Ɛse Nikyeebie?
Teaseɛnam beni yeɛ né Yitiopianiɛ sayɛɛ ne te nu, mmerɛ bɔ Filipo hɔle yenwo berɛ ne?
EDWIRƐ “teaseɛnam” bɔ ɔwɔ Bible nanu ne, ɔkora gyina berɛ ma teaseɛnam pẽe bɔ né ɔwɔ berɛ sɔ mmerɛ nanu kõ. (Aso. 8:28, 29, 38) Nakoso bɔ ɔte yeɛ ole kyɛ, teaseɛnam bɔ né Yitiopianiɛ ne te nu ne, né ɔte piri koraa tra teaseɛnam bɔ né bɛfa bɛkɔ kõɛ, ɔne bɔ né bɛfa betu amirika wɔ angorɛlilɛ nu ne. Ɛmɔma yɛnea bɔ yeti yeɛ yɛkã sɔ ɔ.
Né Yitiopianiɛ ne te sayɛɛ titire bɔ né wapɛ kwanzii tendenn paa wɔ ye akwanduo nanu ɔ. Né “ɔte Yitiopianiɛ hemmaa Kandake ye sayɛɛ titire bɔ ɔnea ye fotoɛ amukoraa so ɔ.” (Aso. 8:27) Nekaa bɔ ɛnnɛ Sudan maen ne wɔ, ɔne Egypt maen ne ngwaen dɔ mukoraati, né ɔboka tete Yitiopia maen naso. Ɔkɔhora kɔwa kyɛ nná teaseɛnam kõmapɛ yeɛ bĩaa ne fatuli atẽe ne ɔ. Bɔ yeti yeɛ ɔte sɔ yeɛ ole kyɛ, né okohia teaseɛnam foforɛ bɔ ɔkɔfa ye nningyein kogua nu ɔ. Teaseɛnam bɔ né bɛfa betu atẽe tete ne, né ebiemɔ le kɔba 4, na né bɛkora bɛfa nikyee bɛkata nekaa bɔ mmenia tena ne anwuro. Nwomaa bie hãne kyɛ: “Ɔnate atẽe bɔ né bɛfa so bɛyɛ teaseɛnam nemɔ ne ati, sɛ ebie fa tu atẽe a, né yenwo ngyere ye. Yesɔ ne ati, né bɛkora bɛfa bɛpɛ atẽe bɔ ɔwale paa ɔ.”
Né Yitiopianiɛ ne kenga nikye mmerɛ Filipo hɔle yenwo berɛ ne. Tworɔnzɛm ne kã kyɛ: “Yiti Filipo tuli amirika hɔle ye nwo berɛ, ɔtele kyɛ ɔ́kenga ngɔmhyɛlɛniɛ Yesaya nwomaa ne.” (Aso. 8:30) Teaseɛnam bɔ né bɛfa betu atẽe sɔ mmerɛ ne, ne ɔngora ndu amirika pẽe. Yeti né Yitiopianiɛ ne kɔhora kɔkenga nikye mmerɛ bɔ ne otu atẽe ne, na ɛhẽne ati yeɛ Filipo hora tuli amirika ɔɔtole ye ne.
Yitiopianiɛ ne “srɛle Filipo kyɛ ɔɔfo tena ye teaseɛnam ne anu bie.” (Aso. 8:31) Teaseɛnam bɔ ne bɛfa betu amirika wɔ angorɛlilɛ nu ne, né sona bɔ ɔkã teaseɛnam ne dwɔso gyina nu bɔ ɔndena ase ɔ. Nakoso Yitiopianiɛ ne deɛ ne de, ɔnate kyɛ né ɔte bɔ bɛfa betu atẽe ne ati, né Filipo kɔhora konya nekaa kɔtena.
Ɔnate edwirɛ bɔ ɔwɔ Asomafoɛ yeti 8, ɔne abakɔsɛm bɔ ɔfoa sɔ dwirɛ he aso ne ati, foto bɔ yɛyɛ ye ɛlɛsaen wɔ yɛ nwomaa ahoroɛ nu bɔ ɔfa Yitiopianiɛ sayɛɛ nanwo ne, ɛyɛ a, yɛyɛ teaseɛnam bɔ né ɔte nu ne pirikua yɛtra bɔ né bɛfa bɛkɔ kõɛ, ɔne bɔ né bɛfa betu amirika wɔ angorɛlilɛ nu tete ne.
