Edwirɛ Bɔ Ebiemɔ Bisa Ɔ
Ɛwenelɛ Waen bɔ ɔwale June 2020 ne, né adesũa bie wɔ nu bɔ ye dwirɛti ne nwa, “Wo Din Ho Ntew.” Sɛɛ yeɛ sɔ adesũa ne maa yenyane ndeaseɛ foforɛ yɛfale Yehowa dumaa, ɔne yenwo atẽe bɔ Yehowa le ye kyɛ odi tumi nanwo ɔ?
Wɔ sɔ Ɛwɛnelɛ Waen nanu ne, yenwuni kyɛ Yehowa dumaa bɔ yenwo kɔte ne, ɔte nikyee bɔ ɔfa mmenia, ɔne abɔfo mukoraati nwo. Yeti, Yehowa dumaa bɔ yenwo kɔte ne, nningyein nyɔ yeɛ ɔwɔ nu ɔ. Kõ yeɛ ole kyɛ, ebiala konwu kyɛ atẽe bɔ ɔfa so di tumi ne yeɛ ɔte pá ɔ. Afei bɔ ɔtɔ so nyɔ ne yeɛ ole nahorɛ bɔ sona koli kɔma Yehowa ne.
Nzuati yeɛ kesaalae de, yɛkã kyɛ Yehowa dumaa bɔ yenwo kɔte ne, yeɛ ɔte nikye bɔ yenwo hia paa ɔ? Nningyein nzã biemɔ ti yeɛ yɛkã sɔ ɔ.
Ofi mmerɛ bɔ Adam ne Hawa tele Yehowa so atũa wɔ Eden turo nanu ne, Satan ahɔso agua Yehowa dumaa nanwo fĩɛ wadwu ɛnnɛ
Bɔ olimoa, Satan guale Yehowa dumaa nanwo fĩɛ wɔ Eden turo nanu. Edwirɛ bɔ Satan bisale Hawa wɔ Eden turo nanu ne, ɔmaa Adam ne ɔye Hawa nyane adwene kyɛ Yehowa te ebie bɔ yetianu yɛse, ɔhyɛ mmenia so, na ɔndwene sona nwo. Edwirɛ bɔ né Yehowa ahãhyire Adam ne Hawa ne, Satan fale atẽe bie aso kakyili edwirɛ ne maa ɔɔyɛle tekyɛ Yehowa te ebie bɔ ɔngã nahorɛ ɔ. Ɔnate sɔ nikyee bɔ Satan yɛle nati, ɔsɛkyele Yehowa dumaa. Ɛhẽne ati yeɛ bɛɛfrɛle ye “Abɔnzam” bɔ okyire “ebie bɔ ɔsɛkye mmenia dumaa” anaa “ngondomboniɛ” ne. (Yoh. 8:44) Hawa tiele Abɔnzam, yeti ɔyɛle Nyameɛ so asoserɛ. Sɔ nikyee bɔ ɔyɛle ne kyire kyɛ né ɔmbena kyɛ owura Nyameɛ bo maa odi ye so. (Gye. 3:1-6) Ɔbaadwu ɛnnɛ mukoraati ne, Satan té pɛ ngondombo to Nyameɛ so, na ɔyɛ sɔ fa sɛkye Yehowa dumaa. Ɔnate ɛhe ati, mmeni pẽe tie Satan, na bɛmva Yehowa dwirɛ bɛnyɛ hwee. Nakoso, Yehowa dumaa krongron bɔ bagua yenwo fĩɛ ne, ɔha bɛbɔ bɛsõ ye ne paa. Ofikyɛ ɛhẽne yeɛ wamaa mmeni pẽe benwu amaneɛ ɛnnɛ ne.
