1. Ɔhaw bɔ bɛbɔ bɛso Yehowa ne fa nu ne mukoraati si ne, nzu yeɛ ɔboka bɛ maa bɛkɔso bɛso ye ɔ?

 MMERƐ bɔ yɛwɔ nu ne, Bible ne kã yenwo dwirɛ kyɛ ɔte “mmerɛ bɔ nu yɛ se ɔ.” (2 Tim. 3:1) Sɛ ɔhaw bɔ ebiala fa nu wɔ Satan wiase he anu ne la ahameɛ a, mmenia sa tane yɛnye paa, ɔnate Yehowa bɔ yɛso ye nati. Sɔ haw hemɔ mukoraati si ne, nzu yeɛ ɔboka yɛ maa yɛkɔso yɛso Yehowa ɔ? Nikyee ko bɔ ɔboka yɛ paa yeɛ ole kyɛ, yaanwu ye kyɛ Yehowa te “Nyameɛ teasefoɛ.”—Yer. 10:10; 2 Tim. 1:12.

2. Nzu yeɛ ɔmaa yenwu ye kyɛ Yehowa te Nyameɛ teasefoɛ ɔ?

² Yehowa te ebie bɔ ɔwɔ berɛ paa ɔ. Ɛhene ati, ɔhaw biala bɔ yɛfa nu ne, onwu ye, na ɔpena kyɛ ɔboka yɛ mmerɛ biala. (2 Abe. 16:9; Edw. 23:4) Sɛ yenwu ye kyɛ Yehowa te Nyameɛ teasefoɛ a, ɛhene kɔboka yɛ maa yɛkɔhora yekogyina ɔhaw biala bɔ ɔkɔto yɛ ne noa. Ɛmɔma yɛnea kyɛbɔ Ɔhene Dawide nwuni kyɛ sɔ dwirɛ ne te nahorɛ ɔ.

3. Mmerɛ bɔ Dawide hane kyɛ “AWURADE te ase ne,” nzu yeɛ né ɔpena kyire ɔ?

³ Né Dawide se kyɛbɔ Yehowa si te ɔ, yeti ɔfale yenwo tole ye so. Mmerɛ bɔ né ye pɔfoɛmɔ bɔ Ɔhene Sɔɔlo boka so, bɛpena ye beku ye ne, ɔbɔle Yehowa mbaeɛ kyɛ ɔboka ye. (Edw. 18:6) Nyameɛ tiele Dawide mbaeɛ ne, na ɔpepɛ lele ye. Ɛhene ati ɔhane kyɛ: “AWURADE te ase!” (Edw. 18:46) Sɔ dwirɛ bɔ Dawide hane ne, né ongyire kyɛ Yehowa wɔ berɛ mbaen.  Nwomaa bie hane kyɛ, bɔ né Dawide pena kyire yeɛ ole kyɛ Yehowa te “Nyameɛ teasefoɛ bɔ ɔpepɛ de ye mmenia mmerɛ biala ɔ.” Bɔ ɔhɔle so wɔ Dawide asetena nu ne maa onwuni kyɛ ye Nyameɛ ne te ase. Ɛhene bokale ye maa osili ye hue kyɛ ɔkɔso Yehowa, na waye ye ayɛ.—Edw. 18:​28, 29, 49.

4. Sɛ yenwu ye kyɛ Yehowa te Nyameɛ teasefoɛ a, sɛɛ yeɛ ɔkɔboka yɛ ɔ?

⁴ Sɛ yede yedi paa kyɛ Yehowa te Nyameɛ teasefoɛ a, ɔkɔboka yɛ maa yɛkɔyere yɛnwo yɛkɔso ye. Afei koso, ɔkɔmaa yekonya anwoserɛ yɛkɔfa yekogyina ɔhaw biala bɔ ɔkɔto yɛ ne noa, na yɛkɔhɔso yɛkɔyɛ adwuma serɛ wɔ ye soen nu. Okosa kɔboka yɛ maa yɛkɔhɔso yekopingye Yehowa.

