1. Nzu yeɛ abɔfo bie nwa yɛyɛ ɔ?

 FA YE kyɛ basoma abɔfo bie kyɛ ɔɔhã edwirɛ bie hyire wɔ. Aso ahãa mmerɛ bɔ ogyi wɔ nyunu odwudwo ne, ekotie ye anaa? Ɛnnɛ, abɔfo bie dwudwo kyire “maen maen ne mmusua kure ne edwudwolɛ ne mmenia amukoraa.” Yede edwirɛ beni yeɛ ɔkã kyire bɛ ɔ? Yenwa, “Ɛ́mɔsuro Nyameɛ ná ɛ́mɔfa animnyam bɛ́ma ye . . . ɛ́mɔsɔne ye bɔ ɔbɔle nyameɛso ne aseɛ ne.” (Nye. 14:​6, 7) Yehowa ngome yeɛ ɔte nahorɛ Nyameɛ bɔ odikyɛ kuro sona biala sõ ye ɔ. Ɔyɛ yɛ fɛ paa kyɛ Yehowa ama y’atẽe kyɛ yɛsõ ye wɔ ye honhom nu asɔre awuro pirikua nanu ɔ.

2. Nzu yeɛ ole Yehowa honhom nu asɔre awuro ne? (Nea alaka bɔ yenwa “ Honhom Nu Asɔre Awuro Ne, Nzu Yeɛ Ongyire Ɔ?”)

² Nzu yeɛ ole honhom nu asɔre awuro ne, na nisua yeɛ yɛkɔhora yekonwu yenwo dwirɛ pẽe ɔ? Sɔ honhom nu asɔre awuro ne, ɔtte sua bie bɔ yɛfa yɛnye yenwu ye ɔ. Na mmom ɔte nhyehyɛɛ bɔ Yehowa nate Yesu Kristo wue naso ayɛ ama yɛ, kyɛbɔ ɔkɔyɛ a, yɛkɔhora yɛkɔsõ ye kyɛbɔ okuro ɔ. Somafoɛ Pɔɔlo hyirehyirele sɔ nhyehyɛɛ nanu wɔ krataa bɔ ɔhworɔ ɔɔmane tete Kristofoɛ bɔ bɛte Hebrifoɛ bɔ né bɛwɔ Yudea ne. b

3-4. Kristofoɛ bɔ bɛte Hebrifoɛ bɔ né bɛwɔ Yudea ne, nzuati yeɛ né bɛnwo hia Pɔɔlo ɔ, na nzu yeɛ ɔyɛ fa bokale bɛ ɔ?

³ Nzuati yeɛ Pɔɔlo hworɔle krataa ɔɔmane Kristofoɛ bɔ bɛte Hebrifoɛ bɔ né bɛwɔ Yudea ne ɔ? Ɔkɔyɛ kyɛ nningyein nyɔ biemɔ ti yeɛ ɔyɛle sɔ ɔ. Bɔ olimoa, Pɔɔlo hworɔle sɔ krataa ne ɔfa ɔɔhyɛle bɛ ngunaen. Bɔ yeti yeɛ ɔte sɔ yeɛ ole kyɛ, bɛwole sɔ Kristofoɛ nemɔ nu pẽe nala bɛtole Yudafoɛ sõen nu. Yeti mmerɛ bɔ bɛɛyɛle Kristofoɛ ne, ɔkɔyɛ kyɛ, Yudafoɛ asɔre mbanyi nemɔ gorole bɛnwo paa. Yede, nzuati yeɛ né bɛgoro bɛnwo ɔ? Ofikyɛ né Kristofoɛ  nemɔ llé asɔre sua biala bɔ né bɛkɔ nu bɛkɔsõ Nyameɛ ɔ, na né bellé afɔleɛ bokyea bɔ né bɛkɔbɔ afɔleɛ wɔ so bɛkɔma Nyameɛ ɔ. Afei koso, né bellé sɔfo biala bɔ né okoli bɛ nyunu kɔbɔ afɔleɛ ɔ. Né ɛhẽne kɔhora kobu Kristofoɛ nemɔ aba nu maa bɛ gyidie kɔhɔ ase. (Heb. 2:1; 3:​12, 14) Ɔwale sɔ ne, ebia ebiemɔ nyane adwene po kyɛ, bekosa bɛkɔhɔ Yudafoɛ sõen bɔ ne bɛwɔ nu daa nanu.

