1. Bɛbɔ né bɛsõ Nyameɛ tete ne, sɛɛ yeɛ ɔbokale benu biemɔ ɔ?

 MMRIENZUA bɔ né bɛsõ Yehowa, bɔ né bedi nahorɛ ne, Bible ne kã bɛnwo dwirɛ kyɛ, né bele akokoduro. Nakoso, odwu mmerɛ bie a, né benwu ye kyɛ b’anwoserɛ so ate, na né esuroen kora kã benu biemɔ. Ebie yeɛ ole kyɛ, ɔtɔ mmerɛ bie a, né Ɔhene Dawide nwu ye kyɛ “ye bo atimu kyɛ bokaa.” Nakoso sɛ odwu mmerɛ bie a né ye ‘kunu tete’ ye. (Edw. 30:7) Nyameɛ fale ye honhom ne bokale Samson maa onyane anwoserɛ paa. Yeti Samson nwuni kyɛ, sɛ Nyameɛ ammoka ye a, ye anwoserɛ ne kotu komini, na ɔkɔyɛ “mmerɛ, na wayɛ kyɛ kuro sona biala.” (Mae. 14:5, 6; 16:17) Sɔ dwirɛ hemɔ maa yenwu kyɛ, Yehowa yeɛ ɔbokale sɔ mmrienzua hemɔ bɔ né bedi nahorɛ ne maa benyane anwoserɛ ne akokoduro ɔ.

2. Nzuati yeɛ somafoɛ Pɔɔlo hãne kyɛ sɛ ɔyɛ mmerɛ a, yeɛ onya anwoserɛ ɔ? (2 Korintofoɛ 12:9, 10)

² Somafoɛ Pɔɔlo koso, ole tole nu kyɛ sɛ Yehowa ammoka ye a, ɔngɔhora ngonya anwoserɛ bɔ ɔkɔfa kɔsõ ye ɔ. (Kenga 2 Korintofoɛ 12:9, 10.) Bɔ yeti yeɛ ɔte sɔ yeɛ ole kyɛ, né anwonyerɛ ha somafoɛ Pɔɔlo paa, kyɛbɔ yɛ koso ɔtɔ mmerɛ bie a anwonyerɛ ha yɛ ne. (Gal. 4:13, 14) Afei koso, odwu mmerɛ bie a, né ɔyɛ se ma Pɔɔlo kyɛ ɔkɔyɛ bɔ ɔte pá ɔ. (Rom. 7:18, 19) Ebiekũ koso, né Pɔɔlo kunu kora tete ye, ofikyɛ né ye adwene yɛ ye kyɛ ɔnate bɔ ɔfa nu nati, ebia okowu. (2 Kor. 1:8, 9) Ɔwɔ nu kyɛ né Pɔɔlo kora yɛ mmerɛ, nakoso onyane anwoserɛ. Yede, nzu yeɛ ɔbokale ye ɔ? Yehowa mane ye anwoserɛ maa ɔhora fa gyinane ɔhaw bɔ né ɔfa nu ne noa.

3. Edwirɛ benimɔ yeɛ yekonya yenwo mmuayɛɛ wɔ adesũa he anu ɔ?

³ Yɛ koso, Yehowa ahyɛ yɛ bɔ kyɛ ɔkɔma yɛ anwoserɛ maa yɛkɔfa yekogyina yɛ haw noa. (1 Pet. 5:10) Nakoso, yɛngɔhora yɛngɔtena berɛ mbaen yɛngɔhã kyɛ Yehowa ma yɛ sɔ anwoserɛ ne. Ɛmɔma yɛnea sɔ mvandoho he. Sɛ ɛhɔen kũ ebie na aleɛ gyi berɛ a, sana sona ne bɔbɔ tete aleɛ ne wura yenoa nu. Sɛ wanyɛ sɔ a, ɔngɔhora ngonya anwoserɛ bɔ ɔwɔ aleɛ nanu ne. Sɔ ala yeɛ yɛ koso, sɛ yekonya anwoserɛ bɔ Yehowa ahã kyɛ ɔkɔfa kɔma yɛ ne a, sana yetu yenwo agyirɛ. Yede, nningyein benimɔ yeɛ Yehowa pena kyɛ ɔfa boka yɛ, na wamaa yanya sɔ anwoserɛ ne ɔ? Nzu yeɛ odikyɛ yɛyɛ kora, na yahora yanya sɔ anwoserɛ ne ɔ? Yɛbaanea mmenia biemɔ bɔ Bible ne kã bɛnwo dwirɛ  kyɛ, Yehowa mane bɛ anwoserɛ maa bɛhora begyinane bɛ haw ahoroɛ noa ɔ. Ɛhẽne kɔboka yɛ maa yekonya sɔ dwirɛ hemɔ nwo mmuayɛɛ. Sɔ mmenia nemɔ yeɛ bele Yona, Yesu maame Maria, ɔne somafoɛ Pɔɔlo. Yekosa yɛkɔnea kyɛbɔ ɛnnɛ koso, Yehowa kɔso boka ye mmenia maa benya anwoserɛ bɛfa begyina bɛ haw noa ɔ.

