Wɔ 1923 afoɛ nala nu ne, asafo ne yɛle nzakrayɛɛ wɔ atẽe bɔ Bible Asũafoɛ nemɔ faso yɛ asafo nhyiamu nanu. Sɔ nzakrayɛɛ ne maa asomdwee wale b’afĩa. Sɔ mmerɛ ne, sɛ Bible Asũafoɛ nemɔ kɔ asafo nhyiamu dapɛen biala a, né besusu tworɔnzɛm ahoroɛ nwo. Afei koso, né bɛbɔ mbaeɛ, na né besa bedi adanzeɛ bɛfa bɛda Nyameɛ ase. Ɛwɛnelɛ Waen bɔ ɔwale sɔ mmerɛ ne hyɛle yebo hãne ɛhe anwo dwirɛ. Sɛ ɛhẽne la ahameɛ a, Bible Asũafoɛ nemɔ yɛle kalanda. Tworɔnzɛm bɔ né bekosusu yenwo dapɛen biala wɔ b’abusũa sõen bo ne, né bɛhyehyɛ ye wɔ sɔ kalanda naso. Afei koso, dwein bɔ sɛ ebie yɛ ye abusũa sõen a, ɔkɔhora kɔto ne, né bɛhyehyɛ ɛhẽne koso wɔ kalanda naso.

Sɛ Bible Asũafoɛ nemɔ yianu wɔ asafo nhyiamu bo a, né bedi adanzeɛ. Nningyein bɔ né bedi yenwo adanzeɛ ne, né ebie fa bɔ ɔhɔle so wɔ asɛnga nu nanwo. Afei koso, bɔ Yehowa ayɛ ama bɛ wɔ b’asetena nu ne, né bedi yenwo adanzeɛ, na sɛ beyie a, né babɔ mbaeɛ. Aliemaa brasua Eva Barney bɔ ɔbɔle asu wɔ afoɛ 1923 nu, mmerɛ bɔ né wali afoɛ 15 ne hãne kyɛ: “Sɔ mmerɛ ne, sɛ né ebie pena kyɛ odi adanzeɛ a, né bɛmaa odwɔso gyina ná wahã edwirɛ bie te kyɛ: ‘Mepena kyɛ meda Awurade ase wɔ bɔ wayɛ wama me ne mukoraati nwo.’” Aliemaa biemɔ wɔ berɛ a, né bɛnye gye ɛhe anwo paa, yeti daa né bɛpena kyɛ bedi adanzeɛ. Aliemaa brasua Barney toale ye dwirɛ naso kyɛ: “Né aliemaa kõ bie bie wɔ berɛ bɔ bɛfrɛ ye Godwin. Né ɔte ebie bɔ yenye afi paa, na daa né ole nikyeebie bɔ ɔpena kyɛ ɔda Awurade ase wɔ yenwo ɔ. Nakoso sɛ ogu so odwudwo na sɛ ɔye nwu ye kyɛ, ɔnate kyɛ ohũ ne dwudwo soma nati, aliemaa bɔ ɔnea adesũa naso ne pena fɛ yaa a, né ɔsɔ ohũ ne ataadeɛ ne noa twẽ ye kãa, kyɛbɔ ɔkɔyɛ a, ɔkɔpɛ ye dwirɛ naso ɔ.”

Bosome biala, né asafo biala ye kyẽa kõ sie berɛ fa yɛ mbaebɔ, na né bedi adanzeɛ bɛfa bɛda Awurade ase. Ɛwɛnelɛ Waen bɔ ɔwale April 1, 1923 ne hãne sɔ adesũa nanwo dwirɛ kyɛ: “Sɛ odwu sɔ kyẽa ne a, odikyɛ bɛfa mmerɛ ne bie bedi adanzeɛ bɛfa bɛkã bɔ ɔhɔle so wɔ asɛnga nu sɔ mmerɛ nanwo dwirɛ bɛfa bɛhyɛ bɛnwo ngunaen. . . Yedé yedi kyɛ sɛ bɛyɛ sɔ a, ɔkɔmaa asomdwee kɔwa asafo nanu, na wamaa aliemaamɔ ayɛ kõ.”