⁴ Bɔ ɔtɔ so nyɔ, Pɔɔlo hãne kyɛ sɔ Kristofoɛ bɔ né bɛte Hebrifoɛ ne, Bible nu dwirɛ bɔ né ɔte kyɛ “aleɛ bɔ nu yɛ no” ne, ne benguro kyɛ bekosũa. Nakoso, ɛhẽne yeɛ né ɔkɔboka bɛ maa bɛ gyidie kɔyɛ se ɔ. (Heb. 5:​11-14) Ɔnate ɛhẽne ati, benu biemɔ wɔ berɛ a, né beté di Mose mmraa naso. Pɔɔlo maa benwuni kyɛ afɔleɛ ahoroɛ bɔ né Mose mmraa ne kã yenwo dwirɛ kyɛ bɛ bɔ ne, wangora wanye bɔne wamvi berɛ. Ɔnate ɛhe ati né sɔ mmraa ne apɛ nu, anaa “batu bagua.” Ɛhẽne sĩ ne, Pɔɔlo maa benwuni edwirɛ bie bɔ yenwo hia paa ɔ. Yeɛ ole kyɛ, ɔmaa sɔ Kristofoɛ nemɔ tele yebo kyɛ, “anyelasoɛ bɔ ɔte paa” tra daa deɛ ne, yeɛ ole afɔleɛ bɔ Yesu bɔle ne, ofikyɛ ɛhẽne yeɛ né ɔkɔboka bɛ maa ‘bekopingye Nyameɛ ɔ.’—Heb. 7:​18, 19.

5. Hebrifoɛ nwomaa ne, enu dwirɛ beni yeɛ odikyɛ yɛte yebo ɔ, na nzuati ɔ?

⁵ Pɔɔlo maa aliemaamɔ bɔ bɛte Hebrifoɛ ne nwuni kyɛ, atẽe bɔ Kristofoɛ fa so sõ Yehowa ne, ɔte pá koraa tra atẽe bɔ Yudafoɛ nemɔ faso sõ ye ne. Pɔɔlo hyirehyirele nu hyirele bɛ kyɛ, atẽe bɔ Yudafoɛ nemɔ fa so sõ Yehowa ne, né ɔte “nningyein bɔ ɔba nemɔ wawoɛ, nakoso ye paapaa ne ole Kristo.” (Kol. 2:17) Sɛ bɛkã nikyeebie nwo wawoɛ a, ɔtte nikyee ne deinn, na mmom ɔboka wɔ maa enwu kyɛbɔ sɔ nikyee ne si te ɔ, kyɛ ebia ɔte piri, anaa ɔte kãa. Atẽe bɔ né Yudafoɛ nemɔ fa so sõ Nyameɛ ne, né ɔte wawoɛ mbaen. Yeti bekye yeɛ né Yehowa bamaa mmenia nwu atẽe pá bɔ ɔpena kyɛ bɛfa so bɛsõ ye ɔ. Ɛhẽne ati, nhyehyɛɛ bɔ Yehowa ayɛ kyɛbɔ ɔkɔyɛ a, yɛkɔhora yekonya bɔne fakyɛ ne, odikyɛ yɛte yebo yé, na wamaa yahora yasõ ye kyɛbɔ okuro ɔ. Yede, atẽe bɔ né Yudafoɛ nemɔ fa so sõ Yehowa (bɔ yeɛ ole wawoɛ ne), ɛmɔma yɛfa yɛtoto atẽe bɔ Kristofoɛ fa so sõ Yehowa (bɔ ɔte pá paa) nanwo, na yɛnea nzonzoneɛ bɔ ɔwɔ nu ɔ. Sɛ yɛyɛ sɔ a, edwirɛ bɔ ɔfa honhom nu asɔre awuro nanwo ne, yɛkɔte yebo yé, na yekonwu kyɛbɔ ɔkɔhora kɔboka yɛ ɔ. Bahyirehyire sɔ dwirɛ he anu wɔ Hebrifoɛ nwomaa nanu.