4. Yɛkɔyɛ sɛɛ ná yanya anwoserɛ bɔ Yehowa ahyɛ bɔ kyɛ ɔkɔfa kɔma yɛ ne?

⁴ Sɛ yɛkɔhora yekonya anwoserɛ yekogyina yɛ haw ahoroɛ noa a, nikyee kõ bɔ odikyɛ yɛyɛ yeɛ ole kyɛ yɛkɔbɔ Yehowa mbaeɛ. Sɛ yɛbɔ Yehowa mbaeɛ a, ɔkɔma yɛ “tumi totohyia,” kyire kyɛ tumi bɔ ɔbo sona deɛ so ɔ. (2 Kor. 4:7) Afei koso, sɛ yɛkenga Bible ne na yɛdwenedwene yenwo a, Yehowa nate ɛhẽne aso kɔboka yɛ maa yekonya anwoserɛ. (Edw. 86:11) Yehowa dwirɛ bɔ ɔwɔ Bible nanu ne, ‘tumi wɔ nu.’ (Heb. 4:12) Yeti sɛ yɛbɔ Yehowa mbaeɛ na yɛkenga Bible ne a, ɔkɔboka yɛ maa yekonya anwoserɛ bɔ yɛkɔfa yekogyina yɛ haw noa ɔ, na ɛhẽne kɔmaa yɛnye kɔgye. Afei koso, sɛ bɛfa adwuma bie bɛma yɛ wɔ asafo nanu, na yenya adwene kyɛ yɛngɔhora yɛngɔyɛ po a, sɔ nningyein nemɔ bɔ yɛkɔyɛ ne, ɔkɔboka yɛ maa yekonya anwoserɛ bɔ yɛkɔfa yɛkɔyɛ ɔ. Yede, ɛmɔma yɛnea kyɛbɔ Yehowa mane Yona anwoserɛ mmerɛ bɔ ɔhaw bie tole ye ne.

5. Nzuati yeɛ né diyifoɛ Yona hia anwoserɛ fi Yehowa berɛ ɔ?

⁵ Edwirɛ bie tole diyifoɛ Yona, na ɛhẽne ati né ohia anwoserɛ fi Yehowa berɛ. Yeɛ ole kyɛ, mmerɛ bɔ Yehowa fale adwuma bie wurale Yona sa ne, né Yona nwu ye kyɛ adwuma ne yɛ se, na né osuro kyɛ ɔkɔɔyɛ sɔ adwuma ne. Yeti ɔɔfole ɛlɛen bie kyɛ ɔnwati. Ɔnate bɔ ɔyɛle nati, ɔhale sɔa, ahãa ɔne bɛbɔ ɔne bɛwɔ ɛlɛen nanu mukoraati bewuli, ofikyɛ mvrama pirikua bie tu fale ɛpo naso. Ɔwale sɔ ne, mmenia bɔ né bɛwɔ ɛlɛen nanu ne gyili Yona tole ɛpo nanu maa egyein pirikua bie mene ye. Mmerɛ bɔ né Yona wɔ egyein ne kunu ne, nzu yeɛ ɔwale ye tianu ɔ? Aso né y’adwene yɛ ye kyɛ okowu anaa? Anaakyɛ né osusu kyɛ Yehowa afɛ ye so yaa, yeti ɔngɔfa ye ngɔyɛ adwuma kõ hɔ? Ɔkɔyɛ kyɛ bɔ Yona hɔle nu ne maa ye kunu tetele ye paa.

6. Kyɛbɔ Yona 2:1, 2, 7 maa yenwu ye ne, mmerɛ bɔ né Yona wura egyein ne kunu ne, nzu yeɛ ɔmaa onyane anwoserɛ ná y’abanu ammu ɔ?