Ná Charles Martin fi Vancouver bɔ ɔwɔ Canada ne. Sɔ mmerɛ ne, né wali afoɛ 19, na né ɔte dawurubɔfoɛ. Sɔ nikyee bɔ né bɛyɛ ne, ɔbokale ye paa. Nziɛen ɔhãne kyɛ: “Ɔnate kyɛ né aliemaamɔ taa kã bɔ ɔhɔle so wɔ asɛnga nu nanwo dwirɛ nati, ɔbokale me paa maa nwuni kyɛbɔ ngoli mmenia adanzeɛ wɔ asɛnga nu ɔ. Afei koso, ɔbokale me maa nwuni kyɛbɔ ngɔma ebie mmuayɛɛ wɔ asɛnga nu mmerɛ bɔ ɔpena kyɛ ɔne me su aporowaa ne.”

Ahyehyɛdeɛ ne hyɛle aliemaamɔ bɔ bɛwɔ asafo ahoroɛ nanu ne ngunaen kyɛ, bɛye ngyẽa biemɔ besie berɛ bɔ  bɛkɔfa bɛkɔyɛ asɛnga adwuma ne ɔ. Sɔ nhyehyɛɛ ne bɔ bɛyɛle ne, ɔmaa aliemaamɔ yɛle kõ. Ɛwɛnelɛ Waen bɔ ɔwale April 1, 1923 ne hãne kyɛ: “Sɔ nhyehyɛɛ he bɔ ahyehyɛdeɛ ne ayɛ ne, ɔkɔmaa yɛkɔhã yɛnwo yɛkɔbɔ nu yɛkɔyɛ asɛnga adwuma ne. . . . Sɔ nhyehyɛɛ he kɔhyɛ yebo kɔyɛ adwuma Dwirɛ, May 1, 1923. Ɛhẽne sĩ ne, Dwirɛ bɔ olimoa wɔ bosome biala nu ne, yɛkɔfa yɛkɔyɛ asɛnga adwuma ne. . . Yeti odikyɛ aliemaamɔ bɔ bɛwɔ asafo biala nu ne bɔ mmɔden kyɛ bɛkɔfa bɛnwo bekowura nu.”

Mmrandeɛ ne ndaluwa po yɛle asɛnga adwuma ne bie. Hazel Burford bɔ sɔ mmerɛ ne, né wali afoɛ 16 ne hãne kyɛ: “Né nwomaa bie wɔ berɛ bɔ bɛfrɛ ye Bulletin, na né edwirɛ bie wɔ nu bɔ ɔboka yɛ maa yenwu bɔ yɛkɔhora yɛkɔhã ye wɔ asɛnga nu ɔ. a Yeti yɛbɔle mmɔden yɛhwẽne sɔ dwirɛ ne yeguale yɛ tianu. Né me nana brienza mva asɛnga adwuma ne nni angorɛ. Ɛhẽne bokale me paa maa me koso nyerele menwo nyɛle asɛnga adwuma ne.” Nakoso, aliemaa bie hãne kyɛ onnikyɛ Aliemaa brasua Burford yɛ asɛnga adwuma ne bie. Burford toale ye dwirɛ naso kyɛ: “Né aliemaa bie bɔ yenye afi wɔ yɛ asafo nanu, na né ɔnde yebo koraa kyɛ akwalaa tekyɛ me, ngɔhã Bible nu dwirɛ ngohyire mmenia ɔ. Sɔ mmerɛ ne, né aliemaa biemɔ le adwene kyɛ, nná Bible Asũafoɛ ne mukoraati yeɛ odikyɛ bɛyɛ asɛnga adwuma ne bie ɔ. Afei koso, né b’adwene yɛ bɛ kyɛ ɔnzɛkyɛ “mmerandeɛ ne ndaluwa” yɛ asɛnga adwuma ne bie fa ye Yehowa ayɛ.” (Edw. 148:​12, 13) Nakoso, Aliemaa brasua Burford amma sɔ dwirɛ ne ammu ye aba nu, na mmom ɔhɔle so yɛle asɛnga adwuma ne. Ɛhẽne sĩ ne, onyane yenwo atẽe hɔle Gilead Sukuu ne bie. Né ɔboka Gilead asũafoɛ bɔ bɛtɔ so nyɔ naso, na ɔɔyɛle nzɛmbatrɛlɛfoɛ wɔ Panama. Nziɛen, aliemaamɔ bɔ né bele adwene kyɛ ɔnzɛkyɛ mmrandeɛ ne ndaluwa yɛ asɛnga adwuma ne bie ne, bɛsesãne b’adwene.