Bɔ ɔtɔ so nyɔ, Yehowa kɔte ye dumaa nanwo, bɔ ebiala ngɔhora ngogua yenwo fĩɛ kõ ɔ. Ɛhe te nikyeebie bɔ yenwo hia Yehowa paa. Yehowa ahã kyɛ: “Me dumaa piri bɔ ɛmɔ agua yenwo fĩɛ ne, ngɔyɛ ye krongron.” (Hes. 36:23) Sɛ ɔyɛ sɔ a, ɔkɔboka abɔfo ne mmenia mukoraati. Yesu koso hãne nikyeebie bɔ yenwo hia paa bɔ odikyɛ mmenia bɔ bɛsõ Yehowa ne bɔ yenwo mbaeɛ ɔ. Ɔhãne kyɛ: “Wɔ dumaa nwo te.” (Mat. 6:9) Yehowa dumaa bɔ odikyɛ yɛhyɛ ye animnyam ne, yenwu yenwo dwirɛ pẽe wɔ Bible nanu. Enu bie ɛhe: “Ɛmɔfa animnyam bɔ ɔfata AWURADE dumaa ɔ, bɛma ye.” (1 Abe. 16:29; Edw. 96:8) “Ɛmɔfa ayɛyelɛ bɔ animnyam wɔ nu ɔ bɛma ye.” (Edw. 66:2) “Ngɔhyɛ wɔ dumaa animnyam afebɔɔ.” (Edw. 86:12) Mmerɛ bie, Yehowa dwudwo fili anwuro. Sɔ mmerɛ ne, né Yesu wɔ asɔre awuro berɛ wɔ Yerusalem. Yesu hãne kyɛ: “Baba, hyɛ wɔ dumaa animnyam.” Yehowa koso yele yenoa kyɛ: “Mahyɛ ye animnyam dada, na ngɔhyɛ ye animnyam biekũ.”—Yoh. 12:28. a
Bɔ ɔtɔ so nzã, bɔ Yehowa abɔ yetianu kyɛ ɔkɔyɛ ne, ɔfa ye dumaa nanwo. Yede yebisa kyɛ, nzɔhwɛ bɔ ɔpɛ yebo bɔ ɔkɔwa Kristo Afoɛ Apee Nnisoɛ ne ayieleɛ ne, sɛɛ yeɛ ɔkɔmaa Yehowa dumaa nanwo kɔte ɔ? Afei koso, Yehowa dumaa bɔ yenwo kɔte sɔ mmerɛ ne, sɛɛ yeɛ ɔkɔhã abɔfo, ɔne mmenia mukoraati ɔ? Sɛ yɛkɔhora yekonya sɔ dwirɛ hemɔ nwo mmuayɛɛ a, odikyɛ yɛkae nningyein nyɔ bɔ yalimoa yahã yenwo dwirɛ ne. Yeɛ ole nahorɛ bɔ sona koli kɔma Yehowa, ɔne yenwo atẽe bɔ Yehowa le ye kyɛ odi nikyee biala so tumi ne. Bɔ ɔte yeɛ ole kyɛ, sɛ afoɛ apee bɔ Yesu kɔfa koli hene ne ba ayieleɛ a, yenwo ngohia kyɛ mmenia yɛ nikyeebie fa kyire kyɛ bedi nahorɛ, ofikyɛ bengoyia ɔhaw biala. Bɔ yeti yeɛ ɔte sɔ yeɛ ole kyɛ, okodwu sɔ mmerɛ ne, né nzɔhwɛ bɔ ɔpɛ yebo ne awa ayieleɛ. Afei koso, mmenia bɔ banya daa ngõa ne, né bemukoraati bayɛ pɛ. Ebiekũ koso, okodwu sɔ mmerɛ ne, né ebiala anwu kyɛ Yehowa yeɛ ɔte ebie bɔ ole yenwo atẽe kyɛ odi nikyeebiala so ɔ. Sɛ ɛhẽne la ahãmeɛ a, sɔ mmerɛ ne, abɔfo bɔ bɛwɔ anwuro, ɔne mmenia bɔ bɛwɔ aseɛ he aso ne, bemukoraati bɛkɔhã bɛnwo bɛkɔbɔ nu kyɛ abusũa kõ, na bekonwu ye kyɛ Yehowa ngome yeɛ ɔfata kyɛ odi bɛ so ɔ. Yeti, ebiala ngodwɔso ngotia yenwo atẽe bɔ Yehowa le ye kyɛ odi tumi ne kõ. Nakoso, sɔ mmerɛ ne, aso Yehowa dumaa ne kɔhɔso kɔyɛ nikyeebie bɔ yenwo hia anaa?
