔmatee nanufoɛ, aliemaamɔ bɔ bɛlela ɔffiss ahoroɛ noa wɔ Bɛtɛl, ɔne pẽe bɔ ɔboka so ɔ. Afei koso, aliemaamɔ bɔ bɛte Akwangyerɛ Kue ne bokafoɛ ne, Akwangyerɛ Kue ne bɔbɔ atete bɛ. Ɛhẽne aboka bɛ paa maa kesaalae bɛyere bɛnwo bɛyɛ adwuma serɛ bɛboka Yehowa ahyehyɛdeɛ ne. Yedé yedi paa kyɛ bɛkɔboka aliemaamɔ maa bɛkɔhɔso bɛkɔsõ Yehowa nahorɛ nu kyẽabie.

14. Nzu deinn yeɛ yasusu yenwo wɔ adesũa he anu ɔ?

¹⁴ Yeti ɔbaadwu wa ne, yanwu ye kyɛ, bɛbɔ bɛkɔhɔ anwuro ne, sɛ bemu befi aseɛ so bɛkɔ, mmerɛ bɔ waha kãa maa amaneɛnwunɛ piri ne kɔ ayieleɛ a, nahorɛ sõen ngɔsɛkye llé. Ofikyɛ bɛbɔ bɛkɔha aseɛ so ne, Yesu kɔboka bɛ maa bɛkɔhɔso bɛkɔsõ Yehowa nahorɛ nu bɔ nikyefee ngosi bɛ atẽe ɔ. Bɔ ɔte yeɛ ole kyɛ, Gɔgo bɔ ofi Magɔgo, bɔ ogyi berɛ ma maenmaen bɔ bahã bɛnwo babɔ nu ne, sɔ mmerɛ ne, né bato bawura yɛ so. (Hes. 38:​18-20) Nakoso bɛsa kosi ase, ɔnate kyɛ Yehowa kɔbɔ ye mmenia nwo waen, na ɔkɔboka bɛ maa bɛkɔhɔso bɛkɔsõ ye. Somafoɛ Yohane nyane nyekyire bie, na onwuni “ɛlɔen kandinga” bie, bɔ begyi berɛ bɛma Kristo mmoaen foforɛ ne. Bɛhã behyirele Yohane kyɛ, sɔ “ɛlɔen kandinga” bɔ onwuni bɛ ne, bafi “amaneɛ piri ne anu bafite.” (Nye. 7:​9, 14) Amba, Yehowa kole bɛ!

15-16. Kyɛbɔ Nyekyire 17:14 maa yenwu ye ne, bɛbɔ bɛkɔhɔ anwuro ne, nzu yeɛ bɛkɔyɛ ye wɔ Amagedon kõɛ nanu ɔ, na sɛɛ yeɛ ɛhẽne maa y’ahõne tɔ yɛ kunu ɔ?

¹⁵ Ebia ebie kobisa kyɛ: ‘Bɛbɔ bɛkɔhɔ anwuro ne koso, sɛ bekodwu dɔ a, nzu yeɛ bɛkɔyɛ ɔ?’ Bible ne ma sɔ dwirɛ he anwo mmuayɛɛ. Ɔkã  kyɛ awaen ahoroɛ bɔ bɛwɔ ewiase ne, “bɛkɔfa koɛ bɛkɔteta Boaen Ba ne.” Nakoso, yɛse kyɛ, Boaen Ba ne kɔfa bɛsĩ kɔhã ase, ɔnate kyɛ Bible ne kã kyɛ: “Boaen Ba ne koli bɛ so ngonim.” Yede nwamɔ yeɛ bɛkɔboka ye ɔ? Tworɔnzɛm ne toa so kyɛ, bɛbɔ “wafrɛ bɛ, waneanea nu waye bɛ, na bedi nahorɛ” ne, yeɛ bɛkɔboka ye ɔ. (Kenga Nyekyire 17:14.) Sɔ mmenia nemɔ yeɛ ole nwamɔ? Ɔte bɛbɔ batingye bɛ maa bahɔ anwuro ne. Yeti bɛbɔ bɛkɔhɔ anwuro ne, sɛ benu sona bɔ ɔpɛ yebo ne nya fi aseɛ he aso kodwu anwuro pɛ, nikyee bɔ bekolimoa bɛkɔyɛ yeɛ ole kyɛ, bɛkɔhõ ngondii. Adwuma bɔ ɔyɛ nwanwa beni ala ɛhe! Bɔ ɔte yeɛ ole kyɛ, bɛbɔ bɛkɔhɔ anwuro ne, koraka bɛbaayɛ Yehowa Adanzefoɛ ne, né benu biemɔ kuro ngondii paa, na né ebiemɔ po te sogyafoɛ. Nakoso mmerɛ bɔ beesũane Bible ne, bɛɛyɛle mmenia bɔ bekuro asomdwee ɔ. (Gal. 5:22; 2 Tɛs. 3:16) Ɛhẽne ati, bɛmva bɛnwo benwura kõɛ nu kõ. Nakoso sɛ benya betingye bɛ maa bekodwu anwuro pɛ, bɛkɔboka Yesu ne ye abɔfo krongron nemɔ aso maa bɛkɔfa Amagedon kõɛ ne kɔwa Nyameɛ pɔfoɛmɔ so.

