ADESŨA 3
DWEIN 124 Yebedi Nokware Daa
Sɛ Ɛkɔ Ɔhaw Bie Nu A, Nya Gyidie Kyɛ Yehowa Kɔboka Wɔ
“[Yehowa] kɔyɛ wɔ mmerɛ so nyinasoɛ pindinn.”—YES. 33:6.
BƆ ADESŨA NE KƆHÃ YENWO DWIRƐ Ɔ
Sɛ ɔhaw bie to yɛ a, yekonwu bɔ odikyɛ yɛyɛ kyɛbɔ ɔkɔyɛ a, yekonya mmokalɛ bɔ Yehowa fama yɛ naso mvasoɛ ɔ.
1-2. Ɔhaw beni yeɛ ɔkora to bɛbɔ bedi nahorɛ bɛma Yehowa ne ɔ?
EDWIRƐ bie bɔ yɛnnea atẽe kɔhora kɔto yɛ. Sɔ yeɛ ɔtole aliemaa bie bɔ bɛfrɛ ye Luis a ɔ. Onyane kansa, na né ɔyɛ suro paa. Dɔktaniɛ bɔ ɔnea ye ne, ɔhãhyirele ye kyɛ, ɔnate sɔ anwonyerɛ nati, ɔngɔhyɛ okowu. Monika ne ohũ koso, né bɛbɔ bɛnwo mmɔden paa wɔ asafo nanu. Nakoso ɛlɛhõ kõ Monika nwuni kyɛ, sãa ohũ bɔ ɔte asafo nu panyi ne, ɔyɛ bɔne fea, na wayɛ sɔ afoɛ pẽe. Aliemaa brasua Olivia koso te sigyaniɛ. Ɔnate mvrama pirikua bie bɔ né ɔbaatu nati, bɛhã behyirele ye kyɛ otu fi ye awuro berɛ. Mmerɛ bɔ mvrama ne tu yiele bɔ ɔɔneane bɔ wasi ne, onwuni kyɛ mvrama ne asɛkye ye awuro ne koraa. Nningyein sesãne kõmapɛ wɔ sɔ aliemaa hemɔ asetena nu bɔ né bɛnnea atẽe ɔ. Wɔ koso, edwirɛ bɔ ɔte sɔ ne bie ato wɔ le anaa?
2 Ɔmva yenwo kyɛ yedi nahorɛ yɛma Yehowa ne, anwonyerɛ kɔhora kɔbɔ yɛ, na ɔhaw foforɛ koso kɔhora kɔto yɛ, kyɛbɔ ɔto mmenia mukoraati ne. Afei koso, mmenia bɔ benguro yɛ dwirɛ ne, bɛkɔhora bɛkɔtane yɛnye. Sɛ yɛkɔ ɔhaw bɔ ɔte sɔ nu a, Yehowa ngɔyɛ nzɛngyerɛnneɛ bie bɔ ɔkɔmaa sɔ haw ne kofi yɛ so ɔ, nakoso wahyɛ yɛ bɔ kyɛ ɔkɔboka yɛ. (Yes. 41:10) Bɔ Yehowa kɔyɛ ne bie yeɛ ole kyɛ, ɔkɔboka yɛ ma yekosi gyinayɛɛ pá kyɛbɔ ɔkɔyɛ a, yɛnye kɔgye ɔ. Afei koso, Yehowa kɔboka yɛ maa yɛkɔhɔ so yekoli ye nahorɛ, mmerɛ bɔ ɔhaw bie bɔ enu yɛ se ato yɛ ne. Wɔ adesũa he anu ne, yɛkɔnea nningyein 4 bɔ Yehowa yɛ fa boka yɛ, mmerɛ bɔ ɔhaw bie ato yɛ ne. Afei koso yɛkɔnea bɔ yɛkɔyɛ, na yahora yanya mmokalɛ bɔ Yehowa fama yɛ naso mvasoɛ ɔ.