NYAMEƐ TEASEFOƐ NE KƆMA WƆ ANWOSERƐ

5. Sɛ ɔhaw bie to yɛ a, nzu yeɛ ɔkɔboka yɛ maa yɛkɔhora yekogyina yenoa ɔ? (Filipifoɛ 2:13)

⁵ Sɛ yɛkae kyɛ Yehowa te ase na ɔkɔboka yɛ mmerɛ biala a, ɔkɔmaa yɛkɔhora yekogyina ɔhaw biala noa, ɔmva yenwo kyɛ ɔte piri anaa ɔte kaa ne. Yɛ Nyameɛ ne de, ole tumi wɔ nikyee biala so, na ɔhaw biala nne berɛ bɔ ɔbo ye anwoserɛ so ɔ. Yeti ɔkɔma yɛ anwoserɛ bɔ yɛkɔfa yekogyina ɔhaw biala noa ɔ. (Kenga Filipifoɛ 2:13.) Ɛhene ati, ɔhaw biala bɔ ɔkɔto yɛ ne, yele gyidie kyɛ yɛkɔhora yekogyina yenoa. Sɛ ɔhaw bɔ ɔte kaa bie to yɛ na yenwu kyɛbɔ Yehowa aboka yɛ a, ɔkɔmaa yekonya gyidie kyɛ sɛ ɔhaw bɔ ɔte piri to yɛ a, ɔkɔboka yɛ.

6. Mmerɛ bɔ né Dawide te abɛmaa ne, edwirɛ beni yeɛ osili bɔ ɔmaa onyane gyidie bɔ nu yɛ se wɔ Yehowa nu ɔ?

⁶ Ɛmɔma yɛnea edwirɛ nyɔ biemɔ bɔ ɔtole Dawide, bɔ ɔmaa onyane gyidie bɔ nu yɛ se wɔ Yehowa nu ɔ. Mmerɛ bɔ né ɔte abɛmaa bɔ né ɔnea ye baba mmoaen so ne, sisire kwabrafo ne gyata bɛɛhyele mmoaen ne bie. Ɔnate akokoduro bɔ né ole ye nati, ɔfoane bɛ oolele boaen ne. Dawide anga ye lle kyɛ ye bɔbɔ ye anwoserɛ yeɛ ɔfa yɛle sɔ ɔ, ofikyɛ né ɔse kyɛ Yehowa yeɛ ɔbokale ye ɔ. (1 Sam. 17:​34-37) Wamma ye wora amvi sɔ dwirɛ ne lle, na mmom né ɔdwenedwene yenwo. Ɛhene maa onyane gyidie kyɛ Nyameɛ teasefoɛ ne kɔma ye anwoserɛ kyeabie.

7. Nzu yeɛ Dawide fale ye adwene siele so ɔ, na sɛɛ yeɛ ɛhene bokale ye maa ɔne Goliate fasiele yenye ɔ?

⁷ Nziɛen, Dawide hɔle Yisrael sogyafoɛ nemɔ asikyeleɛ berɛ. Sɔ mmerɛ ne, ɔkɔyɛ kyɛ né onya lili afoɛ 20 po. Mmerɛ bɔ odwuli berɛ ne, onwuni kyɛ esuronyi aha bɛ paa, ofikyɛ né Filistiniɛ bie bɔ bɛfrɛ ye Goliate ka kyɛ sɛ ‘bɛte mmienzua a, bɛye sona ko na ɔne ye bɛho.’ (1 Sam. 17:​10, 11) Bɔ ɔmaa esuronyi hane sogyafoɛ nemɔ yeɛ ole kyɛ, bɛfale b’adwene besiele kyɛbɔ né Goliate si te kwabii, ɔne alapaa bɔ né ohu bɛ naso. (1 Sam. 17:​24, 25) Dawide de, nna ɛberɛ po yeɛ né ɔnea ɔ. Né ɔse kyɛ bɔ né Goliate yɛ ne, ‘Nyameɛ teasefoɛ ne yeɛ ɔpɛ ye poa,’ anaa ɔbɔ ye alapaa ɔ. (1 Sam. 17:26) Yeti Yehowa yeɛ ɔfale ye adwene siele ye so ɔ. Né Dawide le gyidie kyɛ, Nyameɛ bɔ ɔbokale ye mmerɛ bɔ né ɔnea mmoaen so ne, sɔ mmerɛ he koso ɔkɔboka ye. Ɛhene ati, ɔne Goliate fasiele ye nye, na amba-ne-amba olili ye so ngunim.—1 Sam. 17:​45-51.