⁶ Yede, mmerɛ bɔ né Yona ngome wura egyein ne kunu ne, nzu yeɛ ɔbokale ye maa onyane anwoserɛ, na y’abanu ammu ɔ? Nikyee kõ bɔ ɔbokale ye paa yeɛ ole kyɛ, ɔbɔle Yehowa mbaeɛ. (Kenga Yona 2:1, 2, 7.) Ɔwɔ nu kyɛ né Yona ayɛ Yehowa so asoserɛ, nakoso né odé di kyɛ sɛ ɔbrɛ yenwo ase, na onu yenwo a, Yehowa kotie ye mbaeɛ ne. Afei koso, tworɔnzɛm biemɔ bɔ né Yona alimoa akenga ne, ɔdwenedwenene enu dwirɛ ne biemɔ nwo. Nzu yeɛ ɔmaa yenwu ye sɔ ɔ? Sɛ yɛnea mbaeɛ bɔ Yona bɔle bɔ yenwo dwirɛ wɔ Yona yeti nyɔ ne a, edwirɛ bɔ ɔwɔ nu ne, enu pẽe wɔ berɛ a, ɔne edwirɛ bɔ ɔwɔ Edwein nwomaa nanu ne te kõ. (Sɛ ɛpena kyɛ enwu ɛhe a, fa edwirɛ bɔ ɔwɔ Yona 2:2, 5 ne toto Edwein 69:1; 86:7 nanwo.) Aporowaa biala nne yenwo kyɛ, edwirɛ bɔ ɔwɔ sɔ tworɔnzɛm nanu ne, né Yona se ye yé paa. Yeti mmerɛ bɔ né ɔwɔ sɔ ɔhaw nanu ne, tworɔnzɛm bɔ né ɔte sɔ bɔ ɔdwenedwene yenwo ne, ɔhyɛle ye ngunaen maa onwuni kyɛ Yehowa kɔboka ye. Ɛhẽne sĩ ne, Yehowa maa egyein ne ɔɔfele Yona tole ɛpo ne noa, na né ɛhe kɔmaa Yona konya yenwo atẽe biekũ kɔɔyɛ adwuma bɔ Yehowa afa awura ye sa ne.—Yona 2:10–3:4.

7-8. Nzu yeɛ ɔbokale aliemaa brienzua bie bɔ ɔwɔ Taiwan ne maa onyane anwoserɛ fa gyinane ye haw noa ɔ?

⁷ Bɔ Yona yɛle mmerɛ bɔ né owura egyein ne kunu ne, yɛ koso ɔkɔhora kɔboka yɛ mmerɛ bɔ ɔhaw bie ato yɛ ne. Ɛmɔma yɛnea bɔ ɔtole aliemaa brienzua bie bɔ bɛfrɛ ye Zhiming, b bɔ ɔwɔ Taiwan ne. Zhiming te ebie bɔ ollé anwoserɛ, bɔ anwonyerɛ ha ye paa ɔ. Sɛ ɛhẽne la ahameɛ a, y’abusũafoɛ koso, ɔnate kyɛ ɔte Yehowa Danzeniɛ nati, bɛmma yenwo ndɔ ye, na mmom daa bɛtãne yenye. Bɔ ɔboka Zhiming maa ɔkora gyina ye haw ne noa yeɛ ole kyɛ ɔbɔ mbaeɛ, na osũa nikyee koso. Zhiming hãne kyɛ: Ɔnate ɔhaw bɔ mefa nu nati, odwu  mmerɛ bie a, ɔkora maa me wora bɔ paa, na ɛyɛ a né wayɛ se wama me kyɛ ngosũa nikyee ɔ.” Nakoso Zhiming mma y’abanu mmu. Ɔhãne kyɛ: “Sɛ ɔba sɔ a, bɔ medimoa meyɛ yeɛ ole kyɛ mebɔ Yehowa mbaeɛ. Afei koso, asafo dwein ahoroɛ ne, ɛyɛ a metie bie, na sɛ metie dwein ne a, meto bie medi ye sĩ ngakãngakã. Sɛ meyɛ sɔ a, né menwo atɔ me fɔnwoo, na ɛhẽne sĩ ne, mekora mesũa nikye.”

