Sɛ yɛkenga Bible, ná yɛto yɛ boase yɛyɛ nhwehwɛmuɛ a, ɔkɔboka yɛ maa yɛkɔte bɔ yɛkenga nabo yé. Nakoso, ɔnzɛkyɛ yɛyɛ y’adwene kyɛ yɛpena nimdeɛ bie mbaen. Mmom, odikyɛ yɛyɛ Yehowa subaen ahoroɛ nanwo nhwehwɛmuɛ, kyɛbɔ ɔkɔyɛ a, yɛkɔhɔso yekonya ɔdɔ yɛkɔma ye ɔ. Yeti sɛ ɛkenga Bible a, odikyɛ ebisa wɔnwo kyɛ, ‘Edwirɛ bɔ makenga ye, nzu yeɛ ɔmaa menwu mefa Yehowa nwo ɔ?’

Afei koso, nikyee bɔ Yehowa ayɛ bɔ okyire kyɛ ɔte ɔdɔ, ɔse nworɛ, obua ndɛen turoloo, na ole tumi ne, sɛ yɛ́kenga Bible a, odikyɛ yɛbɔ mmɔden kyɛ yekonwu ye. Nakoso, nna ɛhẽne ngome yeɛ ɔte subaen bɔ Yehowa le ye ɔ. Yehowa le subaen foforɛ pẽe bɔ ɔyɛ nyemene bɔ yɛkɔhora yekosũa yenwo nikye ɔ. Yede, yɛkɔyɛ sɛɛ né yanwu sɔ subaen ahoroɛ nemɔ?

Nhoma a Yehowa Adansefo De Yɛ Nhwehwɛmu, bɔ ɔwɔ Twi nu ne, ɛkɔhora kɔfa kɔyɛ sɔ nhwehwɛmuɛ ne. Nea edwirɛti bɔ yeɛ ole “Yehowa Nyankopɔn” wɔ sɔ nwomaa nanu. Wɔ sɔ edwirɛti nabo ne, ekonwu edwirɛ bie bɔ yenwa “Yehowa Su.” Afei ekonwu nwomaa ahoroɛ biemɔ wɔ berɛ bɔ sɛ ɛkenga a, ɔkɔboka wɔ maa ekosũa Yehowa subaen foforɛ bɔ waha nanwo nikyee ɔ.