8. Sɛ yɛfa ɔhaw bie nu a, gyidie bɔ yele ye kyɛ Yehowa kɔboka yɛ ne, yɛkɔyɛ sɛɛ né yamaa nu ayɛ se? (Nea foto ne koso.)

⁸ Sɛ yɛkae kyɛ Nyameɛ teasefoɛ ne gyi yesi na ɔkɔboka yɛ a, ɛhene kɔmaa yɛkɔhora yekogyina ɔhaw biala bɔ ɔkɔto yɛ ne noa. (Edw. 118:6) Bɔ Yehowa yɛle ye tete ne, sɛ yesusu yenwo a, ɔkɔmaa yekonya yenu gyidie bɔ nu yɛ se ɔ. Yeti ɛyɛ a kenga kyɛbɔ Yehowa pepɛ lele ye mmenia, bɔ yenwo dwirɛ wɔ Bible  nanu ne. (Yes. 37:​17, 33-37) Afei koso, kyɛbɔ Yehowa boka yeliemamɔ bɔ yenwo dwirɛ wɔ jw.org so ne, ɛkɔhora kɔkenga anaa ɛkɔnea yenwo vidio ne bie. Wɔ bɔbɔ koso, bɔ Yehowa ayɛ ama wɔ mmerɛ bie ne, ɛyɛ a dwenedwene yenwo. Ebia wɔ de, ɔhaw pirikua bie tolle wɔ maa ɔyɛlle tekyɛ ɛne sisire kwabrafo anaa gyata yeɛ bɛko ɔ. Nakoso, kyɛbɔ ɔte biala kae kyɛ Yehowa ayɛ bie ama wɔ paa. Nzuati ɔ? Ofikyɛ wahwe wɔ wawa asafo nanu maa ayɛ ye damvo. (Yoh. 6:44) Afei koso, ye yeɛ waboka wɔ maa etɛ so ye ɔ. Yeti ɛyɛ a, srɛ Yehowa kyɛ ɔboka wɔ ma ɛkae mmerɛ bie bɔ otiele wɔ mbaeɛ, kyɛbɔ ɔmaa wɔsa hane nikyeebie wɔ mmerɛ pɔtee bie nu, ɔne kyɛbɔ ɔbokale wɔ maa egyinane ɔhaw bie noa ɔ. Sɛ ɛyɛ sɔ a, ɔkɔmaa ɛkɔhɔso konya gyidie kyɛ Yehowa kogyina wɔ si.

9. Sɛ ɔhaw bie to yɛ a, nzu yeɛ odikyɛ yɛkae ɔ? (Anyandera 27:11)

⁹ Sɛ yenwu ye kyɛ Yehowa te ebie bɔ ɔwɔ berɛ paa a, ɔkɔmaa ɔhaw bie to yɛ a y’abanu ngobu, na mmom yɛkɔfa y’adwene yekosie edwirɛ bɔ yenwo hia paa naso. Yeɛ ole kyɛ Satan nwa sɛ ɔhaw bie to yɛ a, yɛngɔso Yehowa ko. (Yob 1:​10, 11; kenga Anyandera 27:11.) Yeti sɛ yɛkora yegyina ɔhaw bie noa a, ɔmaa Yehowa nwu ye kyɛ yɛdɔ ye, na yɛmaa Satan bayɛ ngondomboniɛ. Aso awaen ne tane Yehowa Adanzefoɛ nye wɔ nekaa bɔ ɛwɔ ne, wɔ sikasɛm ayɛ basaa, ɛkã nzɛmba ne a, mmenia ndie, anaa ɛfa ɔhaw foforɛ nu hɔ ɔ? Sɛ sɔ a, yede kae kyɛ sɛ ɛkora gyina yenoa a, ɛkɔmaa Yehowa nye kɔgye. Afei kae kyɛ Yehowa ngɔma nzɔhwɛ bɔ ɔbo wɔ anwoserɛ so ngɔto wɔ. (1 Kor. 10:13) Ɔkɔma wɔ anwoserɛ bɔ ɛkɔfa kogyina yenoa ɔ.