⁸ Nningyein ahoroɛ bɔ Zhiming sũa ne, waboka ye maa wahora wagyina ɔhaw bɔ ɔfa nu ne noa. Ebie yeɛ ole kyɛ, mmerɛ bie bɔ né bɛbaayɛ Zhiming oprehyen ne, nɛɛseniɛ bɔ né ɔnea ye ne hãhyirele ye kyɛ, ɔnate kyɛ ye mogya wɔ ase nati, odikyɛ bɛma ye mogya. Nakoso, aleɛ baahye maa bɛyɛ Zhiming oprehyen ne, ɔkengale aliemaa brasua bie bɔ ye koso, bɛyɛle ye oprehyen bɔ ɔte sɔ ne bie nwo dwirɛ wɔ asafo nwomaa bie nu. Sɔ aliemaa brasua ne, né ye mogya deɛ ne wɔ ase koraa tra Zhiming deɛ ne po, nakoso wanné mogya, koso yenwo tɔle ye. Sɔ aliemaa brasua nanwo dwirɛ bɔ Zhiming kengale ne, ɔbokale ye maa ye koso, olili nahorɛ mane Yehowa.

9. Sɛ ɔnate ɔhaw bie bɔ ɛfa nu nati, ɛngora nyɛ wɔnwo hwee po a, nzu yeɛ ɛkɔhora kɔyɛ ɔ?(Nea foto ne koso.)

⁹ Sɛ ɔhaw bie to wɔ a, aso ɛyɛ a ɔyɛ se ma wɔ kyɛ ɛkɔbɔ Yehowa mbaeɛ anaa ekosũa nikyee hɔ? Sɛ ɔba sɔ a, kae kyɛ bɔ ɛfa nu ne, Yehowa te yebo. Yeti sɛ ɛkora bɔ ye mbaeɛ tikaapẽ po a, okotie, na ɔkɔboka wɔ maa wɔsa kɔhã bɔ ehia ɔ. (Ɛfe. 3:20) Afei koso, sɛ ebia ɔnate kyɛ afokyɛ, afɛ, anaa wɔ wora abɔ ti ɔyɛ se ma wɔ kyɛ ɛkɔkenga Bible ne a, ɛkɔhora kotie Bible bɔ bayɛ ye ɔdio, anaakyɛ asafo nwomaa ahoroɛ bɔ bayɛ ye ɔdio ne bie. Ɛkɔhora koso kotie dwein ahoroɛ bɔ ɔwɔ jw.org so ne, anaa ɛkɔnea vidio ahoroɛ bɔ ɔwɔ berɛ ne bie. Yeti sɛ ɛbɔ Yehowa mbaeɛ, na ɛbɔ mmɔden kyɛ ekosũa nikyee a, ye koso, ɔkɔma wɔ anwoserɛ maa ekogyina ɔhaw biala bɔ ɛfa nu ne noa.

10. Sɛ ɔhaw bie to yɛ a, nzu yeɛ aliemaamɔ kora yɛ fa boka yɛ ɔ?

¹⁰ Yehowa kɔhora kɔfa aliemaamɔ so kɔhyɛ yɛ ngunaen. Sɛ yɛfa ɔhaw bie nu, anaakyɛ bɛfa adwuma bie bɛma yɛ wɔ asafo nanu, na y’adwene yɛ yɛ kyɛ yɛngɔhora ye yɛ a, aliemaamɔ kɔhora kɔyɛ “aworakyekyerɛ” kɔma yɛ. (Kol. 4:10, 11) Yeliemamɔ bɔ bɛte sɔ ne, bɛboka yɛ paa mmerɛ bɔ yahɔ ‘amaneɛnwunɛ’ nu ne. (Any. 17:17) Sɛ yɛkɔ ɔhaw bie nu a, yeliemamɔ kɔhora kɔboka yɛ maa yɛsa kɔhã bɔ yehia ɔ. Afei koso, bɛkɔhora bɛkɔhyɛ yɛ ngunaen maa yɛkɔhɔso yɛkɔsõ Yehowa. Sɛ yɛnea  Yesu maame Maria a, Yehowa fale adwuma pirikua bie wurale ye sa. Ɛmɔma yɛnea kyɛbɔ ebiemɔ bokale ye maa ɔhora yɛle ɔ.