6. Sɛɛ yeɛ né bɛfa ɛtena sua ne bɛyɛ adwuma ɔ?

⁶ Atẽe bɔ né Yudafoɛ nemɔ faso sõ Yehowa ɔ. Pɔɔlo fale ye ngyirekyiremuɛ ne gyinane ɛtena sua bɔ Mose yɛle afoɛ 1512 K.Y.B (Kora Yeɛ Yesu  Ba) naso. (Nea alaka bɔ yenwa, “Atẽe Bɔ Né Yudafoɛ Nemɔ Faso Sõ Yehowa—Bɔ Okyire Ma Kristofoɛ Ɔ.”) Sɔ ɛtena sua ne, sɛ né Yisraelfoɛ nemɔ tu kɔ nekaa foforɛ a, né betutu bɛkɔ. Yisraelfoɛ nemɔ fale sɔ ɛtena sua ne yɛle adwuma kɔyɛ afoɛ 500 kora yeɛ besi Yerusalem asɔre awuro ne ɔ. (Ɛks. 25:​8, 9; Num. 9:22) Né Yisraelfoɛ nemɔ kɔ nekaa bɔ “ɛtena sua” ne wɔ ne bɛkɔsõ Nyameɛ, na ɛberɛ yeɛ né bɛbɔ afɔleɛ ahoroɛ ɔ. (Ɛks. 29:​43-46) Nakoso, sɔ ɛtena sua ne, né ogyi berɛ ma nikyee bie bɔ yenwo hia paa bɔ né ɔkɔhɔ so kyẽabie kɔma Kristofoɛ ɔ.

7. Mmerɛ beni yeɛ bɛfale honhom nu asɔre awuro ne besiele berɛ ɔ?

⁷ Bɔ okyire ma Kristofoɛ ɔ. Sɔ tete ɛtena sua ne, né ‘ɔte nyameɛso deɛ ne nwo wawoɛ,’ na ɔmaa yenwu kyɛbɔ Yehowa honhom nu asɔre awuro pirikua ne si te ɔ. Pɔɔlo hãne kyɛ sɔ ɛtena sua ne, ɔte “mvandoho ma ɛnɛ mmerɛ ye.” (Heb. 8:5; 9:9) Yeti, mmerɛ bɔ né Pɔɔlo tworɔ Hebrifoɛ nwomaa ne, né sɔ honhom nu asɔre awuro ne wɔ berɛ dada. Bɛfa besiele berɛ wɔ afoɛ 29 Y.B. (Yɛ Aberɛ So) Sɔ afoɛ ne yeɛ Yesu bɔle asu maa bɛfale honhom bɛpopale ye ɔ. Afei ɔhyɛle yebo sõne kyɛ Yehowa “sɔfo panyi paa” wɔ honhom nu asɔre awuro berɛ. c—Heb. 4:14; Aso. 10:​37, 38.

8-9. Kyɛbɔ Hebrifoɛ 7:​23-27 kã ne, nzonzoneɛ beni yeɛ ɔla Yisrael asɔfo mbanyi nemɔ, ɔne Sɔfo Panyi paa bɔ yeɛ ole Yesu Kristo ne, b’afĩa ɔ?