YEHOWA KƆBƆ WƆNWO WAEN
3. Sɛ ɔhaw bie to yɛ a, nzu yeɛ ɔkora yɛ se ma yɛ kyɛ yɛkɔyɛ ɔ?
3 Bɔ ɔmaa ɔyɛ se ɔ. Sɛ edwirɛ bie to yɛ a, ɛyɛ a né ɔyɛ se ma yɛ kyɛ yekosusu nningyein nwo yé, na yasi gyinayɛɛ pá ɔ. Bɔ yeti yeɛ yɛkã sɔ yeɛ ole kyɛ, ɔmaa yedi yealɛ, na yɛteetee. Sɛ ɔba sɔ a, ɛyɛ a né yennwu bɔ yɛyɛ po ɔ. Aliemaa mmrasua nyɔ bɔ yalimoa yahã bɛnwo dwirɛ ne, ɛmɔma yetie bɔ bɛhãne ɔ. Olivia hãne kyɛ: “Mmerɛ bɔ mvrama ne sɛkyele m’awuro ne, na mennwu bɔ nyɛ ɔ, na nyane adwene kyɛ m’anyelasoɛ mukoraati ayie.” Monika koso, mmerɛ bɔ onwuni kyɛ ohũ ayɛ sɔ ne, ɔhãne kyɛ: “Bɔ ɔwale me tianu ala yeɛ ole kyɛ, mehũ aye me ama, na ɔyɛle me yea paa. Yeti, né mennwu bɔ nyɛ menwo ɔ, ofikyɛ wamma m’adwene nu le kyɛ mehũ kɔhora kɔyɛ me sɔ.” Yede, sɛ ɔhaw bie to yɛ na yɛ wora bɔ a, nzu yeɛ Yehowa ahyɛ bɔ kyɛ ɔkɔyɛ kɔma yɛ ɔ?
4. Kyɛbɔ Filipifoɛ 4:6, 7 kã ne, nzu yeɛ Yehowa ahyɛ bɔ kyɛ ɔkɔyɛ kɔma yɛ ɔ?
4 Bɔ Yehowa yɛ faboka yɛ ɔ. Wahyɛ yɛ bɔ wɔ Bible nanu kyɛ, ɔkɔmaa yekonya “Nyameɛ asomdwee.” (Kenga Filipifoɛ 4:6, 7.) Bɔ ɛhe kyire yeɛ ole kyɛ, ɔnate kyɛ yɛne Yehowa afĩa te kama nati, yɛ ahõne kɔtɔ yɛ kunu. Sɔ asomdwee bɔ yɛkã yenwo dwirɛ ne, “ɔbo ndeaseɛ amukoraa so.” Ɛhe maa yenwu ye kyɛ, sona biala nne berɛ bɔ ɔkɔhora kɔmaa yɛsa kɔhã sɔ asomdwee ne ɔ. Aso abɔ mbaeɛ maa w’ahõne atɔ wɔ kunu, mmerɛ bɔ né ɛfa ɔhaw bie nu le anaa? Ɛhẽne yeɛ Bible ne frɛ ye “Nyameɛ asomdwee” ne.
5. Sɛɛ yeɛ Nyameɛ asomdwee bɔ y’ahõne ne y’adwene nwo waen ɔ?
5 Sɔ ngyekyɛmuɛ ne sa hãne ne kyɛ, Nyameɛ asomdwee ‘kɔnea,’ anaa ɔkɔbɔ “ɛmɔ ahone ne ɛmɔ adwene” nwo waen. Sɔ dwirɛ bɔ bahyire yebo kyɛ “kɔnea” ne, né bɛtaa bɛfa bɛtoto sogyafoɛ bɔ bɛbɔ kuro bie nwo waen kyɛbɔ ɔkɔyɛ a, bɛ pɔfoɛmɔ ngɔto ngowura bɛ so nanwo. Mmenia bɔ bɛwɔ sɔ kuro nanu ne, sɛ bɛda a, né bɛ kunu ndete bɛ, ofikyɛ né bɛse kyɛ bele sogyafoɛ bɔ bɛbɔ bɛnwo waen ɔ. Sɔ ala yeɛ yɛ koso, sɛ yele Nyameɛ asomdwee a, ɔmaa yɛ ahõne tɔ yɛ kunu ɔ, ofikyɛ yɛse kyɛ Yehowa kɔboka yɛ. (Edw. 4:8) Ɔhaw bɔ yɛfa nu ne, sɛ wamvi berɛ kesaalae po a, yɛkɔhora yekonya asomdwee bɔ Hana nyane ye ne bie. (1 Sam. 1:16-18) Sɛ ɔba sɔ a, ɔboka yɛ maa yesusu nningyein nwo yé, na yesi gyinayɛɛ pá.