¹⁶ Wɔde susu ɛhe anwo nea. Kristofoɛ bɔ bɛkɔhɔ anwuro bɔ beté wɔ aseɛ he aso ne, benu biemɔ ayɛ mbanyi, na b’anwoserɛ so ate. Nakoso, sɛ bewu na betingye bɛ maa bekodwu anwuro a, bɛkɔyɛ honhom bɔ bɛnwo yɛ se ɔ, na bengowu llé. Afei, bɛkɔboka Yesu bɔ ɔte bɛ Safohene naso maa bɛne bɛ pɔfoɛmɔ kɔhõ wɔ Amagedon kõɛ nanu. Ɛhẽne sĩ ne, bɛne Yesu kɔbɔ nu kɔyɛ adwuma, na bɔne bɔ ɔwɔ yɛnwo ne, bɛkɔboka yɛ maa okofi berɛ ngakãngakã. Aliemaamɔ bɔ bɛkɔhɔ anwuro bɔ beté wɔ aseɛ so ne, nningyein pá pẽe yeɛ bɛyɛ bɛboka yɛ maa yɛsõ Yehowa ɔ. Yeti sɛ bekodwu anwuro dɔ a, bɛkɔyɛ nningyein bɔ ɔtra sɔ koraa bɛkɔboka yɛ.

17. Nzu yeɛ ɔmaa yele gyidie kyɛ mmenia bɔ bɛsõ Nyameɛ ne mukoraati konya ngõa wɔ Amagedon kõɛ nanu ɔ?

¹⁷ Bɛbɔ bɛkɔtena aseɛ so ne, ɛboka bɛso anaa? Sɛ sɔ a, nzu yeɛ odikyɛ ɛyɛ mmerɛ bɔ Amagedon kõɛ ne ahyɛ yebo ne? Yeɛ ole kyɛ, ɛkɔfa wɔnwo kɔto Yehowa so, na atie akwangyerɛ biala bɔ ɔkɔfa kɔma wɔ sɔ mmerɛ ne. Yede, ɛkɔyɛ ye sɛ́? Yeɛ ole kyɛ ɛkɔfa Bible nu dwirɛ he kɔyɛ adwuma. Ɔkã kyɛ: “Baawura wɔ pumbu mɔ nu, ná toto wɔ nwo anoa nu; fa wɔ nwo fea kãa kɔpem kyɛ ahonehulɛ ne kɔtɔ nzue nu ɔ.” (Yes. 26:20) Yele gyidie paa kyɛ bɛbɔ bɛsõ Nyameɛ ne, bɛ mukoraati konya ngõa, ɔmva yenwo kyɛ bɛkɔ anwuro, anaa bɛtena aseɛ so ne. Kyɛbɔ somafoɛ Pɔɔlo hãne ne, yɛ koso yɛse ye pefee kyɛ ‘awaen ahoroɛ anaa nningyein bɔ ɔwɔ berɛ kekesaala ye, anaa nningyein bɔ ɔbaawa ngɔhora ngɔtete yɛ ngofi Nyameɛ dɔ bɔ ɔwɔ yɛ Awurade Kristo Yesu nu ne anwo le.’ (Rom. 8:​38, 39) Nnɛmaa wɔ wora fi kyɛ, Yehowa kuro wɔ dwirɛ paa, na ɔngɔye yesa ngofi wɔ bo le!