⁸ Atẽe bɔ né Yudafoɛ nemɔ faso sõ Yehowa ɔ. Sɔfo panyi ne yeɛ né odi Yisraelfoɛ nemɔ nyunu maa bɛsõ Nyameɛ ɔ. Mmerɛ bɔ Yisraelfoɛ nemɔ fale ɛtena sua ne bewurale Nyameɛ sa ne, Yehowa yele Aarɔn kyɛ sɔfo panyi mane bɛ. Nakoso, Pɔɔlo hyirehyirele nu kyɛ “né asɔfo nemɔ sone, ofikyɛ ewue amma bɛ ate amma bandoa b’adwuma so.” d (Kenga Hebrifoɛ 7:​23-27.) Asɔfo bɔ bɛte sɔ ne, ɔnate kyɛ né bɔne wɔ bɛnwo nati, né odikyɛ bɛbɔ afɔleɛ bɛma bɛnwo. Ɛhe maa yenwu nzonzoneɛ bɔ ɔla bɛbɔ né bɛsõ kyɛ sɔfo panyi wɔ Yisrael, ɔne Sɔfo Panyi paa bɔ yeɛ ole Yesu Kristo ne afĩa.

⁹ Bɔ okyire ma Kristofoɛ ɔ. Yɛ Sɔfo Panyi bɔ yeɛ ole Yesu Kristo ne, “odi ye sɔfo ne wɔ . . . ɛtena sua kaenn bɔ nna dasaniɛ, na mmom Awurade yeɛ osili ɔ nu.” (Heb. 8:​1, 2) Pɔɔlo hyirehyirele nu kyɛ, “ɔnate kyɛ Yesu te ase afebɔɔ ne ati, ye sɔfolilɛ dwumadie ne koso wɔ berɛ afebɔɔ.” Pɔɔlo sa fa bokale so kyɛ Yesu de, “mvomsoɛ anaa bɔne biala nne ye nwo, baye ye basie ahameɛ bafi bɔnefoɛ nu.” Afei koso, né Yesu tte kyɛ Yisrael asɔfo nemɔ, ofikyɛ “onhia kyɛ ɛlɛho biala odi moa bɔ ye bɔbɔ ye bɔne nwo afɔleɛ.” Yede, ɛmɔma yɛnea afɔleɛ bokyea bɔ né Yudafoɛ nemɔ bɔ afɔleɛ wɔ so, ɔne bɔ okyire ma Kristofoɛ ɔ.

10. Afɔleɛ bɔ né bɛbɔ ye wɔ afɔleɛ bokyẽa naso ne, né ɔte nzu nwo wawoɛ?

¹⁰ Atẽe bɔ né Yudafoɛ nemɔ faso sõ Yehowa ɔ. Wɔ ɛtena sua ne anoa ne nyunu ne, né bele afɔleɛ bokyea bɔ bɛfa ngaka bɛbɔ afɔleɛ wɔ so bɛma Yehowa ɔ. Sɔ afɔleɛ bokyea ne, né bafa kɔɔbere bafa yenwo mukoraati. (Ɛks. 27:​1, 2; 40:29) Nakoso, afɔleɛ ahoroɛ bɔ Yisraelfoɛ nemɔ bɔle ne, wangora wankyikyi bɛ bɔne mukoraati. (Heb. 10:​1-4) Bɔ ɔte yeɛ ole kyɛ, ngaka bɔ bɛhɔle so bɛfale bɛ bɛbɔle afɔleɛ ne, né ɔte afɔleɛ pá bɔ kyẽabie Yesu kɔbɔ nanwo wawoɛ. Sɔ afɔleɛ he de, ne ɔkɔhora kokyikyi bɔne bɔ ɔwɔ sona nwo ne koraa.