Sɛ ɔhaw bie to wɔ a, kɔso bɔ mbaeɛ kodwu kyɛ ekonya “Nyameɛ asomdwee” bɔ ɔkɔbɔ w’ahõne ne w’adwene nwo waen ɔ (Nea ngyekyɛmuɛ 4-6)
6. Yɛkɔyɛ sɛɛ né yahora yanya Nyameɛ asomdwee? (Nea foto ne koso.)
6 Bɔ odikyɛ yɛyɛ ɔ. Yɛ koso sɛ ɔhaw bie to yɛ a, odikyɛ yɛbɔ Nyameɛ mbaeɛ daa, na yɛkã yekyire ye kyɛ, ɔfa ye asomdwee ne bɔ yɛ ahõne, ɔne yɛ adwene nwo waen. (Luka 11:9; 1 Tɛs. 5:17) Luis bɔ yalimoa yahã yenwo dwirɛ ne, mmerɛ bɔ bɛhã behyirele ye kyɛ ɔngɔhyɛ okowu ne, ɔhãne bɔ ɔbokale ɔne ɔye Ana ɔ. Ɔhãne kyɛ: “Sɛ bɛkã bekyire wɔ kyɛ ɔngɔhyɛ ekowu a, ɛyɛ a né ennwu bɔ ɛyɛ wɔnwo ɔ. Yeti sɛ annea yé a, engosi gyinayɛɛ pá. Nakoso mbaeɛ bɔ né yɛbɔ ne, yeɛ ɔbokale yɛ maa yenyane asomdwee ɔ.” Luis hɔle so ne ɔye bɔle Yehowa mbaeɛ, na ɛhẽne yeɛ ɔbokale bɛ maa bɛhɔle so benyane asomdwee ɔ. Afei, bɛ ahõne tɔle bɛ kunu, na bɛhora bɛsili gyinayɛɛ pá. Yeti wɔ koso sɛ ɔhaw bie to wɔ a, kɔso bɔ mbaeɛ, na Yehowa kɔma wɔ asomdwee bɔ ɛkɔfa kogyina ɔhaw ne noa ɔ.—Rom. 12:12.
YEHOWA KƆMA WƆ ANWOSERƐ
7. Sɛ yɛfa ɔhaw bie nu a, nzuati yeɛ ɔkora yɛ se ma yɛ kyɛ yekogyina yenoa ɔ?
7 Bɔ ɔmaa ɔyɛ se ɔ. Sɛ yɛfa ɔhaw bie nu a, ɛyɛ a né ɔyɛ se ma yɛ paa kyɛ yekosusu nningyein nwo yé, na yasi gyinayɛɛ pá ɔ. Bɔ ɔmaa ɔba sɔ yeɛ ole kyɛ, ɛyɛ a né yɛ wora abɔ, y’abanu abu, na ɔngyɛ né yafɛ yaa. Ana bɔ yalimoa yahã yenwo dwirɛ ne, mmerɛ bɔ ohũ Luis wuli ne, né ɔyɛ yenwo hwee a ɔnyɛ yé. Ɔhãne kyɛ: “Ɔwale sɔ ne, me wora bɔle paa. Yeti ɛyɛ a né m’ahõne awa, na sɛ ebiala yɛlle me hwee po a, né mafɛ yaa.” Odwu mmerɛ bie koso a, né Ana nwu ye kyɛ waha ye ngome, ofikyɛ nningyein biemɔ bɔ né ohũ Luis di ye nyunu maa bɛyɛ ne, né ye mukoraati aagua ye so. Odwu mmerɛ bie wora a, né Ana nwu yenwo kyɛ ye dwirɛ yɛ anwumvo. Ɛhe maa ɔte ngã kyɛ anomaa ba bie bɔ nzue abo ye maa ye ndaa aloa ne. Yede sɛ yɛkɔ ɔhaw bɔ ɔte sɔ nu a, nzu yeɛ Yehowa yɛ faboka yɛ ɔ?