Nhyiamu ahoroɛ bɔ bɛyɛle ne koso hãne aliemaamɔ bɔle nu. Sɔ nhyiamu bɔ bɛyɛle ne, enu pẽe nala wɔ berɛ a, né bɛye kyẽa bie besie berɛ bɛfa bɛyɛ asɛnga adwuma ne. Enu bie yeɛ ole bɔ bɛyɛle ye wɔ Winnipeg bɔ ɔwɔ Canada ne. Bɛbɔ bɛhɔle sɔ nhyiamu ne bie ne, benyane yenwo atẽe bɛyɛle asɛnga adwuma ne wɔ Winnipeg kuro nanu nekaa biala. Wɔ sɔ nhyiamu ne kyẽa bɔ ɔtɔ so nyɔ bɔ ɔte March 31 ne, bɛhyɛle bɛbɔ bɛwale nhyiamu ne bie ne mukoraati ngunaen kyɛ bɛyɛ asɛnga adwuma ne wɔ Winnipeg kuro nanu nekaa biala, na aliemaamɔ bɔle mmɔden yɛle sɔ. Asɛnga adwuma ne bɔ aliemaamɔ fale bɛnwo wurale nu ne, ɔmaa benyane mmeni pẽe belili bɛ adanzeɛ. Ɔnate ɛhe ati, nhyiamu foforɛ bɔ bɛyɛle ye wɔ August 5 wɔ Winnipeg ne, mmenia kɔyɛ 7,000 yeɛ bɛwale bie ɔ. Nhyiamu ahoroɛ bɔ né bayɛ ye wɔ Canada maen nanu mukoraati ne, ɛhẽne yeɛ ɔte nhyiamu bɔ mmeni pẽe hɔle bie ɔ.

Nhyiamu bɔ ɔte piri paa bɔ Bible Asũafoɛ nemɔ yɛle ye wɔ 1923 afoɛ nanu yeɛ ole bɔ bɛyɛle ye August 18-26 wɔ  Los Angeles, bɔ ɔwɔ California ne. Waha kãa maa bɛyɛ nhyiamu ne, bɛbɔle yenwo dawure wɔ newspaper ahoroɛ nu, na Bible Asũafoɛ nemɔ koso kyekyɛle nhyiamu nanwo asaatolɛ krataa kɔbo 500,000. Afei koso, bɛfale bie bɛtetale kar mɔ nwo.

Wɔ Fue, August 25 ne, Aliemaa Rutherford mane dwudwolɛ bie bɔ ye dwirɛti yeɛ ole, “Mmoaen Ne Mmɔngye” wɔ sɔ nhyiamu nabo. Wɔ ye dwudwolɛ nanu ne, ohyirehyirele nu kyɛ, sɔ “mmoaen” ne gyi berɛ ma mmenia bɔ bɛnye la so kyɛ bɛkɔtena ase daa wɔ paradise bɔ bɛyɛ bɔ Yehowa kuro ne. Wɔ sɔ dwudwolɛ nala nu ne, Aliemaa Rutherford fale edwirɛ bie bɔ ɔte “Kɔkɔbɔ” tole dwaa. Bɛbɔ bawa nhyiamu ne, ɔmaa benwuni ye kyɛ, Bible Asũafoɛ nemɔ bokka asɔre ahoroɛ naso. Yeti ebiala bɔ ɔpena kyɛ ɔyɛ bɔ Yehowa kuro ne, odikyɛ ɔtwẽ yenwo fi ‘Babilɔn Pirikua‘ nanwo. (Nye. 18:​2, 4) Sɔ dwirɛ bɔ Aliemaa Rutherford fa tole dwaa ne, bɛyɛle yenwo trat, na Bible Asũafoɛ nemɔ kyekyɛ mane mmenia miliɔn pẽe wɔ ewiase mukoraati.

Nhyiamu ne kyẽa bɔ ɔpɛ yebo ne, Aliemaa Rutherford mane dwudwolɛ bie hyirele mmenia kɔbo 30,000 bɔ né bawa nhyiamu ne. Sɔ dwudwolɛ ne dwirɛti yeɛ ole, “Maenmaen Mukoraati Bɛboa Bɛnwo Bɛkɔ Amagedon Kõɛ Ne, Nakoso Mmenia Miliɔn Pẽe Bɔ Bɛte Ase Ɛnnɛ Ne, Bengowu Llé.” Né Bible Asũafoɛ nemɔ se kyɛ mmenia pẽe kɔwa sɔ nhyiamu ne bie. Yeti beelɛle stadium bie bɔ ɔwɔ Los Angeles kyɛ bɛfa bɛyɛ nhyiamu ne. Bɔ ɔkɔyɛ na mmeni pẽe bɔ bawa nhyiamu ne ahora ate dwudwolɛ ne, aliemaamɔ hyehyɛle ngaen bɔ bɛfa bɛbɔ dwein bɔ ɔwɔ stadium berɛ ne kama, kyɛbɔ ɔkɔyɛ a, mmenia kɔte bɔ ɔkɔso ne yé ɔ. Mmeni pẽe koso tiele bie wɔ radio so.