NYAMEƐ TEASEFOƐ NE KOYIRA WƆ

10. Nzu yeɛ Nyameɛ teasefoɛ ne kɔyɛ kɔma bɛbɔ bɛso ye ne?

¹⁰ Yehowa yira bɛbɔ bɛso ye ne. (Heb. 11:6) Sɔ mmerɛ he po, ɔmaa yenya asomdwee, na yɛnye gye. Afei ɔkɔmaa yɛ daa ngoa kyeabie.  Yede yedi paa kyɛ Yehowa nye gye yenwo kyɛ okoyira yɛ, na ole tumi bɔ ɔkɔfa kɔyɛ sɔ ɔ. Ɔnate ɛhene ati, yɛyere yɛnwo yɛso ye kyɛbɔ yeɛ tete ne, bɛbɔ né bedi nahorɛ bɛma ye ne yɛle ne. Benu ko yeɛ ole Timoteo.—Heb. 6:​10-12.

11. Nzu yeɛ ɔmaa Timoteo yerele yenwo yɛle adwuma serɛ wɔ asafo nanu ɔ? (1 Timoteo 4:10)

¹¹ Kenga 1 Timoteo 4:10. Timoteo fale yenye tole Nyameɛ teasefoɛ naso. Yesɔ nati, ɔyerele yenwo yɛle adwuma serɛ wɔ asafo nanu. Atee beni aso? Somafoɛ Pɔɔlo hyɛle ye ngunaen kyɛ ɔyere yenwo kyɛ okohyirehyire yé wɔ asɛnga nu, ne asafo nanu. Afei koso, né odikyɛ ɔbɔ bra pá kyɛbɔ ɔkɔyɛ a, mbanyi ne ngwalaa mukoraati kɔhora kosuesua ye ɔ. Pɔɔlo sa fale adwuma serɛ bie wurale ye sa. Yeɛ ole kyɛ ɔfa yegya sie ase, na otu aliemaamɔ foɛ, nakoso ɔyɛ ye wɔ ɔdɔ nu. (1 Tim. 4:​11-16; 2 Tim. 4:​1-5) Né Timoteo le gyidie kyɛ sɛ mmenia nnwu adwuma bɔ ɔyɛ ne po a, Yehowa de onwu ye, yeti okoyira ye.—Rom. 2:​6, 7.

12. Nzu yeɛ ɔkɔboka asafo nu mbanyi nemɔ maa bɛkɔyɛ adwuma bɔ owura bɛsa ne? (Nea foto ne koso.)

¹² Ɛnnɛ koso, asafo nu mbanyi nemɔ kɔhora konya gyidie kyɛ Yehowa nwu adwuma pá bɔ bɛyɛ ne, na yenye sɔ. Mbanyi nemɔ srɛsra aliemaamɔ, bekyirekyire wɔ asafo nanu, na bɛyɛ asɛnga adwuma ne. Nakoso nna ɛhene ngome, benu pee boka maa besisi asafo sua ahoroɛ, na atorɛngyɛm bie si koso a, betu bɛnwo bɛma. Benu biemɔ koso boka bɛbɔ bɛkɔnea aliemaamɔ boso wɔ hɔspitel, ɔne Dɔktafoɛ Ne Ayarefoɛ Afia Ngitahodie Kɔmatii naso. Sɔ mbanyi nemɔ nwu ye kyɛ asafo ne te Yehowa deɛ, na ɔtte sona deɛ. Yesɔ nati, befi b’ahone mukoraati nu bɛyɛ adwuma serɛ bɛfa bɛboka asafo ne, ofikyɛ bele gyidie kyɛ, Yehowa kɔma bɛ akatuaa.—Kol. 3:​23, 24.