11. Sɛ né Maria kɔhora kɔyɛ adwuma bɔ Yehowa afa awura ye sa ne a, nzuati yeɛ né ohia ngunaenhyɛ ɔ?

¹¹ Sɛ né Maria kɔhora kɔyɛ adwuma bɔ Yehowa fawurale ye sa ne a, né okohia ngunaenhyɛ paa. Bɔ yeti yeɛ ɔte sɔ yeɛ ole kyɛ, mmerɛ bɔ abɔfo Gabriel hãhyirele Maria kyɛ ɔkɔnwonzɛ ne, ɔkɔyɛ kyɛ Maria kunu tetele ye paa. Ofikyɛ sɔ mmerɛ ne, né oggya bĩaa. Afei koso, né Maria tetelle akwalaa biala llé, yeti né ɔkɔyɛ se kɔma ye paa kyɛ ɔkɔhora kɔtete akwalaa bɔ kyẽabie ɔkɔɔyɛ Mɛsaya ne ɔ. Ebiekũ koso, sɔ mmerɛ ne, né Yosef afa yenoa ato Maria so kyɛ okogya ye. Yeti né ɔkɔyɛ se kɔma Maria paa kyɛ, ɔkɔhã kohyire Yosef kyɛ ɔnwonzɛ ɔ, ofikyɛ né Yosef ne ye bɛlalle llé.—Luka 1:26-33.

12. Kyɛbɔ Luka 1:39-45 kã ne, sɛɛ yeɛ Yehowa hyɛle Maria ngunaen ɔ?

¹² Yede, nzu yeɛ ɔbokale Maria maa ɔhora yɛle sɔ adwuma pirikua bɔ né yenwo hia ne ɔ? Maria maa ebiemɔ bokale ye. Ebie yeɛ ole kyɛ, obisale abɔfo Gabriel maa ohyirehyirele adwuma bɔ Yehowa afa awura yesa nanu hyirele ye. (Luka 1:34) Ɛhẽne sĩ ne, Maria pɛle atẽe hɔle “mmokaa so Yuda kuro bie anu” ɔɔneane ye abusũaniɛ Elisabɛte boso. Sɔ akwanduo ne bokale Maria paa. Bɔ yeti yeɛ ɔte sɔ yeɛ ole kyɛ, mmerɛ bɔ Maria dwuli Elisabɛte berɛ ne, Yehowa maa Elisabɛte hyɛle ngɔm bie fale akwalaa bɔ né Maria baawo ye nanwo. Na sɔ dwirɛ ne hyɛle Maria ngunaen paa. (Kenga Luka 1:39-45.) Maria hãne kyɛ, Yehowa afa “ye basa wayɔ nningyein mbiri mbiri.” (Luka 1:46-51) Ɛhe maa yenwu kyɛ Yehowa nate abɔfo Gabriel, ɔne Elisabɛte so hyɛle Maria ngunaen paa.