Wɔ 1923 afoɛ nanu ne, né nekaa ahoroɛ pẽe wɔ berɛ bɔ odikyɛ bɛkã nzɛmba ne. Ebie yeɛ ole Africa, Europe, India, ɔne South America. Wɔ India ne, né Aliemaa A. J. Joseph gya braa, na né osa le mmaa nzia. Nakoso ɔbokale maa bɛyɛle nwomaa ahoroɛ wɔ Hindi, Tamil, Telugu, ɔne Urdu dwudwolɛ nu.

Wɔ Sierra Leone koso, Aliemaa Alfred Joseph ɔne Leonard Blackman bɔ né bɛboka Bible Asũafoɛ nemɔ aso ne, bɛhworɔle krataa bɛhɔle ewiase mukoraati adwumayɛbea ti bɔ né ɔwɔ Brooklyn, New York ne kyɛ bɛfa mmenia bɛbra Sierra Leone ma bɛɛboka bɛ wɔ asɛnga adwuma nanu. Benyane bɛ krataa nanwo mmuayɛɛ wɔ April 14, 1923 nu. Alfred hãne kyɛ: “Fue kɔngɔen bie, ebie frɛle me wɔ fon so, na né ɔyɛ me nwanwa paa.” Sona bɔ ɔfrɛle Alfred ne bisale ye kyɛ, “Wɔ yeɛ ɛhworɔle krataa hɔle Watch Tower Society kyɛ ɛpena ebie maa ɔbaboka ɛmɔ maa ɛmɔyɛ asɛnga adwuma ne?” Alfred hãne kyɛ, “Yóo ɔte nahorɛ.” Sona bɔ né ɔne Alfred dwudwo ne koso hãne kyɛ, “Yede basoma me kyɛ mmra berɛ.” Né ɔte Aliemaa William R. Brown yeɛ né ɔne Alfred bedwudwo ne. Né Aliemaa William R. Brown ne ɔye Antonia, ɔne bɛ mma mmrasua nyɔ, Louise ne Lucy bafi Caribbean baadwu Sierra Leone maen nanu sɔ kɔngɔen ne. Sɛ né Aliemaa Alfred Joseph ne Leonard Blackman nwu bɛ a, né bɛnye kɔgye paa, ofikyɛ né banwondɛ bɛ bahyɛ.

 Alfred hãne kyɛ: “Aleɛ hyene ngyerɛmɔ ne, né mene Leonard yɛkenga Bible ne. Mmerɛ bɔ yɛtole yɛnye ne, yenwuni kyɛ ebie fi aluo dɔ ɔba ɔ. Né ɔte Aliemaa Brown. Né ɔte ebie bɔ ɔmva Yehowa soẽn nni angorɛ koraa ɔ. Yeti sɔ kyẽa ne bɔ oodwuli nala, né ɔpena kyɛ bɛyɛ nhyehyɛɛ maa ɔma badwanu dwudwolɛ kyẽa bɔ oliberɛ ne. Mmerɛ bɔ Aliemaa Brown dwuli Sierra Leone ne, waandwu bosome kõ po yeɛ ɔfale nwomaa bɔ ɔwɔ yenwo ne mukoraati mane mmenia wɔ asɛnga nu ɔ. Ɛhẽne sĩ ne, bɛbrɛle ye nwomaa kɔyɛ 5,000. Nakoso, wangyɛ yeɛ ɔfale ɛhẽne mukoraati koso mane mmenia wɔ asɛnga nu maa oyiele ɔ. Bɔ ɔte yeɛ ole kyɛ, né Aliemaa Brown tte ebie bɔ ɔtɔne nwomaa mbaen ɔ. Wɔ ye asetena nu mukoraati ne, sɛ ɔma dwudwolɛ biala a, né ɔtaa twẽ adwene sie Bible naso. Ɛhẽne ati, mmenia tole ye dumaa Bible Brown.