13. Bɔ yɛkora yɛyɛ ye wɔ asafo nanu ne, sɛɛ yeɛ Yehowa nwu ye ɔ?

¹³ Nna ebiala yeɛ ɔkɔhora kɔɔyɛ asafo nu  panyi ɔ. Nakoso yɛ mukoraati yɛkɔhora yɛkɔyɛ nikyeebie yɛkɔma Yehowa. Sɛ yefi y’ahone mukoraati nu yɛso ye a, yenye sɔ. Ndoboa bɔ yɛye yɛfa yɛboka ewiase mukoraati adwuma ne, sɛ ɔte kaa po a, onwu ye. Ebia né yɛfɛle nikye, nakoso sɛ yɛkɔ asafo nhyiamu na yemia yɛnye yɛma mmuayɛɛ a, ɔmaa yenye gye. Afei koso, sɛ yebu yɛnye yegua yeliemamɔ mvomsoɛ so, na yɛfa yɛkyɛ bɛ a, ɔmaa yenye gye paa. Sɛ ɛngora nyɛ pee wɔ asafo nanu kyɛbɔ ahaa ekuro a, nya gyidie kyɛ Yehowa de yenye sɔ bɔ ɛyɛ ne, yeti okoyira wɔ.—Luka 21:​1-4.

KƆSO PINGYE NYAMEƐ TEASEFOƐ NE

14. Sɛ yepingye Yehowa paa a, sɛɛ yeɛ ɔkɔmaa yekoli nahorɛ yɛkɔma ye ɔ? (Nea foto ne koso.)

¹⁴ Sɛ yenwu Yehowa kyɛ ɔte ebie bɔ ɔwɔ berɛ paa a, ɔngɔyɛ se ngɔma yɛ kyɛ yekoli nahorɛ yɛkɔma ye ɔ. Sɔ yeɛ Yosef yɛle ɔ. Ɔnate kyɛ né ɔse kyɛ bɔ ɔyɛ biala Nyameɛ nwu ye nati, né ɔmbena kyɛ ɔyɛ nikyee biala bɔ yenye ngye yenwo ɔ.(Gye. 39:9) Sɛ yekonwu Yehowa kyɛ ɔte ebie bɔ ɔwɔ berɛ paa a, sana yɛbɔ mbaeɛ na yesua Bible ne daa. Sɛ yɛyɛ sɔ a, ɔkɔmaa yekopingye ye paa. Yeti kyɛbɔ Yosef yɛle ne, yɛkoso sɛ Yehowa te yɛ damvo paa a, yɛngɔyɛ nikyee biala bɔ onguro ɔ.—Yak. 4:8.

15. Bɔ Yisraelfoɛ nemɔ yɛle mmerɛ bɔ né bɛwɔ ɛserɛ naso ne, nzu yeɛ yɛkɔhora yekosua yekofi nu ɔ? (Hebrifoɛ 3:12)

¹⁵ Bɛbɔ bemmu Yehowa kyɛ ɔte Nyameɛ teasefoɛ ne, ɔnyɛ se koraa kyɛ bɛkɔhwe bɛnwo bekofi yenwo ɔ. Mmerɛ bɔ né Yisraelfoɛ nemɔ wɔ ɛserɛ naso ne, ɛmɔma yɛnea bɔ ɔtole bɛ ɔ. Né bɛse kyɛ Yehowa wɔ berɛ, nakoso né benne benni kyɛ ɔkɔmaa bɛsa kɔha bɔ behia ɔ. Odwuli nekaa bie po ne, bebisale kyɛ: “Aso AWURADE wɔ yɛ nu wa, anaakyɛ ɔnne yɛ nu wa?” (Ɛks. 17:​2, 7) Ɛhene ati, bɛyɛle Nyameɛ so asoserɛ. Bɔ bɛyele ne te kɔkɔbɔ ma yɛ, yeti odikyɛ yɛnea yé né yanzuesua bɔ bɛyɛle ne.—Kenga Hebrifoɛ 3:12.