8. Kyɛbɔ Yesaya 33:6 kã ne, nzu yeɛ Yehowa ahyɛ bɔ kyɛ ɔkɔyɛ kɔma yɛ ɔ?
8 Bɔ Yehowa yɛ faboka yɛ ɔ. Yehowa ahyɛ yɛ bɔ kyɛ, ɔkɔma yɛ anwoserɛ bɔ yɛkɔfa yekogyina yɛ haw noa. (Kenga Yesaya 33:6.) Sɛ mvrama tu fa ɛpo so a, opia ship ne kɔ bɛen anaa famaa so, na ɛyɛ a né ɔyɛ suro paa. Nakoso bayɛ buralɛ bie wɔ ship nanwo, yeti sɛ bɛtwẽ bɛto nzue nanu a, ɔboka ship ne, na wammono. Ɔnate sɔ nikyee bɔ bayɛ ye wɔ ship nanwo nati, sɛ mvrama tu a, ɔmaa ɔkɔ bɔkɔɔ, na bɛbɔ bɛte nu ne koso, bɛ kunu ndete bɛ. Sɛ ship ne nate nzue naso a, yeɛ buralɛ ne yɛ adwuma yé paa ɔ. Sɔ ala yeɛ yɛ koso, sɛ yɛkɔso yedi nahorɛ yɛma Yehowa mmerɛ bɔ yɛfa ɔhaw nu a, ɔkɔma yɛ anwoserɛ bɔ yɛkɔfa yekogyina yenoa ɔ.
Sɛ ɛfa nningyein bɔ yɛfa yɛyɛ nhwehwɛmuɛ ne sũa nikyee a, ɔkɔboka wɔ maa ekonya anwoserɛ bɔ ɛkɔfa kogyina wɔ haw noa ɔ (Nea ngyekyɛmuɛ 8-9)
9. Nningyein bɔ yɛfa yɛyɛ nhwehwɛmuɛ ne, sɛɛ yeɛ ɔkɔhora kɔboka yɛ ɔ? (Nea foto ne koso.)
9 Bɔ odikyɛ yɛyɛ ɔ. Sɛ edwirɛ bie hyɛ wɔ so, na ennwu bɔ ɛyɛ a, bɔ mmɔden kyɛ ɛkɔbɔ mbaeɛ daa, ɛkɔhɔ adesũa, na ayɛ asɛnga adwuma ne bie. Ebia ɔnate ɔhaw bɔ ɛfa nu nati, ɛngora nyɛ sɔ nningyein hemɔ kyɛbɔ né ɛyɛ ye dáa ne. Nakoso nwu ye kyɛ, Yehowa se bɔ ɛfa nu ne mukoraati, na ɔmbena kyɛ ɛyɛ bɔ ɔbo w’anwoserɛ so ɔ. (Fatoto Luka 21:1-4 nanwo.) Sɛ ɛhẽne la ahameɛ a, bɔ mmɔden kyɛ ekosũa nikyee daa, na dwenedwene bɔ esũa nanwo. Yede, nzu yeɛ ɔkɔboka wɔ maa ɛkɔyɛ sɔ ɔ? Yeɛ ole kyɛ, asafo ne ayɛ nwomaa ne vidio ahoroɛ bɔ ɔkɔhora kɔboka wɔ ɔ. Sɛ ɛpena kyɛ enwu edwirɛ bɔ ɔkɔboka wɔ mmerɛ bɔ ɛfa ɔhaw bie nu a, nningyein bɔ yɛfa yɛyɛ nhwehwɛmuɛ bɔ ɔwɔ wɔ dwudwolɛ nu ne, ɛkɔhora kɔfa bie kɔyɛ adwuma. Ebie yeɛ ole JW Library®app, ɔne Nhoma a Yehowa Adansefo De Yɛ Nhwehwɛmu ne. Monika bɔ yalimoa yahã yenwo dwirɛ ne, ɔhãne kyɛ, sɛ ye wora bɔ, anaa y’abanu bu a, ɔbɔ mmɔden kyɛ ɔkɔfa sɔ nningyein nemɔ bie kɔyɛ nhwehwɛmuɛ. Ɛhẽne maa onya awerɛkyekyerɛ. Edwirɛ bɔ ɛyɛ a ɔyɛ yenwo nhwehwɛmuɛ ne, ebie yeɛ ole “ɛyaafɛlɛ.” Ɔtɔ mmerɛ bie koso a, ɛyɛ a, ɔyɛ nhwehwɛmuɛ fa “mmerɛ bɔ ebie aye wɔ ama,” anaa “nahorɛlilɛ” nwo. Ɔhãne kyɛ: “Sɛ menya metena ase kyɛ mebaasũa nikyee a, né me wora abɔ. Nakoso ngoyie ne, né Yehowa nate bɔ masũa naso amaa menwo adwo me fɔnwoo. Ofikyɛ nhwehwɛmuɛ bɔ nyɛle ne, wamaa manwu kyɛ Yehowa se ɔhaw bɔ mefa nu namukoraati, na ɔkɔboka me maa ngogyina yenoa.” Yɛ koso, Yehowa fa sɔ atẽe naso boka yɛ maa yɛkora yegyina ɔhaw biala bɔ yɛfa nu ne noa, na ɛhẽne maa yɛ ahõne tɔ yɛ kunu.—Edw. 119:143, 144.
YEHOWA KƆBOKA WƆ
10. Sɛ ɔhaw bie bɔ enu se to yɛ a, nzu yeɛ ɔkora fi nu ba ɔ?
10 Bɔ ɔmaa ɔyɛ se ɔ. Ebie bɔ ɔse amirika tu paa ne, sɛ opira na ɔtɔ gua so a, enwu ye a, ɛngɔhã kyɛ ye yeɛ né yenwo yɛ nyera ne. Sɔ ala yeɛ yɛ koso, ɔhaw bie bɔ enu yɛ se to yɛ a, ɔmaa yɛ anwoserɛ so te, na y’abanu bu ɔ. Ɔba sɔ a, nningyein biemɔ bɔ né yɛkora yɛyɛ ne, ebia yɛngɔhora ye yɛ kõ. Anaa nningyein bɔ né yekuro ye yɛlɛ ne, ekonwu ye ne, né hwee ngã yɛ kyɛ yɛyɛ. Afei koso, odwu mmerɛ bie a, ɛyɛ a né ɔyɛ se ma yɛ kyɛ yekodwɔso yekofi yɛ bɛen so, na yayɛ nningyein bɔ odikyɛ yɛyɛ wɔ kyēa nanu, kyɛbɔ ɔtole Elia ne. (1 Ahe. 19:5-7) Yede sɛ y’abanu bu a, nzu yeɛ Yehowa ahyɛ bɔ kyɛ ɔkɔyɛ kɔma yɛ ɔ?