13. Mmerɛ bɔ aliemaa brasua bie bɔ ɔwɔ Bolivia maa aliemaamɔ bokale ye ne, nzu yeɛ ofili nu wale ɔ?

¹³ Kyɛbɔ Maria yɛle ne, yɛ koso odikyɛ yɛmaa yeliemamɔ boka yɛ, kyɛbɔ ɔkɔyɛ a, yekonya anwoserɛ yɛkɔfa yekogyina yɛ haw noa ɔ. Aliemaa brasua bie bɔ bɛfrɛ ye Dasuri wɔ Bolivia. Né ohia ngunaenhyɛ fi aliemaamɔ berɛ paa, kyɛbɔ ɔkɔyɛ a, ɔkɔhora kogyina ɔhaw bie bɔ ɔtole ye ne noa ɔ. Anwonyerɛ bie bɔle ye baba, na dɔktafoɛ hãne kyɛ sɔ anwonyerɛ ne, bengonya yenoa ayire. Yeti né odikyɛ Dasuri tena ye baba nwo wɔ hɔspitel berɛ mmerɛ biala. (1 Tim. 5:4) Sɔ dwirɛ bɔ ɔtole Dasuri ne, né ɔlla ase mma ye koraa. Ɔhãne kyɛ: “Sɛ odwu mmerɛ bie a, né m’abanu abu paa.” Aso Dasuri maa aliemaamɔ bokale ye anaa? Ahyɛaseɛ ne de wannyɛ sɔ. Dasuri hyirehyirele bɔ yeti yeɛ wannyɛ sɔ nanu. Ɔhãne kyɛ: “Né membena kyɛ mefa me baba anwonyerɛ nanwo dwirɛ meha aliemaamɔ.” Ɔtoale ye dwirɛ naso kyɛ: Né m’adwene yɛ me kyɛ, Yehowa ngome yeɛ ɔkɔhora kɔboka me maa ngogyina me haw ne noa ɔ. Nakoso mmanwuni kyɛ, sɛ mete menwo mefi aliemaamɔ nwo a, né waayɛ kyɛbɔ me ngome makyekye me haw ne masoa ne.” (Any. 18:1) Ɔwale sɔ ne, Dasuri yɛle kyɛ ɔkɔfrɛ aliemaa biemɔ bɔ bɛte ye damvo, na wahã ɔhaw bɔ wato ye nanwo dwirɛ wahyire bɛ. Dasuri hãne kyɛ: “Mmerɛ bɔ sɔ aliemaa nemɔ tele bɔ wato me nanwo dwirɛ ne, bɛfale aleɛ bɛbrɛle me wɔ hɔspitel berɛ, na bɛfale Bible nanu dwirɛ biemɔ bɛkyekyele me wora. Bɔ sɔ aliemaa nemɔ yɛ mane me ne, me wora ngofi ye llé. Yɛla abusũa pirikua bie nu, na sɔ abusũa ne yeɛ ole aliemaamɔ bɔ yɛne bɛ sõ Yehowa ne. Sɛ yɛkɔ ɔhaw bie nu a, sɔ aliemaa hemɔ nye gye yenwo kyɛ bɛkɔboka yɛ, na bahyɛ yɛ ngunaen maa yahɔso yasõ Yehowa.”

14. Sɛ yɛkɔ ɔhaw bie nu a, nzuati yeɛ odikyɛ yɛmaa asafo nu mbanyi nemɔ boka yɛ ɔ?

¹⁴ Asafo nu mbanyi koso te mmenia bɔ Yehowa nate bɛ so hyɛ yɛ ngunaen maa yenya anwoserɛ yɛfa yegyina yɛ haw noa ɔ. Sɔ ngunaenhyɛ bɔ asafo nu mbanyi fama yɛ ne, ɔboka yɛ maa sɛ yɛfa ɔhaw bie nu po a, yɛnwo kora tɔ yɛ fɔnwoo. Ɛhe maa yenwu ye kyɛ asafo nu mbanyi nemɔ te akyɛdeɛ bɔ Yehowa afa ama yɛ ɔ. (Yes. 32:1, 2) Yeti sɛ ɛkɔ ɔhaw bie nu a, kã yenwo dwirɛ kyire asafo nu mbanyi nemɔ. Sɛ bɛfa akwangyerɛ bie bɛma wɔ a, tie na fa yɛ adwuma. Sɛ ɛyɛ sɔ a, Yehowa kɔfa asafo nu mbanyi nemɔ aso kɔma wɔ anwoserɛ maa ekogyina wɔ haw noa.

15. Anyelasoɛ beni yeɛ Kristofoɛ mukoraati le ye ɔ?

¹⁵ Nningyein ahoroɛ bɔ Yehowa afa ahyɛ yɛ bɔ kyɛ ɔkɔfa kɔma yɛ bɔ yenwo dwirɛ wɔ Bible nanu ne, ɛhẽne koso boka yɛ maa yenya anwoserɛ bɔ yɛkɔfa yɛkɔsõ ye ɔ. (Rom. 4:3, 18-20) Yenu biemɔ le anyelasoɛ kyɛ yɛkɔtena aseɛ he aso daa wɔ Paradise. Ebiemɔ koso le anyelasoɛ kyɛ bɛkɔhɔ anwuro. Sɛ yɛfa y’adwene yesie sɔ anyelasoɛ bɔ yele naso a, ɔkɔma yɛ anwoserɛ maa yɛkɔhora yekogyina ɔhaw biala noa, na yɛkɔhora yɛkɔhã nzɛmba ne. Afei koso, ɔkɔhora kɔboka yɛ maa adwuma biala bɔ bɛkɔfa bɛkɔma yɛ wɔ asafo anu ne, yɛkɔhora yɛkɔyɛ. (1 Tɛs. 1:3) Né somafoɛ Pɔɔlo le sɔ anyelasoɛ ne bie, na ɛhẽne yeɛ ɔbokale ye maa onyane anwoserɛ fa gyinane ye haw noa ɔ.