11. Afɔleɛ bokyea beni yeɛ Yesu fale yenwo bɔle afɔleɛ wɔ so ne? (Hebrifoɛ 10:​5-7, 10)

¹¹ Bɔ okyire ma Kristofoɛ ɔ. Né Yesu se kyɛ, Yehowa asoma ye awa aseɛ he aso kyɛ, ɔɔfa ye ngõa bɔ afɔleɛ ɔfa le mmenia mukoraati. (Mat. 20:28)  Yeti, mmerɛ bɔ Yesu bɔle asu ne, né ɔte kyɛbɔ wafa yenwo wama Yehowa kyɛ ɔkɔyɛ bɔ Yehowa kuro biala. (Yoh. 6:38; Gal. 1:4) Afɔleɛ bokyea bɔ Yesu fale yenwo bɔle afɔleɛ wɔ so ne, né ɔtte bɔ bafa bɛsa bayɛ ɔ, na mmom né ogyi berɛ ma Nyameɛ “apɛdeɛ” bɔ Yesu kɔyɛ ɔ. Ɛhẽne yeɛ ole kyɛ ɔkɔfa ye nipadua bɔ bɔne biala nne yenwo ne kɔbɔ afɔleɛ ɔ. Afɔleɛ bɔ Yesu bɔle ne, obukyele atẽe mane bɛbɔ bekonya yenu gyidie ne, kyɛbɔ ɔkɔyɛ a, ɔkɔfa ‘kɔte bɛnwo pɛnkõ’ kofi bɔne nwo ɔ. (Kenga Hebrifoɛ 10:​5-7, 10.) Yede, ɛtena sua ne bɔ né bakyekyɛ nu ne koso, né ogyi berɛ ma nzu? Ɛmɔma yɛnea.

12. Sua bɔ né bahyɛ nu nyɔ wɔ ɛtena sua nanu ne, nwamɔ ngome yeɛ né odikyɛ bɛkɔ nu ɔ?

¹² Atẽe bɔ né Yudafoɛ nemɔ faso sõ Yehowa ɔ. Kyɛbɔ né basiesie ɛtena sua nanu ne, sɔ ala yeɛ besiesiele asɔre awuro bɔ besili ye wɔ Yerusalem nanu ɔ. Sɛ ewura ɛtena sua nanu a, né sua bie wɔ berɛ bɔ bafa mbɛmuɛ ɛtena bahyɛ nu nyɔ ɔ. Sɔ ala yeɛ né asɔre awuro ne koso te ɔ. Ne bɛfrɛ kõ “Nekaa Krongron,” na né bɛfrɛ kõ koso “Krongron nu Krongron.” (Heb. 9:​2-5; Ɛks. 26:​31-33) Sɛ ɛkɔ Nekaa Krongron berɛ a, nningyein bɔ ekonwu ye wɔ berɛ ne bie yeɛ ole esikaa kɔkorɛ kanea bakaa, afɔleɛ bokyea bɔ bɛyera ɛyɛɛ wɔ so, ɔne ɛpoen bɔ bɛfa paanoo krongron begua so ɔ. Asɔfo bɔ né “bapopa bɛ ngoo” ne ngome yeɛ né odikyɛ bɛkɔ nekaa krongron berɛ bɛkɔyɛ bɛ adwuma ɔ. (Num. 3:​3, 7, 10) Nningyein bɔ né ɔwɔ Krongron nu Krongron berɛ yeɛ ole apam alaka bɔ né bafa esikaa kɔkorɛ bayɛ ɔ. Né ɛhẽne te adanzeɛ bɔ okyire kyɛ Yehowa wɔ asɔre awuro berɛ. (Ɛks. 25:​21, 22) Sɔfo Panyi ne ngome yeɛ né ɔkɔ krongron nu krongron berɛ afoɛ noa biala ɔkɔbɔ afɔleɛ Mbata Kyẽa ne ɔ. (Lew. 16:​2, 17)  Afoɛ noa biala, né Sɔfo Panyi ne kɔ berɛ komapɛ twe. Sɛ ɔkɔ berɛ a, né ɔfa kaka bɔ afɔleɛ ma yenwo, ɔne maen ne mukoraati. Sɔ nikyee bɔ né Sɔfo Panyi ne yɛ ye wɔ ɛtena sua nanu ne, mmerɛ bie sĩ ne, Yehowa nate ye honhom krongron naso maa yenwuni bɔ ogyi berɛ ma ɔ.—Heb. 9:​6-8. e

13. Nekaa Krongron, ɔne Krongron Nu Krongron bɔ né ɔwɔ ɛtena sua nanu ne, nzu yeɛ okyire ma Kristofoɛ ɔ?

¹³ Bɔ okyire ma Kristofoɛ ɔ. Mmenia bɔ bɛte Kristofoɛ ne, Yehowa afa ye honhom apopa benu kãa bie, na ɛhẽne amaa bɛne ye anya abusũabɔ sonongo bie. Sɔ mmenia bɔ Yehowa afa ye honhom apopa bɛ ne, bɛte 144,000, na bɛkɔboka Yesu so maa bɛne ye kɔsõ kyɛ asɔfo wɔ anwuro. (Nye. 1:6; 14:1) Nekaa Krongron bɔ né ɔwɔ ɛtena sua nanu ne, ogyi berɛ ma mmenia bɔ Nyameɛ afa ye honhom apopa bɛ maa baayɛ ye mmaamɔ, mmerɛ po bɔ beté wɔ aseɛ he aso ne. (Rom. 8:​15-17) Krongron Nu Krongron bɔ né ɔwɔ ɛtena sua nanu ne koso, ogyi berɛ ma anwuro, nekaa bɔ Yehowa te ne. Wɔ asɔre awuro nanu berɛ ne, né “mbɛmuɛ tena” ne kyɛ Nekaa Krongron, ɔne Krongron Nu Krongron nanu. Sɔ ala yeɛ mmerɛ bɔ né Yesu wɔ aseɛ so ne, ɔnate kyɛ né ɔte sona nati, né ɔngɔhora ngɔhɔ anwuro ngɔsõ kyɛ sɔfo panyi wɔ honhom nu asɔre awuro berɛ. Nakoso mmerɛ bɔ Yesu fale ye nipadua bɔle afɔleɛ ne, ɔmaa onyane yenwo atẽe kyɛ okosa kɔhɔ anwuro. Na ɛhẽne amaa Kristofoɛ bɔ bafa honhom bapopa bɛ ne, banya yenwo atẽe kyɛ bɛ koso bɛkɔhɔ anwuro. Nakoso, sɛ sɔ Kristofoɛ hemɔ kɔhora kɔhɔ anwuro a, sana bewu maa betingye bɛ kora. (Heb. 10:​19, 20; 1 Kor. 15:50) Mmerɛ bɔ betingyele Yesu ne, onyane yenwo atẽe wurale Krongron Nu Krongron bɔ ɔwɔ honhom nu asɔre awuro berɛ nanu. Ɛhe amaa bɛbɔ bafa honhom bapopa bɛ ne koso, bɛkɔhora bɛkɔɔboka Yesu so.

14. Kyɛbɔ Hebrifoɛ 9:​12, 24-26, kã ne, nhyehyɛɛ bɔ Yehowa ayɛ kyɛbɔ ɔkɔyɛ a, yɛkɔhora yɛkɔsõ ye wɔ ye honhom nu asɔre awuro berɛ ne, nzuati yeɛ odi mũ paa ɔ?