11. Sɛ yɛkɔ ɔhaw bie nu a, nikyee foforɛ beni yeɛ Yehowa yɛ faboka yɛ ɔ? (Edwein 94:18)
11 Bɔ Yehowa yɛ faboka yɛ ɔ. Yehowa ahyɛ yɛ bɔ kyɛ ɔkɔboka yɛ. (Kenga Edwein 94:18.) Ebie bɔ ɔse amirika tu paa ne, sɛ opira na ɔtɔ gua so a, sana ebie kyekye ye gya ne ma ye, kyɛbɔ ɔkɔyɛ a, ɔkɔhora kɔnate biekũ ɔ. Sɔ ala yeɛ yɛ koso, nningyein bɔ yɛyɛ ye wɔ Yehowa sõen nu ne, sɛ yɛkɔhora yɛkɔyɛ ye biekũ a, sana yɛmaa bɛboka yɛ. Sɛ ɔba sɔ a, edwirɛ bie bɔ Yehowa hãne ne, ɔkɔhora kɔkyekye yɛ wora. Ɔhãne kyɛ: “Ofikyɛ me, AWURADE wɔ Nyameɛ, ndira wɔ sa famaa, na me yeɛ mekã mekyire wɔ kyɛ, ‘Nnɛsuro, na ngɔboka wɔ.’” (Yes. 41:13) Ɔhene Dawide nwuni kyɛ sɔ dwirɛ ne te nahorɛ paa. Mmerɛ bie bɔ ɔhɔle anwokyere nu ne, ye pɔfoɛmɔ tanene yenye. Nakoso, ɔhãhyirele Yehowa kyɛ: “Wɔ mmokalɛ amaa mayɛ sona titire.” (Edw. 18:35) Yede atēe beni yeɛ Yehowa faso boka yɛ ɔ?
Ma w’abusũafoɛ, wɔ damvomɔ, ɔne asafo nu mbanyi nemɔ atẽe ma bɛboka wɔ (Nea ngyekyɛmuɛ 11-13)
12. Sɛ y’abanu bu a, nwamɔ yeɛ Yehowa kɔhora kɔfa bɛ so kɔboka yɛ ɔ?
12 Sɛ odwu mmerɛ bie na yɛfa ɔhaw nu a, Yehowa kora fa ebiemɔ so hyɛ yɛ ngunaen. Ebie yeɛ ole kyɛ, mmerɛ bɔ Dawide abanu buli, na onnwu bɔ ɔyɛ yenwo ne, ye damvo Yonatan penane yebo so, na ɔkyekyele ye wora. (1 Sam. 23:16, 17) Sɔ ala koso yeɛ Yehowa nate Elisa so bokale Elia maa ɔhora yɛle adwuma bɔ né owura yesa ne ɔ. (1 Ahe. 19:16, 21; 2 Ahe. 2:2) Ɛnnɛ koso, Yehowa kora fa yɛ abusũafoɛ, yɛ damvomɔ, ɔne asafo nu mbanyi so boka yɛ. Nakoso, ɔtɔ mmerɛ bie a, ɔnate yealɛ bɔ yedi nati, ɛyɛ a né yɛmbena kyɛ yɛkã yɛ dwirɛ yekyire ebiala. Yeti ɛyɛ a, né yɛpena kyɛ yɛte yɛnwo yɛkɔtena nekaa bie. Sɛ yɛyɛ sɔ a ɔtte bɔne. Yede, nzu yeɛ odikyɛ yɛyɛ, na wamaa Yehowa aboka yɛ ɔ?
13. Sɛ yɛfa ɔhaw bie nu a, yɛkɔyɛ sɛɛ ne yamaa Yehowa aboka yɛ? (Nea foto ne koso.)
13 Bɔ odikyɛ yɛyɛ ɔ. Ɔmva yenwo ne ɔhaw biala bɔ yɛfa nu ne, odikyɛ yɛbɔ mmɔden kyɛ yɛngɔte yɛnwo. Bɔ ɔmaa ɔte sɔ yeɛ ole kyɛ, sɛ yɛte yɛnwo yefi mmenia nwo a, yɛngora yenzusu nningyein nwo yé. Afei ɔmaa yɛfa yɛ adwene yesie ɔhaw bɔ yɛfa nu naso. Sɛ ɔba sɔ a, ɔkɔyɛ se kyɛ yɛkɔhora yekosi gyinayɛɛ pá ɔ. (Any. 18:1) Sɛ ɔhaw bie bɔ enu yɛ se to yɛ, na yɛ ngome yɛkɔtena nekaa bie yɛdwene yɛnwo a, ɔtte mvomsoɛ. Nakoso sɛ yɛmaa ɔbayɛ yɛ subaen kyɛ daa yɛkɔte yɛnwo a, ɔkɔmaa ɔkɔyɛ se kyɛ yekonwu mmokalɛ bɔ Yehowa pena kyɛ ɔfa ma yɛ ne. Yeti ɔhaw biala bɔ ɛfa nu ne, ma w’abusũafoɛ, wɔ damvomɔ, anaa asafo nu mbanyi boka wɔ. Sɛ ɔyɛ se ma wɔ po a, mia wɔnye ma bɛboka wɔ, ofikyɛ bɛ yeɛ Yehowa nate bɛ so kɔboka wɔ ɔ.—Any. 17:17; Yes. 32:1, 2.