16. Nzuati yeɛ né somafoɛ Pɔɔlo hia anwoserɛ ɔ?

¹⁶ Wɔ Pɔɔlo krataa bɔ ɔhworɔ ɔɔmane Korintofoɛ nanu ne, né onwu yenwo kyɛ, ɔte kyɛ kukue bie bɔ bafa nnɛterɛ bayɛ bɔ ollé anwoserɛ ɔ. Sɔ dwirɛ bɔ Pɔɔlo hãne ne maa yenwu kyɛ, né ohia anwoserɛ paa. Pɔɔlo hãne kyɛ: ‘onwu amaneɛ,’ ‘yenwo ahyere ye,’ ‘bɛtane yenye,’ na ‘babɔ ye bato ase.’ Sɛ odwu mmerɛ bie po a, né Pɔɔlo ngõa pena fi yesa. (2 Kor. 4:8-10) Pɔɔlo hworɔle sɔ dwirɛ he mmerɛ bɔ né ɔyɛ ye nzɛmbatrɛlɛ adwuma bɔ ɔtɔ so nzã ne. Mmerɛ bɔ Pɔɔlo hãne sɔ dwirɛ ne, né ɔnze kyɛ sãa ɔhaw foforɛ la ye nyunu bɔ ɔnwondɛ ye ɔ. Sɔ haw ne bie yeɛ ole kyɛ bɛbole ye, bɛhyele ye bɛtole nu, ɛlɛen butuli ye, na bɛfale ye bɛtole prisã.

17. Kyɛbɔ 2 Korintofoɛ 4:16-18 kã ne, nzu yeɛ ɔbokale Pɔɔlo maa onyane anwoserɛ fa gyinane ɔhaw ahoroɛ bɔ ɔtole ye ne noa ɔ?

¹⁷ Pɔɔlo fale yenye siele anyelasoɛ bɔ né ole ye naso, na ɛhẽne bokale ye maa onyane anwoserɛ fa gyinane ye haw noa. (Kenga 2 Korintofoɛ 4:16-18.) Ɔhãhyirele aliemaamɔ bɔ bɛwɔ Korinto ne kyɛ, ɔwɔ nu kyɛ ye nwonaen bɔ anyeɛ nwu ye ne “gu so ɔsɛkye de,” nakoso ɔmma ɛhẽne mmu y’aba nu. Pɔɔlo fale ye adwene siele daa ngõa bɔ né okonya ye kyẽabie naso. Sɔ daa ngõa bɔ né Pɔɔlo konya ye wɔ anwuro kyẽabie ne, ɔhãne yenwo dwirɛ kyɛ, ɔte “animnyam kandinga bɔ ɔwɔ berɛ afebɔɔ, bɔ ɔtra so ɔ.” Sɔ nhyiraa bɔ né Pɔɔlo konya ye kyẽabie ne, onwuni kyɛ ɔtra ɔhaw biala bɔ né ɔfa nu sɔ mmerɛ ne. Pɔɔlo fale y’adwene siele sɔ anyelasoɛ  naso, ɛhẽne ati ɔhãne kyɛ, “onyi frɔmfrɔm alehyeleɛ biala.”

18. Kyẽabie nwo anyelasoɛ bɔ Tihomir ne y’abusũa ne le ye ne, sɛɛ yeɛ waboka bɛ ɔ?

¹⁸ Aliemaa bie wɔ Bulgaria bɔ bɛfrɛ ye Tihomir. Kyẽabie nwo anyelasoɛ bɔ ole ye ne, ɔbokale ye paa maa ɔhora gyinane ɔhaw bie bɔ ɔtole ye ne noa. Afoɛ kãa bɔ wapɛ nu ne, kar fale oliema brienzua kõ bɔ bɛfrɛ ye Zdravko fĩni ase maa owuli. Tihomir aliema ne wue ne yɛle ye yea, yeti olili yenwo aworabɔlɛ hyɛle paa. Bɔ waboka Tihomir ne y’abusũa maa bahora bagyina bɔ wato bɛ ne noa yeɛ ole kyɛ, bɛfa b’adwene besie ewuetingyélɛ bɔ ɔkɔwa kyẽabie naso. Tihomir hãne kyɛ: “Nningyein bɔ né yɛdwene yenwo ne, ebie yeɛ ole aleɛ bɔ yɛkɔtõ yɛkɔma Zdravko mmerɛ bɔ batingyé ye bawa ngõa nu ne. Afei koso, bɛbɔ yɛkɔto yɛsa yɛkɔfrɛ bɛ maa yɛne bɛ kɔbɔ nu kodidi, ɔne nningyein bɔ osisili wɔ ayieleɛ mmerɛ nanu mukoraati, bɔ yɛkɔhã yenwo dwirɛ yekohyire ye ne, yɛfale y’adwene yesiele so.” Tihomir hãne kyɛ sɔ nningyein ne bɔ bɛfale b’adwene besiele so ne, ɛhẽne yeɛ ɔbokale bɛ maa benyane anwoserɛ bɛfa begyinane aworabɔlɛ bɔ né bedi ne noa, mmerɛ bɔ bɛnwondɛ kyɛ Yehowa kotingyé oliema ne kɔwa ngõa nu kyẽabie ne.