¹⁴ Ɔbaadwu ɛwa ne, yanwu kyɛ Yehowa nate Yesu wue naso ayɛ nhyehyɛɛ kyɛbɔ ɔkɔyɛ a, yɛkɔhora yɛkɔsõ ye kyɛbɔ okuro ɔ. Afei koso, wafa Yesu Kristo wama yɛ kyɛ sɔfo panyi. Sɔ nhyehyɛɛ he bɔ Yehowa ayɛ ne, ɔte bɔ yenwo hia koraa tra bɔ né ɔkɔso wɔ Yudafoɛ sõen nu ne. Wɔ Yisraelfoɛ nemɔ aberɛ so ne, né sɔfo panyi ne kɔ Krongron Nu Krongron berɛ kɔfa kaka mogya bɔ afɔleɛ. Nakoso, Yesu de ɔhɔle “nyameɛso berɛ deinn,” nekaa bɔ Yehowa te bɔ ɛberɛ te krongron ne. Mmerɛ bɔ odwuli berɛ ne, ɔmaa Nyameɛ nwuni kyɛ, “wafa ye bɔbɔ ye nwo wabɔ afɔleɛ wakyikyi bɔne.” (Kenga Hebrifoɛ 9:​12, 24-26.) Yesu nate sɔ afɔleɛ bɔ ɔbɔle naso wakyikyi yɛ bɔne koraa. Sɛ yɛnye la so kyɛ yɛkɔhɔ anwuro oo, sɛ yekoso yɛkɔtena aseɛ he aso oo, yɛ mukoraati yɛkɔhora yɛkɔsõ Yehowa wɔ honhom nu asɔre awuro berɛ. Yede ɛmɔma yɛnea kyɛbɔ yɛkɔhora yɛkɔyɛ sɔ ɔ.

15. Nwamɔ yeɛ né bɛyɛ adwuma wɔ ɛtena sua ne aluo berɛ ɔ?

¹⁵ Atẽe bɔ né Yudafoɛ nemɔ faso sõ Yehowa ɔ. Né ɛtena sua ne le nekaa pirikua bie bɔ bale yenwo ɔ, na né bɛfrɛ berɛ ɛtena sua ne aluo. Ɛberɛ yeɛ né asɔfo nemɔ yɛ b’adwuma ɔ. Nningyein bɔ né ɔwɔ ɛtena sua ne aluo berɛ yeɛ ole, afɔleɛ bokyea pirikua bɔ né bɛbɔ afɔleɛ wɔ so, ɔne kɔɔbere ayaa, bɔ ne bɛfa nzue begua nu ɔ. Nzue bɔ né ɔwɔ sɔ ayaa nanu ne, ɛhẽne yeɛ né asɔfo nemɔ fa nwunzi bɛnwo kora né baayɛ bɛ adwuma wɔ ɛtena sua nanu ɔ. (Ɛks. 30:​17-20; 40:​6-8) Asɔre awuro bɔ nziɛen besili ne koso, né ole nekaa pirikua bɔ bɛbɔ bɛtte asɔfo nemɔ kora gyina sõ Nyameɛ ɔ.

16. Nwamɔ yeɛ bɛsõ Yehowa wɔ honhom nu asɔre awuro ne kunu aluo berɛ ɔ, na nwamɔ koso yeɛ bɛsõ Yehowa wɔ aluo dɔ ɔ?

 ¹⁶ Bɔ okyire ma Kristofoɛ ɔ. Koraka Yesu aliemaamɔ bɔ bafa honhom bapopa bɛ ne kɔɔboka Yesu so wɔ anwuro maa bɛkɔsõ kyɛ asɔfo ne, odikyɛ bɛfa nahorɛlilɛ bɛsõ Yehowa wɔ honhom nu asɔre awuro ne kunu dɔ aluo berɛ wɔ aseɛ he aso. Ayaa pirikua bɔ né nzue wɔ nu ne koso, ɔkae Kristofoɛ bɔ bafa honhom bapopa bɛ ne kyɛ, odikyɛ bɛmaa b’abrabɔ ɔne bɛ sõen nwo te wɔ Yehowa nyunu. Sɔ ala yeɛ odikyɛ Kristofoɛ mukoraati koso yɛ ɔ. Yede, “ɛlɔen kandinga” bɔ bɛboka Kristo aliemaamɔ bɔ bafa honhom bapopa bɛ ne koso, nisua yeɛ bɛsõ Yehowa ɔ? Somafoɛ Yohane nwuni kyɛ bɛwɔ “Nyameɛ ahennie bia ne nyunu,” bɔ ogyi berɛ ma asɔre awuro ne aluo berɛ wɔ aseɛ he aso, “ná bɛsɔne ye alehyeleɛ ne alesaleɛ wɔ ye asɔneyɛɛ sua nu.” (Nye. 7:​9, 13-15) Odikyɛ yɛda Yehowa ase paa kyɛ wama yɛ atẽe kyɛ yɛ koso, yɛsõ ye wɔ ye honhom nu asɔre awuro pirikua nanu ɔ.