Ɔwɔ nu, okodwu sɔ mmerɛ ne, né Yehowa dumaa nanwo ate, bɔ ebiala ngɔhora ngogua yenwo fĩɛ kõ ɔ. Nakoso, abɔfo bɔ bɛwɔ anwuro, ɔne mmenia bɔ bɛwɔ aseɛ he aso ne, bɛkɔhɔso bɛkɔbɔ Yehowa dumaa ne, na bɛkɔye ye ayɛ daa. Nzuati yeɛ yɛkã sɔ ɔ? Ofikyɛ Yehowa kɔhɔso kɔyɛ nningyein pẽe bɔ ɔyɛ nwanwa, bɔ ɔkɔmaa yɛnye kɔgye daa wɔ Paradise. Afei koso, sɛ afoɛ apee bɔ Yesu kɔfa koli hene ne ba ayieleɛ a, ɔkɔbrɛ yenwo ase kowura Yehowa bo, na ɔkɔkakyi ahennie ne kɔma ye. Afei, “Nyameɛ koli nningyein mukoraati so hene.” (1 Kor. 15:28) Ɛhẽne sĩ ne, mmenia bɔ bɛwɔ aseɛ he aso ne, “bɛkɔhɔ Nyameɛ mma fanwodie animnyam nanu,” na ɔkɔmaa bɛnye kɔgye paa. (Rom. 8:21) Ebiekũ koso, abɔfo bɔ bɛwɔ anwuro, ɔne mmenia bɔ bɛwɔ aseɛ he aso ne, bɛkɔhã bɛkɔbɔ nu kyɛ abusũa kõ, kyɛbɔ ahyɛaseɛ ne, né Yehowa pena kyɛ ɔyɛ ne.—Ɛfe. 1:10.
Yede, sɔ nikyee ne bɔ ɔkɔhɔso ne, nzu yeɛ ɔkɔhã abɔfo bɔ bɛwɔ anwuro, ɔne mmenia bɔ bɛwɔ aseɛ he aso ne maa bɛkɔyɛ ɔ? Ɔkɔhã bɛ maa bɛkɔye Yehowa dumaa krongron ne ayɛ. Dawide bɔ né ɔte dweintolɛniɛ ne hãne kyɛ: “Animnyam hã AWURADE . . . Ye animnyam dumaa ne, odikyɛ bɛye ye ayɛ daa.” (Edw. 72:18, 19) Nahorɛ dwirɛ yeɛ ole kyɛ, sɛ yɛkɔ ewiase foforɛ nanu a, yekonya nningyein pẽe bɔ yekogyina so yɛkɔye Yehowa ayɛ daa ɔ.
Bɔ ɔte yeɛ ole kyɛ, Yehowa dumaa ne maa yenwu kyɛbɔ osi te, ɔne kyɛbɔ osi dɔ yɛ ɔ. (1 Yoh. 4:8) Sɛ yɛkɔ ewiase foforɛ nanu a, daa biala yɛkɔkae kyɛ Yehowa dɔ yɛ nati yeɛ ɔbɔle yɛ, na ɔmaa Ɔwa Yesu wu mane yɛ ɔ. Afei koso, yekonwu kyɛ atẽe bɔ ɔfaso di yɛ so ne kyire kyɛ ɔdɔ yɛ. Bɔ ɔboka ɛhe aso biekũ yeɛ ole kyɛ, nningyein bɔ ɔkɔhɔso sɔ mmerɛ ne, ɔkɔmaa daa biala yekonwu kyɛ ɔdɔ bɔ Yehowa le ma yɛ ne, yebo mbɛ llé. Ɛhe mukoraati kɔmaa yekopingyé Yehowa kyɛ yɛ Baba, na yɛkɔye ye dumaa krongron ne ayɛ daa.—Edw. 73:28.