19. Nzu yeɛ ɔkɔboka wɔ maa ɛkɔhɔ so konya gyidie kyɛ nningyein bɔ ɛnea ye atẽe kyẽabie ne kɔwa nu ɔ? (Nea foto ne koso.)

¹⁹ Ɛkɔyɛ sɛɛ ná ahɔso anya gyidie kyɛ nningyein bɔ ɛnea ye atẽe kyẽabie ne kɔwa nu? Bɔ ɛkɔhora kɔyɛ ne bie yeɛ ole kyɛ, sɛ ele anyelasoɛ kyɛ ɛkɔtena aseɛ he aso daa a, yede bɔ Bible ne ahã afa kyɛbɔ Paradise asetena kɔyɛ ne, kenga na dwenedwene yenwo. (Yes. 25:8; 32:16-18) Yede, fa ye kyɛ ɛwɔ ewiase foforɛ nanu bɔ mmenia bɔ bekuro wɔ dwirɛ apɛ wɔnwo ayia, na etie dwein bɔ ɔyɛ fɛ, bɔ nnomaa sũɛ koso gua wɔ so anu ɔ. Nea kyɛbɔ ahãa wɔnye kosi kɔgye ɔ! Sɛ ɛnea Paradise nwo foto bɔ ɔwɔ yɛ nwomaa ahoroɛ nu anaa dwein nwo vidio biemɔ te kyɛ Wiase Foforo No Mu, Aba Mu Awie, ɔne Fa W’ani Bu ne a, ɔkɔboka wɔ maa ɛkɔhora kɔyɛ sɔ. Sɛ yɛkɔ so yɛdwene kyɛbɔ nningyein kɔyɛ wɔ ewiase foforɛ nanu nanwo a, yɛngɔfa y’adwene yengosie “amaneɛ kãa bɔ yɛnwu ye” ɛnnɛ naso. (2 Kor. 4:17) Sɔ nningyein bɔ Yehowa afa ahyɛ wɔ bɔ ne, ɔkɔhora kɔboka wɔ maa ekonya anwoserɛ kɔfa kogyina ɔhaw biala bɔ ɔkɔto wɔ ne noa.

20. Sɛ y’abanu bu a, nzu yeɛ ɔkɔboka yɛ maa yekonya anwoserɛ ɔ?

²⁰ “Sɛ AWURADE boka yɛ so a, yɛkoli ngonim,” ɔmva yenwo kyɛ ebia y’abanu abu ne. (Edw. 108:13) Nningyein bɔ ɔkɔboka wɔ maa ekonya anwoserɛ kɔfa kogyina wɔ haw noa ne, Yehowa alimoa ayɛ yenwo nhyehyɛɛ dada. Ebia bafa adwuma bie bawura wɔsa wɔ asafo nanu, nakoso w’adwene yɛ wɔ kyɛ ɔyɛ se. Anaa ɔhaw bie bɔ ɛfa nu wɔ w’asetena nu nati, wɔnye ngye. Sɛ sɔ a, yede fi w’ahõne nu bɔ Yehowa mbaeɛ, na sũa nikye. Afei koso, má aliemaamɔ boka wɔ, na fa w’adwene sie nningyein bɔ Yehowa afa ahyɛ wɔ bɔ naso. Sɛ ɛyɛ sɔ a, Nyameɛ kɔma ‘wɔ tumi amukoraa maa ekogyina pindinn, kyɛbɔ ye animnyam tumi te ne, na ahora afa aboterɛ ne animia amukoraa agyina wɔ anigye nu.’—Kol. 1:11.