YEHOWA KƆKYEKYE WƆ WORA
14. Nningyein benimɔ yeɛ ɔkɔhora kɔmaa esuronyi kɔhã yɛ ɔ?
14 Bɔ ɔmaa ɔyɛ se ɔ. Ɔnate bɔ yɛfa nu nati, esuronyi kɔhora kɔhã yɛ. Sɛ yɛnea Bible nu a, mmenia bɔ né bedi nahorɛ bɛma Nyameɛ ne po, odwu mmerɛ bie a, ɔnate bɛ pɔfoɛmɔ ti, ɛyɛ a esuronyi ne ahunundetelɛ tɔ bɛ so. (Edw. 18:4; 55:1, 5) Sɔ ala koso yeɛ odwu mmerɛ bie a, bɛbɔ yɛne bɛ kɔ sukuu, bɛbɔ yɛne bɛ yɛ adwuma, yɛ abusũafoɛ, ɔne awaen mbanyi kora tane yɛnye ɔ. Afei koso, sɛ anwonyerɛ bɔ ɔyɛ suro bɔ yɛ, na bɛkã bekyire yɛ kyɛ yekowu a, yɛ kunu kɔhora kɔtete yɛ. Sɛ ɔba sɔ a, né yaayɛ kyɛ akwalaa kãamba bie bɔ ɔngora hwee yɛ ne. Yede sɛ sɔ dwirɛ ne bie to yɛ a, sɛɛ yeɛ Yehowa boka yɛ ɔ?
15. Kyɛbɔ Edwein 94:19 kã ne, nzu yeɛ Yehowa ahyɛ yɛ bɔ kyɛ ɔkɔyɛ kɔma yɛ ɔ?
15 Bɔ Yehowa yɛ faboka yɛ ɔ. Sɛ ɔhaw bie to yɛ a, Yehowa kyekye yɛ wora, na ɔka yɛ ahõne to yɛ kunu. (Kenga Edwein 94:19.) Edwirɛ bɔ ɔwɔ sɔ tworɔnzɛm nanu ne, yɛkɔhora yɛkɔfa yɛkɔtoto abayaa bie bɔ ɔnate agralaa bɔ ɔbobɔ nu nati, esuronyi ahã ye, na ɔngora da nanwo. Nakoso, sɛ ye baba kɔ yenwo, na ɔfa ye ta ye hue so, na ɔkã ye ahõne to ye kunu a, nea kyɛbɔ akwalaa ne kosi kɔla ɔ. Ɔwɔ nu kyɛ agralaa ne ogu so ɔbobɔ nu de, nakoso ɔnate kyɛ ɔla ye baba hue so nati, ye kunu ngɔtete ye kõ. Yɛ koso sɛ ɔhaw bie bɔ yɛfa nu nati, wamaa esuronyi ahã yɛ a, odikyɛ yenya gyidie kyɛ yɛ Baba bɔ ɔwɔ anwuro ne kɔkyekye yɛ wora, kyɛbɔ ɔkɔyɛ a, esuronyi bɔ wahã yɛ ne kofi berɛ ɔ. Yede sɛ yɛkɔhora yekonya sɔ awerɛkyekyerɛ bɔ ofi Yehowa berɛ ne a, nzu yeɛ odikyɛ yɛyɛ ɔ?
