Nná mmerɛ bɔ yayia nu wɔ asafo nhyiamu, manzini nhyiamu, ɔne mandam nhyiamu bo ngome yeɛ yɛkɔhora yekosũa Yehowa nwo nikye ɔ. Mmom yɛbɔbɔ anaa yɛne y’abusũa kɔhora kɔbɔ nu kosũa Yehowa nwo nikyee mmerɛ foforɛ. Nningyein ahoroɛ bɔ oliliso he kɔhora kɔboka wɔ maa ekonwu bɔ wɔ bɔbɔ, anaa ɛne w’abusũa kɔhora kosũa ɔ:

• Dimoa sũa nningyein bɔ yekosusu yenwo wɔ asafo nhyiamu bo ne. Bɔ ɛkɔhora kɔyɛ ne bie yeɛ ole kyɛ, ekosũa dwein bɔ yɛkɔto ye wɔ asafo nhyiamu bo ne. Afei koso, ɛkɔhora kɔboka w’abusũa nanufoɛ maa bekosũa mmuayɛɛ bɔ bɛkɔma ɔ.

• Ɛkɔhora kɔkenga Bible nu dwirɛ bie. Sɛ eyie a, dwenedwene bɔ akenga nanwo, anaa tworɔ bɔ asũa afi nu ne to berɛ.

• Mbaeɛ bɔ ebiemɔ bɔle bɔ yenwo dwirɛ wɔ Bible nanu ne, ɛkɔhora kɔkenga bie na adwenedwene yenwo. Sɛ ɛyɛ sɔ a, ɔkɔboka wɔ maa ɛkɔhora kofi w’ahõne nu kɔbɔ mbaeɛ.

• Vidio ahoroɛ bɔ asafo ne ayɛ ne, wɔ bɔbɔ anaa ɛne w’abusũa ne kɔhora kɔnea bie na ɛmɔsusu yenwo. Ɛhẽne sĩ ne, ɛmɔkɔhora bɛkɔhworɔ bɔ ɛmɔ asũa bafi vidio nanu ne bɛkɔto berɛ.

• Ɛmɔsũa kyɛbɔ ɛmɔkoli adanzeɛ wɔ asɛnga nu ɔ. Bɔ ɛmɔkɔhora bɛkɔyɛ ne bie yeɛ ole kyɛ, ɛmɔnu kõ kɔhora kɔyɛ yenwo kyɛ waato ebie wɔ asɛnga nu bɔ odi ye adanzeɛ ɔ.

• Nningyein ahoroɛ bɔ Yehowa abɔ ne, ɛmɔkɔhora bekofité bɛkɔɔnea bie, na bɔ ɔmaa ɛmɔnwu ye bɛfa Yehowa nwo ne, ɛmɔsusu yenwo. a