Edwirɛ Bɔ Ebiemɔ Bisa Ɔ
Edwirɛ bɔ ɔwɔ Edwein 12:7 bɔ ɔkã kyɛ ‘Ɛkɔnea bɛ so’ ne, aso ogyi berɛ ma “sona bɔ olle bie” ɔwɔ ngyekyɛmuɛ 5 nanu ne, anaa ɔte “AWURADE bɔhyɛ,” kyɛbɔ ngyekyɛmuɛ 6 ne kã ne?
Edwirɛ bɔ ɔwɔ sɔ dwein nanu ne, ɔmaa yenwu kyɛ mmenia nwo dwirɛ yeɛ né ɔkã ɔ.
Edwein 12:1-4 ne maa yenwu ye kyɛ “nahorɛlilɛfoɛ, bɛ boso anunu afi adasa mmaa nu.” Afei ɛmɔma yɛnea edwirɛ bɔ ɔwɔ Edwein 12:5-7 ne. Ɔkã kyɛ:
‘AWURADE nwa nyoo, “Ɔnate kyɛ sona bɔ olle bie ne, bɛhyɛ ye,
ná bɛma sona bɔ ɔyɛ anwumvo ne odi aworabɔlɛ ne ati,
ngɔkekã me nwo.
Ye nwo waenbɔlɛ bɔ yeɛ ɔpena ne, ngɔfa ngɔma ye.”
AWURADE bɔhyɛ te bɔhyɛ bɔ ye nwo te ɔ,
Ɔte kyɛ ɛdwetɛ bɔ bapɔ ye nwo wɔ ɛfaa afaa nu ɔ, bɔ bapɔ ye nwo pɛen nzoo ɔ.
Ao AWURADE, ɛkɔnea bɛ so;
Ɛkɔbɔ bɛ nwo waen kofi sɔ aworɛ ndoatoasoɛ he anu afebɔɔ.’
“Sona bɔ olle bie ne,” ngyekyɛmuɛ 5 ne kã bɔ Yehowa kɔyɛ kɔma ye nanwo dwirɛ. Yeɛ ole kyɛ, ɔkɔbɔ yenwo waen.
Ngyekyɛmuɛ 6 ne fa bokale so kyɛ, “AWURADE bɔhyɛ” anaa ye dwirɛ ne, ‘ye nwo te, ɔte kyɛ ɛdwetɛ bɔ bapɔ ye nwo ɔ.’ Kristofoɛ mukoraati de sɔ dwirɛ he tonu.—Edw. 18:30; 119:140.
Afei ɛmɔma yɛnea Edwein 12:7 ne. Ɔkã kyɛ: ‘Ao AWURADE, ɛkɔnea bɛ so; ɛkɔbɔ bɛ nwo waen fi sɔ aworɛ ndoatoasoɛ he anu afebɔɔ.’ Edwirɛ ‘bɛ,’ bɔ ɔfa yɛle adwuma wɔ wa ne, ogyi berɛ ma nzu?
Ngyekyɛmuɛ 7 ne toa ngyekyɛmuɛ 6 bɔ ɔkã “AWURADE bɔhyɛ” nwo dwirɛ naso. Ɛhene ati, ebia ebiemɔ konya adwene kyɛ, edwirɛ ‘bɛ’ ne gyi berɛ ma Nyameɛ dwirɛ ne. Nakoso, Bible ne de, yɛse kyɛ Nyameɛ ahɔso abɔ yenwo waen wafi bɛbɔ bɛpena kyɛ bɛsɛkye ye ne sanu waadwu ɛnnɛ.—Yes. 40:8; 1 Pet. 1:25.
Osa te nahorɛ kyɛ “sona bɔ olle bie,” ɔne “sona bɔ ɔyɛ anwumvo” bɔ bɛnwo dwirɛ wɔ ngyekyɛmuɛ 5 ne, Yehowa bɔ bɛnwo waen, na ɔkɔhɔso kɔyɛ sɔ.—Yob 36:15; Edw. 6:4; 31:1, 2; 54:7; 145:20.
Yede, edwirɛ ‘bɛ,’ bɔ ɔwɔ ngyekyɛmuɛ 7 nanu ne, ogyi berɛ ma nzu?
Sɛ yesusu edwirɛ bɔ ɔwɔ sɔ dwein nanu nanwo a, yenwu ye kyɛ ‘bɛ’ ne, ogyi berɛ ma mmenia.
Edwein 12 ne ahyɛaseɛ ne, Dawide hane nahorɛlilɛfoɛ bɔ abɔnefoɛ pɛ ngondombo kyire bɛ nanwo dwirɛ. Afei ɔhane kyɛ Yehowa kɔkekã yenwo, na watua bɛbɔ bɛyɛ sɔ naso kerɛ. Edwirɛ bɔ ɔwɔ sɔ dwein nanu ne maa yenya gyidie kyɛ, Nyameɛ kɔboka bɛbɔ bɛso ne, ofikyɛ ye bɔbɔ yeɛ wahyɛ bɔ kyɛ ɔkɔyɛ sɔ ɔ.
Yeti edwirɛ ‘bɛ,’ bɔ ɔwɔ ngyekyɛmuɛ 7 nanu ne, okyire kyɛ bɛbɔ belle bie ne, Yehowa kɔnea bɛso, na wale bɛ wafi abɔnefoɛ sa nu.
Edwirɛ ‘bɛ,’ bɔ ɔwɔ sɔ ngyekyɛmuɛ he anu ne, ofite Hebri Tworɔnzɛm bɔ bɛneane so bɛhworɔle bie, bɔ mmeni pee de to nu bɔ bɛfrɛ Hebrew Masoretic text nanu. Wɔ Greek Septuagint nanu ne, bɛfale edwirɛ “yɛ,” bɔ ogyi berɛ ma nahorɛlilɛfoɛ bɔ belle bie, ná bɛ dwirɛ yɛ anwumvo ne yɛle adwuma pɛen nyɔ wɔ ngyekyɛmuɛ 7 nanu. Ngyekyɛmuɛ 7 ne ayieleɛ ne kã kyɛ nahorɛlilɛfoɛ ne, ɔkɔbɔ “bɛ nwo” waen kofi “sɔ aworɛ ndoatoasoɛ” bɔ bɛsosɔ bɔne so ne sa nu. (Edw. 12:7, 8) Hebri tworɔnzɛm bɔ behyirele yebo bɛhɔle Aramaeke dwudwolɛ nu ne koso, bɛfale edwirɛ “bɛ” bɛyɛle adwuma wɔ ngyekyɛmuɛ 7 ne ahyɛaseɛ ne. Ɔkã kyɛ: “AO AWURADE, ɛkɔbɔ bɛbɔ bedi nahorɛ nanwo waen, ekole bɛ kofi sɔ aworɛ ndoatoasoɛ abɔnefoɛ hemɔ sa nu afebɔɔ.” Ɛhe te adanzeɛ foforɛ bɔ okyire kyɛ edwirɛ bɔ ɔwɔ Edwein 12:7 ne, ɔmva Nyameɛ dwirɛ bɔ ɔkɔbɔ yenwo waen nanwo.
Sɔ tworɔnzɛm ne maa “nahorɛlilɛfoɛ” nya anyelasoɛ kyɛ Nyameɛ kole bɛ.