17. Afɔleɛ beni yeɛ yanya yenwo atẽe kyɛ yɛkɔbɔ yɛkɔma Yehowa ɔ?

¹⁷ Kristofoɛ bɔ bɛwɔ berɛ ɛnnɛ ne, benu biala le yenwo atẽe kyɛ ɔkɔfa ye mmerɛ, ye anwoserɛ, ɔne ye anwonyadeɛ kɔsõ Nyameɛ. Afutue bɔ somafoɛ Pɔɔlo famane Kristofoɛ bɔ né bɛte Hebrifoɛ ne, ɔkɔhora kɔboka yɛ koso. Ɔhãne kyɛ: “Ɛmɔma yɛ́fa ayɛyelɛ yɛyɛ afɔleɛ yɛfa Yesu so yɛma Nyameɛ, na ɛhe te yɛ noa afɔleɛ bɔ yɛfa yɛhyɛ ye dumaa animnyam ɔ.” (Heb. 13:15) Yehowa alo yɛ paa, ofikyɛ wamaa yanya yenwo atẽe bɔ yɛkɔfa yɛkɔsõ ye ɔ. Yeti, odikyɛ yɛ koso yɛyɛ bɔ yɛkɔhora biala wɔ ye sõen nu.

18. Kyɛbɔ Hebrifoɛ 10:​22-25 kã ne, nningyein beni yeɛ odikyɛ yɛyere yɛnwo kyɛ yɛkɔyɛ ɔ, na nzu yeɛ ɔnzɛkyɛ yɛmaa yɛ wora fi ye llé ɔ?

¹⁸ Kenga Hebrifoɛ 10:​22-25. Mmerɛ bɔ né Pɔɔlo fa ye krataa bɔ ɔhworɔ ɔɔmane Hebrifoɛ nemɔ ba ayieleɛ ne, ɔmaa yenwuni nningyein biemɔ bɔ odikyɛ yɛyere yɛnwo kyɛ yɛkɔyɛ ye daa wɔ Yehowa sõen nu ɔ. Ebie yeɛ ole kyɛ, odikyɛ yɛbɔ Yehowa mbaeɛ daa, na yɛyere yɛnwo yɛyɛ asɛnga adwuma ne. Afei koso odikyɛ yɛbɔ mmɔden yɛkɔ asafo nhyiamu daa kyɛbɔ ɔkɔyɛ a, yɛne yeliemamɔ kɔhora kɔhyehyɛ yɛnwo ngunaen, ‘nganga kesaala ye bɔ yenwu ye kyɛ Yehowa Kyẽa ne apingye’ ne. Waha kãa maa Nyekyire nwomaa nanu dwirɛ ba ayieleɛ ne, Yehowa abɔfo bie hãne kyɛ: “Sɔne Nyameɛ!” Abɔfo ne sili sɔ dwirɛ naso pɛen nyɔ fa hyirele kyɛ ɔte edwirɛ bɔ yenwo hia paa. (Nye. 19:10; 22:9) Nningyein pá bɔ yasũa yafa Yehowa honhom nu asɔre awuro pirikua nanwo ne, nnɛmɔmaa yɛ wora fi ye llé. Afei koso, ɛmɔma yehyire kyɛ yɛnye sɔ yenwo atẽe bɔ yanya ye kyɛ yɛsõ Yehowa bɔ ɔte yɛ Nyameɛ bɔ ole tumi ne.