Sɔ mmerɛ ne, né Bɛtɛl bɔ ɔwɔ Germany kuro bie bɔ bɛfrɛ ye Barmen nanu te kãa. Yeti aliemaamɔ bɔ né bɛyɛ adwuma wɔ berɛ ne, né bɛngɔ berɛ. Afei koso, né aliemaa nemɔ ate kyɛ France sogyafoɛ ne pena kyɛ bedé sɔ kuro ne bɛbɔ so. Ɔnate ɛhẽne ati, Bible Asũafoɛ nemɔ yɛle b’adwene kyɛ bɛkɔɔpena sua foforɛ. Yeti benyane nekaa kama wɔ Magdeburg bɔ né bɛkɔhora bɛkɔprente nwomaa ahoroɛ wɔ berɛ ɔ. Wɔ June 19 ne, aliemaamɔ sesale nningyein bɔ bɛfa bɛprente nwomaa ne mukoraati bɛhɔle Bɛtɛl foforɛ bɔ ɔwɔ Magdeburg nanu. Afei bɛbɔle aliemaamɔ bɔ bɛwɔ ewiase mukoraati adwumayɛbea ti ne amaneɛ kyɛ batu bahɔ sua foforɛ nanu. Sɔ kyẽa nala bɛtele ye wɔ news nu kyɛ, France asogyafoɛ nemɔ ale Barmen kuro ne babɔ so. Ɔwale sɔ ne, aliemaamɔ lale Yehowa ase paa kyɛ wabɔ bɛnwo waen na waboka bɛ maa bafi berɛ asomdwee nu ɔ.

Wɔ Brazil ne, Aliemaa George Young bɔ né otutu atẽe kɔkã nzɛmba ne, ɔbokale maa Bɛtɛl wale maen nanu, na bɛhyɛle yebo bɛyɛle Ɛwɛnelɛ Waen ne wɔ Portuguese dwudwolɛ nu. Oodwuli maen nanu bosome kãa bie sĩ ne, ɔhora fale magazin ne trat kɔbo 7,000 mane mmenia wɔ asɛnga nu. Mmerɛ bɔ Aliemaa George Young dwuli Brazil ne, ɔhɔle maame bie bɔ bɛfrɛ ye Sarah Ferguson awuro, na ɔɔneane ɔne ye abusũafoɛ bɛ bo so, na ɛhe maa Sarah Ferguson nye gyele paa. Ofi 1899 yeɛ Sarah Ferguson hyɛle yebo kyɛ ɔkenga Ɛwɛnelɛ Waen ne ɔ, koso né ɔhora bɔlle asu. Nakoso mmerɛ bɔ Aliemaa George Young wale Brazil bosome kãa bie sĩ ne, Aliemaa brasua Ferguson ne ye mmaamɔ 4 hora bɔle asu.

Waha kãa maa 1923 afoɛ ne kɔ ayieleɛ ne, Ɛwɛnelɛ Waen bɔ ɔwale December 15 1923 ne hãne kyɛbɔ nzakrayɛɛ ahoroɛ bɔ ahyehyɛdeɛ ne yɛle ne, ɔbokale Bible Asũafoɛ nemɔ maa bɛyɛle kõ nanwo dwirɛ. Ɛwɛnelɛ Waen ne hãne kyɛ: “Yɛkora yenwu ye kyɛ, aliemaamɔ bɔ bɛwɔ asafo ahoroɛ . . . nanu ne, bɛ gyidie ayɛ se paa. . . Yeti ɛmɔma yɛyere yɛnwo kyɛ yɛkɔhɔ so yɛkɔyɛ asɛnga adwuma ne wɔ afoɛ bɔ yɛbaawura nu nanu. Sɛ yɛyɛ sɔ a, ɔkɔmaa yɛkɔhɔ so yɛkɔsõ Yehowa yé.”

Né nningyein pá pẽe kɔhɔso wɔ ahyehyɛdeɛ nanu wɔ 1924 afoɛ nanu, na né ɛhe kɔmaa Bible Asũafoɛ nemɔ nye kɔgye paa. Né aliemaamɔ bɔ bɛwɔ Bɛtɛl ne atɔ aseɛ bie wɔ supɔ bie aso. Né bɛfrɛ sɔ supɔ ne Staten. Sɛ efi ewiase mukoraati adwumayɛbea ti bɔ ɔwɔ Brooklyn ne ɛkɔ berɛ a, né ɔnwale. Sua ahoroɛ bɔ né besisi ye wɔ sɔ aseɛ foforɛ bɔ né batɔ naso ne, beyiele ye wɔ 1924 nu. Ɛhẽne sĩ ne, adwuma ahoroɛ bɔ bɛyɛle ye wɔ berɛ ne, ɔbokale aliemaamɔ maa bɛyɛle kõ, na bɛhora bɛyɛle asɛnga adwuma ne wɔ nekaa ahoroɛ pẽe. Nakoso nna ɛhẽne ngome, na mmom né nningyein pá pẽe wɔ berɛ bɔ ahyehyɛdeɛ ne kɔyɛ ɔ.