16. Nzu yeɛ ɔkɔmaa yɛ gyidie kɔhora kɔhɔ ase ɔ?

 ¹⁶ Nningyein bɔ ɔ́kɔso wɔ ewiase he anu ne, ɔmaa ɔyɛ se kyɛ yekopingye Yehowa ɔ. Mmeni pee kã kyɛ Nyameɛ nne berɛ. Afei, yɛtaa yenwu kyɛ, bɛbɔ bɛmva Nyameɛ mmraa bɛnyɛ hwee ne, wasi bɛ yé. Sɛ yenwu ye sɔ a, yɛ gyidie kɔhora kɔhɔ ase. Ebia yɛngɔha kyɛ Nyameɛ nne berɛ, nakoso yɛkɔhora yekonya adwene kyɛ ɔngɔhora ngɔboka yɛ. Bɔ ɔhworɔle Edwein 73 ne koso, onyane sɔ adwene ne bie. Onwuni kyɛ bɛbɔ bɛmva Nyameɛ mmraa bɛnyɛ hwee ne, wasi bɛ yé, na bɛnwo atɔ bɛ. Ɛhene ati, ɔhyɛle yebo nyane adwene kyɛ mvasoɛ nne so kyɛ ebie kɔso Nyameɛ ɔ.—Edw. 73:​11-13.

17. Nzu yeɛ ɔkɔboka yɛ maa yɛkɔhɔ so yekopingye Yehowa ɔ?

¹⁷ Yede, nzu yeɛ ɔbokale edweintolɛniɛ ne maa ɔsesane ye adwene ɔ? Ɔfale ye adwene hɔle bɔ ɔkɔto bɛbɔ bɛnzo Yehowa naso. (Edw. 73:​18, 19, 27) Afei koso, mvasoɛ bɔ ɔwɔ so kyɛ ebie kɔso Nyameɛ ne, osusuli yenwo. (Edw. 73:24) Yɛkoso, yɛkɔhora yɛkɔdwenedwene nhyiraa bɔ Yehowa afa ama yɛ nanwo. Wɔde susu yenwo nea oo, sɛ nna Yehowa bɔ yɛso ye a, ahaa y’abrabɔ te sɛɛ? Sɛ yɛdwene ɛhe anwo a, ɔkɔmaa yɛkɔhɔ so yekoli nahorɛ yɛkɔma Yehowa, na kyɛbɔ edweintolɛniɛ ne hane ne, yɛkoso yɛkɔha kyɛ: “Nakoso me de, ɔte paa ma me kyɛ ngopingye Nyameɛ ɔ.”—Edw. 73:28.

18. Nzuati yeɛ ɔnzɛkyɛ yesuro bɔ okosi kyeabie ɔ?

¹⁸ Ɔnate kyɛ yɛse kyɛ ‘yɛso Nyameɛ teasefoɛ ne nahorɛniɛ’ nati, yele gyidie kyɛ ɔhaw biala bɔ ɔkɔto yɛ wɔ ayieleɛ mmerɛ he anu ne, yɛkɔhora yekogyina ye noa. (1 Tɛs. 1:9) Yɛ Nyameɛ bɔ yɛso ye ne, ɔwɔ berɛ paa, yeti ɔkɔboka yɛ mmerɛ biala. Ɔbokale bɛbɔ né bɛso ye tete ne, na ɛnnɛ koso ɔkɔboka yɛ. Ɔngɔhyɛ amaneɛnwunɛ piri ne kɔye ye ti, nakoso esuronyi ngɔha yɛ, ofikyɛ yɛse kyɛ Yehowa boka yɛ so. (Yes. 41:10) Yeti ɛmɔma ‘yɛsi y’ahone yɛhã kyɛ, “Awurade te me bokafoɛ, mengosuro nikye fee.’”—Heb. 13:​5, 6.