Sɛ ɛkenga Bible ne a, wɔ Baba bɔ ɔwɔ anwuro ne nate so kɔkyekye wɔ wora (Nea ngyekyɛmuɛ 15-16)
16. Nzu yeɛ odikyɛ yɛyɛ na wamaa yanya awerɛkyekyerɛ yafi Yehowa berɛ ɔ? (Nea foto ne koso.)
16 Bɔ odikyɛ yɛyɛ ɔ. Bɔ mmɔden kyɛ ɛkɔbɔ Yehowa mbaeɛ, na kenga Bible ne kyẽa biala. (Edw. 77:1, 12-14) Sɛ ɛmaa ɔyɛ wɔ subaen kyɛ ɛkɔyɛ sɔ nningyein nemɔ a, ɔkɔmaa sɛ ɔhaw bie to wɔ a, ndeɛn nala ɛkɔbɔ Yehowa mbaeɛ maa ɔkɔboka wɔ. Kã bɔ wamaa esuronyi ahã wɔ, ɔne ɔhaw bɔ ɛfa nu ne mukoraati nwo dwirɛ kyire Yehowa, mmerɛ bɔ ɛbɔ mbaeɛ ne. Ɛhẽne sĩ ne, bɔ mmɔden kenga Bible ne, na Yehowa koso nate so kɔkyekye wɔ wora. (Edw. 119:28) Tworɔnzɛm biemɔ wɔ berɛ a, sɛ esuronyi kã wɔ na ɛkenga a, ɔkɔhora kɔhyɛ wɔ ngunaen maa w’ahõne kɔtɔ wɔ kunu. Enu bie yeɛ ole Yob, Edwein, ɔne Anyandera nwomaa ne. Ɛkɔhora koso konwu bie wɔ Yesu dwirɛ bɔ ɔhãne ye wɔ Mateo yeti 6 nanu. Sɛ ɛbɔ Yehowa mbaeɛ, na ɛyere wɔnwo kenga Bible ne daa a, Yehowa koso nate so kɔkyekye wɔ wora.
17. Nzuati yeɛ odikyɛ yɛkɔ so yenya gyidie wɔ Yehowa nu ɔ?
17 Odikyɛ yenya gyidie kyɛ ɔhaw biala bɔ ɔkɔto yɛ ne, Yehowa kɔboka yɛ maa yekogyina yenoa, na ɔngɔyakyi yɛnu llé. (Edw. 23:4; 94:14) Yehowa ahyɛ bɔ kyɛ ɔkɔbɔ yɛnwo waen, ɔkɔma yɛ anwoserɛ, ɔkɔboka yɛ, ná wakyekye yɛ wora mmerɛ bɔ yɛfa ɔhaw nu ɔ. Yesaya 26:3 kã Yehowa nwo dwirɛ kyɛ: “Na sona bɔ ye adwene atindim wɔ wɔ nu ne, ɛbɔ ye nwo waen wɔ asomdwee bɔ odi mu ɔ nu, ofikyɛ ɔfa ye wora wura wɔ nu.” Yeti fa wɔnwo to Yehowa so, na mmokalɛ bɔ ɔkɔfa kɔma wɔ ne koso, bɔ mmɔden dé to nu. Sɛ ɛyɛ sɔ a, ekonya anwoserɛ kɔfa kogyina ɔhaw bɔ enu yɛ se biala bɔ ɔkɔto wɔ ne noa.
SƐƐ YƐƐ ƐKƆYE EDWIRƐ HEMƆ NOA Ɔ?
-
Mmerɛ beni yeɛ yehia Yehowa mmokalɛ paa ɔ?
-
Sɛ ɔhaw bie to yɛ a, nningyein 4 beni yeɛ Yehowa yɛ faboka yɛ ɔ?
-
Nzu yeɛ odikyɛ yɛyɛ na wamaa Yehowa ahora aboka yɛ ɔ?
DWEIN 12 Otumfoɔ, Yehowa Nyankopɔn
a Dumaa ne bie wɔ berɛ a, basesã ye.